လံာ်မၢ်ကူး 5
5
ယ့ၣ်ၡူးမၤဘျါက့ၤပှၤတဂၤလၢ တၢ်နါတဖၣ်ဒိးအီၤ
(မး. ၈:၂၈-၃၄; လူၤ. ၈:၂၆-၃၉)
1ယ့ၣ်ၡူးဒီးအပျဲၢ်အဘီၣ်တဖၣ်ခီဃီၤပီၣ်လဲၣ်ကၤလံၤလါ ဒီးလဲၤတုၤဝဲလၢပီၣ်လဲၣ်ဝၢ်ဘးခီ, လၢပှၤကဒါရၤဖိအကီၢ် ပူၤလီၤ. 2အဝဲဒၣ်စံၣ်လီၤလၢချံပူၤတယံာ်ဘၣ်ဒီး ပှၤလၢတၢ်နါဒိးအီၤတဂၤဟးထီၣ်လၢတၢ်သွၣ်ခိၣ်အပူၤဒီးဟဲ သဂၢၢ်အီၤလီၤ. 3ပှၤတဂၤအံၤအိၣ်ဝဲဆိးဝဲလၢပှၤသွၣ်ခိၣ်အပူၤ ဒီးပှၤစၢဃာ်အီၤလၢပျံၤထးဒၣ်လဲာ်တန့ၢ်ဘၣ်နီတဂၤဘၣ်လီၤ. 4အဂ့ၢ်ဒ်လဲၣ်န့ၣ်အဝဲဒၣ်အစုဘၣ်တၢ်စၢဃာ်အီၤဒီးအခီၣ်ဘၣ် တၢ်ကျီၤဃာ်အီၤလၢပျံၤထးတဘျုးဘျီဘၣ်ဆၣ်ဒီးအဝဲဒၣ်ထဲး တဲာ်ဒီးဘိးကၢ်ကွံာ်ဝဲဒၣ်ကိးဘျီဒဲးလီၤ. အဝဲဒၣ်အဂံၢ်အဘါဆူၣ်တုၤဒၣ်လဲာ်ပှၤမၤဘှါအီၤတန့ၢ်နီ တဂၤဘၣ်. 5လၢမုၢ်နၤဒီးမုၢ်ဆါန့ၣ်, အဝဲဟးဝ့ၤဝီၤလၢပှၤသွၣ်ခိၣ်အပူၤတဖၣ်ဒီးတၢ်လူၢ်ဖိတဖၣ် အကျါ, ကိးပသူကိးပသီထီၣ်ဝဲဒီးဂဲာ်လီၤအသးလၢ လၢၢ်အက့အခီတဖၣ်လီၤ.
6အဝဲဒၣ်ထံၣ်စိဃီၤယ့ၣ်ၡူးလၢအယံၤဒီးဃ့ၢ်ဃီၤဝဲဆူအအိၣ် ဒီးချံးခီၣ်တီၤလီၤဝဲလၢအမဲာ်ညါလီၤ. 7ဒီးကိးပသူထီၣ်လၢအကလုၢ်ဖးဒိၣ်ဒီးစံးဝဲ, “ယွၤလၢအဒိၣ်ကတၢၢ်ထီကတၢၢ်တဂၤအဖိခွါယ့ၣ်ၡူးဧၢ, မ့ၢ်နဘၣ်ဃးဒီးယၤဒ်လဲၣ်. ယဃ့ကညးနၤလၢယွၤအမဲာ်ညါမၤအၢမၤနးယၤတဂ့ၤ.” 8(စံးတၢ်ဒ်အံၤမ့ၢ်လၢယ့ၣ်ၡူးစံးဘၣ်တ့ၢ်အီၤ, “တၢ်နါအၢတဒုဧၢ, ဟးထီၣ်ကွံာ်လၢပှၤတဂၤအံၤအပူၤတက့ၢ်” အဃိလီၤ.)
