1 Samuel 1
1
Dios yanem ga'me c'oĝot jañe'me Ana
1'Uo di'me noic jo'ne Ramá, 'naleua di'me Efraín, jo'ne 'lachaqa't gaa'me qajoĝona'a. Neta'ña ga'me jiyaĝaua jo'ne chiyoĝoguet di'me Suf, lenaĝat da'me Elcaná, jo'ne c'oĝot di'me Jeroham nataq'aen laual di'me Elihú, jo'ne c'oĝot di'me Tohu, c'oĝot di'me Suf, jo'ne mach'e chiyoĝoguet di'me Efraín. 2Elcaná uo'oe gaa'me loua': jañe'me onole qa'a lenaĝat da'me Ana, jañe'me laqaya qa'a lenaĝat da'me Peniná. Jañe'me Peniná qa'a uo'oe gaa'me c'oqo'te, qalaĝaja jañe'me Ana qaya'te c'oĝot ca'li. 3Yemeda gaa'me 'uoidi Elcaná ca'e nale ga'me 'lachaqa', dajoyi di'me Siló qa'a ua'a nale yauote lemaĝa'j nataq'aen yauote gaa'me lajaqaje'j, yate'm joñe'me Jaliaĝanec jo'ne napacalegue ena'uac. Nataq'aen uo'oe dos gaa'me c'oqo'te ñe'me tamenaĝaiqui lo'o jo'ne Elí, jodaa'me lenaqa'te Hofní nataq'aen Finees, jo'ne nach'e ena'ama tamenaĝaiqui lo'ol.
4Nale yovita da'me ya'uo lajaqajec ñe'me Elcaná, yanem ga'me lae jo'ne en loĝot jañe'me Peniná, nataq'aen yemeda gaa'me c'oqo'te. 5Qalaĝaja jañe'me Ana yanem joga'me etapega p'ajaye, qa'a yataqata noqopita, temaq'aen ñe'me Jaliaĝanec da'me ja yanem ga'me notolec. 6Jouaĝat da'me dojo', Peniná jo'ne lauteua jañe'me yataqata ja yaĝatac nataq'aen ye'uetac jañe'me, nach'e eta't da'me en totelegue, jouaĝat ñe'me Jaliaĝanec da'me ja yanem ga'me notolec.
7Yemeda gaa'me 'uoidi, nale dajotegue ga'me netamenaĝaiqui ñe'me Jaliaĝanec, Peniná nach'e eta't da'me ja yaĝatac. Qo'oche' ca'li Ana nach'e eta't da'me noyetac nataq'aen da'me ja deque'e. 8Qama'le eetac ñe'me Elcaná jo'ne loua:
«¿Toqoch'e da'me anoyetac? ¿Toqoch'e da'me am totelegue nataq'aen da'me ja aueque'e? ¿Qo'li qaya'te auen chiyaqayi da'me jayem 'uo, dite da'me jooga ta'le jalcote gaa'me ac'oqo'tepi?»
9'Uo ga'me ua'a ca'li ueteda'a di'me Siló, Ana ñejeguem da'me yem da'me deque'e. Ñe'me tamenaĝaiqui lo'o Elí ñichiñe ca'li, qoyoqo'ta ga'me qotayape'uo ga'me tamenaĝaiqui jo'ne 'lachaqa' ñe'me Jaliaĝanec. 10Ana noyetac ca'li, nataq'aen lichigui ga'me lauel, qama'le netamenot ca'li ñe'me Jaliaĝanec. 11Qama'le ya'uo da'me 'naĝataĝac:
«Am Jaliaĝanec jo'ne anapacalegue ena'uac: qom jetaque auec'aten da'me yachoĝodec, mach'e jayem adalemaĝajete, qama'le jayem anetouetac nataq'aen jayem auanem ga'me yalec, qama'le am janem qomle da'me nejiyaĝauayaĝac. Qama'le qom 'uo da'me dojo', ja ch'e qonojotec ga'me layoĝot, da'me jen yelo'teguet da'me auen ñeme.»
12Jañe'me Ana cop'a da'me netametapecot ñe'me Jaliaĝanec, qama'le Elí yec'aten da'me nedegaĝat. 13Qalaĝaja jañe'me queta da'me netametac, ja yejam ga'me 'laqatac maq joda'me ch'e dedatapelegue da'me nedegaĝat. Chane'eja Elí etapega taĝae, 14qama'le eetac:
«¿Jach'e ga'me ua'a qom yem da'me am taĝae? ¡Aĝañi na'me lataĝa!»
