လံာ်လူၤကၣ် 16
16
ပှၤကွၢ်ထွဲတၢ်ဖိတၢ်လံၤလၢ အသးဆးတဂၤ
1ယ့ၣ်ၡူးစံးဘၣ်အပျဲၢ်အဘီၣ်တဖၣ်, “ပှၤထူးပှၤတီၤအိၣ်ဝဲဒၣ်တဂၤလၢ အအိၣ်ဒီးပှၤအံးထွဲကွၢ်ထွဲအတၢ်ဖိတၢ်လံၤတဂၤလီၤ. အဝဲဘၣ်တၢ်တဲဘၣ်အီၤလၢအပှၤကွၢ်ထွဲတၢ်ဖိတၢ်လံၤတဂၤအံၤ မၤလၢာ်ဂီၤကလီအကျိၣ်အစ့လီၤ. 2ပှၤထူးပှၤတီၤကိးဃီၤအပှၤကွၢ်ထွဲတၢ်စုလီၢ်ခီၣ်ခိၣ်အဝဲန့ၣ်ဒီးစံးဘၣ်အီၤ, ‘နဂ့ၢ်နကျိၤလၢယနၢ်ဟူဘၣ်အီၤတမံၤအံၤမ့ၢ်တၢ်ဒ်လဲၣ်. ဟ့ၣ်ထီၣ်တၢ်ပာ်ဖျါအလၢအပှဲၤဘၣ်ဃးဒီးနတၢ်ကွၢ်ထွဲပၢဆှၢ ယတၢ်စုလီၢ်ခီၣ်ခိၣ်တက့ၢ်. အဂ့ၢ်ဒ်အံၤ, နကဲယပှၤကွၢ်ထွဲတၢ်စုလီၢ်ခီၣ်ခိၣ်တသ့လၢၤဘၣ်.’ 3တုၤနုၤတစု, ပှၤကွၢ်ထွဲတၢ်ဖိတၢ်လံၤဆိကမိၣ်ဝဲလၢအသးပူၤ, ‘ယကစၢ်ကထုးထီၣ်ကွံာ်ယၤလၢယတၢ်မၤအလီၢ်လီၤ. မ့ၢ်ယကမၤ ဘၣ်ဒ်လဲၣ်. ယကခူၣ်တၢ်ပူၤအဂီၢ်ယဂံၢ်ယဘါတလၢတပှဲၤဘၣ်. ဒီးယကဃ့အီၣ်ယဆၣ်အဂီၢ်ယမဲာ်ဆှးလီၤ. 4ခဲကနံၣ်အံၤ, ယကဘၣ်မၤဒ်လဲၣ်န့ၣ်ယသ့ၣ်ညါလီၤ. ယမ့ၢ်မၤဒ်န့ၣ်ဒီး, ဖဲယတၢ်မၤတအိၣ်လၢၤအဆၢကတီၢ်န့ၣ်, ယကအိၣ်ဒီးတံၤသကိးတဖၣ်လၢ အကတူၢ်လိာ်ခီၣ်ဆၢယၤလၢအဝဲသ့ၣ်အဟံၣ်ပူၤဃီပူၤလီၤ.’ 5လၢတၢ်န့ၣ်အဃိ, အဝဲဒၣ်ကိးဃီၤပှၤတဖၣ်လၢအိၣ်ဒီးအကမၢ် လၢအကဘၣ်လိးတူာ်က့ၤအကစၢ်လီၤ. အဝဲဒၣ်စံးဘၣ်ပှၤအဆိ ကတၢၢ်တဂၤ, ‘နဒ့ၣ်ကမၢ်လၢနကဘၣ်လိးက့ၤယကစၢ်န့ၣ်အိၣ်ဆံး အါလဲၣ်.’ 6အဝဲဒၣ်စံးဆၢအီၤ, ‘သ့ၣ်စၤယံးသိအဒၢတကယၤလီၤ.’ ပှၤပၢၤတၢ်စုလီၢ်ခီၣ်ခိၣ်စံးအီၤ, ‘နစရီအိၣ်လၢအံၤ, ဆ့ၣ်နီၤဒီးကွဲးလီၤယဲၢ်ဆံတက့ၢ်.’ 