Luka 23
23
UYesu pawutalo pa Pilato
(Matayo 27:1-2, 11-14; Maluko 15:1-5; Yohana 18:28-38)
1Neke ikiwungu kyonda kya Vayahudi kiimage, kimusindikage uYesu kwa Pilato.#23:1 Pilato Uyu aali Muloma, ye aatemile umugoola gwa Yudeya. 2Kiivangaga ukumutaaha kiitigilaga, “Umuunu uyu, tukamuweene iiheniya avaanu veesu, nu kuvafunda vatanage ukuhomba ikodi kwa Kayisali. Kangi iilonga ukutigila, umwene ye Mesiya, uMutwa.”
3UPilato akumuwuudzaga uYesu iitigilaga, “Uveeve ve Mutwa va Vayahudi?” UYesu akumuhigaga iitigilaga, “Yuuve ye úlongile ulo.” 4UPilato akuvalongelaga avateekedzi avakomi, pamwinga ni lilugu lya vaanu iitigilaga, “Sindikuyiwona inongwa ya muunu uyu.” 5Avaanu avo viikangadzaga viitigilaga, “Imbulanidzo dzaakwe dzikuvahulila avaanu ukuvedza vagalusi! Átagaliidze imbulanidzo dzaakwe mu nyi yonda ya Yudeya iyi, aavangile ku Galilaya, lino áfikile kuno.”
6UPilato aaviye ápuliike idzo, akumuwuudzaga uYesu nde muhuma ku Galilaya. 7Pe aadzeeliye ukutigila uYesu iihuma ku Galilaya, umugoola gwa wutemi wa Helode, akumusindikaga kwa Helode, pakuva mu figono fiifyo, uHelode aali mu Yelusalemu.
UHelode akumuwuudza uYesu
8UHelode pe amuweene uYesu, iikeelaga mbandu, pakuva ifigono fyoloofu aasakaga ukumuwona. Aali ápuliike imola dzaakwe, aahuuvilaga ukumuwona uYesu pe iihuufya ikimanyilo. 9Neke uHelode amuwuudzage uYesu amadzwi goloofu, neke kangi uYesu atanage ukuhiga nambe lidzwi. 10Avateekedzi avakomi na vawulanidzi va milagililwe viikwimaga nu kumutaaha mbandu uYesu.
11UHelode na vakolakyanda vaakwe viivangaga ukumuyeyewusa uYesu nu kumukinila. Vakumufwalidzaga imyenda gya lutogo nu kumuheka. Neke uHelode amupilusage uYesu kwa Pilato. 12Ukuvangila ikigono kiikyo, uHelode nu Pilato viivedzaga wudzeela, nde vavedze pa kutala vaali wukava.
UYesu iihigwa ukukomwa
(Matayo 27:15-31; Maluko 15:6-20; Yohana 18:38b–19:16)
13Pambele uPilato akuvalundasaga avateekedzi avakomi, na valongodzi va Vayahudi, pamwinga na vaanu avangi. 14Akuvalongelaga iitigilaga, “Múundeetiye umuunu uyu, mwitigila iiwulanidza avaanu ukutigila vavedzage vagalusi. Lino ndímuwuudziidze pa miiho geenyo mu idzo dze mukumutaaha, neke kangi sindiyiweene inongwa ukwakwe. 15Nayu Helode asiyiweene inongwa ukwakwe, kye kileka amupiluse ukwesu. Lino muludzeelage wunofu ukutigila, umuunu uyu asihokile inongwa íyivagiye akomwe. 16Lino ahadza iitowa, neke ndimwawule.” [17Gyali gye mivedzehedze pa kyaka kya Paasaka, uPilato ukuvadindulila avaanu umudindilwa yumwinga.]#23:17 Amadzwi aga simoogali mu wusimbe uwungi uwa kataali.
18Neke kangi avaanu vonda avo vayooyage pamwinga vatigilage, “Umuunu uyo, akomwe! Twisaka utudindulile uBalaba!” 19Kwali umuunu ye aatambulwaga Balaba, ye aadindiilwe mu ndinde, pakuva aahulile uwugalusi wukomi nu wuwuladzi mu wudzenge.
20UPilato aasakaga ukumudindulila uYesu, neke alongage na vaanu avo kangi. 21Neke kangi aveene vaginage ukuyooya vatigilage, “Atovelelelwe! Atovelelelwe!”
22UPilato akuvalongelaga kangi ulwa wudatu iitigilaga, “Kye kiki? Umuunu uyu áhokile kiki? Uneene sindikuyiwona inongwa ukwakwe íyivagiye ukukomwa! Lino iitowa, neke ndimudindulile.” 23Neke kangi avaanu avo vaginage ukuyooya mbandu, viisaka uYesu atovelelelwe pa kipindulihidzo. Uwusililo waakwe, umwango gwawo gwikwidikwaga.
24Apo, uPilato iilamulaga ukulima ngita avaanu kye vamunyiliike. 25UPilato akumudindulilaga uBalaba ngita avaanu kye vaasakaga, uyo aali ádindiilwe wiimila wa wugalusi wukomi nu wuwuladzi. Neke amugotolage uYesu ku vakolakyanda vamulimile kye viisaka.
UYesu iitovelelelwa pa kipindulihidzo
(Matayo 27:32-44; Maluko 15:21-32; Yohana 19:17-27)
26Avakolakyanda pe vakumusindika uYesu kumukoma, viitaangʼanaga nu muunu yumwinga, ye aatambulwaga Simoni, umuhuma ku wudzenge wa Kilene. Uyo aahumile ku mugunda. Vakumugagiilidzaga anyamule ikipindulihidzo kya Yesu. Neke anyamulage, aniniilage kumbele kwa Yesu.
