Ima̍tiyu 6
6
Lɛlā yī lɛhi ɔyɔ̍ɔ̄ya̍
1“Ala̍ du̍mɔ̍-du̍mɔ̍ nīi ɔ̄chɔ̄chɛ ge̍ e̍e bī lɛlā ɔyɔ̍ɔ̄ya̍ lɔkɔ nīi Ɔwɔ chikpo̍ ma̍ ge̍ chabɔ̄ la ɔgbādu hu āchɛ ni̍. Ala̍ ge̍ ya̍ i̍ngɔ̍ɔ, Ɔwɔ A̍dā yī ala̍ nīi hɔ̄ la ichō ma̍ i̍ ge̍ē kla̍ ala̍ ure̍ ɔha̍lɔha̍ ni̍.
2“Wu̍chē yī ɔla̍ā, a ge̍ yɛ ge̍ē kɔ̄ ɔjā de ɔlɛha̍ ma̍, a ā ya̍ lɛbɛ nīi āchɛ wa̍a̍ ge̍ē ma̍ wɔ o̍bū ni̍. I̍ngɔ̍ɔ nīi āchɛ ɔkɛlā ɔha̍ chōo̍chē ya̍ ɔha̍ lɛ a̍nɛ: E̍ ya̍ i̍ngɔ̍ɔ la ɛbɛ bāa u̍nu̍ ogrēeyī ba̍la ogblo̍lo̍ ma̍, hɛ̄ɛbɛ nīi āchɛ ge̍ē ma̍ wā kā wā ɔkɔ̄kā. Lēchi̍, n ge̍ē koko̍o ē de ala̍! Aa̍ ɛla̍ā, Ɔwɔ de ure̍ yī wā kla̍ āā kwɛ̍ɛjī mɛ̍! 3A ge̍ yɛ ge̍ē kɔ̄ ɔjā de ɔlɛha̍ ma̍, a ā ya̍ nīi abɔ̄ līfīyē ge̍ je̍ ɔjā nīi abɔ̄ līre̍ yɛ ē ya̍ ma̍ ni̍; 4hɛ̄ɛbɛ nīi lɛhi ɔyɔ̍ɔ̄ya̍ ɔla̍ā ge̍ re̍ka ɔjā lɛ̍ba. Bū la ɛbɛ ɔla̍ā, Ɔwɔ A̍dā yī ala̍ nīi ē ma̍ ɔjā nīi āchɛ ē ya̍ lɛ̍bɛ̍ba ma̍ ge̍ē kla̍ awɔ ure̍ la ogēdēgēdē.
Lɛlā yī ɔhā ojōji
(Ilu̍uku 11:2-4)
5“Ala̍ ge̍ē jɔhā de Ɔwɔ ma̍, ala̍ e̍e ya̍ bɔ̄ɔkɔ nīi āchɛ ɔkɛlā ɔha̍ chōo̍chē ya̍ ɔha̍ ē ya̍ ma̍ ni̍. E̍ jwɔ̍ɔnyɛ yī ɔyarɛ la u̍nu̍ ogrēeyī ba̍la ogblo̍lo̍ jɔhā, hɛ̄ɛbɛ nīi āchɛ ge̍ē ma̍ wā. Lēchi̍, n ā koko̍o de ala̍! E̍ nāa ure̍ yī wā kwɛ̍ɛjī mɛ̍. 6Ala̍ ge̍ē jɔhā ma̍, ala̍ chɛ̄ ga u̍kwee̍ yī ala̍ du̍mɔ̍. Ala̍ pīya ɔpu ba̍ nīi ala̍ ge̍ jɔhā de Ɔwɔ A̍dā yī ala̍ nīi ɔ̄chɛ i̍ ē ma̍ ɔ̄ ɔmɔ̍ɔ̄ma̍ ni̍ ma̍. Bū la ɛbɛ ɔla̍ā, Ɔwɔ A̍dā nīi ē ma̍ ɔjā nīi ala̍ ē ya̍ lɛ̍bɛ̍ba ma̍ ge̍ē kla̍ ala̍ ure̍.