7အဝဲဒၣ်စံးဘၣ်ကဒီးပှၤအဂၤတဂၤ, ‘နဲဒၣ်တခီလဲၣ်. နဒ့ၣ်ကမၢ်လၢနကဘၣ်လိးက့ၤအိၣ်ဝဲဆံးအါလဲၣ်.’ အဝဲဒၣ်စံးဆၢအီၤ, ‘ဘုကၠူၣ်အကိၢ်တကယၤလီၤ.’ ပှၤပၢၤတၢ်စုလီၢ်ခီၣ်ခိၣ်စံးဘၣ်အီၤ, ‘နစရီအိၣ်လၢအံၤ, ဆ့ၣ်နီၤဒီးကွဲးလီၤဃိးဆံတက့ၢ်.’ 8ပှၤပၢၤတၢ်စုလီၢ်ခီၣ်ခိၣ်တဂၤအံၤအကစၢ်စံးထီၣ်ပတြၢၤအီၤလၢ အမၤတၢ်လၢအလၢပှဲၤဒီးတၢ်ကူၣ်ဘၣ်ဖးသ့ဒ်အံၤအသိးအဃိန့ၣ်လီၤ. အဂ့ၢ်ဒ်အံၤ, ဖဲလၢအဘၣ်ဃးဒီးတၢ်ကွၢ်ထွဲသုးကျဲၤတၢ်လၢ အတၢ်ဂ့ၢ်တၢ်ကျိၤတဖၣ်အဂ့ၢ်န့ၣ်ပှၤလၢဟီၣ်ခိၣ်တစိၤအံၤတဖၣ် ကူၣ်ဘၣ်ဖးသ့ဒိၣ်န့ၢ်ပှၤဘၣ်ဃးဒီးတၢ်ကပီၤတဖၣ်, တက့ၢ်လီၤ.”
9ဒီးယ့ၣ်ၡူးကတိၤတၢ်ဒီးစံးဝဲ, “ဒီးလၢတၢ်န့ၣ်အဃိယစံးဘၣ်တဲဘၣ်သု, ဒ်သိးသုကမၤန့ၢ်တံၤသကိးအဂီၢ်, သူဟီၣ်ခိၣ်အတၢ်ထူးတၢ်တီၤ, ဒီးတုၤအလၢာ်ကွံာ်ဒီး သုကဘၣ်တၢ်တူၢ်လိာ်ခီၣ်ဆၢသုလၢဟံၣ်အထူအယိာ်န့ၣ်တက့ၢ်. 10ပှၤတဂၤလၢ်လၢ်လၢအတီဝဲလၢတၢ်ဂ့ၢ်အဆံးဖိတဖၣ်အပူၤန့ၣ်, ကတီစ့ၢ်ကီးဝဲလၢတၢ်ဂ့ၢ်အဒိၣ်တဖၣ်အပူၤလီၤ. ပှၤတဂၤလၢ်လၢ်လၢ အတတီလၢတၢ်ဂ့ၢ်အဆံးဖိတဖၣ်အပူၤန့ၣ်ကတတီစ့ၢ်ကီးဝဲလၢတၢ်ဂ့ၢ် အဒိၣ်တဖၣ်အပူၤလီၤ. 11မ့မ့ၢ်ဒ်န့ၣ်ဒီး, လၢတၢ်ကွၢ်ထွဲပၢဆှၢဟီၣ်ခိၣ်အတၢ်ထူးတၢ်တီၤအပူၤ န့ၣ်သုမ့ၢ်တတီတ့ၢ်သုဝဲဒီး, တၢ်နာ်န့ၢ်သုလၢတၢ်ထူးတၢ်တီၤနီၢ်နီၢ် အဂီၢ်န့ၣ်, ကသ့ဝဲလၢကျဲဒ်လဲၣ်. 12ဒီးသုမ့ၢ်တတီတ့ၢ်သုဝဲဘၣ်ဃးဒီးတၢ်လၢအမ့ၢ်ပှၤတဂၤဒၣ်အတၢ်န့ၣ်, မ့ၢ်မတၤကဟ့ၣ်သုတၢ်လၢအမ့ၢ်သုတၢ်န့ၣ်လဲၣ်.