9အန့ၣ်ဒီးယ့ၣ်ၡူးသံကွၢ်အီၤ, “နမံၤဒ်လဲၣ်.” အဝဲစံးဆၢက့ၤဝဲ, “ယမံၤမ့ၢ်လ့းကူၣ်လီၤ. အဂ့ၢ်မ့ၢ်လၢပအိၣ်အါဒုအဃိလီၤ.” 10ဒီးအဝဲဒၣ်ဃ့ကညးယ့ၣ်ၡူးသပှၢ်ပှၢ်လၢ အသုတမၢအဟးထီၣ်ကွံာ်လၢကီၢ်န့ၣ်အပူၤတဂ့ၤလီၤ.
11ဖဲတယံၤတဘူးဒီးတၢ်လီၢ်န့ၣ်, တၢ်လူၢ်ဖိ အိၣ်ဝဲတလူၢ်ဒီးထိးတဖုအီၣ်အဆၣ်ဖဲတၢ်လူၢ်န့ၣ်အလိၤလီၤ. 12အန့ၣ်ဒီးတၢ်နါတဖၣ်ဃ့ကညးယ့ၣ်ၡူးဒီးစံးဝဲ, “ပျဲပလဲၤဆူထိးတဖၣ်အအိၣ်ဒ်သိးပကနုာ်ဆူအပူၤတက့ၢ်.” 13ယ့ၣ်ၡူးပျဲအဝဲသ့ၣ်မၤဒ်အဃ့ဝဲအသိးလီၤ. ဖဲန့ၣ်တၢ်နါအၢတဖၣ်ဟးထီၣ်ကွံာ်လၢပှၤတဂၤန့ၣ် အလိၤဒီးလဲၤနုာ်ဝဲဆူထိးတဖၣ်အပူၤလီၤ. ထိးဒီတဖုညါလၢအနီၣ်ဂံၢ်အိၣ်ခံကထိဃၣ်ဃၣ်န့ၣ်, ဃ့ၢ်သဖှိလီၤလၢလ့ကဘျၣ်ကပၤလၢအလီၤဘံဆှိခိၣ်, ဆူပီၣ်လဲၣ်ပူၤဒီးလီၤအုးသံဝဲခဲလၢာ်လီၤ.
14ပှၤကွၢ်ထိးတဖၣ်ဃ့ၢ်ထီၣ်လၢတၢ်လီၢ်ဖဲန့ၣ်ဒီးစံးဘၣ်တဲဘၣ် တၢ်မၤအသးအဂ့ၢ်အကျိၤအံၤဆူပှၤအိၣ်လၢဝ့ၢ်ပူၤဒီးပှၤအိၣ်လၢ ခိတဖၣ်လီၤ. အန့ၣ်ဒီးပှၤဟဲဝဲဒ်သိးကထံၣ်ဘၣ်တၢ်မၤအသး နီၢ်နီၢ်မ့ၢ်တၢ်မနုၤလဲၣ်န့ၣ်လီၤ. 15တုၤအဝဲသ့ၣ်ဟဲတုၤဖဲယ့ၣ်ၡူးအိၣ်တၢ်အလီၢ်န့ၣ်, အဝဲသ့ၣ်ထံၣ်ဘၣ်ပှၤလၢတၢ်နါလ့းကူၣ်ဒိးတ့ၢ်အီၤ တဂၤဆ့ၣ်နီၤဖဲန့ၣ်အိၣ်ဒီးတၢ်ကူတၢ်သိးဒီးအသးဘၣ်လီၢ် ဘၣ်စးဂ့ၤဂ့ၤဘၣ်ဘၣ်သတးဒီး, အဝဲသ့ၣ်ပျံၤတၢ်ဖုးတၢ်လီၤ. 16ပှၤလၢအထံၣ်ဘၣ်တၢ်မၤအသးနီၢ်နီၢ်တဖၣ်စံးဘၣ်တဲဘၣ်ပှၤလၢ အဟဲကွၢ်တၢ်တဖၣ်ဘၣ်ဃးတၢ်မၤအသးဒီးပှၤလၢတၢ်နါဒိးအီၤတဂၤ, ဒီးထိးတဖၣ်အဂ့ၢ်အကျိၤလီၤ.
17သတးဒီးအဝဲသ့ၣ်တဖၣ်ဃ့ကညးယ့ၣ်ၡူးလၢအကဟးထီၣ်ကွံာ်လၢ အဝဲသ့ၣ်အိၣ်တၢ်အလီၢ်ကဝီၤန့ၣ်လီၤ.