7“Ala̍ ge̍ē jɔhā ma̍, ala̍ e̍e ka a̍kpla yī lɛlā kpradada lɔkɔ nīi āchɛ i̍je̍ Ɔwɔ ni̍ ē ya̍ ma̍ ni̍. Aa̍ ma̍ gbɛri̍ya̍ ka Ɔwɔ ɔ̍lɔ ge̍ē pɔ̍ɔkɔ yī aa̍ wu̍chē ɔka kpradada ɔla̍ā. 8Ala̍ e̍e ya̍ i̍ngɔ̍ɔ bāa aa̍ ma̍ ni̍. Ɔwɔ A̍dā yī ala̍ ɔlɔjā je̍ ɔjā nīi ku̍ ala̍ ɔkɔ ma̍ o̍bū nīi ala̍ chikpo̍ a̍nɛ. 9I̍ngɛ̍ɛ̄nɛ̄ nīi ala̍ ge̍ē jɔhā de Ɔwɔ a̍nɛ:
“ ‘A̍dā yī alɔ nīi hɔ̄ la ichō!
Ɔnɛ̄ɛhɛhi ge̍ lā de riyī yī wɔ.
10Yɛ̄grāa yī Ɔchwɔ̄lɛ̍ Oro̍ōre̍ yī wɔ ge̍ yewā;
E̍ ge̍ yɛ̍ɛ̄lā yī wɔ nīi a chikpo̍ ma̍ amu la ajɛ,
lɔkɔ nīi o̍ lɛ abɔ̍ɔ la ichō ma̍.
11De ojōre̍ nīi ge̍ē jɛ̄ alɔ lɛmiyɛ i̍chɛ ma̍ de alɔ.
12De lɛlā ɔdwɔ̄bi̍ nīi alɔ ya̍ ma̍ kɔ̄ de alɔ,
lɔkɔ nīi alɔ ē de ē kɔ̄ de āchɛ nīi ya̍ alɔ lɛlā abi̍ ma̍.
13A ā chɛ̄ nīi ɔjɔ̄jā ge̍ ma alɔ ma̍ wɔhɔ̍hu̍ ni̍.
Wu̍ alɔ ngmɛ̍ɛchɛ hī Ɔdwɔ̄bi̍.’
14“Ala̍ ge̍ de lɛlā abi̍ nīi āchɛ ya̍ ala̍ ma̍ kɔ̄ de wa̍, Ɔwɔ A̍dā yī ala̍ nīi hɔ̄ la ichō ma̍ titi ge̍ē de lɛlā ɔdwɔ̄bi̍ yī ala̍ ē kɔ̄ de ala̍. 15Ala̍ i̍ ge̍ de lɛlā abi̍ yī āchɛ kɔ̄ de wa̍ ni̍, Ɔwɔ A̍dā yī ala̍ nīi hɔ̄ la ichō ma̍ i̍ ge̍ē de lɛlā abi̍ nīi ala̍ ya̍ ma̍ ē kɔ̄ de ala̍ ni̍.
Lɛlā yī lɛmiyɛ ɔchɔ̄chā
16“Ala̍ ge̍ē ku̍ iyī ala̍ chlɛ̄ɛmiyɛ ma̍, ala̍ e̍e pi̍ eyī jɔ̍ɔ̍ bɔ̄ɔkɔ nīi āchɛ ɔkɛlā ɔha̍ chōo̍chē ya̍ ɔha̍ ē ya̍ ma̍ ni̍. E̍ ē ti̍yaha bɛ̍ɛ̍ ē bī ibi̍īyē yī lɛmɛmiyɛ, hɛ̄ɛbɛ nīi āchɛ ge̍ē ma̍ wā jo̍ōkū hīka ɛ̍lɛ yɛ ē chlɛ̄ɛmiyɛ. Lēchi̍, n ā koko̍o de ala̍! E̍ nāa ure̍ yī lɛlā yī wā kwɛ̍ɛjī mɛ̍. 17Ala̍ ge̍ē ku̍ iyī ala̍ chlɛ̄ɛmiyɛ ma̍, ala̍ ā na eyī nīi ala̍ ge̍ flɛ̍hu̍ gblɛ̍ɛgblɛ̍ɛ, 18hɛ̄ɛbɛ nīi āchɛ ge̍ e̍e jo̍ōkū ka ala̍ ɔ̍lɔ hɔ̄ lɛmiyɛ ɔchɔ̄chā ni̍. Ɔ̍chi̍kpa̍kpa̍ Ɔwɔ A̍dā yī ala̍ nīi e̍ i̍ ē ma̍ ɔ̍ ɔmɔ̍ɔ̄ma̍ ni̍ ma̍ ge̍ē jo̍ōkū a̍nɛ. Bū la ɛbɛ ɔla̍ā, Ɔwɔ A̍dā yī ala̍ nīi ē ma̍ ɔjā nīi āchɛ ē ya̍ lɛ̍bɛ̍ba ma̍ ge̍ē kla̍ ala̍ ure̍ la ogēdēgēdē.