13‘တၢ်ခ့တၢ်ပှၤတဂၤမၤကစၢ်ခံဂၤအတၢ်မၤတသ့ဘၣ်. အဝဲဒၣ်ကသးဟ့အဝဲတဂၤ, ဒီးအဲၣ်အဂၤတဂၤလီၤ. အဝဲဒၣ်ကတီဒီးအဝဲတဂၤဒီးတပာ်ကဲဘၣ်အဂၤတဂၤလီၤ. သုမၤကစၢ်ယွၤအတၢ်မၤဒီးကျိၣ်စ့အတၢ်မၤခံမံၤလၢာ်တသ့ဘၣ်.”
ယ့ၣ်ၡူးအတၢ်ကတိၤလီၤတိၢ်လီၤဆီတနီၤ
(မး. ၁၁:၁၂-၁၃; ၅:၃၁-၃၂; မၢ်. ၁၀:၁၁-၁၂)
14ပှၤဖၤရံၤၡဲတဖၣ်နၢ်ဟူဘၣ်တၢ်သ့ၣ်တဖၣ်အံၤခဲလၢာ်, ဒီးအဝဲသ့ၣ်နံၤဘၣ်ဖၣ်လဲယ့ၣ်ၡူး, အဂ့ၢ်မ့ၢ်လၢအဝဲသ့ၣ်အဲၣ်ကျိၣ်စ့အဃိလီၤ. 15ယ့ၣ်ၡူးစံးဘၣ်အဝဲသ့ၣ်, “သုမ့ၢ်ပှၤတဖၣ်လၢအမၤဖျါအသးဒ် အတီဝဲလိၤဝဲ, လၢပှၤကညီအမဲာ်ညါ, ဘၣ်ဆၣ်ဒီးကစၢ်ယွၤသ့ၣ်ညါသုသူၣ်သုသးလီၤ. အဂ့ၢ်ဒ်အံၤ, တၢ်လၢပှၤကညီဆိကမိၣ်လၢ အအိၣ်ဒီးအလုၢ်အပှ့ၤဖးဒိၣ်န့ၣ်, လၢကစၢ်ယွၤအမဲာ်ညါ မ့ၢ်တၢ်လၢအလီၤသးဘၣ်အၢန့ၣ်လီၤ.
16စီၤမိၤၡ့အတၢ်သိၣ်တၢ်သီဒီးဝံအတၢ်ကွဲးတဖၣ်အိၣ်ဝဲဒၣ်တုၤလၢ ပှၤဘျၢတၢ်စီၤယိၤဟၣ်အဆၢကတီၢ်လီၤ. စးထီၣ်ဖဲန့ၣ် တၢ်သးခု အကစီၣ်ဘၣ်ဃးဒီးကစၢ်ယွၤအဘီအမုၢ်ဘၣ်တၢ်စံၣ်တဲၤတဲလီၤအီၤ, ဒီးပှၤကိးဂၤဒဲးဂုာ်လဲၤနုာ်ဝဲဆူကစၢ်ယွၤအဘီအမုၢ်အပူၤလီၤ. 17ဘၣ်ဆၣ်ဒီးမူခိၣ်ဒီးဟီၣ်ခိၣ်န့ၣ် လီၤမၢ်ကွံာ်ဝဲညီန့ၢ်ဒံးလံာ်တၢ်သိၣ်တၢ်သီအလံာ်မဲာ်ဖျၢၣ်အဆံးကတၢၢ် တဖျၢၣ်ကလီၤမၢ်ကွံာ်ဝဲတက့ၢ်လီၤ.
18ပိာ်ခွါတဂၤလၢ်လၢ်လၢအပာ်မၢ်ကွံာ်အမါဒီးန့ၢ်အမါလၢပိာ်မုၣ် အဂၤတဂၤန့ၣ်, မ့ၢ်အအဲၣ်ဘၢတၢ်, ဒီးပိာ်ခွါတဂၤလၢအန့ၢ်အမါလၢပိာ်မုၣ်တဂၤလၢအဘၣ်တၢ်ပာ်မၢ်ကွံာ်အီၤန့ၣ်, မ့ၢ်အမၤကမၣ်ပှၤဂၤအမါလီၤ.
