လံာ်လူၤကၣ် 1
1
1စီၤသီးဖံၤလူးသးဘိဧၢ, ပှၤအါဒံအါဂၤဂုာ်ကျဲးစၢးတ့ၢ်ဝဲအဂ့ၤကတၢၢ်လၢအကကွဲး ဖျါထီၣ်က့ၤတၢ်ဂ့ၢ်လၢအမၤတ့ၢ်အသးလၢပသိးပကျါသ့ၣ် တဖၣ်န့ၣ်လီၤ. 2အဝဲသ့ၣ်ကွဲးတၢ်ဂ့ၢ်ဘၣ်ထွဲဒီးပှၤလၢအထံၣ်ဘၣ်တၢ်သ့ၣ် တဖၣ်အံၤလၢအမဲာ်ချံဒၣ်ဝဲစးထီၣ်လၢအခီၣ်ထံးကတၢၢ် ဒီးတဲဘၣ်ပှၤ ဒီးဒုးဟူထီၣ်သါလီၤတၢ်ကစီၣ်တမံၤအံၤန့ၣ်လီၤ. 3ဒီးလၢတၢ်န့ၣ်အဃိတၢ်ဒိၣ်ဧၢ, ဒ်ယဃုသ့ၣ်ညါနၢ်ပၢၢ်တ့ၢ်လံယဲ ဘၣ်ဃးတၢ်ဂ့ၢ်သ့ၣ်တဖၣ်အံၤခဲလၢာ်ခဲဆ့စးထီၣ်လၢအခီၣ်ထံး အသိး, ယဆိကမိၣ်ယမ့ၢ်ကွဲးလီၤတၢ်ဂ့ၢ်တမံၤအံၤလၢအဂ့ၢ်အဝီ ဒ်သိးနကဖးဘၣ်နဲအဂီၢ်ဒီး, ကမ့ၢ်တၢ်လၢအဂ့ၤလီၤ. 4ယမၤတၢ်အဝဲအံၤန့ၣ် မ့ၢ်ဒ်သိးနကသ့ၣ်ညါဘၣ်တၢ်မ့ၢ်တၢ်တီ လၢာ်လၢာ်ဆ့ဆ့ဘၣ်ဃးဒီးကယဲၢ်တၢ်သ့ၣ်တဖၣ်လၢ နဘၣ်တၢ်သိၣ်လိတ့ၢ်နၤန့ၣ်လီၤ.
တၢ်ဘိးဘၣ်သ့ၣ်ညါဘၣ်ဃး ပှၤဘျၢတၢ်စီၤယိၤဟၣ် အတၢ်အိၣ်ဖျဲၣ်ထီၣ်အဂ့ၢ်
5ဖဲဆၢကတီၢ်လၢစီၤဟ့ၤရိာ်ကဲကီၢ်ယူဒၤအစီၤပၤန့ၣ်, ပှၤလုၢ်တၢ်အခိၣ်လၢအမံၤမ့ၢ်စီၤစဃၤရံအိၣ်ဝဲဒၣ်တဂၤ ဒီးအဝဲဒၣ်ဘၣ်ထွဲလၢစီၤအဘံယၤတစိၣ်ပှၤလုၢ်တၢ်အခိၣ် အကရူၢ်လီၤ. အဝဲဒၣ်အမါအမံၤမ့ၢ်နီၢ်အ့းလံၤစါဘ့း ဒီးဘၣ်ထွဲစ့ၢ်ကီးလၢပှၤလုၢ်တၢ်အဒိၣ်အဒူၣ်ဖိထၢဖိန့ၣ်လီၤ. 6အဝဲသ့ၣ်ခံဂၤလၢာ်အိၣ်မူတၢ်အိၣ်မူလၢအဂ့ၤအဝါလၢကစၢ် ယွၤအမဲာ်ညါဒီးစူၢ်ကစၢ်ယွၤအတၢ်သိၣ်တၢ်သီဒီး အတၢ်မၤလိာ်တဖၣ်လၢလၢပှဲၤပှဲၤလီၤ. 7အဝဲသ့ၣ်အဖိတအိၣ်နီတဂၤဘၣ်. အဂ့ၢ်မ့ၢ်လၢ နီၢ်အ့းလံၤစါဘ့းမ့ၢ်ပှၤတူာ်ဖိဒီးအဝဲဒၣ်ဒီးစီၤစဃၤရံခံဂၤလၢာ် အသးပှၢ်ထီၣ်ဖးဒိၣ်လံအဃိန့ၣ်လီၤ.