Wɔdu yī ɛbɛ ɔchwɔ̄lɛ̍ oro̍ōre̍ yī Ɔwɔ
(Ilu̍uku 12:33-34)
19“Ala̍ e̍e de wɔdu yī ala̍ gbō amu la ajɛ la ɛbɛ nīi lɛla kɛ̄ɛ ākīkɔ̄ɔmā ge̍ē bīya anu̍, kɛ̄ɛ nīi uwī ge̍ē de ē kpo̍ mɛ ma̍ ni̍. 20Ɔkɔkɔ yī ɔla̍ā, ala̍ de wɔdu yī ala̍ gbō la ɛbɛ yī Ɔchwɔ̄lɛ̍ Oro̍ōre̍ yī Ɔwɔ. Abɔ̍ɔ, lɛla ba̍la ākīkɔ̄ɔmā i̍ ē bīya ɔjā mɛ ni̍; uwī i̍ ē gāa ge̍ē kpo̍ ɛjā mɛ ni̍. 21Wu̍chē oji̍ nɛ, ɛbɛ nīi wɔdu yī ɔ̄chɛ ē lā ma̍, aba̍bɔ̍ɔ kpɛɛ nīi ūkpɔ̄tū yī ɔ̄chɛ lā a̍nɛ.
Ɛbɛ ɔlɛgēdēgēdē yī ibi̍īyē
(Ilu̍uku 11:34-36)
22“Īkprī re̍ka ɛbɛ ɔlɛgēdēgēdē yī ibi̍īyē a̍nɛ. Īkprī yī wɔ ge̍ lɛ chra̍da̍da̍, ɛbɛ ɔlɛgēdēgēdē mu ibi̍īyē yī wɔ wa̍a̍. 23Īkprī yī wɔ ge̍ chī dwɔ̄bi̍, o̍ re̍ka ibi̍īyē yī wɔ hɔ̄ la ɛbɛ odobū. Ɛbɛ ɔlɛgēdēgēdē nīi hɔ̄ la ibi̍īyē yī wɔ ma̍ ge̍ chī de pīya ɛbɛ odobū bɛ̍ɛ? O̍ ē dobū abi̍ kana̍ ma̍ ēēe!
Ɔwɔ ba̍la āɛ̄jā ɔlɔ̄lɛ
(Ilu̍uku 16:13; 12:22-31)
24“Ɔfiyɛ ūkpo̍he i̍ ē hɔ̍chɛ̍ yī abābā ɛpa ē mɛ ni̍. O̍ ge̍ lɛ i̍ngɔ̍ɔ, ɔ̍lɔma̍ ɔha̍ ge̍ē hī ɔtū, ɔha̍ ge̍ē ta̍ ɔ̄ anyī. O̍ ge̍ē pɔ̍ɔkɔ yī ɔha̍, o̍ chī ge̍ē tɔ̍ɔkɔ yī ɔha̍. Gala ɔgɔgu ɔla̍ā, ala̍ i̍ ge̍ē hɔ̄ ɔ̍chɛ̍ yī Ɔwɔ ba̍la okpo ē ngmo̍tu̍chɛ̄ mɛ ni̍.
25“Wu̍chē yī ɔla̍ā, n ge̍ē koko̍o de ala̍! Ala̍ e̍e hi̍yɛ̄ngura yī ojōre̍ kɛ̄ɛ ɔjā ɔgwɔ̍ɔ̄gwa̍ nīi ala̍ ge̍ē nāa ē lɛ ɔhɔ̄leyī ma̍ ni̍. Ala̍ e̍e hi̍yɛ̄ngura yī ɔjā nīi ala̍ ge̍ē tū la ibi̍īyē ma̍ ni̍. Je̍ka ɔhɔ̄leyī ɔlɔjā ga ojōre̍ ɔgɔ̄ga pɛtɛpɛtɛ? Ibi̍īyē chī ga ɔjā otūlibi̍īyē ɔgɔ̄ga pɛtɛpɛtɛ! 26Ala̍ ā ma̍ a̍gba̍ana nīi wōwu bɛ̍ɛ̍ ma̍ ge̍ e̍ē! E̍ ē nyi ɔjā ɔha̍ la yɛrɔ̄? E̍ ē kpo̍ ɔjā ɔha̍ tu̍chɛ̄ la yɛrɔ̄? Kɛ̄ɛ oji̍ nīi e̍ kpo̍ gblāa la u̍ku̍na je̍ ma̍? Ɔwɔ A̍dā yī ala̍ nīi hɔ̄ la ichō ma̍ ē deyīrɛ wa̍ a̍nɛ. Je̍ka aa̍ ala̍ - ɔjā ɔlamu-ɔlamu pɛtɛpɛtɛ hi̍ a̍gba̍ana a̍nɛ? 27Ɔ̄nyɛ lipu̍ yī ala̍ ge̍ē ya̍ nīi ɔhɔ̄leyī yī nū gwɔ̄gwā gāa iyɔ̄bū iyɔ̄bū mɛ bū la yɛ̄ngura ɔhɔ̍ɔ̄hɛ̍ i̍ngɔ̍ɔ ɔla̍ā ma̍/?