ပှၤထူးပှၤတီၤဒီးစီၤလါစရူး
19“တဘျီန့ၣ်, ပှၤထူးပှၤတီၤအိၣ်ဝဲတဂၤလၢအကူအသိးတၢ်ကူတၢ်ကၤအပှ့ၤဒိၣ်ကတၢၢ် တဖၣ်ဒီးမုာ်လၤဝဲလၢတၢ်အီၣ်အမူးဖးဒိၣ်အပူၤကိးနံၤဒဲးလီၤ. 20ပှၤဖှီၣ်ဖိယာ်ဖိအိၣ်စ့ၢ်ကီးဝဲတဂၤလၢအမံၤမ့ၢ်စီၤလါစရူး, လၢအအိၣ်ပှဲၤဒီးအပူၤလီၢ်ပူၤကျဲ, ဒီးဘၣ်တၢ်ဟဲစိာ်ညီနုၢ်အီၤဆူ ပှၤထူးပှၤတီၤတဂၤန့ၣ်အတြဲၤခီၣ်ထံး, 21အိၣ်ဒီးတၢ်ဆၢမုၢ်လၢ်လၢအကအီၣ်ဘၣ်တၢ်အီၣ်လၢအလီၤဆှု လၢပှၤထူးပှၤတီၤတဂၤအံၤအစီၢ်နီၤခိၣ်န့ၣ်လီၤ. ထွံၣ်တဖၣ်ဒၣ်လဲာ်ဟဲဒီးလ့ၣ်အဝဲဒၣ်အပူၤလီၢ်ပူၤကျဲတဖၣ်လီၤ. 22ပှၤဖှီၣ်ဖိယာ်ဖိတဂၤအံၤသံဝဲ, ဒီးဘၣ်တၢ်စိာ်ထီၣ်အီၤလၢကလူး တဖၣ်ဆူ စီၤအၤဘြၤဟၣ်အကပၤ, ဖဲတၢ်အီၣ်အမူးလၢမူခိၣ်န့ၣ်လီၤ. ပှၤထူးပှၤတီၤစ့ၢ်ကီးသံဝဲ, ဒီးဘၣ်တၢ်ခူၣ်လီၤအီၤလီၤ. 23လၢပျုၤပူၤဖဲအဝဲဒၣ်ဘၣ်တူၢ်တၢ်နးမးန့ၣ်, အဝဲကွၢ်ထီၣ်တၢ်ဒီးထံၣ်စီၤအၤဘြၤဟၣ်လၢအယံၤ, အိၣ်ဒီးစီၤလါစရူးလၢအကပၤလီၤ. 24လၢတၢ်န့ၣ်အဃိအဝဲဒၣ်ကိးထီၣ်ဝဲ, ‘ပၢ်စီၤအၤဘြၤဟၣ်ဧၢ, သူၣ်ကညီၤသးကညီၤယၤ ဒီးမၢစီၤလါစရူးဘျၢလီၤအစုမုၢ် အစိးနါလၢထံကျါဒီးဟဲမၤခုၣ်လီၤယပျ့ၤန့ၣ်တက့ၢ်. အဂ့ၢ်ဒ်အံၤ, ယအိၣ်လၢတၢ်ဘၣ်တူၢ်တၢ်နးမးအပူၤ, လၢမ့ၣ်အူတခါအံၤအပူၤလီၤ.’ 25ဘၣ်ဆၣ်ဒီးစီၤအၤဘြၤဟၣ်စံးဝဲ, ‘ယဖိခွါဧၢ, သ့ၣ်နီၣ်ထီၣ်တက့ၢ်. လၢနတၢ်အိၣ်မူအဆၢကတီၢ်န့ၣ်, နဘၣ်တၢ်ဟ့ၣ်နၤလၢကယဲၢ်တၢ် အဂ့ၤတဖၣ်, မ့မ့ၢ်စီၤလါစရူးတခီဒိးန့ၢ်ဘၣ်ကယဲၢ်မ့ၢ်တၢ်အအၢ တဖၣ်လီၤ. ဘၣ်ဆၣ်ဒီးခဲကနံၣ်အံၤ, အဝဲအနီၢ်ကစၢ်ဒၣ်ဝဲအိၣ်မုာ်အိၣ်ပၢၤဖဲတၢ်လီၢ်တပူၤအံၤ, မ့မ့ၢ်နၤတခီနအိၣ်လၢတၢ်ဘၣ်တူၢ်တၢ်အပူၤလီၤ. 