8ဘၣ်မုၢ်တနံၤန့ၣ်စီၤစဃၤရံမၤအတၢ်မၤဒ်ပှၤလုၢ်တၢ်အခိၣ်တဂၤအသိး လၢတၢ်လုၢ်ဟံၣ်အပူၤ, အဂ့ၢ်မ့ၢ်လၢအတုၤဃီၤအဝဲဒၣ်အတီၤလၢအကဟံးန့ၢ်မူဒါဖဲ တနံၤဘၣ်တနံၤအတၢ်ဘူၣ်တၢ်ဘါအကတီၢ်အဃိန့ၣ်လီၤ. 9ဒ်ပှၤလုၢ်တၢ်အခိၣ်တဖၣ်အလုၢ်အလၢ်အိၣ်ဝဲအသိးန့ၣ်, အဝဲဒၣ်ဘၣ်တၢ်ဃုထၢထီၣ်အီၤခီဖျိတၢ်ဖီၣ်တၢ်ဖးလၢ အကဆိၣ်ကဲၤတၢ်နၢမူလၢတၢ်လုၢ်လီၢ်အဖီခိၣ်လီၤ. လၢတၢ်န့ၣ်အဃိ အဝဲဒၣ်လဲၤနုာ်ဆူကစၢ်ယွၤအတၢ်လုၢ်ဟံၣ် အပူၤ 10ဒီးပှၤဂီၢ်မုၢ်အိၣ်လၢတၢ်ချၢတဖၣ်ဃ့ဘါထုကဖၣ်တၢ်ဖဲ နၣ်ရံၣ်အကတီၢ်လၢတၢ်နၢမူဘၣ်တၢ်ဆိၣ်ကဲၤအီၤန့ၣ်လီၤ. 11ကစၢ်ယွၤအကလူးတဂၤလီၣ်ဖျါထီၣ်အသးလၢအီၤဒီး အိၣ်ဆၢထၢၣ်ဝဲဒၣ်ဖဲတၢ်လုၢ်လီၢ်, လၢတၢ်နၢမူဘၣ်တၢ်ဆိၣ် ကဲၤအီၤလၢအဖီခိၣ်န့ၣ်အစုထွဲတကပၤလီၤ. 12ဖဲစီၤစဃၤရံထံၣ်အီၤန့ၣ်, အဝဲဒၣ်ဖုးသံပျီၢ်သံဒီးပျံၤတၢ်လီၤ. 13ဘၣ်ဆၣ်ဒီးကလူးန့ၣ်စံးဘၣ်အီၤ, “ပျံၤတၢ်တဂ့ၤ စီၤစဃၤရံဧၢ, ကစၢ်ယွၤနၢ်ဟူလံနတၢ်ထုကဖၣ်လံ. ဒီးနမါနီၢ်အ့းလံၤစါဘ့းကဆံးစၢ်န့ၢ်နၤလၢဖိခွါတဂၤလီၤ. နကဘၣ်ယုၢ်န့ၢ်အမံၤလၢစီၤယိၤဟၣ်လီၤ. 14ဖဲအဝဲဒၣ်အိၣ်ဖျဲၣ်ထီၣ်န့ၣ်, နကသူၣ်ဖှံသးညီသူၣ်ခုသးခုနဲဒၣ်အဒိၣ် အအါဒီးပှၤအဂၤအါဒံအါဂၤကသးခုဝဲန့ၣ်လီၤ. 15အဝဲဒၣ်ကမ့ၢ်ပှၤဖးဒိၣ်တဂၤလၢကစၢ်အမဲာ်ညါလီၤ. စပံးထံမ့ၢ်ဂ့ၤ, တၢ်လၢအကဒုးမူၤဒုးဘှီးပှၤမ့ၢ်ဂ့ၤ, အဝဲတဘၣ်အီဝဲနီတမံၤဘၣ်. အဝဲဒၣ်ကလၢပှဲၤဒီးသးစီဆှံဖဲအအိၣ်ဒံးလၢအမိၢ်အဟၢဖၢပူၤလံၤလံၤ, 16ဒီးအဝဲကဆှၢက့ၤအံၣ်စရ့လးအပှၤဂီၢ်မုၢ်အါဒံအါဂၤဆူအဝဲသ့ၣ်အယွၤ, ကစၢ်ယွၤအအိၣ်လီၤ. 17အဝဲဒၣ်ကလဲၤလၢကစၢ်အမဲာ်ညါအိၣ်ဒီးသးအဂံၢ်အဘါဒီးတၢ်စိတၢ် ကမီၤဒ်ဝံအ့ၤလံယၤအသိးန့ၣ်လီၤ. အဝဲဒၣ်ကဘိးဃၣ်က့ၤပၢ်တဖၣ်အသးဆူဖိတဖၣ်အအိၣ်, အဝဲဒၣ်ကဃၣ်ကဒါက့ၤပှၤတဒိကနၣ်တၢ်တဖၣ်ဆူပှၤတီပှၤလိၤ အတၢ်ဆိကမိၣ်အကျဲ, အဝဲဒၣ်ကကတဲာ်ကတီၤကစၢ်ယွၤ အပှၤဂီၢ်မုၢ်တဖၣ်လၢယွၤအဂီၢ်လီၤ.”
