Jenesis 4
4
Nuarin tas alupas 4.
1 Keen im Ebel, napos vaig urau, nauritai urau, im nalaigaheni urau. 8 Et atgei atmas Ebel a Keen. 11 Neruvaig irai Keen. 17 Inok inmaliyum uhup. 19 Lemek im ohwat ehnaa o un. 25 Napos vaig u Sed, 26 im Inos.
1IS ato Iva ehgan a Atam; is um opoc aien, um apos Keen; is ika aien, Et mun alupai nyak inhalav atamaig a Ihova.
2Is lep apos Ebel etwan aien. Is atimi asgi siip a Ebel, ja is atimi ahapol a Keen.
3Is ti pan itac hal adiat, ja is lucsei nohwai itai an nobohtan a Keen nitai ahlap vai Ihova.
4Is lep lucsei nakli siip irai siip esjilid o un a Ebel im nagako iran. Is upene inliinmopoi Ihova vai Ebel im nitai ahlap o un:
5ja is eti upene inliinmopon aien vai Keen im nitai ahlap o un. Is edemda alupas a Keen, um acen nesganimtan.
6Is ika a Ihova ehele Keen, Na edemda aiek vanhe? et has nesganimtam aiek vanhe?
7El et upene nedo unyum, etpu upene inliinmopok ainyak vai euc; ja el et eti upene nedo unyum, et amen nitai ahlap an neucse neom unyum. Etpu imiaiji intas unyum aien, napu esjilid iran aiek.
8Is ika a Keen ehele Ebel etwan, Tu apan akaijau um edo: erus wat amen arau anliin pece, is atidai a Keen, um atgei Ebel etwan.
9Is ika a Ihova ehele Keen, Ebel etwam yek eda? Is ika aien, Ek eti ato ainyak: Ek eti atimi aminjinaig etwak ainyak.
10Is ika aien, Inhe nigki na mun ago aiek? et ahlaig vai nyak nohran ja irai etwam an nobohtan.
11Va nitai inigki er ahlaijai euc an nobohtan, eh mun asalgei par leh inja irai etwam vai euc;
12nau wit ahapol an nobohtan aiek, inyi eti ededel upene itai vai, euc; napu atimi amen ehcid aiek um ilikin natimi an nobohtan.
13Is ika a Keen ehele Ihova, Et esjilid nimtan imi nyak, ek auatialidi ainyak napos vaig.
14Na mun idim ahlo nyak aiek an nobohtan an nadiat inig; uhpu adenaig nyak va nesganimtam; ekpu atimi amen ehcid ainyak um ilikin natimi an nobohtan; erupu lep atgei nyak a ilpu atimi ecet nyak.
15Is ika ehelen a Ihova, Aien et atgei Keen aien uhpu eceseven aru iran. Is ati nitai asjaaicnaig irai Keen a Ihova, vai yi jim ecet yin tah um atgei yin.
16Is aha a Keen vai Ihova, um amen an pece Not, an nahaijin Itena an ridjai o un.
17Is ato ehgan a Keen; is um opoc aien, um apos Inok: is ago inmaliyum aien, um anvi nidai inmaliyum iyehki par ika Inok, nilpun nidai inhal o un.
18Is apos Airat a Inok: is apos Mehujeel a Airat: is apos Meduseel a Mehujeel: is apos Lemek a Meduseel.
19Is leh ehgan is ero a Lemek: nidan is ethi Eta, im nidan is ethi Silla.
20Is apos Jebal a Eta: is uhup aien irai ilpu atimi amen irai eom atga, um asgi itai eklim edo irai pece.
21Nidai etwan Jubal: is uhup aien irai ilpu atimi asega era ago hutlavlav im natarau ara.
22Is apos Tubal-keen a Silla; is esege imi atimi aien par ago itai irai bras im aiurn: is atahig irai Tubal-keen a Neama.
23Is ika a Lemek ehele ohwat ehnaa o un, Ak Eta im Silla, arumu ahgei nohrak aijaurau; ak ohwat ehnaa unyak, atahaijeg intas unyak aijaurau: kis atgei natimi is ethi ainyak is asji nyak aien, um lep atgei intakuras is ethi is auud nyak aien.
24El eh eceseven aru vai Keen, uhpu idim ecesevente im seven aru vai Lemek.
25Is lep ato ehgan a Atam; is apos inhalav atamaig aien, um anvi nidan par ika Sed; is ika aien, Is ati imi nyak inhalav atamaig et eche a Atua par isjeupigmoig Ebel is atgei yin a Keen.
26Is lep apos inhalav atamaig a Sed; is anvi nidan aien par ika Inos: eris atupun natimi an nopan iyehki par aniv ra an nidai Ihova.
Одоогоор Сонгогдсон:
Jenesis 4: VAO63
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Vanuatu Bible (Intas Etipup) © United Bible Societies, 1863, 2019.