လံာ်မၢ်ကူး 7
7
မိၢ်ပၢ်ဖံဖုလၢပျၢၤအလုၢ်အလၢ်
(မး. ၁၅:၁-၉)
1ပှၤဖၤရံၤၡဲတဖၣ်ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတ နီၤလၢအဟဲလၢဝ့ၢ်ယရူၤၡလ့ၣ်တခီန့ၣ်, ဟဲဖှိၣ်သကိးဆူယ့ၣ်ၡူးအအိၣ်လီၤ. 2အဝဲသ့ၣ်ထံၣ်ဝဲလၢအပျဲၢ်အဘီၣ်တနီၤအီၣ်တၢ်အီတၢ်လၢအစုတကဆှီ ဘၣ်, အခီပညီ, အဝဲသ့ၣ်တသ့အစုဒ်တၢ်ဘူၣ်တၢ်ဘါအလုၢ်အလၢ် အိၣ်ဝဲအသိးဘၣ်အဃိလီၤ.
3(အဂ့ၢ်မ့ၢ်လၢပှၤဖၤရံၤၡဲဒီးပှၤယူဒၤဖိအဂၤတဖၣ်စ့ၢ်ကီး မၤဝဲဒ်မိၢ်ပၢ်ဖံဖုလၢပျၢၤအလုၢ်အလၢ်အသိးအဃိဒီး အဝဲသ့ၣ်မ့ၢ်တသ့ကဆှီဘၣ်အစုဒ်တၢ်သိၣ်တၢ်သီအိၣ်ဝဲအသိး ဘၣ်ဒီးတအီၣ်တၢ်နီတမံၤဘၣ်. 4တုၤအဝဲသ့ၣ်ဟဲက့ၤလၢဖၠါပူၤန့ၣ်, မ့တမ့ၢ်လၢအမၤကဆှီ ဘၣ်တၢ်အီၣ်လၢအဟဲက့ၤစိာ်ဝဲလၢဖၠါပူၤဘၣ်ဒီး အဝဲသ့ၣ် တအီၣ်ဝဲဘၣ်. မိၢ်ပၢ်ဖံဖုလၢပျၢၤအလုၢ်အလၢ်အဂၤလၢ အဝဲသ့ၣ်ဟံးဃာ်ဒီးမၤဝဲတဖၣ်အိၣ်ဒံးအါမံၤ, ဒ်တၢ်ကဘၣ်သ့ကဆှီလီခီ, သပၢၤ, လီခီတိၢ်ဘီဒီးလီၢ်မံခးတဖၣ်လၢကျဲအဘၣ်န့ၣ်လီၤ.)
5အန့ၣ်သတးဒီး ပှၤဖၤရံၤၡဲဒီးပှၤသ့တၢ်ဘူၣ်တၢ်ဘါ အတၢ်သိၣ်တၢ်သီတဖၣ်သံကွၢ်ယ့ၣ်ၡူးဒီးစံးဝဲ, “ဘၣ်မနုၤနပျဲၢ်နဘီၣ်တဖၣ်တအိၣ်မူဒ်မိၢ်ပၢ်ဖံဖုလၢပျၢၤ အလုၢ်အလၢ်အသိးဘၣ်, မ့မ့ၢ်အီၣ်တၢ်အီတၢ်လၢအစုလၢအတကဆှီဘၣ်န့ၣ်လဲၣ်.”
6ယ့ၣ်ၡူးစံးဆၢအဝဲသ့ၣ်, “ဝံယၡါယၤအတၢ်ကတိၤဆိပာ်လၢသုဂ့ၢ်န့ၣ်ဘၣ်မးလီၤ.
သုမ့ၢ်ပှၤပာ်မၤအသးတဖၣ်ဒ်အဝဲကွဲးတၢ်အသိး,
‘ကစၢ်ယွၤစံးဝဲပှၤသ့ၣ်တဖၣ်အံၤမၤလၤကပီၤယၤလၢ
အထးခိၣ်ဘၣ်ဆၣ်ဒီး
အသးတခီ အိၣ်ယံၤဒီးယၤလီၤ.
