လံာ်ယိၤဟၣ် 4
4
ယ့ၣ်ၡူးဒီးပှၤၡၤမရံမုၣ်
1ဖဲယ့ၣ်ၡူးသ့ၣ်ညါလၢပှၤဖၤရံၤၡဲတဖၣ်နၢ်ဟူလၢ အဝဲမၤန့ၢ်ဒီးဘျၢဘၣ်အပျဲၢ်အဘီၣ်တဖၣ်အါန့ၢ်စီၤယိၤဟၣ်န့ၣ်, 2(အနီၢ်နီၢ်န့ၣ် ယ့ၣ်ၡူးအကစၢ်ဒၣ်ဝဲတဘျၢပှၤလၢထံနီတဂၤဘၣ်, မ့ၢ်ဒၣ်အပျဲၢ်အဘီၣ်တဖၣ်ဘျၢတၢ်လီၤ.) 3အဝဲဟးထီၣ်လၢကီၢ်ယူဒၤဒီး လဲၤဝဲဆူကီၢ်ကၤလံၤ လါလီၤ. 4အဝဲဘၣ်လဲၤခီဖျိကီၢ်ၡၤမရံန့ၣ်လီၤ.
5လဲၤတုၤဝဲလၢဝ့ၢ်စံဃၢ်, အိၣ်လၢကီၢ်ၡၤမရံအပူၤ, ဘူးဒီးဟီၣ်ခိၣ်အကဝီၤလၢစီၤယၤကိာ်ဟ့ၣ်လီၤအဖိခွါ စီၤယိၤသးန့ၣ်လီၤ. 6စီၤယၤကိာ်အထံပူၤအိၣ်ဝဲဖဲန့ၣ်ဒီးမ့ၢ်လၢယ့ၣ်ၡူးလဲၤ တၢ်ဒီးလီၤဘှံးလီၤတီၤအဃိဆ့ၣ်နီၤဝဲဖဲထံပူၤအဃၢၤ လီၤ. ဒီးအဆၢကတီၢ်ကဘၣ်ဖဲမုၢ်ထူၣ်ဃၣ်ဃၣ်လီၤ.
7ပှၤၡၤမရံမုၣ်တဂၤဟဲဒၢၣ်ထံဒီးယ့ၣ်ၡူးစံးဘၣ် အီၤ, “ဟ့ၣ်ဒုးအီယၤလၢထံတက့ၢ်.” 8(အပျဲၢ်အဘီၣ်လဲၤပှ့ၤတၢ်အီၣ်တၢ်အီလၢဝ့ၢ်ပူၤန့ၣ်လီၤ.)
9ဒီးပိာ်မုၣ်န့ၣ်စံးဆၢအီၤ, “နဲနမ့ၢ်ပှၤယူဒၤဖိဒီးယဲယမ့ၢ် ပှၤၡၤမရံဖိ, နဃ့အီယၤလၢထံကသ့ဒ်လဲၣ်. (အဝဲစံးတၢ်အံၤမ့ၢ်လၢပှၤယူဒၤဖိတဖၣ်တသူလီခီ လၢပှၤၡၤမရံဖိတဖၣ်သူဝဲန့ၣ်ဘၣ်အဃိလီၤ.)
10ယ့ၣ်ၡူးစံးဆၢတၢ်ဒီးစံးဘၣ်အီၤ, “နမ့ၢ်သ့ၣ်ညါတ့ၢ်ကစၢ်ယွၤ အတၢ်ဟ့ၣ်ဒီးပှၤလၢအဃ့အီနၤလၢထံတဂၤမ့ၢ်မတၤလဲၣ်န့ၣ်, နကဃ့တၢ်လၢအီၤဒီးအဝဲကဟ့ၣ်နၤထံလၢအဟ့ၣ် တၢ်မူန့ၣ်လီၤ.
11ပိာ်မုၣ်စံးဘၣ်အီၤ, “ကစၢ်ဧၢ, နထံစဲၤတအိၣ်ဘၣ်ဒီးထံပူၤ တခီယိာ်မးလီၤ. နကလဲၤမၤန့ၢ်ထံလၢအဟ့ၣ်တၢ်မူန့ၣ်ဖဲလဲၣ်. 12ပပၢ်စီၤယၤကိာ်ဟ့ၣ်လီၤပှၤလၢထံပူၤအံၤလီၤ. အဝဲဒီးအဖိ တဖၣ်, ဒီးအဆၣ်ဖိကီၢ်ဖိတဖၣ်အီထံလၢထံပူၤအံၤလီၤ. မ့ၢ်နစံးလီၤနသးလၢနဒိၣ်န့ၢ်ဒံးစီၤယၤကိာ်တက့ၢ်န့ၣ်ဧါ.”
13ယ့ၣ်ၡူးစံးဆၢတၢ်ဒီးစံးဘၣ်အီၤ, “ပှၤတဂၤလၢ်လၢ်လၢ အအီထံအံၤ, တၢ်ကသူကဒီးအသးလၢထံန့ၣ်လီၤ. 14မ့မ့ၢ်ပှၤတဂၤလၢ်လၢ်လၢအအီထံလၢယကဟ့ၣ်အီအီၤန့ၣ်, အသးတသူထံနီတဘျီလၢၤဘၣ်. ထံလၢယကဟ့ၣ်အီၤန့ၣ်, ကကဲထီၣ်ထံထီၣ်ပၢၢ်လၢအပူၤလၢကဟ့ၣ်ထီၣ်တၢ်မူ အထံဒီးတၢ်မူအထူအယိာ်န့ၣ်လီၤ.”
15ပိာ်မုၣ်န့ၣ်စံးဘၣ်အီၤ, “ကစၢ်ဧၢ, ဟ့ၣ်ယၤထံအဝဲန့ၣ်ဒ်သိး ယသးသုတသူထံလၢၤတဂ့ၤ, ဒီးဒ်သိးယသုတဟဲဒၢၣ်ဘၣ်လၢၤထံဖဲအံၤတဂ့ၤန့ၣ်တက့ၢ်.”
16ယ့ၣ်ၡူးစံးဘၣ်အီၤ, “က့ၤဒီးကိးန့ၢ်နဝၤဒီးဟဲကိးအီၤဖဲအံၤ တက့ၢ်.”
17ပိာ်မုၣ်န့ၣ်စံးဆၢအီၤ, “ယဝၤတအိၣ်ဘၣ်.” ယ့ၣ်ၡူးစံးဘၣ်အီၤ,
“နစံးလၢနဝၤတအိၣ်ဘၣ်န့ၣ်ဘၣ်ကစီဒီလီၤ. 18နဝၤအိၣ်တ့ၢ်လံယဲၢ်ဆီလံဒီးပိာ်ခွါလၢနအိၣ်ဒီးအီၤခဲအံၤတဂၤ န့ၣ်တမ့ၢ်နဝၤဘၣ်. နတဲဘၣ်တ့ၢ်ယၤတၢ်မ့ၢ်တၢ်တီလီၤ.”
19ပိာ်မုၣ်န့ၣ်စံးဝဲ, “ကစၢ်ဧၢ, ယထံၣ်လၢနမ့ၢ်ဝံတဂၤန့ၣ်လီၤ.
20ပဝဲပှၤၡၤမရံဖိပမိၢ်ပၢ်ဖံဖုလၢပျၢၤတဖၣ်ဘူၣ်ထီၣ်ဘါထီၣ် ကစၢ်ယွၤဖဲကစၢၢ်အံၤအလိၤ, မ့မ့ၢ်သုဝဲပှၤယူဒၤဖိတဖၣ် သုစံးလၢပကြၢးဘူၣ်ထီၣ်ဘါထီၣ်ကစၢ်ယွၤလၢဝ့ၢ်ယရူၤၡလ့ၣ် အပူၤန့ၣ်လီၤ.”
21ယ့ၣ်ၡူးစံးဘၣ်အီၤ, “နာ်ယၤတက့ၢ်ပိာ်မုၣ်ဧၢ, တၢ်ဆၢကတီၢ် ကတုၤဝဲဖဲပှၤတဘူၣ်ထီၣ်ဘါထီၣ်ဘၣ်ပၢ်ယွၤလၢကစၢၢ်အံၤ အလိၤမ့ၢ်ဂ့ၤ, လၢဝ့ၢ်ယရူၤၡလ့ၣ်အပူၤမ့ၢ်ဂ့ၤန့ၣ်လၢၤဘၣ်. 22သုဝဲပှၤၡၤမရံဖိတဖၣ်သုဘူၣ်ထီၣ်ဘါထီၣ်မတၤလဲၣ်န့ၣ်သု တသ့ၣ်ညါဘၣ်. မ့မ့ၢ်ပဝဲပှၤယူဒၤဖိတဖၣ်ပသ့ၣ်ညါပှၤလၢ ပဘူၣ်ထီၣ်ဘါထီၣ်အီၤ, မ့ၢ်လၢတၢ်အုၣ်က့ၤခီၣ်က့ၤန့ၣ်ဟဲထီၣ် လၢပှၤယူဒၤဖိတဖၣ်အအိၣ်အဃိန့ၣ်လီၤ. 23မ့မ့ၢ်အဆၢကတီၢ်နၣ်ရံၣ်ကဘၣ်ဝဲ, ဒီးဘၣ်ခဲကနံၣ်အံၤဒၣ် လဲာ်ဖဲပှၤလၢအဘူၣ်ထီၣ်ဘါထီၣ်တၢ်နီၢ်နီၢ်တဖၣ် ကဘူၣ်ထီၣ်ဘါထီၣ်ပၢ်ယွၤလၢသူၣ်လၢသးဒီးလၢတၢ်မ့ၢ် တၢ်တီလီၤ. အဂ့ၢ်ဒ်အံၤ, ပၢ်ယွၤအဲၣ်ဒိးပှၤလၢအဘူၣ်ထီၣ်ဘါထီၣ်အီၤဒ်န့ၣ်အသိး တဖၣ်လီၤ. 24ကစၢ်ယွၤမ့ၢ်သူၣ်မ့ၢ်သးဒီးပှၤလၢအဘူၣ်ထီၣ်ဘါထီၣ်အီၤ တဖၣ်, ဘၣ်ဘူၣ်ထီၣ်ဘါထီၣ်အီၤလၢသူၣ်လၢသး ဒီးလၢတၢ်မ့ၢ်တၢ်တီလီၤ.”
25ပိာ်မုၣ်န့ၣ်စံးဘၣ်အီၤ, “ယသ့ၣ်ညါလၢမ့းၡံအၤ, လၢအမ့ၢ်ခရံာ်န့ၣ်ကဟဲဝဲ, ဒီးတုၤအဟဲဝဲဒီးကစံးဘၣ်တဲဘၣ် ပှၤလၢတၢ်ခဲလၢာ်န့ၣ်လီၤ.”
26ယ့ၣ်ၡူးစံးဆၢအီၤ, “ယၤ, ပှၤလၢအကတိၤတၢ်ဒီးနၤခဲအံၤန့ၣ်, မ့ၢ်ပှၤအဝဲန့ၣ်လီၤ.”
27အကတီၢ်ဖဲန့ၣ်ယ့ၣ်ၡူးအပျဲၢ်အဘီၣ်တဖၣ်ဟဲက့ၤတုၤဝဲ ဒီးကမၢကမၣ်ဝဲဒိၣ်မးလၢအထံၣ်ဘၣ်ယ့ၣ်ၡူးကတိၤတၢ်ဒီး ပိာ်မုၣ်န့ၣ်အဃိလီၤ. ဘၣ်ဆၣ်ဒီးအဝဲသ့ၣ်တသံကွၢ်ဝဲ, “နအဲၣ်ဒိးတၢ်မနုၤလၢအအိၣ်လဲၣ်” မ့တမ့ၢ် “နကတိၤတၢ်ဒီးအီၤဘၣ်မနုၤလဲၣ်” န့ၣ်နီတဂၤဘၣ်.
