Zɛnɛse 10
10
Nôa ǹônii-ni dísuui pîlaŋ-pere
(Kɔlɔnikɔ Maa-ŋuŋ 1:5-23)
1Nôa ǹônii láa ƃe kɛ̀ a, Sɛ̂ŋ, Aaŋ da Zafɛ dísuui pîlaŋ-pere ká ŋí. Ǹûai ŋí dí lônii-sinaa maa sɔlɔ ƃô ǹya-fɛɛi pôlu ma.
2Zafɛ ǹônii-sinaai ƃa. Gomɛ, Magɔɔ, Madai, Zavaŋ, Tuba, Misɛ da Tira. 3Gomɛ ǹônii-sinaai ƃa, Asikena, Lifa da Togama. 4Zavaŋ ǹônii-sinaai ƃa, Ilaisa, Sipîŋ, Kitiŋ da Lôo. 5Yúo koo-ma-ƃelai dí kùla ǹûai ŋí kponôi. Zafɛ ǹônii-sinaai ƃe kɛ̀ a ǹûai nyii-ŋai díkaa dílɔii-ŋuŋ-ŋai su a dísîi-woo tɛi-tɛi-ŋai, yɛ̂ɛ berei dísuu-ŋai da dílɔii-ŋuŋ-ŋai káa lai.
6Aaŋ ǹônii-sinaai ƃa, Kusi, Ize, Lebia da Keena. 7Kusi ǹônii-sinaai ƃa, Siƃa, Avila, Sabata, Laama da Sateka. Laama ǹônii-sinaai ƃa, Siƃa da Dedaŋ. 8Kusi ǹóŋ-surɔ̂ŋ láa ƃa, Nimɔrɔ, nyii kɛ̀ a ǹúui maa-ŋuŋ nyii wála-wala támaa è kɛ̀ ǹyêei ǹɔii sui. 9È kɛ̀ a gbâna pili-nuu kɛ́tɛ Yâwɛɛ ŋɛ́i. Mɛni ma da mò dîyɛɛi, “Tɔɔ Yâwɛɛ é í kɛ́ a loŋso kɛ́tɛ yɛ̂ɛ Nimɔrɔ.” 10Daa-lee-ŋai è kɛ̀ mɛi dîa ƃa, Beebɛ, Irɛ da Aka. Daa-lee-ŋai ŋí kélee díkɛ̀ Babelɔŋ lɔii sui. 11È kùla ǹɔii ŋí su é lí Asiria é Ninivɛ taa-leei, Liobɔ Iî taa-leei, da Kâla taa-leei-ŋai tɔ́ɔ naa, 12da Lesɛŋ taa-leei, nyii è dɔ̂ɔ Ninivɛ da Kâla taa-lee gɛ́tɛi loai.
13Ize è kɛ̀ a Ladia-ŋai dínâŋ da Anaŋ-ŋai, Lea-ŋai, Nafitu-ŋai, 14Patusi-ŋai, Kasu-ŋai, da Kulîi-ŋai, nyii-ŋai Felesia-ŋai dí kùla díkponôi.
15Keena è kɛ̀ a Sidɔŋ ǹâŋ, nyii kɛ̀ a ǹóŋ maa-ŋuŋ, ǹêɣe kɛ́ ƃô a Ita. 16Zɛbusi-ŋai, Amɔra-ŋai, Gɛgasi-ŋai, 17Iva-ŋai, Aki-ŋai, Sini-ŋai, 18Avada-ŋai, Zemari-ŋai da Ama-ŋai dí kùla máŋ Keena ŋɔsuui su. Naa pôlu ma Keena-ŋai dísuui è tàa-taa. 19Keena-ŋai dílɔii ŋɔsu-kɛtɛ è kùla Sidɔŋ nyii gáa Gera taa-leei ma perei, é seri Geza, Sodɔŋ, Gomora, Adama da Zeƃoliŋ, é seri Lasa. 20Aaŋ ǹônii-sinaai ká ŋí yɛ̂ɛ berei dísuui káa la da dísîi-woo-ŋai, é pɛ́lɛ dílɔii-ŋuŋ-ŋai dîa da dínûai.
21Zafɛ ǹîa-surɔ̂ŋ Sɛ̂ŋ nyii kɛ̀ a Ibulu-ŋai kélee dínâŋ, ǹyaa máŋ è nîa-pɛlɛɛ maa sɔlɔ ƃô. 22Sɛ̂ŋ ǹônii-sinaai ƃe kɛ̀ a, Elaŋ, Asuɔ, Apasa, Ludi da Araŋ. 23Araŋ ǹônii-sinaai ƃa Uzi, Ɔ̂ɔ, Getɛ da Mɛsi. 24Apasa è kɛ̀ a Sila ǹâŋ, Sila kɛ́ ƃô a Ibɛ ǹâŋ. 25Ibɛ è lônii-sinaa feerɛ maa sɔlɔ ƃô. Dɔnɔ láa ƃé kɛ̀ a Pelɛ, kpɛ́ni fêi, ŋɔtãi mâ ǹɔii ŋáa è kɛ̀ a gɔlɛɛ. Gbélii láa ƃé kɛ̀ a Zotaŋ. 26Zotaŋ è kɛ̀ a Amoda ǹâŋ, Silɛfi, Azamavɛ, Zera, 27Adoraŋ, Uzaa, Dikila, 28Oba, Abimaɛ, Siƃa, 29Ofiɛ, Avila da Zoba. Diai ŋí kélee díkɛ̀ a Zotaŋ nônii. 30Ǹɔii dí kɛ̀ zui ŋɔkôya è kùla Misa é lí Sifa-pere é seri ǹyée lɔii mâ vóloi kulâi-pere. 31Sɛ̂ŋ ǹônii-sinaai ká ŋí yɛ̂ɛ berei dísuui káa la, dísîi-woo-ŋai, dílɔii-ŋuŋ-ŋai da dínûai.
32Nôa ǹônii-sinaai dísuui ká ŋí yɛ̂ɛ berei dísuu pîlaŋ-pere káa la da dílɔii-ŋuŋ-ŋai. Ǹûai ŋí kponôi ƃé ǹúu suu-ŋai kélee dí kùla naa dí táa-taa ǹɔii su gwaa kélee ǹya-fɛɛi pôlu ma.
Одоогоор Сонгогдсон:
Zɛnɛse 10: KWB
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү