Yohani 19
19
1Nga Pilato atola Yesu amuvyapula. 2Awavita awalukaakamba kamyunga awamukupika kumutwe; awamuzwika ichizwalo chiwenzu, 3awaya kweweliwe awati, Ndi imfumu yawa Yuda iwe nuwulanzi wutali! Awaya awamupama.
4Anyoka Pilato afumila kunzi anena iwumba ati, Lolani, namufumizya kunzi kwakwe mwemwe, alyakuti mumanye kuno nenji ntazanile uluwi lumwi mweweliwe. 5Nga Yesu afumila kunzi azwite akamba kamyunga nichizwalo chiwenzu. Pilato awanena ati, Aleni! Umuntu weyo!
6Awala wasimapepo wakulu nawakalindilila wamulola awapunda awati, Mupamantile pawuchingane! Mupamantile pawuchingane!
E Pilato awanena ati, Aleni weyo!
Musendani, mukamupamantile pawuchingane. Ntamuzanile uluwi lumwi. 7AwaYuda awatolelela awati, Tuli nisundo lyakuti ale akomwe, amuno wavwanganga akuti aMwanakwe Leza.
8Ala Pilato wivwa amazwi yanye-yaa atina nkaninye. 9Anyochela mwisano aya awuzya Yesu ati, Nga kumwinu akwinye?
Ukuwa Yesu nanti kutolelela chimwi. 10Pilato ati Ngawakanila ukumvwanzya chani? Yizuka, kuno indi namaka yakukusapula, nukukupamantila pawuchinganenye.
11Yesu atolelela ati, Ndi atele Leza atakupile maka utanga uwe namaka yamwi ayakunchitila chimwi. Achaleka umuntu wino wandemesile kwewewe ali nuluwembu lulutilizye.
12Ala Pilato wivwa amazwi yanyeyaa awalonda ukutaya Yesu. Ukuwa awaYuda awapongomoka awati, Ndi wamutaya ye usi wechiwuza chamfumu nkulu! Wensi wino akayichita ichifumu amulwani wamfumu nkulu!
13Ala Pilato wivwa amazwi yanyeyaa, afumizya Yesu kunzi aya ayikala pachilimba chakupanzizya pamasyo yano yakakwitwa ukuti, eChilwala mupapatale. (MuchiHeberi wakutanji, Gabata.) 14Walinji awanda wakuyisengania kukulya ichakulya chakupitililwa mutondo nilanzi lyatezile kwela lyafika pamutwe papela. Pilato anena awaYuda ati, Imfumu yinu yoo!
15Awapongomoka awati, Mukome!
Mukome! Mupamantile pawuchingane! Pilato awawuzya ati, Wuzye mukasi mpamantile imfumu yinu pawuchingane?
kasi mpamantile imfumu yinu pawuchingane?
Wasimapepo wakulu awatolelela awati, Swenji tuli nimfumu yonganyensu, imfumu nkulu!
16Ngapano Pilato awalemeka Yesu ukuti akapamantilwe pawupawuchingane.
Yesu apamantilwa pawuchingane
Achaleka awasenda Yesu. 17Apita, alanga asenzile uwuchingane wakwe, ukuya kumasyo yano watanji, Amasyo Yipanga. (Yano muchiHeberi wakutanji Golgota.) 18Kokonye akuno awaya awamupamantila pawuchingane; awapamantila nawantu wanji wawili pamawuchingane, wumwi mbali zyoo nawinji mbali zinji, Yesu pakasi. 19Pilato awalika iwaliko aliwika pawuchingane ati, E Yesu wa mwe Nazareti, Imfumu yawaYuda. 20AwaYuda awavule awawazya amazwinye yaa, amuno amasyo yano Yesu wapamantizilwe pawuchingane kutalinji akutali nakaya. Amawawaliko yawalisilwe muchiHeberi, much iLatini, na muchiGriki. 21Wasimapepo wakulu awa chi Yuda awanena Pilato awati, Utize uwalike uti, Amfumu yawaYuda, ukuwa uti, Umuntunye wee watanji, Nemfumu yawaYuda.
22Pilato atolelela ati, Chino nawalika ye nalala nawalikanye.