28အန့ၣ်ဒီး, ပိာ်မုၣ်ပာ်တ့ၢ်အသပၢၤထံဒီးက့ၤက့ၤဝဲဆူဝ့ၢ်ပူၤ ဒီးစံးဘၣ်ပှၤဂီၢ်မုၢ်, 29“ဟဲဒီးကွၢ်ပှၤတဂၤလၢအစံးဘၣ်တဲဘၣ်ယၤတၢ်ခဲလၢာ်လၢ ယမၤတ့ၢ်လံန့ၣ်တက့ၢ်. မ့ၢ်ကမ့ၢ်ခရံာ်န့ၣ်ဧါ.” 30မၤသးဒ်န့ၣ်ဒီး, အဝဲသ့ၣ်ဟးထီၣ်လၢဝ့ၢ်ပူၤဒီးလဲၤဆူယ့ၣ်ၡူး အအိၣ်လီၤ.
31အကတီၢ်ဖဲန့ၣ်, အပျဲၢ်အဘီၣ်တဖၣ်ဃ့ကညးယ့ၣ်ၡူးဒီးစံး, “သရၣ်ဧၢ, အီၣ်တၢ်တက့ၢ်.”
32ဘၣ်ဆၣ်အဝဲဒၣ်စံးဆၢဝဲ, “ယအိၣ်ဒီးတၢ်အီၣ်လၢယကအီၣ်အီၤလၢ သုတသ့ၣ်ညါဘၣ်န့ၣ်လီၤ.”
33မၤသးဒ်န့ၣ်ဒီးအပျဲၢ်အဘီၣ်တဖၣ်သံကွၢ်လိာ်အသးတဂၤဒီး တဂၤ, “မ့ၢ်ပှၤဟဲစိာ်န့ၢ်အီၤတၢ်အီၣ်တဂၤဂၤလံဧါ.”
34ယ့ၣ်ၡူးစံးဘၣ်အဝဲသ့ၣ်, “ယတၢ်အီၣ်န့ၣ်မ့ၢ်ယကမၤပှၤလၢ အမၢလီၤယၤတဂၤအတၢ်ဘၣ်အသးဒီးမၤအီၤတုၤအဝံၤ တစုန့ၣ်လီၤ. 35သုညီနုၢ်စံး, ‘ဆူညါလွံၢ်လါဒီး ကူးဘုအကတီၢ်ကဘၣ်ဝဲလီၤ.’ ဘၣ်ဆၣ် ယစံးဘၣ်သု, ကွၢ်စံာ်ပျီတဖၣ်လီၤတံၢ်လီၤဆဲးတက့ၢ်. ဘုဂီၤထီၣ်လံဒီးတၢ်ကူးအီၤအကတီၢ်ဘၣ်လံ. 36ပှၤလၢအကူးဘုတဂၤန့ၣ်, န့ၢ်ဘၣ်တၢ်အဘူးအလဲဒီးပာ်ဖှိၣ်တၤသူတၤသၣ်တဖၣ် လၢတၢ်မူအထူအယိာ်အဂီၢ်, ဒ်သိးပှၤလၢအဖှံတၢ်ဒီးပှၤလၢအကူးက့ၤတၢ်ခံဂၤလၢာ် ကသးခုသကိးဝဲအဂီၢ်လီၤ. 37တၢ်ကတိၤအမ့ၢ်အတီတထံၣ်စံးဝဲဒၣ်, ‘ပှၤဖှံတၢ်မ့ၢ်တဂၤ, ဒီးပှၤအဂၤတဂၤကူးက့ၤတၢ်န့ၣ်လီၤ.’ 38ယမၢလီၤသုလၢသုကလဲၤကူးဘုလၢစံာ်လီၢ်တလီၢ် လၢသုတမၤတ့ၢ်တၢ်လၢအပူၤနီတဘျီဘၣ်န့ၣ်လီၤ. ပှၤအဂၤတဖၣ်မၤတ့ၢ်တၢ်ဖဲန့ၣ်, ဒီးသုဘၣ်ဘျုးလၢအဝဲသ့ၣ်အတၢ်မၤအဃိလီၤ.”