18စီၤစဃၤရံစံးဘၣ်ကလူးအဝဲန့ၣ်, “တၢ်အဝဲအံၤမ့ၢ်, တမ့ၢ်လဲၣ်န့ၣ်, ယကသ့ၣ်ညါယဲလၢကျဲဒ်လဲၣ်. ယမ့ၢ်ပှၤလၢအသးပှၢ်ထီၣ်လံတဂၤဒီးယမါစ့ၢ်ကီး အသးပှၢ်လံန့ၣ်လီၤ.” 19“ယဲဒၣ်အံၤယမ့ၢ်ကၤဘြံၤအ့လးလီၤ,” ကလူးစံးဆၢအီၤ, “ယဆၢထၢၣ်လၢယွၤအမဲာ်ညါဒီးအဝဲဒၣ် ဆှၢလီၤယၤဒ်သိးယကကတိၤတၢ်ဒီးနၤဒီးစံးဘၣ်တဲဘၣ်နၤ လၢတၢ်သးခုကစီၣ်တမံၤအံၤန့ၣ်လီၤ. 20ဘၣ်ဆၣ်ဒီးယတၢ်ကစီၣ်လၢအကဟဲလၢထီၣ်ပှဲၤထီၣ်ဖဲဆၢ ကတီၢ်တုၤဃီၤအံၤန့ၣ်နတစူၢ်တနာ်နဲဒၣ်ဘၣ်. မ့ၢ်လၢနတစူၢ်တနာ်တၢ်အဃိ, နကအိၣ်တအုၣ်ဒီးအိၣ်ဘှ့ၣ်အိၣ်ဘှီၣ် တုၤဃီၤမုၢ်တနံၤဖဲ ယတၢ်အၢၣ်လီၤအီလီၤတၢ်ဒီးနၤဟဲလၢထီၣ်ပှဲၤထီၣ်ဝဲန့ၣ်လီၤ.”
21ဖဲအဆၢကတီၢ်ဝဲန့ၣ်ပှၤဂီၢ်မုၢ်တဖၣ်အိၣ်ခိးစီၤစဃၤရံလၢတၢ်ချၢဒီး ကမၢကမၣ်ဝဲလၢအဝဲဒၣ်အိၣ်လၢတၢ်လုၢ်ဟံၣ်အပူၤယံာ်တ့ၢ် ဃဲးဃဲးအဃိန့ၣ်လီၤ. 22ဖဲအဝဲဒၣ်ဟဲက့ၤထီၣ်ဆူခိန့ၣ်, ကတိၤတၢ်ဒီးအဝဲသ့ၣ်တသ့ဘၣ် သတးဒီးအဝဲသ့ၣ်သ့ၣ်ညါလၢအဝဲဒၣ်ထံၣ်ဘၣ်တ့ၢ်တၢ်ထံၣ်လၢညါ ခီလၢတၢ်လုၢ်ဟံၣ်အပူၤန့ၣ်လီၤ. မ့ၢ်လၢအဝဲဒၣ်ကတိၤတၢ်လၢအထးခိၣ်တသ့ဝဲနီတဘီအဃိ ကတိၤတၢ်ဒီးအဝဲသ့ၣ်ခီဖျိအဒုးနဲၣ်မၤဟူးမၤဂဲၤအစုန့ၣ်လီၤ.
23ဒီးဖဲစီၤစဃၤရံအတၢ်ဖံးတၢ်မၤအဆၢကတီၢ်လၢတၢ်လုၢ်ဟံၣ်အပူၤ ကတၢၢ်န့ၣ်, အဝဲဒၣ်က့ၤက့ၤဆူအဟံၣ်လီၤ. 24တၢ်မၤအသးဝံၤအလီၢ်ခံတစိၢ်တလီၢ်န့ၣ်, အဝဲဒၣ်အမါနီၢ်အ့းလံၤစါဘ့းအိၣ်ထီၣ်ဒီးအဟုးအသး ဒီးပာ်တဒၢအသးလၢဟံၣ်ပူၤလၢယဲၢ်လါအတီၢ်ပူၤလီၤ. 25“ခဲကနံၣ်အံၤကစၢ်ယွၤမၤစၢၤလံယၤလံ,” အဝဲဒၣ်စံးဝဲ, “အဝဲဒၣ်စိာ်ကွံာ်လံတၢ်လၢအမၤမဲာ်ဆှးယၤလၢပှၤ ဂီၢ်မုၢ်ဂီၢ်ပၤအမဲာ်ညါတမံၤန့ၣ်လံ.”