18ဖဲယ့ၣ်ၡူးလဲၤနုာ်လီၤဆူချံပူၤအကတီၢ်ပှၤလၢတၢ်နါဒိးတ့ၢ်အီၤတဂၤ န့ၣ်ဃ့ကညးအီၤဒီးစံးဝဲ, “ပျဲယလဲၤတၢ်ဒီးနၤတက့ၢ်.”
19ဘၣ်ဆၣ်ဒီးယ့ၣ်ၡူးတပျဲအီၤဘၣ်. မ့မ့ၢ်စံးဘၣ်အီၤ, “က့ၤက့ၤဆူနဟံၣ်နဃီဒီးတဲဘၣ်ပှၤအိၣ်ဒီးနၤတဖၣ်လၢ ကစၢ်မၤတ့ၢ်တၢ်လၢနဂီၢ်ဆံးအါဒီးအတၢ်သးကညီၤအိၣ်တ့ၢ်လၢနဖီ ခိၣ်ဆံးအါလဲၣ်န့ၣ်တက့ၢ်.”
20အန့ၣ်ဒီးပှၤတဂၤန့ၣ်ဟးထီၣ်ကွံာ်ဖဲန့ၣ်ဝံၤလဲၤခီဂာ်ဒ့းကၤပလံၣ် လၢအမ့ၢ်ဝ့ၢ်အဖျၢၣ်တဆံအတၢ်ပၢ ဒီကီၢ်ညါဒီးစံးဘၣ်တဲဘၣ်တၢ်လၢယ့ၣ်ၡူးမၤလၢအဂီၢ်တဖၣ်လီၤ. ဒီးကယဲၢ်ပှၤလၢအနၢ်ဟူဘၣ်တၢ်ဂ့ၢ်န့ၣ်ကမၢကမၣ်ဝဲဒိၣ်မးလီၤ.
စီၤယၤအ့ၤရူးအဖိမုၣ်ဒီးပိာ်မုၣ်လၢအထိးဘၣ် ယ့ၣ်ၡူးအဆ့ကၤ
(မး. ၉:၁၈-၂၆; လူၤ. ၈:၄၀-၅၆)
21ယ့ၣ်ၡူးဒိးထီၣ်ချံဒီးခီဃီၤကဒါက့ၤဆူပီၣ်လဲၣ်ဝၢ်ဘးခီ လီၤ. တုၤအတုၤလၢဘးခီဒီးအိၣ်ဒံးလၢပီၣ်လဲၣ်နံၤအဖၢမုၢ်န့ၣ် ပှၤဂီၢ်မုၢ်ဖးဒိၣ်ဟဲအိၣ်ဝးတရံးအီၤလီၤ. 22အကတီၢ်ဖဲန့ၣ်, ဘူၣ်ဘျီၣ်လၢအမ့ၢ်တၢ်ဘါလီၢ်အခိၣ်လၢ အမံၤမ့ၢ်ဝဲစီၤယၤအ့ၤရူးတဂၤဟဲတုၤဝဲဒီး တုၤအထံၣ်ယ့ၣ်ၡူးဒီးထိၣ်လီၤပှီၤအသးလၢအမဲာ်ညါဝံၤ 23ဃ့ကညးအီၤသပှၢ်ပှၢ်ဒီးစံးဝဲ, “ယဖိမုၣ်ဖိဆါနးမးဒီးဘူးတ့ၢ်မးလၢအကသံလီၤ. ဝံသးစူၤဟဲဒီးပာ်နစုလၢအလိၤဒ်သိးကဘျါက့ၤဝဲဒီးကအိၣ် မူဘၣ်ဒံးဝဲအဂီၢ်န့ၣ်တက့ၢ်.”
24အန့ၣ်ဒီးယ့ၣ်ၡူးလဲၤသကိးဒီးအီၤလီၤ. ပှၤလၢအပိာ်ထီၣ်ယ့ၣ်ၡူးအခံအိၣ်အါအါဂီၢ်ဂီၢ်တုၤဒၣ်လဲာ် ဘၣ်တၢ်ဆီၣ်သနံးအီၤကိးကပၤဒဲးလီၤ.