39ပှၤၡၤမရံဖိအါဂၤလၢဝ့ၢ်ပူၤစူၢ်က့ၤနာ်က့ၤယ့ၣ်ၡူးမ့ၢ်လၢပိာ်မုၣ် န့ၣ်အုၣ်အသးဒီးစံးဝဲ, “အဝဲစံးဘၣ်တဲဘၣ်ယၤတၢ်ခဲလၢာ်လၢ ယမၤတ့ၢ်လံ” အဃိန့ၣ်လီၤ. 40သတးဒီး, ဖဲပှၤၡၤမရံဖိတဖၣ်ဟဲတုၤလၢအအိၣ်န့ၣ်, ဃ့ကညးအီၤလၢအကအိၣ်ဒီးအဝဲသ့ၣ်ဒီးယ့ၣ်ၡူးအိၣ်ဖဲန့ၣ်ခံသီလီၤ.
41ဒီးမ့ၢ်လၢယ့ၣ်ၡူးအတၢ်စံးတၢ်ကတိၤအဃိဒီး, ပှၤစူၢ်က့ၤနာ်က့ၤတၢ်အါထီၣ်အါဂၤန့ၣ်လီၤ. 42ဒီးအဝဲသ့ၣ်စံးဘၣ်ပိာ်မုၣ်န့ၣ်, “ပစူၢ်က့ၤနာ်က့ၤတၢ်ခဲအံၤ တမ့ၢ်လၢၤလၢနတၢ်ကတိၤတဖၣ်အဃိဘၣ်. မ့မ့ၢ်, မ့ၢ်လၢ ပနၢ်ဟူအတၢ်စံးတၢ်ကတိၤလၢပကစၢ်ဒၣ်ဝဲအဃိဒီးပသ့ၣ်ညါ လၢအဝဲမ့ၢ်နီၢ်နီၢ်ပှၤလၢအအုၣ်က့ၤခီၣ်က့ၤပှၤဟီၣ်ခိၣ်ဖိန့ၣ်လီၤ.”
ယ့ၣ်ၡူးမၤဘျါက့ၤပဒိၣ်တဂၤအဖိခွါ
43ယ့ၣ်ၡူးအိၣ်ဖဲန့ၣ်ခံသီဝံၤအလီၢ်ခံ, အဝဲဟးထီၣ်ဒီးလဲၤဝဲဆူကီၢ်ကၤလံၤလါန့ၣ်လီၤ. 44အဂ့ၢ်ဒ်အံၤ, အကစၢ်ဒၣ်ဝဲစံးတ့ၢ်ဝဲ, “တၢ်လၢဝံန့ၣ် လၢအထံအကီၢ်ဒၣ်ဝဲအပူၤပှၤတယူးယီၣ်ပာ်ကဲအီၤဘၣ်.” 45ဖဲအဝဲလဲၤတုၤဝဲလၢကီၢ်ကၤလံၤလါန့ၣ်, ပှၤဖဲန့ၣ်တဖၣ်တူၢ်လိာ်ခီၣ်ဆၢအီၤဂ့ၤမးမ့ၢ်လၢ အဝဲသ့ၣ်လဲၤတ့ၢ်လံဆူဘူၣ်လဲၤကပာ်လၢဝ့ၢ်ယရူၤၡလ့ၣ် ဒီးထံၣ်ဘၣ်လံတၢ်ခဲလၢာ်လၢအဝဲမၤတ့ၢ်ဝဲဖဲဘူၣ် အကတီၢ်န့ၣ်အဃိလီၤ.