တၢ်ဘိးဘၣ်သ့ၣ်ညါယ့ၣ်ၡူးကအိၣ်ဖျဲၣ်ထီၣ်အဂ့ၢ်
26ဖဲနီၢ်အ့းလံၤစါဘ့းအိၣ်ဒီးအဟုးအသးပှဲၤထီၣ်ဃုလါတလါန့ၣ်, ယွၤဆှၢလီၤကလူးကၤဘြံၤအ့လး ဆူဝ့ၢ်တဖျၢၣ်လၢအမံၤမ့ၢ်နစၤရ့း အိၣ်ဝဲဖဲကီၢ်ကၤလံၤလါန့ၣ်လီၤ. 27အဝဲဒၣ်အိၣ်ဒီးတၢ်ကစီၣ်တမံၤလၢပှၤမုၣ်ကနီၤတဂၤလၢ အဘၣ်တၢ်အၢၣ်လီၤပာ်အီၤလၢအကကဲထီၣ်ပှၤတဂၤလၢ အမံၤမ့ၢ်စီၤယိၤသးအမါအဂီၢ်န့ၣ်လီၤ. စီၤယိၤသးမ့ၢ်ဝဲပှၤဟဲလီၤစၢၤလီၤသွဲၣ်လၢစီၤပၤဒၤဝံး အဒူၣ်ဖိထၢဖိဒီးမုၣ်ကနီၤအမံၤမ့ၢ်နီၢ်မၤရံလီၤ. 28ကလူးဟဲဆူအဝဲဒၣ်အအိၣ်ဒီးစံးဘၣ်အီၤ, “မ်တၢ်ဃူတၢ်ဖိးအိၣ်ဒီးနၤတက့ၢ်. ကစၢ်အိၣ်ဒီးနၤဒီးဆိၣ်ဂ့ၤတ့ၢ်လံနၤအဒိၣ်အမုၢ်လံ.”
29နီၢ်မၤရံအသးဘၣ်တံာ်တာ်ဝဲဒိၣ်မးလၢကလူးအတၢ်ကစီၣ် တမံၤန့ၣ်အဃိဒီးဆိကမိၣ်ဝဲကလူးအတၢ်ကတိၤတဖၣ်န့ၣ်, မ့ၢ်တၢ်မနုၤလဲၣ်အဂ့ၢ်န့ၣ်လီၤ. 30ကလူးန့ၣ်စံးဘၣ်အီၤ, “တဘၣ်ပျံၤတၢ်တဂ့ၤနီၢ်မၤရံဧၢ, ယွၤမၤဘျုးမၤဖှိၣ်လံနၤလံ. 31နကဒၢထီၣ်ဒီးဆံးစၢ်န့ၢ်ဖိခွါတဂၤဒီးနကဘၣ်ယုၢ်အမံၤလၢယ့ၣ်ၡူး လီၤ. 32အဝဲဒၣ်ကမ့ၢ်ပှၤအဒိၣ်ကစၢ်ယွၤတဂၤဒီးကဘၣ်တၢ်ကိးအီၤလၢ ယွၤလၢအမ့ၢ်တၢ်ထီကတၢၢ်တဂၤအဖိခွါလီၤ. ယွၤကစၢ်ယွၤကဒုးကဲအီၤလၢစီၤပၤဒ်ပှၤလၢအဝဲဒၣ်ဟဲလီၤစၢၤ ဝဲလၢအီၤ, စီၤဒၤဝံးတဂၤအသိး 33ဒီးအဝဲဒၣ်ကကဲထီၣ်စီၤယၤကိာ်အစၢၤအသွဲၣ်တဖၣ်အစီၤပၤလီၤ ထူလီၤယိာ်ဒီးအဘီအမုၢ်တကတၢၢ်ဝဲနီတစုဘၣ်လီၤ.”
34နီၢ်မၤရံစံးဘၣ်ကလူးဒီးစံးဝဲ, “ယမ့ၢ်ဒၣ်မုၣ်ကနီၤတဂၤလီၤ. လၢတၢ်န့ၣ်အဃိ, တၢ်တမံၤအံၤမၤအသးကသ့ဝဲလၢကျဲဒ်လဲၣ်.”