7အတၢ်ဘူၣ်ထီၣ်ဘါထီၣ်ယၤကဲတၢ်ကလီကလီ
မ့ၢ်လၢအဝဲသ့ၣ်သိၣ်လိပှၤကညီအတၢ်သိၣ်တၢ်သီတဖၣ် ဒ်ကစၢ်ယွၤအတၢ်သိၣ်တၢ်သီအသိးအဃိန့ၣ်လီၤ.’
8သုညိကွံာ်ကစၢ်ယွၤအတၢ်မၤလိာ်ဒီးဟံးဃာ်ဂၢၢ်ကျၢၤ ပှၤကညီအတၢ်သိၣ်တၢ်သီလီၤ.”
9ယ့ၣ်ၡူးစံးကဒီးဝဲ, “ဒ်သိးသုကဟံးဃာ်ဘၣ်သုတၢ်သိၣ်လိသီလိလၢ အဟဲလီၤစၢၤလၢမိၢ်ပၢ်ဖံဖုလၢပျၢၤတဖၣ်အအိၣ်အဂီၢ်န့ၣ်, သုဃုထံၣ်န့ၢ်ကျဲလၢသုကညိကွံာ်ကစၢ်ယွၤအတၢ်မၤလိာ်န့ၣ်သ့ဒိၣ်မးလီၤ. 10အဂ့ၢ်ဒ်အံၤစီၤမိၤၡ့မၤလိာ်သု, ‘ယူးယီၣ်နမိၢ်ဒီးနပၢ်တက့ၢ်.’ ဒီး ‘ပှၤတဂၤလၢ်လၢ်လၢအကတိၤအၢကတိၤသီအပၢ်မ့တမ့ၢ် အမိၢ်န့ၣ်, ကဘၣ်တၢ်စံၣ်ညီၣ်သံကွံာ်အီၤန့ၣ်လီၤ.’ 11ဘၣ်ဆၣ်ဒီးသုစံးသုဝဲ, ပှၤတဂၤမ့ၢ်တဲဘၣ်အမိၢ်မ့တမ့ၢ်အပၢ်လၢ တၢ်လၢအဝဲကြၢးဟ့ၣ်မၤစၢၤအဝဲသ့ၣ်တဖၣ်န့ၣ် ‘ကဲထီၣ်ကီၤဘၣ်လံ’ (အခီပညီ, ကဲထီၣ်ကစၢ်ယွၤအတၢ်လံ) န့ၣ်, 12ပှၤအဝဲန့ၣ်, တလိၣ်အမၤတၢ်လၢအပၢ်ဒီးအမိၢ်အဂီၢ်နီတမံၤ လၢၤဘၣ်န့ၣ်လီၤ. 13သုမၤဒ်အံၤန့ၣ်, မ့ၢ်သုဒုးကဲထီၣ်ကစၢ်ယွၤအကလုၢ်ကထါလၢတၢ် ကလီကလီခီဖျိသုဟ့ၣ်ယုၢ်လီၤမိၢ်ပၢ်ဖံဖုလၢပျၢၤ အတၢ်သိၣ်လိသီလိတဆီဘၣ်တဆီအဃိန့ၣ်လီၤ. ဒီးတၢ်ဒ်သိးအံၤလၢသုမၤအီၤန့ၣ်, အိၣ်အါမံၤလီၤ.”
တၢ်လၢအဒုးကဲထီၣ်ပှၤတဂၤလၢ အတကဆှီဘၣ်
(မး. ၁၅:၁၀-၂၀)
14အန့ၣ်ဝံၤယ့ၣ်ၡူးကိးဃီၤကဒီးပှၤဂီၢ်မုၢ်တဖၣ်ဆူအအိၣ်ဒီးစံးဝဲ, “သုဝဲသ့ၣ်ခဲလၢာ်ကနၣ်ယတၢ်ကတိၤဒီးနၢ်ပၢၢ်ဘၣ်တက့ၢ်. 15တၢ်လၢအလဲၤနုာ်ဆူပှၤကညီတဂၤအပူၤဒီးကဒုးကဲထီၣ် အီၤလၢပှၤတကဆှီဘၣ်န့ၣ်, တအိၣ်နီတမံၤဘၣ်. မ့မ့ၢ်တၢ်လၢအဟဲထီၣ်လၢပှၤကညီတဂၤအပူၤန့ၣ်, မ့ၢ်တၢ်လၢအဒုးကဲထီၣ်အီၤလၢပှၤတကဆှီဘၣ်တခီန့ၣ်လီၤ. 16(ပှၤလၢအအိၣ်ဒီးအနၢ်လၢအနၢ်ဟူတၢ်သ့န့ၣ်, မ်အဒိကနၣ်တၢ်တက့ၢ်.)”