26လၢန့ၣ်အမဲာ်ညါ, တၢ်ပူၤဖးယိာ်အိၣ်ဝဲဒၣ်လၢပဘၢၣ်စၢၤတပူၤ, သတးဒီးပှၤအိၣ်ဖဲအံၤတဖၣ်မ့ၢ်အဲၣ်ဒိးလဲၤခီဂာ်ဆူသုအိၣ် န့ၣ်လဲၤဝဲတသ့ဘၣ်. ဒီးပှၤအိၣ်လၢသုအိၣ်ဖဲန့ၣ်တဖၣ်ဟဲခီဃီၤဆူပအိၣ် တသ့စ့ၢ်ကီးဘၣ်န့ၣ်လီၤ.’ 27ပှၤထူးပှၤတီၤစံးဝဲ, ‘မ့မ့ၢ်ဒ်န့ၣ်ဒီး, ပၢ်ဧၢ, ယဃ့ကညးနၤ, ဆှၢလီၤစီၤလါစရူးဆူယပၢ်အဟံၣ် 28ဖဲယဒီပုၢ်ဝဲၢ်ပိာ်ခွါအိၣ်ဝဲယဲၢ်ဂၤန့ၣ်တက့ၢ်. ပျဲအဝဲဒၣ်လဲၤဒီးဟ့ၣ်ပလီၢ်အဝဲသ့ၣ်, ဒ်သိးအဝဲသ့ၣ်အသုတဟဲဘၣ်စ့ၢ်ကီးဖဲတၢ်ဘၣ်တူၢ်တၢ်အလီၢ်တတီၤ အံၤတဂ့ၤန့ၣ်တက့ၢ်.’ 29စီၤအၤဘြၣ်ဟၣ်စံးဝဲ, ‘နဒီပုၢ်ဝဲၢ်ပိာ်ခွါတဖၣ်အိၣ်ဒီးစီၤမိၤၡ့ ဒီးဝံအတၢ်ကွဲးတဖၣ်လၢအကဟ့ၣ်ပလီၢ်အဝဲသ့ၣ်အဂီၢ်လီၤ. မ်နဒီပုၢ်ဝဲၢ်ပိာ်ခွါတဖၣ်ဒိကနၣ်အဝဲသ့ၣ်အတၢ်ကတိၤတက့ၢ်.’ 30ပှၤထူးပှၤတီၤစံးဆၢဝဲ, ‘ပၢ်အၤဘြၤဟၣ်ဧၢ, တၢ်န့ၣ်တလၢတပှဲၤဒံးဘၣ်. မ့ၢ်ပှၤတဂၤဂၤမ့ၢ်ဂဲၤဆၢထၢၣ်က့ၤလၢတၢ်သံဒီး လဲၤဆူအဝဲသ့ၣ်အအိၣ်န့ၣ်, အဝဲသ့ၣ်ကဃၣ်ကွံာ်အသးလၢအတၢ်ဒဲးဘးတဖၣ်လီၤ.’ 31ဘၣ်ဆၣ်ဒီးစီၤအၤဘြၤဟၣ်စံးဝဲ, ‘အဝဲသ့ၣ်မ့ၢ်တစူၢ်စီၤမိၤၡ့ဒီးဝံတဖၣ်အတၢ်ကွဲးန့ၣ်, ပှၤတဂၤမ့ၢ်ဂဲၤဆၢထၢၣ်က့ၤလၢတၢ်သံသနာ်က့, တမ့ၢ်အဝဲသ့ၣ်ကစူၢ်ကနာ်တၢ်ဘၣ်.’ ”
Одоогоор Сонгогдсон:
လံာ်လူၤကၣ် 16: KSWC
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Sgaw Karen Common Bible © Bible Society of Myanmar, 1992.