35ကလူးစံးဆၢတၢ်ဒီးစံးဝဲ, “သးစီဆှံကဟဲလီၤလၢနလိၤဒီး ကစၢ်ယွၤအစိကမီၤအကဒုကလီၤဘၣ်နၤလီၤ. လၢတၢ်ဂ့ၢ်တမံၤအံၤအဃိ, ဖိသၣ်စီဆှံတဂၤန့ၣ်ကဘၣ်တၢ်ကိးအီၤလၢကစၢ်ယွၤအဖိခွါန့ၣ်လီၤ. 36သ့ၣ်နီၣ်ထီၣ်နဘူးနတံၢ်နီၢ်အ့းလံၤစါဘ့းတက့ၢ်. တၢ်စံးတ့ၢ်ဝဲလၢအဝဲဒၣ်အဖိအိၣ်တသ့ဘၣ်. ဘၣ်ဆၣ်ဒီး, ခဲကနံၣ်အံၤအဝဲအသးပှၢ်ဒိၣ်မးသနာ်က့ အနီၢ်ကစၢ်ဒၣ်ဝဲအိၣ်ဒီးအဟုးအသးန့ၣ်အိၣ်လံဃုလါလံ. 37အဂ့ၢ်ဒ်အံၤတၢ်လၢကစၢ်ယွၤမၤတသ့န့ၣ်တအိၣ်နီတမံၤဘၣ်.”
38“ယမ့ၢ်ယဲကစၢ်အခ့အပှၤတဂၤလီၤ.” နီၢ်မၤရံစံးဝဲ, “မ်တၢ်ကမၤအသးဒ်နစံးတ့ၢ်လံနဲအသိးတက့ၢ်.” ဒီးကလူးန့ၣ်ဟးထီၣ်ကွံာ်လၢအဃၢၤလီၤ.
နီၢ်မၤရံလဲၤအိၣ်သကိးနီၢ်အ့းလံၤစါဘ့း
39တၢ်န့ၣ်ဝံၤအလီၢ်ခံတယံာ်ဘၣ်န့ၣ်, နီၢ်မၤရံအိၣ်ကတဲာ်ကတီၤထီၣ် အသးဒီးလဲၤဝဲဒၣ်ချ့ချ့ဆူဝ့ၢ်တဖျၢၣ်အိၣ်လၢကီၢ်ယူဒၤအတၢ်လူၢ် တၢ်တြီၤအကျါန့ၣ်လီၤ. 40အဝဲဒၣ်လဲၤနုာ်ဆူစီၤစဃၤရံအဟံၣ်ပူၤဒီးဆၢဂ့ၤဆၢဝါနီၢ်အ့းလံၤ စါဘ့းလီၤ. 41ဖဲနီၢ်အ့းလံၤစါဘ့းနၢ်ဟူဘၣ်နီၢ်မၤရံအတၢ်ကတိၤဆၢဂ့ၤဆၢဝါန့ၣ်, ပှၤဖိသၣ်ဟူးဂဲၤဝဲလၢအဟၢဖၢပူၤလီၤ. နီၢ်အ့းလံၤစါဘ့းလၢထီၣ်ပှဲၤထီၣ်ဝဲဒီးသးစီဆှံ,
42ဒီးကတိၤထီၣ်တၢ်လၢအကလုၢ်ဖးဒိၣ်ဒီးစံးဝဲ, “လၢပိာ်မုၣ်တဖၣ်ခဲလၢာ်အကျါန့ၣ်, နမ့ၢ်ပှၤဘၣ်ဆိၣ်ဂ့ၤကတၢၢ်ဒီးဖိသၣ်လၢနကဒၢထီၣ်အီၤ တဂၤန့ၣ်ဘၣ်ဆိၣ်ဂ့ၤဝဲဒၣ်လီၤ. 43တၢ်အဒိၣ်အမုၢ်တမံၤလၢအမ့ၢ်ဝဲယကစၢ်အမိၢ်အတၢ်ဟဲအိၣ် သကိးယၤအံၤ, မၤအသးဒီးယၤလၢတၢ်ဂ့ၢ်မနုၤတမံၤအဃိလဲၣ်. 44အဂ့ၢ်ဒ်အံၤ, တစုဃီဖဲယနၢ်ဟူဘၣ်နတၢ်ကတိၤဆၢဂ့ၤဆၢဝါန့ၣ်, ဖိသၣ်အိၣ်လၢယဟၢဖၢပူၤတဂၤဟူးဂဲၤထီၣ်ဝဲလၢတၢ်သးခုအပူၤလီၤ. 45မ့ၢ်လၢနနာ်လၢကစၢ်အတၢ်ကစီၣ်ကဟဲလၢထီၣ်ပှဲၤထီၣ်လၢနဂီၢ် အဃိ, နဘၣ်ဆိၣ်ဂ့ၤနဲလီၤ.”
