Башланув 25
25
Ибраимнинъ Кетурадан олгъан эвлятлары
1Ибраим даа бир кере эвленди, апайынынъ ады Кетура эди. 2О, Ибраимге Зимран, Ёкъшан, Медан, Мидьян, Ишбакъ ве Шуах адлы огълан балаларны тапты. 3Ёкъшаннынъ Шева ве Дедан адлы балалары олды. Деданнынъ огъуллары: Ашшурим, Летушим ве Леуммимдир. 4#1 Тар 1.32-33Мидьяннынъ огъуллары будыр: Эфа, Эфер, Ханокъ, Авида ве Элдаа. Олар эписи Кетуранынъ эвлятларыдыр.
5Ибраим бутюн олгъан барлыгъыны огълу Исхакъкъа берди. 6Джариелеринден олгъан огъулларына исе Ибраим, даа сагъ олгъанда, бахшышлар берип, оларны огълу Исхакътан четке, шаркъкъа, шаркъ топракъларына ёллады.
Ибраимнинъ олюми ве дефн этильмеси
7Эписи олып, Ибраим 175 йыл яшады. 8О, баягъы яшта олгъан къарт олып, яшайышкъа тойып кечинди ве баба-деделерине къошулды. 9Огъуллары Исхакъ ве Исмаил Ибраимни Мамренинъ къаршысында, Цохар огълунынъ хитли Эфроннынъ тарласындаки Макъпела къобасында дефн эттилер. 10#Баш 23.16-20Бу тарланы Ибраим Хетнинъ огъулларындан сатын алгъан эди. Анда Ибраим ве онынъ апайы Саре дефн этильгенлер. 11Ибраим кечинген сонъ, Алла онынъ огълу Исхакъны багъышлады. Исхакъ Беэр-Лахай-Рои янында яшай эди.
Исмаилнинъ эвлятлары
12Мына Ибраимнинъ огълу Исмаил (оны Ибраимге Саренинъ хызметчиси мысырлы Хагъар тапты) ве онынъ эвлятлары акъкъында ривает.
13Буюгинден башлап кичкенесине баргъандже, Исмаил огъулларынынъ адлары будыр: Невайот (Исмаилнинъ биринджи догъгъан огълу), Кедар, Адбеэл, Мивсам, 14Мишма, Дума, Масса, 15#1 Тар 1.29-31Хадад, Тема, Етур, Нафиш ве Кедма. 16Бу Исмаилнинъ огъуллары ве он эки халкъ башлыкъларынынъ адлары. Оларнынъ адлары койлерининъ ве къасабаларынынъ адлары олдылар.
17Исмаил эписи олып, 137 йыл яшады. Сонъ о кечинди ве баба-деделерине къошулды. 18#1 Пад 15.7Онынъ эвлятлары Ашшургъа тараф Мысыр огюнде олгъан Хавиладан башлап Шургъадже ерлештилер. Олар озь агъа-къардашларынен душманлыкъта яшай эдилер.
Исав ве Якъупнынъ догъувы
19Мына Ибраимнинъ огълу Исхакъ ве онынъ эвлятлары акъкъында ривает.
Ибраимнинъ Исхакъ адлы огълу олды. 20Исхакъ къыркъ яшында олгъанда, о, Паддан-Арамдан олгъан арамлы Бетуэлнинъ къызы Рефикъагъа эвленди. Рефикъа, арамлы Лаваннынъ къызкъардашы эди. 21Апайы бала тапып оламагъаны ичюн, Исхакъ РАББИге дува этти. РАББИ Исхакънынъ дувасыны эшитти, ве апайы Рефикъа юклю олды. 22Онынъ ичинде олгъан огъуллары талашып башладылар, ве Рефикъа: «Бу манъа не ичюн олды?» – деп тюшюнди ве барып, РАББИден сорады. 23#Сай 24.18; 2 Пад 8.14; 1 Тар 8.13; Рим 9.12РАББИ онъа бойле деди:
– Къурсагъынъда эки миллет бар. Ичинъден эки тюрлю халкъ пейда оладжакълар. Олардан бир халкъы башкъасындан кучьлюдже оладжакъ, ве кичкенесине буюги хызмет этеджек.
24Онъа догъмагъа вакъыт кельди. Мына, къурсагъында эгизлер эди. 25Биринджиси бутюн къырмызы ве юньлю урба киби чыкъты; онынъ адыны Исав къойдылар. 26Артындан, Исавнынъ табаныны къолунен тутып, къардашы чыкъты. Онъа Якъуп#25.26 Якъуп – къ. еуд. «якъов» сёзюнинъ айтылувы «акев» (табан) сёзюнинъ айтылувына ошай. деген ад къойдылар. Олар догъгъанда, Исхакъ алтмыш яшында эди.
Исав озюнинъ биринджилигини сата
27Балалар буюдилер. Исав уста авджы, тарла адамы олды. Якъуп исе чадырларда яшагъан юваш адам олды. 28Ав этини бегенип, Исхакъ Исавны севе эди. Рефикъа исе Якъупны севе эди.
29Бир кунь Якъуп аш пиширгенде, Исав тарладан болдурып-узюлип къайтты. 30Исав Якъупкъа:
– Манъа анавы къырмызыдан ашамагъа берчи, – деди. – Мен болдурдым.
(Бунынъ ичюн онъа Эдом#25.30 Эдом – къ. еуд. бу сёзнинъ айтылувы «адом» (къырмызы) сёзюнинъ айтылувына ошай. деген лагъап бердилер.)
31 #
Текр 21.17
Якъуп Исавгъа:
– Сен манъа биринджи догъгъан акъкъынъны сат, – деди.
32– Мен ачтан олерим, – деди Исав. – Биринджи догъгъанымнынъ акъкъындан манъа не файда?
33– Башта емин эт, – деди Якъуп.
Исав емин этти ве Якъупкъа биринджи догъгъанынынъ акъкъыны сатты. 34#Еуд 12.16Сонъ Якъуп Исавгъа отьмек ве берджимек шорбасыны берди. Исав ашап ичти ве сонъ турып кетти. Бойле этип, Исав биринджи догъгъанынынъ акъкъыны козь огюне биле алмады.
Одоогоор Сонгогдсон:
Башланув 25: CTB
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© Институт перевода Библии, 2016