17တုၤမ့ၢ်အဟးထီၣ်ကွံာ်လၢပှၤဂီၢ်မုၢ်အအိၣ်ဒီးက့ၤနုာ်ဝဲဆူဟံၣ်ပူၤန့ၣ်, အပျဲၢ်အဘီၣ်တဖၣ်သံကွၢ်အီၤတၢ်ကတိၤဒိအခီပညီန့ၣ်လီၤ. 18ယ့ၣ်ၡူးစံးဘၣ်အဝဲသ့ၣ်, “သုတၢ်သ့ၣ်ညါနၢ်ပၢၢ်တထီၣ်ဘးဒ်ပှၤဂၤတဖၣ်အသိးလီၤမးလဲၣ်. တၢ်အိၣ်လၢတၢ်ချၢလၢအလဲၤနုာ်ဆူပှၤတဂၤအပူၤ ဒီးကမၤတကဆှီအီၤတအိၣ်နီတမံၤဘၣ်န့ၣ်, သုတနၢ်ပၢၢ်ဘၣ်ဧါ. 19အဂ့ၢ်မ့ၢ်လၢအတလဲၤနုာ်ဆူအသးကံၢ်ပူၤဘၣ်, မ့မ့ၢ်လဲၤနုာ်ဝဲဆူအဟၢဖၢပူၤဝံၤဒီးဟးထီၣ်ကွံာ်ဝဲလၢ အနီၢ်ခိအပူၤလီၤ.” (ယ့ၣ်ၡူးစံးတၢ်ဒ်သိးအံၤန့ၣ်မ့ၢ်အတဲဖျါထီၣ်ဝဲလၢ တၢ်အီၣ်ခဲလၢာ်မ့ၢ်တၢ်လၢအကဆှီဝဲန့ၣ်လီၤ.)
20ဒီးစံးကဒီးဝဲ, “တၢ်လၢအဟဲထီၣ်လၢပှၤကညီတဂၤအပူၤန့ၣ်, မ့ၢ်တၢ်လၢအမၤတကဆှီဘၣ်အီၤန့ၣ်လီၤ. 21အဂ့ၢ်ဒ်လဲၣ်န့ၣ်, တၢ်လၢအဟဲထီၣ်လၢပှၤအသးကံၢ်ပူၤ မ့ၢ်တၢ်ဆိကမိၣ်အအၢအသီတဖၣ်လၢအဒုးမၤအီၤလၢတၢ်မၤ ကမၣ်မုၣ်ကမၣ်ခွါ, တၢ်ဟုၣ်တၢ်ဘျၣ်, တၢ်မၤသံပှၤကညီ, 22တၢ်အဲၣ်ဘၢမါအဲၣ်ဘၢဝၤ, တၢ်မၤတၢ်သူၣ်လီသးကွံတၢ်, တၢ်အၢတၢ်သီကိးကလုာ်ဒဲး, တၢ်လီတၢ်ဝ့ၤ, တၢ်တဃံတလၤ, တၢ်သးကါ, တၢ်ဒုၣ်ဒွဲၣ်စံးအၢ, တၢ်ပာ်ထီၣ်ထီသး, ဒီးတၢ်သူၣ်တဆးသးတဆးတဖၣ်လီၤ. 23တၢ်တဂ့ၤတဘၣ်တဖၣ်အံၤဟဲထီၣ်လၢပှၤကညီတဂၤအပူၤဒီး ဒုးကဲထီၣ်အီၤလၢပှၤတကဆှီဘၣ်တဂၤလီၤ.”
