Imilimo 1
1
1Mukundwe wane Teofila:
Mwekalata wane uwakutalika nawalisile vyonsi vino Yesu wachisile navino wasambilizizye, ukufumilila pano watalichizile ukuwomba 2ukwizafika napawanda wuno wasenzilwe mwiyulu. Pano atani asendwe mupela wapile awapostile wakwe wane wasozile amasundo namaka ya Muzimu Mwimichile. 3Pansizi yamfwa yakwe wayilanjizizye impindi mvule mumanda amakumi yani, apanichisya nukupanichisya kuno walinji amumi; walolekanga kuwapostile wakwe, nukuvwanzyania nawo ivya Wufumu wakwe Leza. 4Walile wawungana apaliponga nawo, awakomelezya ati, Mutize mufume mwe Yerusalemu, ukuwa mulindilile ichawila chino Umukwasi walayilizizye, chino nani nawanenile. 5Yohani wabatizyanga naminzi, ukuwa kwasyala amanda matichi mwenji muliwabatizya nu Muzimu Mwimichile.
Yesu asendwa mwiyulu
6Walile pano awapostile wawungana apaliponga nu Yesu awamuwuzya awati, Mfumu, wuzye ampindinye yoo yino wandi unyosezye awa Israeli Uwufumu?
7Yesu awanena ati, Ivyampindi namalanzi vyeni Umukwasi awino wavimanya, chisi achinu ukumanya pano vyovyonye vilipona. 8Ukuwa muliyizuzwa namaka pano Muzimu Mwimichile wiza kwakwe mwemwe, mwize muwe mwewakalola wane mwe Yerusalemu, na mwe Yudeya monsi, na mwe Samariya, ukufika nakuno insi yapakula. 9Ala wavwanga ivintunye vyoo, pane wakulola nukulola asendwa mwiyulu; iwingo alimuvwimbilichizya awasowa napano walyata.
10Awala wasyala wakulolechesya mupela pano akupita, awantu wawili wano wazwite ivizwalo vitiswe awiwuchila ayimilile pakwe woliwo. 11Awati, Mwe wantu wa mwe Galileya, ngachani chino mwimilile mukulola mupela? E Yesu-nye wee wino wasendwa kwakwe mwemwe waya mwiyulu, alinyoka ndivino mwamulola akuya mwiyulu.
Impyani yakwe Yuda
12Ngapano awapostile awafuma kumwamba wamingungu awanyochela kwe Yerusalemu, umusinzo wutichi ukufuma mukaya. 13Awala wafika mwe Yerusalemu awakwela kung'anda yapapela amuno awakwikala: kwalinji e Peter, nu Yohani, nu Jemusi nu Andreya, e Filipu nu Tomasi, e Bartolomeyo nu Mateyu, nu Jemusi umwanakwe Alifeyu, e Simoni umu Patrioti, nu Yuda, umwanakwe Jemusi. 14Penye wawungananga apaliponga mukupepa, apaliponga nawanachi, nu Mariya enyina wakwe Yesu, nga nawanyina.
15Akula kwapita amanda matichi, awasuwizi nche umwanda wonga namakumi yawili wonsi ponga, awawungana apaliponga, Peter ayimilila awavwanga. Akuti, 16Wanawitu, chazipizile ukuti Amawaliko Matele yafiswe yano Muzimu Mwimichile wavwanjizile mumulomo wakwe Davidi, kuvyakwe Yuda, wino walinji wenankolelelo wakwe wane walemile Yesu. 17Yuda-nye weyo walinji awiwumba litu, amuno wasozilwe ukuwomba umulimo apaliponga naswe.
18(Indalama zino Yuda wapochelezile muwuwipe wakazile ichalo, muno waponile afwa nukufwa; alepunkana namala yakwe yonsi ayafumila palwenze. 19Awantu wonsi wane wikalanga mwe Yerusalemu awivwa chochonye, achaleka mumuvwango wawo wakakwita ichalonye chocho wakuti Akeldama, akuli kuti, ichalo chawazi.)
20Amuno yawalikwa mwe kalata wamalumbo ukuti,
Lekani ing'anda yakwe isyale achipompa;
nuwakwikala mwenemo asowele kumwi.
Swinya yawalikwa yati,
Lekani umuntu winji apyanile pamulimo wakwe.
21-22Achaleka fwandi, umuntu winji wazipila ayisanzye kwesweswe awe wekalola wakuzyulupuka kwa Mfumu e Yesu. Ukuwa kweni wazipila awe awumwi uwamwiwumba litu impindi yonsi yino Yesu wapitapitanga apaliponga naswe, ukufumilila pampindi yino Yohani wawilanga ibatizo lyakwe ukwizafika nuwanda wuno Yesu wasenzilwe mwiyulu.
23Achaleka awelengania awantu wawili: e Jozefu, wino witwanga ilyakwe Barasaba (wino swinya wamwitanga ilyakwe Jastasi), nga nu Matiya. 24Achaleka awapepa awati, We Mfumu, wenji wamanya ivyamumyezo yawantu wonsi. Achaleka, oko we Mfumu, tusolele wenga pakwe waa wawili 25ukuti awawomba umulimo wawupostile wuno Yuda wawusya waya kumasyo yakwe. 26Ngapano awapenda ivipendo pamazina yawili. ivipendo aviwila Matiya, awino asanzwa kwiwumba lyawapostile ikumi nawenga.
Одоогоор Сонгогдсон:
Imilimo 1: WWN82
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Chinamwanga Bible © United Bible Societies, 1981.