25အကတီၢ်ဖဲန့ၣ်, ပှၤပိာ်မုၣ်အိၣ်ဝဲတဂၤလၢအအိၣ်ဒီး တၢ်ဆါသွံၣ်လီၤတဆံခံနံၣ်လီၤ. 26ကသံၣ်သရၣ်အါဂၤဂုာ်ကျဲးစၢးမၤဘျါအီၤဒီးအဝဲဒၣ်အကျိၣ် အစ့လၢာ်ကွံာ်ခဲလၢာ်သနာ်က့, အတၢ်ဆါန့ၣ်တကိညၢ်အမဲာ်ညါနးထီၣ်ကွ့ၢ်ကွ့ၢ်လီၤ. 27အဝဲဒၣ်နၢ်ဟူတ့ၢ်လံယ့ၣ်ၡူးအဂ့ၢ်သတးဒီးဝာ်နုာ်ဖျိပှၤဂီၢ် မုၢ်ဆူယ့ၣ်ၡူးအလီၢ်ခံဒီးထိးဘၣ်အဆ့ကၤလၢအစုလီၤ. 28အဂ့ၢ်ဒ်အံၤစံးလီၤအသး “ယမ့ၢ်ထိးဘၣ်ထဲအကူအသိးဒီးယကဘျါက့ၤယဲလီၤ.”
29တကီၢ်ခါအတၢ်ဆါသွံၣ်လီၤန့ၣ် တုာ်ဝဲဒီးသ့ၣ်ညါဝဲလၢအတၢ်ဆါဘျါက့ၤဝဲလံန့ၣ်လီၤ. 30တဘျီဃီဖဲန့ၣ်ယ့ၣ်ၡူးသ့ၣ်ညါလၢတၢ်စိတၢ်ကမီၤဟးထီၣ်ကွံာ် လၢအပူၤသတးဒီးဃၣ်ကဒါက့ၤအသးဆူပှၤဂီၢ်မုၢ်အအိၣ် ဒီးသံကွၢ်ဝဲ, “မ့ၢ်မတၤတဂၤထိးဘၣ်ယဆ့ကၤလဲၣ်.”
31အပျဲၢ်အဘီၣ်တဖၣ်စံးဆၢအီၤ, “နထံၣ်ပှၤဂီၢ်မုၢ်ဆီၣ်သနံးနၤထဲအံၤညါန့ၣ် မ့ၢ်နစံးဒံးလၢမတၤထိးယၤတဂၤလဲၣ်န့ၣ်ဧါ.”
32ဘၣ်ဆၣ်ယ့ၣ်ၡူးကွၢ်တရံးတၢ်ဝးဝးလၢကထံၣ်ဘၣ်ပှၤလၢ အထိးဘၣ်တ့ၢ်အီၤတဂၤန့ၣ်လီၤ. 33အန့ၣ်တစုပိာ်မုၣ်တဂၤန့ၣ်မ့ၢ်လၢအသ့ၣ်ညါ လီၤအသးလၢအတၢ်ဆါဘျါက့ၤလံသတးဒီး, ဟဲထီၣ်ဆူတၢ်မဲာ်ညါလၢတၢ်ပျံၤတၢ်ဖုးဒီးတၢ်ကနိးကစုာ် အပူၤ, ချံးခီၣ်တီၤလီၤလၢယ့ၣ်ၡူးအမဲာ်ညါဒီးစံးဘၣ်တဲဘၣ်အီၤတၢ် မၤအသးနီၢ်နီၢ်တဖၣ်ခဲလၢာ်လီၤ. 34ယ့ၣ်ၡူးစံးဘၣ်အီၤ, “ဖိမုၣ်ဧၢ, နတၢ်နာ်န့ၣ်မၤဘျါက့ၤနၤလံ. က့ၤမုာ်မုာ်တက့ၢ်. နတၢ်ဆါဘျါလံ.”
35ဖဲယ့ၣ်ၡူးကတိၤတၢ်အဖၢမုၢ်, စီၤယၤအ့ၤရူးအပှၤဟံၣ်ဖိတနီၤဟဲတုၤဝဲဒီးစံးဘၣ်အီၤ, “နဖိမုၣ်သံလံ. ဘၣ်မနုၤနမၤတံာ်တာ်ဒံးသရၣ်လဲၣ်.”