23Awala awavita wapamantila Yesu pawuchingane, awasenda ivizwalo vyakwe awavyankania muvipya vini, ichipya chonga kuwavita wenga. Awanyoka awasenda umwinjilo, wuno wutalinji numusumwa wakovilwe awowo, nanti musumo. 24Awavita awavwanzyania wakuti, Tutize tuwulepule; ukuwa tupende ichipendo tulole wino angawusenda. Chonye-choo chachisilwe alyakuti amawaliko yafiswe yano yati,
Wankine ivizwalo vyane,
weni umwinjilo wane awapenda. Awavita wachisile wonye-woo.
25Wano wimilile papipi nuwuchingane wakwe Yesu walinji wenyina, numunyina nyina, nu Mariya emuka Klopasi, nga nu Mariya wa ku Magadala. 26Yesu alola nyina numusambilizi wino wakunzile wimilile paponye; achaleka anena nyina ati, Mayo, umwanako weyo.
27Anyoka anena umusambilizi ati, Nyoko weyo, Ukufumilila paponye umusambilizi asenda nyina aya awakwikala nawe mung'anda yakwe.
Imfwa yakwe Yesu
(Mateyu 27:45-56; Marko 15:33-41; Luka 23:44-49)
28Yesu amanya kuno ivintu vyonsi vyatezile vyasila; alyakuti Amawaliko Matele yafiswe avwanga ati Ulusala lwanduma.
29Paponye palinji ulweso, luno Iwizwile namasi yipala; awatimpika epamba mwipala, awanyepelela kulusamba lwambozyo, awamutambichizya kumulomo. 30Yesu apochelela ati, Kanonzi chasila! Ayinamika umutwe wakwe afwa.
Awalasa Yesu paluwazu
31Ngapano awaYuda awalambilizya Pilato ukuti awazumilizye wavune amanama yawantu wano wakomilwe, wawisye wawafumye pamawuchingane. Wachisile wowonye muno palinji apechisano, watalondanga ukuti ivyala vilange vili pamawuchingane pawanda wakusolezya, amuno uwanda wowonye walinji awakusolezya nkani. 32Ngapano awavita awaya awavuna amanama yamuntu wakutalika nuwachitiwilinye wano wakomilwe apaliponga nu Yesu. 33Ukuwa awala waya kwe Yesu awalola kuno afwile kali, weni nanti kuti wamuvune amanama. 34Ukuwa uwavita wumwi atola isumo amulasa paluwazu, uwazi naminzi avizwa. 35(Wino waweni chochonye wapanichisya wawumbula, alyakuti namwenye musuwile. Chino wavwanga achakusimichila, swinya wamanyichisya kuno wavwanga molimonye.) 36Chachisilwe wonye-woo ukuti Amawaliko Matele yafiswe, yano yati Atalivunwa ifupa lyakwe nanti lyonga. 37Swinya kuli Amazwi Matele yanji yano yati, Awantu waliwalola wino walasilwe.
Ukuzikwa kwakwe Yesu
(Mateyu 27:57-61; Marko 15:42-47; Luka 23:50-56)
38Pansinzi, e Jozefu wino wafumilizile kukaya kwake Arimatiya, alambilizya Pilato ukuti asende umuwili wakwe Yesu. (E Jozefunye weyo wakonkanga Yesu, munkama, amuno watinanga awaYuda.) Pilato amuzumilizya ukuti asende umuwili achaleka Jozefu aya asenda umuwili wakwe Yesu. 39Nga Nikodemu, wino pakutalika wayile mukulola Yesu uwusiku, apita apaliponga nu Jozefu, wasenzile uwusule, uwusanzinkane nichilolo namalowe ivyakung'wama kwamapawunzi umwanda wonga (100). 40Wowilinye awasenda umuwili wakwe Yesu awawunyepa munyenda mitelepe imisansile nuwusule wifungo nunchile; amuno wowo awuli mwata wamizichile yavyala ku waYuda. 41Pamasyo yano Yesu wasayisilwe palinji ichalo, muchalonye momo mwalinji inkungwe-mpya yino wumwi asitela azikwe mwenemo. 42Muno uwanda wakusolezya wawa Yuda watezile wapalamila, swinya muno ninkungwe yapalamizile, awaya awazika Yesu momonye.
Одоогоор Сонгогдсон:
Yohani 19: WWN82
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Chinamwanga Bible © United Bible Societies, 1981.