46အန့ၣ်ဝံၤ, ယ့ၣ်ၡူးက့ၤကဒါက့ၤဆူဝ့ၢ်ကၤနါလၢကီၢ်ကၤလံၤလါ အပူၤ, တၢ်လီၢ်ဖဲတဘျီအဝဲမၤကဲထီၣ်ထံလၢစပံးထံန့ၣ်လီၤ. လၢဝ့ၢ်ကပ့းရနီၣ်န့ၣ်ပဒိၣ်အိၣ်ဝဲတဂၤလၢအဖိခွါဆိးက့ဝဲန့ၣ်လီၤ. 47အဝဲဒၣ်နၢ်ဟူလၢယ့ၣ်ၡူးဟဲလၢကီၢ်ယူဒၤဆူကီၢ်ကၤလံၤလါ သတးဒီး, လဲၤဝဲဆူအအိၣ်ဒီးဃ့ကညးအီၤဒ်သိးအကလဲၤ ဆူဝ့ၢ်ကပ့းရနီၣ်ဒီးမၤဘျါက့ၤအဖိခွါလၢဘူးအကသံတ့ၢ် တဂၤန့ၣ်လီၤ. 48ယ့ၣ်ၡူးစံးဘၣ်အီၤ, “သုမ့ၢ်တထံၣ်ဘၣ်တၢ်လီၤလိၢ်လီၤလးဒီးတၢ်ပနီၣ်လီၤလး တဖၣ်ဘၣ်န့ၣ်, သုတစူၢ်က့ၤနာ်က့ၤတၢ်နီတဂၤဘၣ်.”
49ဒီးပဒိၣ်န့ၣ်စံးဆၢအီၤ, “ကစၢ်ဧၢ, ဟဲဒီးယၤခဲအံၤတချုးလၢယဖိသံဒံးဘၣ်န့ၣ်တက့ၢ်.”
50ယ့ၣ်ၡူးစံးဘၣ်အီၤ, “က့ၤက့ၤတက့ၢ်. နဖိခွါန့ၣ်ကမူကစီဒီလီၤ.”
ပှၤတဂၤန့ၣ်နာ်ယ့ၣ်ၡူးအတၢ်ကတိၤတဖၣ်ဒီးက့ၤက့ၤဝဲလီၤ. 51ဖဲအက့ၤဝဲအဖၢမုၢ်န့ၣ်, အခ့အပှၤတဖၣ်ဟဲသဂၢၢ်အီၤဒီး စံးဘၣ်အီၤ, “နဖိခွါမူဝဲကစီဒီလီၤ.”
52အဝဲသံကွၢ်ပှၤသ့ၣ်တဖၣ်လၢအဖိခွါအိၣ်မုာ်ထီၣ်က့ၤဖဲ တၢ်ဆၢကတီၢ်မတၤလဲၣ်ဒီး, အဝဲသ့ၣ်စံးဆၢဝဲ, “အတၢ် ကိၢ်လီၤက့ၤန့ၣ်ကဘၣ်ဖဲမဟါတနံၤမုၢ်ဃ့ၢ်လီၤတနၣ်ရံၣ်န့ၣ်လီၤ.” 53အန့ၣ်ဒီးပၢ်တဂၤအံၤသ့ၣ်နီၣ်ထီၣ်က့ၤဝဲလၢတၢ်အံၤမ့ၢ်နၣ်ရံၣ် တကတီၢ်ဃီဖဲယ့ၣ်ၡူးစံးဘၣ်အီၤ, “နဖိခွါန့ၣ်ကမူကစီဒီလီၤ” န့ၣ်လီၤ. သတးဒီးအဝဲဒီးအဒူၣ်ဖိထၢဖိခဲလၢာ်စူၢ်က့ၤနာ်က့ၤ ယ့ၣ်ၡူးန့ၣ်လီၤ.
54အဝဲအံၤမ့ၢ်ယ့ၣ်ၡူးမၤတၢ်လီၤလးခံမံၤတမံၤဖဲ အဟးထီၣ်လၢကီၢ်ယူဒၤဒီးဟဲဆူကီၢ်ကၤလံၤလါဝံၤ အလီၢ်ခံန့ၣ်လီၤ.
Одоогоор Сонгогдсон:
လံာ်ယိၤဟၣ် 4: KSWC
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Sgaw Karen Common Bible © Bible Society of Myanmar, 1992.