28“Ɔna̍ u̍tu - iyī yɛ̄ngura yī ɔjā otūlibi̍īyē ma̍/? Ala̍ i̍ ma̍ lɔkɔ nīi īpū yī lipu̍ a̍chi̍ ɛha̍ nīi li̍hi̍hi̍ ma̍ ē jɛ̄ ma̍ ni̍? E̍ i̍ ya̍ u̍ku̍rɔ̍ ni̍; e̍ i̍ ē chī gɔ̍ ɔjā otūlibi̍īyē ni̍! 29N ā koko̍o de ala̍ gɛ! Iso̍lōmɔn nīi gbwɔdu ɛbɛ̍bɛ̍-ɛbɛ̍bɛ̍ ma̍, o̍ i̍ lɛ āɛ̄jā otūlibi̍īyē nīi li̍hi̍hi̍ i̍ngɔ̍ɔ bāa ododo̍ yī a̍chi̍ ɛla̍ā ma̍ ni̍. 30Ɔwɔ ē de āɛ̄jā otūlibi̍īyē de īpū yī lipu̍ a̍chi̍ ɛla̍ā a̍nɛ. A̍chi̍ ɔbɔbɔ nīi ge̍ hɔ̄ ma̍ i̍chɛ ji nīi o̍ ē pīyēku̍ i̍chi̍chi̍ nīi e̍ ē de ē kpo̍ tū ɔla̍ ma̍! Aa̍ nīi Ɔwɔ i̍ ge̍ē jo̍ōkū lēchi̍ lēchi̍ yī ɔjā otūlibi̍īyē ode ru ala̍ ni̍ a̍nɛ? Ɔtū ode chōche yī ala̍ ma̍ bi̍hi chɔ̍ɔ! 31Ala̍ e̍e kū la yɛ̄ngura ɔhɔ̍ɔ̄hɛ̍ ni̍. Ala̍ e̍e ka hīka, ‘Aba̍ nīi ojōre̍, kɛ̄ɛ ɔjā ɔgwɔ̍ɔ̄gwa̍, kɛ̄ɛ ɔjā otūlibi̍īyē yī alɔ ge̍ bū i̍chɛ ma̍ ēēe’ ni̍. 32Ma̍a ɛla̍ā - lɛlā nīi āchɛ i̍je̍ Ɔwɔ ni̍ ē ya̍ ma̍ nɛ. Ɔwɔ A̍dā yī ala̍ ɔlɔjā nīi hɔ̄ la ichō ma̍ jo̍ōkū hīka ɛjā nūma̍ wa̍a̍ ɔ̍lɔ ku̍ ala̍ ɔkɔ. 33Ɔkɔkɔ yī ɔla̍ā, ala̍ ā ho̍bo̍bū de ūkpɔ̄tū yī ala̍ rɛ la ɔpiyɛ yī Ɔchwɔ̄lɛ̍ Oro̍ōre̍ yī Ɔwɔ ba̍la lɛlā nīi o̍ chikpo̍ ka ala̍ ɔ̍lɔ ge̍ ya̍ ma̍. Bū la ɛbɛ ɔla̍ā, o̍ ge̍ē de ɛjā ehēhī nūma̍ wa̍a̍ de ala̍ ji. 34Ala̍ e̍e hi̍yɛ̄ngura yī i̍chi̍chi̍ ni̍; i̍chi̍chi̍ ɔlɔjā ge̍ē hi̍yɛ̄ngura iyī nū a̍nɛ. O̍ i̍ ngma̍ nīi ɔ̄chɛ ē kpo̍ akanya ge̍ē chɔba la onīi ē hɔ̄ mɔ̄chīmɔ̄chī ma̍ ē gɛ ni̍.
Одоогоор Сонгогдсон:
Ima̍tiyu 6: YBASR
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2020 Bible Society of Nigeria (second edition)