နီၢ်မၤရံအတၢ်သးဝံၣ်စံးထီၣ်ပတြၢၤယွၤ
46နီၢ်မၤရံစံးဝဲဒၣ်,
“ယသးအံၤစံးထီၣ်ပတြၢၤကစၢ်လီၤ.
47ယသူၣ်ခုသးခုယဲလၢကစၢ်ယွၤ,
ယတၢ်အုၣ်က့ၤခီၣ်က့ၤကစၢ်တဂၤအဃိလီၤ.
48အဂ့ၢ်ဒ်အံၤအဝဲသ့ၣ်နီၣ်ထီၣ်ယၤ, ပှၤလၢအမ့ၢ်အဝဲဒၣ်အခ့အပှၤအဆံးတဂၤလီၤ.
စးထီၣ်ခဲကနံၣ်အံၤဒီးဆူညါန့ၣ်, ပှၤကိးကလုာ်ဒဲး
ကကိးယၤလၢပှၤဘၣ်ဆိၣ်ဂ့ၤတဂၤ,
49အဂ့ၢ်မ့ၢ်လၢတၢ်အဒိၣ်အမုၢ်တဖၣ်လၢယွၤ,
တၢ်စိဒိၣ်ကမီၤထီတဂၤမၤတ့ၢ်ဝဲလၢယဂီၢ်အဃိလီၤ.
အဝဲဒၣ်အမံၤစီဝဲဆှံဝဲလီၤ.
50အဝဲဒၣ်ဒုးနဲၣ်တၢ်သးကညီၤလၢ
ပှၤမၤလၤကပီၤအီၤသ့ၣ်တဖၣ်အဖီခိၣ်
လၢပှၤတစိၤဘၣ်တစိၤန့ၣ်လီၤ.
51အဝဲဒၣ်ယူာ်ထီၣ်အစုလၢအဂံၢ်ဆူၣ်ဘါဆူၣ်
ဒီးမၤလီၤပြံလီၤပြါပှၤပာ်ထီၣ်ထီအသးလၢ
ကယဲၢ်အတၢ်ကူၣ်ထီၣ်ဖးလီၤအပူၤတဖၣ်လီၤ.
52အဝဲဒၣ်ပာ်လီၤကွံာ်စီၤပၤလၢအစိဒိၣ်ကမီၤထီတဖၣ်လၢ အလီၢ်ပစိာ်အလိၤ
ဒီးယူာ်ထီၣ်ထီပှၤအိၣ်လၢတၢ်လီၢ်
အတီၤဖုၣ်တဖၣ်လီၤ.
53ပှၤလၢတၢ်သၣ်ဝံၤအသးတဖၣ်န့ၣ်,
ဒုးဘျဲးအီၣ်ဘျဲးအီဝဲလၢတၢ်အဝံၣ်အဘဲ
ဒီးပှၤအထူးအတီၤတဖၣ်န့ၣ်
ဒုးက့ၤကလီကလီဝဲလီၤ.
54အဝဲဒၣ်သ့ၣ်နီၣ်ထီၣ်တၢ်အၢၣ်လီၤအီလီၤလၢ
အမၤတ့ၢ်ဝဲဒီးမိၢ်ပၢ်ဖံဖုလၢပျၢၤတဖၣ်
ဒီးဟဲဝဲဒ်သိးအကမၤစၢၤ
အခ့အပှၤအံၣ်စရ့လးန့ၣ်လီၤ.
55အဝဲဒၣ်သ့ၣ်နီၣ်ထီၣ်လၢအကသးကညီၤ
စီၤအၤဘြၤဟၣ်ဒီးအစၢၤအသွဲၣ်တဖၣ်
ကိးဂၤဒဲးလီၤစိၤလီၤထီလီၤ.”
56နီၢ်မၤရံအိၣ်ဒီးနီၢ်အ့းလံၤစါဘ့းကဘၣ်သၢလါဒီး အန့ၣ်ဝံၤအလီၢ်ခံက့ၤကဒါက့ၤဝဲဆူအဟံၣ်လီၤ.
ပှၤဘျၢတၢ်စီၤယိၤဟၣ်အတၢ်အိၣ်ဖျဲၣ်ထီၣ်
57တၢ်ဆၢကတီၢ်တုၤဃီၤဝဲလၢနီၢ်အ့းလံၤစါဘ့းအဖိကအိၣ် ဖျဲၣ်ထီၣ်ဒီးအဝဲဒၣ်ဆံးစၢ်န့ၢ်ဖိခွါတဂၤလီၤ. 58ပှၤအိၣ်လၢအဝဲဒၣ်အဃၢၤဒီးအဝဲဒၣ်အဘူးအတံၢ်တဖၣ်နၢ်ဟူဘၣ်ဝဲလၢ ကစၢ်ယွၤဂ့ၤတ့ၢ်လၢအဝဲဒၣ်အဖီခိၣ်လီၤလိၢ်လီၤလးမးဒီး အဝဲသ့ၣ်ကိးဒံကိးဂၤဒဲးသးခုဃုာ်ဒီးအီၤလီၤ.