ပိာ်မုၣ်တဂၤအတၢ်စူၢ်တၢ်နာ်
(မး. ၁၅:၂၁-၂၈)
24အန့ၣ်ဝံၤယ့ၣ်ၡူးဟးထီၣ်ဖဲန့ၣ်ဒီးလဲၤဝဲဆူတၢ်လီၢ်ကဝီၤအိၣ်ဘူး ဒီးဝ့ၢ်ထါယၢၣ်ဒီးစံဒိၣ်လီၤ. လဲၤနုာ်ဝဲဆူဟံၣ်တဖျၢၣ်အပူၤ, ဒီးတအဲၣ်ဒိးလၢပှၤကသ့ၣ်ညါ န့ၢ်အီၤလၢအဝဲအိၣ်ဖဲန့ၣ်ဘၣ်. ဘၣ်ဆၣ်ဒီးအိၣ်ဝဲလၢတၢ်ခူသူၣ်ပူၤတန့ၢ်ဘၣ်. 25ပိာ်မုၣ်လၢအဖိမုၣ်ဖိတၢ်နါဒိးအီၤတဂၤန့ၣ်, နၢ်ဟူယ့ၣ်ၡူးအဂ့ၢ်တဘျီဃီဟဲဝဲဆူအအိၣ်ဒီးထိၣ်လီၤပှီၤ အသးဖဲအခီၣ်ထံးန့ၣ်လီၤ. 26ပိာ်မုၣ်န့ၣ်မ့ၢ်ပှၤကြံးခ်မုၣ်တဂၤလၢအအိၣ်ဖျဲၣ်ထီၣ်လၢ ဖံၤနံက့ၤဘၣ်ဃးဒီးကီၢ်စူၤရံန့ၣ်လီၤ. အဝဲဒၣ်ဃ့သကွံၢ်ကညးယ့ၣ်ၡူးလၢအကဟီထီၣ်ကွံာ် တၢ်နါလၢအဒိးအဖိမုၣ်န့ၣ်လီၤ. 27ဘၣ်ဆၣ်ဒီးယ့ၣ်ၡူးစံးဘၣ်အီၤ, “တၢ်အီၣ်န့ၣ်ပျဲပဒုးအီၣ်ဆိဖိတဖၣ်တက့ၢ်. ပကဟံးန့ၢ်ဖိအတၢ်အီၣ်ဒီးကွံာ်လီၤန့ၢ်ထွံၣ်တဖၣ် န့ၣ်တကြၢးဘၣ်.”
28အဝဲဒၣ်စံးဆၢက့ၤအီၤ, “မ့ၢ်ယၢာ်, ကစၢ်ဧၢ, ဘၣ်ဆၣ်ဒီးထွံၣ်အိၣ်လၢစီၢ်နီၤခိၣ်အဖီလာ်တဖၣ်ဒၣ်လဲာ် အီၣ်ဘၣ်ဝဲဖိတဖၣ်အတၢ်အီၣ်အိၣ်ဘျဲၣ်အိၣ်စဲၢ်တဖၣ်န့ၣ်လီၤ.”
29အန့ၣ်ဒီးယ့ၣ်ၡူးစံးဘၣ်အီၤ, “မ့ၢ်လၢနတၢ်ကတိၤတထံၣ်အံၤအဃိ, က့ၤမုာ်မုာ်ဆူနဟံၣ်န့ၣ်တက့ၢ်. နဖိမုၣ်န့ၣ်တၢ်နါဟးထီၣ်ကွံာ်လၢအလိၤလံ.”
30အဝဲဒၣ်က့ၤက့ၤဆူအဟံၣ်ဒီးထံၣ်ဘၣ်အဖိမုၣ်အိၣ်မံလီၤလၢ အလီၢ်မံခိၣ်ဒီးတၢ်နါဟးထီၣ်ကွံာ်လၢအလိၤလံန့ၣ်လီၤ.