36တၢ်လၢအဝဲသ့ၣ်တဖၣ်စံးဝဲန့ၣ်ယ့ၣ်ၡူးတကနၣ်ဃုာ်ဝဲဘၣ်ဒီးစံး ဘၣ်စီၤယၤအ့ၤရူး, “ပျံၤတၢ်တဂ့ၤ. ထဲနာ်တၢ်တက့ၢ်.” 37အန့ၣ်ဒီးအဝဲဒၣ်တပျဲပှၤအဂၤကလဲၤပိာ်အခံဆူညါနီတဂၤလၢၤဘၣ်. ပျဲဝဲထဲစီၤပ့းတရူးဒီးစီၤယၤကိာ်, ဒီးအဒီပုၢ်ဝဲၢ်စီၤယိၤဟၣ်ဧိၤလီၤ. 38တုၤအလဲၤတုၤဝဲလၢစီၤယၤအ့ၤရူးအဟံၣ်ဒီးယ့ၣ်ၡူးထံၣ်ဘၣ်တၢ် သဘံၣ်ဘုၣ်မၤအသးဒီးနၢ်ဟူတၢ်ဟီၣ်တၢ်ယၢၤဒီးတၢ်ကိးပသူကိး ပသီလီၤ. 39လဲၤနုာ်ဝဲဆူဟံၣ်ပူၤဒီးစံးဘၣ်ပှၤတဖၣ်န့ၣ်, “ဘၣ်မနုၤသုဘၣ်မၤသဘံၣ်ဘုၣ်တၢ်ဒီးဟီၣ်တၢ်ယၢၤတၢ် ထဲထဲအံၤန့ၣ်လဲၣ်. ဖိသၣ်မုၣ်တသံဘၣ်, မ့ၢ်ဒၣ်အမံဘၣ်အသး လီၤ.”
40အဝဲသ့ၣ်တဖၣ်နံၤဘၣ်ဖၣ်လဲအီၤလီၤ. အန့ၣ်ဒီးဟီထီၣ်ကွံာ်အဝဲသ့ၣ်ခဲလၢာ်ဆူခိဝံၤကိးနုာ်ထဲဖိ သၣ်အမိၢ်အပၢ်ဒီးအပျဲၢ်အဘီၣ်သၢဂၤဒီးလဲၤနုာ် လီၤဝဲဆူဖိသၣ်အိၣ်မံလီၤဝဲအဒၢးပူၤလီၤ. 41အဝဲဒၣ်ဟံးထီၣ်ဖိသၣ်မုၣ်န့ၣ်လၢအစုဒီးစံးဘၣ်အီၤ, “တၤလံၤသၤကူမံၤ,” အခီပညီ “ပိာ်မုၣ်ဖိဧၢ, ယစံးဘၣ်နၤ, ဂဲၤဆၢထၢၣ်တက့ၢ်.”
42ဖိသၣ်မုၣ်န့ၣ်ဂဲၤဆၢထၢၣ်ဒီးဟးဝဲတဘျီဃီလီၤ. (အဝဲဒၣ်အသးအိၣ်တဆံခံနံၣ်လီၤ) တၢ်မၤအသးအံၤဒုးကမၢကမၣ်ပှၤတဖၣ်န့ၣ်ဒိၣ်မးလီၤ. 43ဘၣ်ဆၣ်ယ့ၣ်ၡူးမၤလိာ်အဝဲသ့ၣ်လၢတၢ်ကတိၤလၢအဆူၣ် ဒ်သိးအသုတစံးဘၣ်တဲဘၣ်တၢ်ဂ့ၢ်အံၤလၢပှၤနီတဂၤတဂ့ၤ, ဒီးမၢပှၤဟ့ၣ်ဒုးအီၣ်ဖိသၣ်န့ၣ်လၢတၢ်အီၣ်တမံၤမံၤလီၤ.
Одоогоор Сонгогдсон:
လံာ်မၢ်ကူး 5: KSWC
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Sgaw Karen Common Bible © Bible Society of Myanmar, 1992.