59ဒီးဃိးသီတသီန့ၣ်, အဝဲသ့ၣ်ဟဲဒ်သိးအကကူးတရံးဖိသၣ်ဒီး သါကယုၢ်န့ၢ်အမံၤလၢစီၤစဃၤရံဒ်အပၢ်အမံၤအသိးလီၤ. 60ဘၣ်ဆၣ်ဒီးအမိၢ်စံးဝဲ, “တမ့ၢ်ဘၣ်. အဝဲဒၣ်အမံၤကဘၣ်မ့ၢ်စီၤယိၤဟၣ်လီၤ.”
61အဝဲသ့ၣ်စံးဘၣ်အီၤ, “သုဘူးသုတံၢ်လၢအမံၤဒ်န့ၣ်တအိၣ်နီတဂၤဘၣ်.” 62တုၤနုၤတစုအဝဲသ့ၣ်သံကွၢ်အပၢ်ခီဖျိအဒုးနဲၣ်တၢ်ပနီၣ်ဆူအအိၣ်လၢ အဝဲသးအိၣ်ယုၢ်အဖိခွါအမံၤဒ်လဲၣ်န့ၣ်လီၤ.
63ဖဲန့ၣ်စီၤစဃၤရံဃ့တၢ်အဘ့ၣ်ဘၣ်လၢပှၤကွဲးတၢ်အဂီၢ်တဘ့ၣ်ဒီးကွဲးလီၤဝဲ, “အဝဲဒၣ်အမံၤမ့ၢ်စီၤယိၤဟၣ်လီၤ.” အဝဲသ့ၣ်ကမၢကမၣ်မးဝဲကိးဂၤဒဲးလီၤ. 64တဘျီဃီဖဲန့ၣ်စီၤစဃၤရံကတိၤတၢ်သ့ထီၣ်က့ၤဒီးအဝဲဒၣ် စံးထီၣ်ပတြၢၤကစၢ်ယွၤလီၤ. 65ကယဲၢ်ပှၤအိၣ်ဆိးလၢအခိၣ်အဃၢၤတဖၣ်ပှဲၤဒီးတၢ်ပျံၤတၢ်ဖုးဒီး တၢ်ကစီၣ်ဘၣ်ဃးတၢ်သ့ၣ်တဖၣ်အံၤအဂ့ၢ်ဟူထီၣ်သါလီၤဝဲ သကုၤကီၢ်ယူဒၤအတၢ်လူၢ်တၢ်တြီၤတၢ်လီၢ်တၢ်ကျဲတဖၣ်လီၤ. 66ကယဲၢ်ပှၤလၢအနၢ်ဟူဘၣ်တၢ်ဂ့ၢ်တမံၤအံၤန့ၣ်, ဆိကမိၣ်ဝဲလၢအဂ့ၢ်ဒီးသံကွၢ်ဝဲ, “ဖိသၣ်တဂၤအံၤကကဲထီၣ်တၢ်မနုၤလဲၣ်.” အဂ့ၢ်ဒ်အံၤအိၣ်ဖျါဝဲဒၣ်ဆှံဆှံလၢကစၢ်အစိကမီၤအိၣ်လၢ အဝဲဒၣ်အလိၤန့ၣ်လီၤ.
စီၤစဃၤရံအတၢ်ကတိၤလၢဝံကျိာ်
67စီၤယိၤဟၣ်အပၢ်စီၤစဃၤရံလၢထီၣ်ပှဲၤထီၣ်လၢသးစီဆှံဒီး အဝဲဒၣ်ကတိၤထီၣ်ကစၢ်ယွၤအတၢ်ကစီၣ်လီၤ.
68“မ်ပကစံးထီၣ်ပတြၢၤသကိးကစၢ်, အံၣ်စရ့လးအကစၢ်ယွၤန့ၣ်တက့ၢ်.
အဝဲဒၣ်ဟဲဒ်သိးအကမၤစၢၤအပှၤဂီၢ်မုၢ်ဒီးဒုးထူၣ်ဖျဲးထီၣ်ကွံာ်အဝဲသ့ၣ်လီၤ.