ယ့ၣ်ၡူးမၤဘျါက့ၤပှၤနၢ်တအၢ ဒီးပှၤအုးအးတဂၤ
31အန့ၣ်ဝံၤယ့ၣ်ၡူးဟးထီၣ်လၢတၢ်လီၢ်ကဝီၤဘူးဒီးဝ့ၢ်ထါယၢၣ်, လဲၤခီဖျိဝ့ၢ်စံဒိၣ်ဆူပီၣ်လဲၣ်ကၤလံၤလါ, ဒီးလၢကျဲန့ၣ်လဲၤခီဂာ်ဘၣ်ဝဲဒ့းကၤပလံၣ်လၢအမ့ၢ်ဝ့ၢ် အဖျၢၣ်တဆံအတၢ်ပၢန့ၣ်လီၤ. 32ပှၤတနီၤဟဲကိးပှၤနၢ်တအၢဒီးအုးအးကတာ်ပျ့ၤတဂၤဆူအအိၣ်, ဒီးအဝဲသ့ၣ်ဃ့သကွံၢ်ကညးယ့ၣ်ၡူးဒ်သိးအကပာ်ထီၣ်အစုလၢအလိၤ အဂီၢ်လီၤ. 33အန့ၣ်ဒီးယ့ၣ်ၡူးမိၤထီၣ်အီၤထဲတဂၤဧိၤစီၤစုၤဒီးကမျၢၢ်အိၣ်တၢ်အလီၢ်, ဆွံနုာ်အစုနၢတဖၣ်လၢအနၢ်ခံခီလၢာ်အပူၤဝံၤထုးထီၣ်က့ၤအီၤ, ဒီးထူးပှဲာ်လီၤအစုနၢ, ဒီးထိးဘၣ်အဝဲဒၣ်အပျ့ၤန့ၣ်လီၤ. 34အန့ၣ်ဝံၤ, ယ့ၣ်ၡူးကွၢ်ထီၣ်တၢ်ဆူမူခိၣ်, ကအုထီၣ်ဝဲဒီးစံးဘၣ်ပှၤတဂၤန့ၣ်, “အ့ၤဖၤသါ” အခီပညီ, “အိးဟိထီၣ်တက့ၢ်,” န့ၣ်လီၤ.
35တဘျီဃီပှၤတဂၤန့ၣ်နၢ်ဟူထီၣ်က့ၤတၢ်, အပျ့ၤအထူၣ်အပျၢ်လီၤကဆှၣ်ကွံာ်, ဒီးကတိၤထီၣ်က့ၤတၢ်သ့ဝဲဂ့ၤဂ့ၤဘၣ်ဘၣ်န့ၣ်လီၤ. 36ဝံၤဒီးယ့ၣ်ၡူးမၤလိာ်အဝဲသ့ၣ်ဒ်သိးအသုတစံးဘၣ်တဲဘၣ်တၢ် ဂ့ၢ်အံၤလၢပှၤနီတဂၤတဂ့ၤလီၤ. ဘၣ်ဆၣ်ဒီးဒံးမၤလိာ်ဝဲသပှၢ်ပှၢ်, အဝဲသ့ၣ်ရၤလီၤတၢ်ကစီၣ်ဒ်အါထီၣ်တခီန့ၣ်လီၤ. 37အဝဲသ့ၣ်တဖၣ်န့ၣ်တၢ်လီၤကမၢကမၣ်ဘၣ်အီၤဒိၣ်မးဒီးစံးဝဲ, “အဝဲဒၣ်တဂၤအံၤ, မၤတၢ်ကိးမံၤဒဲးသ့ဝဲဂ့ၤဂ့ၤဘၣ်ဘၣ်လီၤ. ပှၤလၢအနၢ်တအၢဒၣ်လဲာ်န့ၣ်ဒုးနၢ်ဟူထီၣ်က့ၤဝဲတၢ်, ဒီးပှၤလၢအအုးအးန့ၣ်ဒုးကတိၤထီၣ်က့ၤဝဲတၢ်လီၤ.”
Одоогоор Сонгогдсон:
လံာ်မၢ်ကူး 7: KSWC
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Sgaw Karen Common Bible © Bible Society of Myanmar, 1992.