Gha ta Wəshi 1
1
GHA TA VƏ
1–11
Shala kapa pɛtɛa wəshi ba'a wəndə ŋelɛ
1Ma te gha ta və ne, pa Shala pate yɛ ghweme le hɛɗi. 2Pa shɛ kese va hɛɗi we, shalala se ŋkɛ. Ŋkwesle ya zhiɓə kənəa ndərə nya wəba. Sefəa Shala nde gavele dzeyi kənəa yɛ yɛmə. 3Tagha gɛ, ma ke Shala: «Nza waŋe shɛ!» Pa waŋe menete geva. 4Newe ke Shala ne, ganyɛke waŋea shɛ, pa ŋkɛ nehemte yɛ waŋe le ŋkwesle. 5Pa Shala hekate waŋe kaveci, pa ŋkɛ hekate ŋkwesle kaviɗi. Pa tɛhwɛɗi menete geva, ghwɛaɗɛaɗɛa ŋkwa kiɗinyɛ: kwa ghate ta hɛ ŋkɛ.
6Ma ke Shala zhɛkwa: «Veyi geva ŋkwa kala kwalekwə nya medzəɓə kwelɛ tepe ta yɛ yɛmə kezha nehe hɛ bake mbe!» 7Pa Shala veyi ŋkwa nya kenehemte yɛ yɛmə nyi kwake kwake le nyi pelɛghə. 8Pa Shala ndeke nda slə ke ŋkwa nya te ghəa shɛ kaghweme. Pa tɛhwɛɗi menete geva, ghwɛaɗɛaɗɛa ŋkwa kiɗinyɛ: kwa bake ta hɛ ŋkɛ. 9Ma ke Shala zhɛkwa: «Tsenete geva yɛmə nyi kwake yitea ghweme te ŋkwa nya kwetɛŋe yitea ncake geva ŋkwa nya keghwele ghwele!» Pa wəsəa shɛ menete geva kala nyagha. 10Pa Shala hekate nda slə ke ŋkwa nya keghwele ghwelea shɛ kahɛɗi, pa ŋkɛ hekate yɛmə nyi ketsenete geva kandərə. Ma kwa nakɛ Shala ne, ganyɛke ŋkɛ. 11Tagha gɛ, ma ke Shala: «Pesete geva wəshi te hɛɗi: mama ta gwəzə ba'a wəfe nyi keya, nyi nza mama ta felehwe ta nci mbe ya ta nci!» Pa ŋkɛ menete geva kala nyagha. 12Pəɗəfə wəshi pesete geva te hɛɗi: gwəzə nyi nza ya ta nci kala mama ta nci ba'a wəfe nyi keya kala mama ta nci. Ma kwa nakɛ Shala ne, ganyɛke ŋkɛ. 13Pa tɛhwɛɗi menete geva, ghwɛaɗɛaɗɛa ŋkwa kiɗinyɛ: kwa maheke ta hɛ ŋkɛ.
14Ma ke Shala zhɛkwa: «Menete geva wəshi nyi kewaŋe ŋkwa pelɛ ghweme kezha nehe yɛ veci le viɗi. Nza hɛ kawəshi kencɛ yɛ gəsəkə, yɛ hɛ ba'a va nyi keɓela geva 15ba'a yitea ve nda waŋe hɛ ke hɛɗi sawa pelɛ ghweme!» Pa ŋkɛ menete geva kala nyagha. 16Pa Shala pate wəshi nyi kewaŋe ŋkwa nyi jama jama bake: ma nya kwele ne, kezha sleke ŋkwa nya heveci. Ma nya ɓɛhwɛ, kezha sleke ŋkwa nya heviɗi, pa ŋkɛ pate yɛ saseregwa perə. 17Pa Shala veyi hɛ pelɛ ghweme kezha ve nda waŋe ke hɛɗi, 18kezha sleke ŋkwa nya heveci le nya heviɗi ba'a kezha nehe yɛ waŋe le ŋkwesle. Ma kwa nakɛ Shala ne, ganyɛke ŋkɛ. 19Pa tɛhwɛɗi menete geva, ghwɛaɗɛaɗɛa ŋkwa kiɗinyɛ: kwa wəfaɗe ta hɛ ŋkɛ.