69အဝဲဒၣ်ဒုးအိၣ်ထီၣ်တၢ်အုၣ်က့ၤခီၣ်က့ၤကစၢ် အဂံၢ်ဆူၣ်ဘါဆူၣ်တဂၤလၢပဂီၢ်, လၢအမ့ၢ်
အခ့အပှၤစီၤဒၤဝံးအစၢၤအသွဲၣ်တဂၤလီၤ.
70လၢအပူၤကွံာ်ဖးယံာ်န့ၣ်, အဝဲဒၣ်အၢၣ်လီၤအီလီၤဝဲခီဖျိအဝံစီဆှံတဖၣ်,
71လၢအဝဲကအုၣ်က့ၤခီၣ်က့ၤပှၤလၢ
ပဒုၣ်ပဒါတဖၣ်အစုပူၤ,
ဒီးကယဲၢ်ပှၤလၢအသးဟ့ပှၤတဖၣ်
အတၢ်စိတၢ်ကမီၤအပူၤလီၤ.
72အဝဲဒၣ်စံးဝဲလၢအကဒုးနဲၣ်တၢ်သးကညီၤလၢ
မိၢ်ပၢ်ဖံဖုလၢပျၢၤတဖၣ်
ဒီးသ့ၣ်နီၣ်ထီၣ်အတၢ်အၢၣ်လီၤစီဆှံန့ၣ်လီၤ.
73အဝဲဒၣ်အိၣ်ဒီးတၢ်ဆိၣ်လီၤအသးသညူးသပှၢ်ဒီး
ပပၢ်ဖးဒိၣ်စီၤအၤဘြၤဟၣ်,
74အဝဲဒၣ်အၢၣ်လီၤအီလီၤလၢအကအုၣ်က့ၤခီၣ်က့ၤပှၤလၢပဒုၣ် ပဒါတဖၣ်အစုပူၤ
ဒီးပျဲပမၤအတၢ်ဖံးတၢ်မၤပူၤဖျဲးဒီးတၢ်ပျံၤတၢ်ဖုး,
75ဒ်သိးပကစီဝဲဆှံဝဲဒီးတီဝဲလိၤဝဲလၢအဝဲဒၣ်အမဲာ်ညါ
လၢပတၢ်အိၣ်မူဒီစိၤညါန့ၣ်လီၤ.
76နဲဒၣ်ယဖိခွါ, နကဘၣ်တၢ်ကိးနၤလၢ
ကစၢ်ယွၤတၢ်ထီကတၢၢ်အဝံတဂၤန့ၣ်လီၤ.
နကလဲၤဆိနဲလၢကစၢ်အမဲာ်ညါ
ဒ်သိးနကကတဲာ်ကတီၤကျဲလၢအဂီၢ်,
77ဒ်သိးနကစံးဘၣ်တဲဘၣ်အဝဲဒၣ်အပှၤဂီၢ်မုၢ်လၢ အဝဲသ့ၣ်ကဒိးန့ၢ်ဘၣ်တၢ်အုၣ်က့ၤခီၣ်က့ၤ
ခီဖျိအတၢ်ဒဲးဘးတဖၣ်
ဘၣ်တၢ်ပျၢ်ကွံာ်အီၤန့ၣ်လီၤ.
78ပကစၢ်ယွၤမ့ၢ်ပှၤလၢ
အသူၣ်ကညီၤသးကညီၤတၢ်လီၤ.
အဝဲဒၣ်ကပျဲတၢ်အုၣ်က့ၤခီၣ်က့ၤအမုၢ်ဆ့ၣ်ဟဲဝါထီၣ် လၢပဖီခိၣ်ကပြုၢ်ကပြီၤ,
79ဒီးကပီၤလီၤလၢမူခိၣ်လၢ ပှၤကိးဂၤဒဲးလၢ
အအိၣ်မူလၢတၢ်ခံးဒီးတၢ်သံအကဒုအပူၤ,
ဒီးကဆှၢပခီၣ်ခါတဖၣ်ဆူ
တၢ်ဃူတၢ်ဖိးအကျဲပူၤန့ၣ်လီၤ.”
80ဖိသၣ်ဒိၣ်ထီၣ်လၢနီၢ်ခိဒီးနီၢ်သးလီၤ. အဝဲဒၣ်အိၣ်ဝဲဆိးဝဲလၢပှၢ်မုၢ်ကနၢတုၤလီၤမုၢ်တနံၤ ဖဲအဝဲမၤဖျါထီၣ်အသးလၢကမျၢၢ်အမဲာ်ညါ, လၢအံၣ်စရ့လးအပှၤဂီၢ်မုၢ်န့ၣ်လီၤ.
Одоогоор Сонгогдсон:
လံာ်လူၤကၣ် 1: KSWC
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Sgaw Karen Common Bible © Bible Society of Myanmar, 1992.