MATIU 15
15
Chisɔsi‑a bai sa, a si Chu mɔɛ n bemba n 'na kanɛ ma
(Maki 7:1-13)
1Chɛ gbakɔ, Chu mɔɛ chɛ nu, miin ni Fayisii n na, an bɛ Chu n 'na sawa kan mɔɛ dɔ n na, an ka‑a wan Chuusaɛn duu ɔ, mbɛ an na‑a Chisɔsi tena. Mbɛ an‑na a fɔ, an dɔ, 2“Mmɔ woo mɔɛ n‑na kanɛ min to mmɔ boo ɔ, a nyin fan mɔ ɔ mɔ ko a. Chɛɛ i fɛ denɛ n‑na an fandi bɔ kan chɛ kɔɔ. Koe min na mu, an mbe ee an boo a ko a chia ma, yɔ kan chɛ‑a a fɔ buɛ min dɔ, mɔɛ e na daunɛ chɛ. I‑a chɛ yen ka ma?”
3Mbɛ Chisɔsi ɔ, “Wo ta sin, wo e Yataa 'a sawa to wan, mbɛ wo bea‑a wo ta kanɛ fɛ. Wo‑a chɛ yen ka ma? 4Yataa 'a sawa yen ko, a ɔ, wo ni kooya be wo fa ma, a basan wo de a. A yɛ to, ni mɔ ɔ mɔ‑a bai yama sa a fa ma ni a de, wo ni an mɔɛ chɛ fa. 5Chɛɛ wo tana, wo e mɔɛ n kan fan, an ni a fɔ an fa n ye, a basan an de n na, an dɔ, an toen ni an ni fenɛ min be an ma, min ma gbɔsɔɛ ɛ an ma, an ban‑da a be‑a Yataa ma. 6Wo ɔ te, mbɛ a ma din ni mɔɛ chɛ ma, ko chɛ koe a a fa ye, a basan a de a. Chɛ ɛ a ɔ yian fan, mbɛ wo‑a wo ta kanɛ a sɛ Yataa ta sawa kun ma. 7Wo wan, nɛnɛn fea ti nu. Yataa 'a gbonka chɛ mɔɛ Aisaya teayaen fan ni suun, a na‑a bai sa kɛn a si wo ma, a ɔ,
8‘Yataa ɔ te, a ɔ, wo e basɔmaya be dechee a ma wo da ɔ wan,
chɛɛ a wakoe ee wo faa ɔ.
9Wo e samun gbama an chɛ a tena,
koe min na mu, wo e mɔɛ n kan gbɛ wo ta kanɛ an na,
wo e ta‑a a ma‑a yɔ a 'a sawa‑a a fɔ ka wan.’ ”
Chisɔsi ɔ te, koe min mbe a ma, mɔɛ ma ni nyamui Yataa ya kɔɔ
(Maki 7:14-23)
10Mbɛ Chisɔsi‑a mɔ fanka chɛ chee a tena, mbɛ a‑a a fɔ an ye, a ɔ, “Wo gbɛɛ wo wo too ma sɔ n da a bai ma, a yɛ to, wo ni a ɔ gbɛ. 11Mɔ gbu e min don i da a, an mbe ee a ma, i ma ni nyamui Yataa ya kɔɔ, fɔ e min‑na bɔ i da ɔ.”
12Mbɛ a fɛ denɛ n gbɛn‑da a ma, mbɛ an dɔ, “I‑a ɔ sɔn fan, mbɛ i‑a bai min fɔ ka, a don‑da wan Fayisii mɔɛ chɛ n ma kaka?”
13Mbɛ a ɔ, “Fa min mbe banda bu ɔ, ɛ nyan fen kan kɔ kan kuu bɔ‑a wan, a ma min chin ni. 14Wo faa ma gbaa Fayisii mɔɛ chɛ n ko a. An maen fan mu yɔ ya te tɔɛ nu, miin toen mu an ni chia yian an bɔ ya te tɔɛ n na. Ni ya te tɔɛ‑a chia yian ya te tɔɛ a, an fea gbɛɛ ɛ bea wan sonɛ ɔ chia kuu a.”