20Ma ke Shala zhɛkwa: «Menete geva ŋkɛ kanza mama ta wəshi nyi nza mpi hwe kwa ndərə ba'a zlə yɛ 'yɛ yitea ghweme kənəa hɛɗi!» 21Pa Shala pate wəshi keseɗa nyi jama jama kwa ndərə ba'a mama ta wəshi keseɗa nyi kedzeghwa mbe yɛmə kwele kwele, pa ŋkɛ pate mama ta 'yɛ. Ma kwa nakɛ Shala ne, ganyɛke ŋkɛ. 22Pa Shala wəpikɛ hɛ, ma ke: «Yate mə ya, mbakete mə geva, viɗikɛ mə yɛmə nyi kwa yɛ ndərə ba'a yate ya yɛ 'yɛ kwele kwele te hɛɗi!» 23Pa tɛhwɛɗi menete geva, ghwɛaɗɛaɗɛa ŋkwa kiɗinyɛ: kwa mcɛfe ta hɛ ŋkɛ.
24Ma ke Shala zhɛkwa: «Yate ya mama ta wəshi keseɗa te hɛɗi: wəshi keseɗa nyi ki ghɛ, wəshi keseɗa nyi ɓɛhwɛ ɓɛhwɛ ba'a wəshi keseɗa nyi hwa gamba, kala mama ta nci!» Pa ŋkɛ menete geva kala nyagha. 25Tsagha pate mama ta wəshi keseɗa nyi hwa gamba, mama ta wəshi keseɗa nyi ki ghɛ ba'a mama ta wəshi keseɗa nyi ɓɛhwɛ ɓɛhwɛ Shala. Ma kwa nakɛ Shala ne, ganyɛke ŋkɛ. 26Ma ke Shala: «Pate ɓəmə wəndə ŋelɛ kala ghəa ɓəmə, kala pa ta ɓəmə. Nza hɛ kaka sleke kelepe nyi kwa ndərə, 'yɛ nyi yitea ghweme, wəshi keseɗa nyi jama jama ba'a wəshi keseɗa nyi ɓɛhwɛ ɓɛhwɛ nyi kedzeghwa te hɛɗi!»
27Pa Shala pate wəndə ŋelɛ kala pa ta ŋkɛ,
kala pa ta Shala pate ŋkɛ.
Yɛ za le male pate hɛ ŋkɛ.
28Pa Shala wəpikɛ hɛ, ma ke sha hɛ: «Yate mə ya ba'a mbakete mə geva kwele kwele, viɗikɛ mə hɛɗi ba'a sleke mə ŋkɛ. Nza mə kaka sleke kelepe nyi kwa ndərə, 'yɛ nyi yitea ghweme ba'a pɛtɛa wəshi keseɗa nyi kedzeghwa te hɛɗi!» 29Ma ke Shala zhɛkwa: «'Ya kave ŋayɛ yayata gwəzə nya keya te hɛɗi ba'a yayata wəfe nya nza felehwe ta ŋkɛ mbe ya ta ŋkɛ. Kawəshi kezeme ta ŋayɛ tenza hɛ. 30Kave nda gwəzə kwa menjaɓa 'ya ke pɛtɛa wəshi keseɗa nyi te hɛɗi, yɛ 'yɛ nyi yitea ghweme, yayata wəsə nya kedzeghwa te hɛɗi ba'a nya nza mpi hwe kawəsə kezeme.» Pa ŋkɛ menete geva kala nyagha. 31Ma newe ke Shala sha wəshi nyi menete ŋkɛ ne, zlahe ganyɛa nci. Pa tɛhwɛɗi menete geva, ghwɛaɗɛaɗɛa ŋkwa kiɗinyɛ: kwa ŋkwaŋe ta hɛ ŋkɛ.
Одоогоор Сонгогдсон:
Gha ta Wəshi 1: BEKDC12
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
La Bible en langue Kapsiki avec les livres deutérocanoniques © Alliance Biblique du Cameroun 2012.