Matei 4
4
Yesu ilingiwa na Setani
(Maluko 1:12-13; Luka 4:1-13)
1Kangi Mpungu Msopi wamlongwisi Yesu mbaka kulugangatu muni alingiwa na Setani. 2Ajihinisi chakulya lukumbi lwa magono alobaini kilu na muhi pamwishu njala yamvinili. 3Hinu Setani akabwela na kumjovela, “Ngati veve wa Mwana wa Chapanga amula aga maganga gavyai libumunda.”
4Nambu Yesu akayangula, “Yiyandikwi mu Mayandiku Gamsopi, ‘Mundu itama lepi ndava ya libumunda lene, nambu kwa kulanda kila lilovi leijova Chapanga.’ ”
5Kangi Setani akamtola Yesu mbaka Yelusalemu weuvi muji wa msopi, akamkita ayima panani pa chituvilu cha Nyumba ya Chapanga, 6akamjovela, “Ngati veve mwana wa Chapanga ujitagayi pahi, ndava vayandiki,
‘Chapanga akuvalagazila vamitumu va kunani kwa Chapanga ndava yaku,
Yati vakukuyanga mu mawoko gavi,
ukotoka kujikuvala chigendelu chaku paliganga.’ ”
7Yesu akamyangula, mewawa “Mayandiku Gamsopi gijova, ‘Kotoka kumlinga Bambu Chapanga waku.’ ”
8Kangi Setani akamtola na kuhamba nayu panani pachitumbi chitali, na kumlangisa unkosi woha wa pamulima na ukulu waki, 9akamjovela, “Goha aga yati nikupela, ngati ukunigundamila na kunifugamila.”
10Penapo, Yesu akayangula, “Wuka Setani! Vayandiki, mu Mayandiku Gamsopi yati ‘Umgundamila Bambu Chapanga waku, na kumhengela mwene ndu!’”
11Hinu Setani, akamleka Yesu na vamitumu va kunani kwa Chapanga vakabwela vakamhengela.
Yesu itumbula lihengu laki ku Galilaya
(Maluko 1:14-15; Luka 4:14-15)
12Yesu peayuwini kuvya Yohani vamkungili muchifungu akahamba ku Galilaya. 13Akawuka ku Nazaleti akahamba ku Kapelanaumu, muji wa kumwambu ya nyanja Galilaya mumilima ya Zebuloni na Nafutali, akatama kwenuko. 14Ndi gatimili gala geajovili Isaya, mweavi mlota wa Chapanga,
15“Mulima wa Zebuloni na mulima wa Nafutali,
njila ya kuhamba kunyanja mwambu ya mumfuleni Yoludani,
Galilaya muji wa vandu vangali Vayawudi!
16Vandu vevatami kuchitita.
Vauweni lumuli luvaha.
Vene vitama mumuji wa chitita na chimuwili cha lifwa,
lumuli luvalangasili.”
17Kuhumila lukumbi lwenulo Yesu atumbwili kukokosa, “Mumuwuyila Chapanga, muni Unkosi wa kunani kwa Chapanga uvi papipi!”
Yesu avakemela vevilova somba mcheche
(Maluko 1:16-20; Luka 5:1-11)
18Yesu peagendayi mumhana wa nyanja Galilaya, avaweni valongo vavili vevilova somba Simoni, mweikemiwa Petili na Andelea mlongo waki, valova somba na ngwanda munyanja ndava vavi valova. 19Yesu akavajovela, ngati chamwilova somba, “Munilandayi, nene yati nikuvakita nyenye kuvya vakuvaleta vandu kwa Bambu.” 20Bahapo vazilekili ngwanda zavi, vakamlanda.
21Peahegalili kulongolo, avaweni valongo vangi vavili, Yakobo na Yohani, vana va Zebedayo. Vene vavi mugati ya watu pamonga na dadi wavi Zebedayo, vatengenezayi ngwanda za kulovela somba. Yesu akavakemela, 22navene kanyata vakauleka watu pamonga na dadi wavi, vakamlanda Yesu.
Yesu akuvalamisa vatamu
(Luka 6:17-19)
23Yesu ahambili kila pandu ku Galilaya, iwula munyumba za kukonganekela Vayawudi na kuvakokosela Lilovi la Bwina la Unkosi wa Chapanga. Akavalamisa matamu ndalindali gevavi nagu vandu. 24Malovi gaki gadandasiki pandi zoha za ku Silia. Vandu voha vevavi na matamu na mang'ahiso, mewa vevatalaliwi na mizuka na vevihinduka na vevagogodili higa vavapeliki kwaki na mwene akavalamisa. 25Msambi wa vandu kuhuma ku Galilaya na Dekapoli ndi miji kumi, mewa Yelusalemu na Yudea na kumwambu ya mfuleni Yoludani vakamlanda.
Одоогоор Сонгогдсон:
Matei 4: NNT2020
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ngoni New Testament © The Word for the World Southern Africa and Pioneer Bible Translators, 2020.