15Mbɛ Pita ɔ, “Bai chɛ fasai wɛ nn ye, i‑a min fɔ ka, a si mɔɛ ma nyamui koe ma.”
16Mbɛ Chisɔsi ɔ, “Wo e ka n fɛ wan, chɛɛ chɛ gbɛɛ ɔ, wo 'a yiima tɛ ɔ dɔɔ. 17Fen kɔ fen mɔ gbu ɛ min daun, ɛ yii mɔ bu ɔ wan, mbɛ a ta‑a kumbai a kanɛ ɔ. Wo ma chɛ ɔ sɔn? 18Chɛɛ bai min mbe bɔ mɔ gbu da ɔ, ɛ ka mɔ yiima ɔ wan. A sin fan mbe mɔ ma nyamui Yataa ya kɔɔ. 19A mu min na, ko yama gbɛɛ ɛ bɔ mɔ gbu yiima an dɔ. A ni ma mɔ fa koe an na, kanka chɛ ko mu, fania fɔ mu, ni tɔ ɔ tɛ yama chɛ. A yɛ to, a ni ma waa ma basan koe a mɔɛ a, wo ee fuu ɔ min na, ni ko tɛ koe wɛɛ. 20Koe chɛ n gbɛɛ fan mbe a ma, mɔ gbu ma ni nyamui Yataa ya kɔɔ. Chɛɛ daun chɛ koe a, ni mɔ ma i boo a ko ni a chia ma, a ee a ma mɔ ma ni nyamui Yataa ya kɔɔ.”
Musu 'a danaya‑a a 'a denɛ baun
(Maki 7:24-30)
21Chɛ gbakɔ, Chisɔsi bɔ‑a wan nɔ, an bɛ a fɛ denɛ n na, mbɛ an ta‑a Taya tanda ɔ, ni Sidon. 22Mbɛ a tima chɛ a, musu dɔndɔ ni wan an tanda chɛ ɔ, min ni Kenaan mɔɛ a. A na‑a wan Chisɔsi tena. A bun‑da yee tɛ‑a, a ɔ, “I wɛn bɔ‑a Mansa Defidi 'a dambi ɔ, chinchin n ma. Mansa, n 'na den musuma gbandien mu a yama boo a, nyina yama ɛ a tɔɔ tena.”
23Chɛɛ Chisɔsi nii ma koɔ ni musu chɛ tena ɛnden bɛɛ a. Mbɛ a fɛ denɛ n gbɛn‑da a ma, mbɛ an dɔ, “A fɔ musu chɛ ye, a ni ka mmɔ fɛ a 'a yee wa tɛ chɛ a.”
24Mbɛ Chisɔsi‑a a fɔ musu chɛ ye, a ɔ, “Yataa‑a n sɔ Chu mɔɛ n fan ko a dechee, an fan mbe yɔ sa nu miin toenɛ a ɔ. Chɛɛ a ma n sɔ ni mɔ dɔ gbɛɛ n tena.”
25Chɛɛ musu chɛ na‑a wan, mbɛ a bea‑a a chen na disa‑a, a ɔ, “Mansa, basan n ma.”
26Mbɛ a ɔ, “A ma nyin mɔ ni den mɛsɛ n 'na daun fenɛ bɔ an da a, i ni a be wuu n ma.”
27Mbɛ musu chɛ ɔ, “Mansa, i‑a tea fɔ. Chɛɛ wuu miin bɛɛ ɛ ma si ɔ den mɛsɛ n baima, ni an da a pɛɛ bea‑a duu ma, an mbe a daun fan.”
28Mbɛ Chisɔsi ɔ te gbɛ, “E. Bɔɔɛ, i 'a danaya n ko a, a da a koo. I toen mu koe min na, n mbe a chɛ‑a wan i ye.” A tima chɛ a, Yataa‑a a 'a den chɛ baun fan.