15'Yateguet jañe'me Ana:
«Ja naq'aeta, jaliaĝanec. Ja naq'aeta ta'le ñiyomigui ga'me lataĝa uotaĝa gamachaqaega qoniyomigui jo'ne chem, maq joda'me jalcote da'me yachoĝodec nataq'aen da'me ja'aĝatem da'me yelnataĝac jo'ne co'yaq ñe'me Jaliaĝanec. 16Ena'te auetapega jayem yauo jo'ne ja no'en, dite da'me ñetametac yema ga'me nolo' jouaĝat da'me ja jayem 'te matelegue nataq'aen 'uo da'me yachoĝodec.»
17'Yateguet ñe'me Elí:
«Jamo, oc, joda'me 'nemaĝac am ue'tajop. Ñe'me Nedios di'me Israel 'noota qom am yanem ga'me aviyaĝataque.»
18'Yateguet jañe'me:
«Yataqata jalcochiñe da'me yamaic.»
Qama'le jañe'me Ana 'viyelaĝague ga'me chiyoĝogue, male ua'a da'me deque'e nataq'aen ja yitaĝa ta'le totelegue. 19Nete' laqaya ca'li eque' da'me 'nalañi, qama'le yem da'me 'nonaĝachedigui ñe'me Jaliaĝanec, qama'le 'viyelaĝategue ga'me 'lachaqa't jo'ne Ramá. Yoĝo'yi da'me dojo' Elcaná leuaua jañe'me loua Ana, qama'le ñe'me Jaliaĝanec netouena ga'me netamenaĝac ca'li jañe'me. 20Ua'a ca'li jañe'me Ana male qo'uaĝae, qama'le yovita ga'me laloqo' da'me 'niyiñe ga'me c'oĝot, qama'le en lenaĝat da'me Samuel, jouaĝat da'me dajelaĝanot ñe'me Jaliaĝanec.#1:20 Samuel: hebreo le'ec 'laqatac jo'ne yelo'teguet da'me Lenaĝat mach'e Dios, qalaĝaja ena'am da'me lajamaĝa ga'me 'laqatac laqaya jo'ne yelo'teguet jajelaĝan.
21Yitaĝa ec ñe'me Elcaná nataq'aen gaa'me c'oqo'tepi dajoyi di'me Siló qaedi yepaquichigui ga'me joote 'naĝataĝac ca'li, da'me ya'uo ga'me lajaqajec. 22Qalaĝaja jañe'me Ana ja ec, qa'a eetac ca'li dojapegue' ñe'me loua:
«Da'me jayem qa'a ja jec chayovida'a qom yaĝañi da'me lanogaĝac jena'me notolec. Yem qama'le jedo'ogue qaedi janem ñe'me Jaliaĝanec, qama'le ja yitaĝa ca'e joñe'me.»
23Qama'le Elcaná 'yateguet:
«Aua'uo joga'me auetapega, 'noota ta'le aua'uo. Oue'tena chayovida'a qom auen yaĝañi da'me lanogaĝac. Qama'le 'noota qom ñe'me Jaliaĝanec en yepaquichigui ga'me 'laqatac.»
Qama'le jañe'me ja ec maq joda'me netela ñe'me c'oĝot chayovida'a da'me yaĝañi da'me lanogaĝac. 24Yem da'me dojo' qaale maliaĝa jaqayi joñe'me, qama'le Ana yedo'ogue ga'me 'lemec ñe'me Jaliaĝanec jo'ne na'ña di'me Siló. Nataq'aen yachi ga'me uaca c'oĝot, veinte kilos ga'me trigo lojoche nataq'aen ga'me lataĝa. 25Qama'le Ana choqoñe'me Elcaná e'n lajaqaje'j ga'me uaca c'oĝot nataq'aen yauedeuo ñe'me notolec yate'm ñe'me Elí. 26Qama'le eetac jañe'me Ana:
«Jayem avichoĝoden, am jaliaĝanec, qalaĝaja da'me yataqata eja ena'am joda'me ouetaue mach'e jayem ca'li joueta'ñena da'me ñetametac, am qoyoqo'ta ca'li. 27Ñachoĝodenot ca'li ñe'me Jaliaĝanec qaedi jayem yanem jena'me jenjo' yalec, qama'le jayem yanem. 28Qama'le da'me jayem, janem ñe'me Jaliaĝanec, qom cha'li uetalegue jena'me aleua nach'e eta't da'me t'onataĝaneuo'o joñe'me.»
Qama'le Elí yataqata yeda'aguet jena'me aleua da'me naĝañi, qama'le 'nonaĝachigui ñe'me Jaliaĝanec.
Одоогоор Сонгогдсон:
1 Samuel 1: TDO
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Biblia en Toba del Oeste © Sociedad Bíblica Argentina, 2014, 2019.