Chisɔsi‑a mɔ sɛsɛ n baun an 'na gbandi n dɔ
29Mbɛ Chisɔsi ni ma, an bɛ a fɛ denɛ n na, an bɔ‑a wan nɔ, mbɛ an ta‑a Kadidi yii wa chɛ a sanɛ. An sɛ‑a wan nɔ kɔnkɔ dɔndɔ ɔ, mbɛ a si‑a nɔ. 30Mɔ sɛsɛ a sɔn‑da wan a ma. Mɔɛ chɛ n na‑a wan gbandi mɔ sɛsɛ a. Dɔ n namaaenɛ ɛ, dɔ nu, an fiondenɛ ɛ, dɔ n mumundenɛ ɛ, dɔ n boo faenɛ ɛ an ma, a basan an chenɛ a. An na‑a an gbɛɛ a Chisɔsi chen kɔɔ, a sin, a‑a an gbɛɛ baun fan. 31Mɔɛ chɛ n gbɛɛ tɛnɛ‑a wan a a, kɛn Chisɔsi‑a chɛ ma. An‑na a ɔ yen mumunɛ n koɔ‑a, namaa n tachɛ‑a, mbɛ ya te tɔɛ n‑na kaina yen. An‑na a ɔ yen fan to, miin bɛɛ boo n faen ni an ma, an baun‑da, a basan chɛ n na, miin chenɛ n faen ni an ma. Chɛ ko a, an‑na tando be wan Yataa ma, Chu mɔɛ n ni Yataa min fai.
Chisɔsi‑a kamin wu naaninɛ n da kɔ
(Maki 8:1-10)
32Mbɛ Chisɔsi‑a a fɛ denɛ n chee wan kaina dɔndɔ, a ɔ, “Mɔɛ chɛ n ma chinchinden mu n ye. Tee sawa an nɛ ka gbɛ, an mbe nɛ mmɔ fɛ, daun fen mbe ee nɔ. Ni n‑na a ma sunɛ an ni ta an kɔnkɔ tɔɛ a, an mbe ka‑a wan an chenɛ kɔɔ chia a, an ni bɔn a ma.”
33Mbɛ an dɔ, “Mɔ ee che daun fenɛ sɔn‑da nɛ kan kɔ kan, fuin chɛ ma, mɔ ɛ mɔ fanka chɛ da kɔ min na.”
34Mbɛ a ɔ, “Biidi yuu ɛ nɛ wo boo ɔ?”
An dɔ, “Biidi gbugbu wɔnfea an mbe nn boo ɔ, ni nyɛ mɛsɛ ɛnden.”
35Mbɛ a‑a a fɔ mɔɛ chɛ n gbɛɛ tɛtɛ ye, a ɔ an ni si duu ma, mbɛ an gbɛɛ si‑a. 36An si‑a kɛn, a‑a biidi wɔnfea chɛ ya, a basan nyɛ mɛsɛ ɛnden chɛ a, mbɛ a‑a Yataa wai bɔ daun fen chɛ ko a. Mbɛ a‑a a ɔ kai kai, biidi chɛ basan nyɛ a, mbɛ a‑a a be a fɛ denɛ n ma, mbɛ an bɛɛ‑a a du du mɔɛ chɛ n gbɛɛ tɛtɛ ma. 37An gbɛɛ‑a an bu fa daunɛ chɛ wan. Mbɛ a fɛ denɛ n‑na mɔɛ chɛ n da tɔɛ a sɔn sɔn, a bɛn‑da wan samba sɛmbɛnden wɔnfea da a faenɛ ma gban. 38Mɔ kaima miin na‑a an daun fen chɛ daun, an danɛ taen fan ni mɔ wu naanin dɔ. Musu n bɛ den mɛsɛ n na, an na‑a daunɛ chɛ wan, chɛɛ an nii ma an dan ni.
39Mbɛ Chisɔsi‑a a saa mɔɛ chɛ n na, an yɛ‑a an baa nu. A wan ni ma, ni a fɛ denɛ nu, an sɛ‑a wan dɛndɛ ɔ, mbɛ an ta‑a Makadan tanda ɔ.
Одоогоор Сонгогдсон:
MATIU 15: KONONT
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
New Testament in Kono © The Bible Society of Sierra Leone, 2006.