27Ni lilugu likomi lya vaanu likumuniniilaga uYesu. Mu avo, vaali moovali avamwayuuva avaahuguvalaga nu kuvemba wiimila wa Yesu. 28UYesu akuvaseedukilaga, akuvalongelaga iitigilaga, “Nye vamwayuuva va mu Yelusalemu! Mutane ukuumbembela uneene, nda haamu, mwivembelage uwuumi weenyo na vaana veenyo! 29Muludzeelage wunofu ukutigila fiikwadza ifigono, avaanu pe valaatigila, ‘Vali kitendileme avamwayuuva avagumba, avasiivegala nambe koongʼeledza!’ 30Pe peene,
‘Avaanu valafilongela ifidunda ukutigila, “Mutugwile!”
Kangi valatulongela utudunda utudebe viitigila, “Mutugubikile!” ’#Hoseya 10:8
31“Pakuva, ngana viilima ewo ku mubiki umudodi, apo lulaavedza wuli ku mubiki umuumu?”#23:31 Mubiki umudodi…mubiki umuumu UYesu iilongela mu selengo ukutigila, ngana avaanu vámuhigile umwene umugolofu, uluhigo lulaavedza lutalamu hiilo ku vaanu va mu Yelusalemu, ávavagiye uluhigo.
32Umusika avakolakyanda pe vamusindikaga uYesu kutovelelelwa, vavasindiike na vagonadaasi vavili pamwinga nave. 33Pe vaafikile apaatambulwaga Libangʼa lya Mutuwe,#23:33 Libangʼa lya Mutuwe Mu ndongele ya Kiebulaniya, kwe kutigila Goligota. Lole IGoligota ku Figanulo. vakumutovelelelaga uYesu pa kipindulihidzo. Avagonadaasi navo viitovelelelwaga, nayula pa kipindulihidzo kyakwe, yumwinga kundiyo kwa Yesu, uyungi kungʼigi. 34UYesu iitigilaga, “Ve Daada! Uvapyanile, pakuva vasiludzeeliye lwe vakululima.” Avakolakyanda avo viisoolanilaga ulusolo ulwa kugavana imyenda gya Yesu.#Ndzimbililo 22:18 35Avaanu viikwimaga apo viilola.
Avakomi va Vayahudi, vamuyeyewusaga vaatigilaga, “Akiipokaga avangi! Lino, ngana umwene ye Mesiya umuhaagule va Nguluvi, iipoke mwene!” 36Avakolakyanda navo, vakumuyeyewusaga. Vakumuhegelelaga nu kumuleetela idifwayi indzadzu,#23:36 Idifwayi indzadzu Ndzimbililo 69:21. Lole Idifwayi ku Figanulo. 37vakumulongelaga viitigilaga, “Ngana uli Mutwa va Vayahudi, wiipoke yuuve!”
38Na pakyanya pa kipindulihidzo vaatoveleliye uwusimbe wa madzwi agaatigiye,
uyu ye yesu, mutwa va vayahudi
39Yumwinga mu vagonadaasi avo, akumuligaga iitigilaga, “Uveeve siye Mesiya? Wiipoke yuuve, kangi utupoke naafwe!” 40Neke kangi uva kavili amukenyelage umuyagwe atigilage, “Uveeve! Usikumoogopa uNguluvi? Usiiwona uneefwe túhigiilwe luhigo lumwinga nu mwene? 41Uneefwe túhigiilwe uluhigo ngita kye lukutuvagila, pakuva twikwanukila ídzitegiine nu wanandzi weesu. Neke kangi uyu asilimile wanandzi wuwuvedzaga.” 42Neke atigilage, “Ve Yesu! Pe wiikwingila ku wutwa waako, uundziwukage!” 43UYesu akumuhigaga iitigilaga, “Ndikukulongela ndakyene, ineengʼuli iyi wiivedzasa naane ku Paladiso.”#23:43 Paladiso Lole IPaladiso ku Figanulo.
UYesu iifuwa pa kipindulihidzo
(Matayo 27:45-56; Maluko 15:33-41; Yohana 19:28-30)
44Ukuvangila ikivalilo kya mutanda (6.00) pa muunyi, ukufikila ikivalilo kinyigondza (9.00), ikiisi kiigwidzaga mu nyi yonda, 45ilidzuwa liitilivalaga. Ilibupa lya mwenda mu tembeli,#23:45 Ilibupa lya mwenda mu tembeli Ili lyabaagulaga aPiimike pa Piimike nu kungi. Lole Itembeli ku Figanulo. liideemukaga fipiidza fivili ukuhuma pakyanya ukufikila paanyi.
46UYesu iikoolaga iitigilaga, “Ve Daada! Ndikuwuviika uwuumi wangu mu mawoko gaako.”#Ndzimbililo 31:5 Aaviye álongile idzo, gwidumukaga. 47Umwimiilidzi va kipuga kya vakolakyanda pe adziweene idzo ídzihumiye, akumupeelaga indolo uNguluvi iitigilaga, “Ndakyene umuunu uyu akali mugolofu!”
48Na vaanu vonda avaalundiine apo, vaaviye vádziweene ídzihumiye, viiwuyaga ku kaaya dzaawo, vakwitova-tova pa mambaga dzaawo mu wuhuguvafu. 49Kangi vonda avaadzeeliine nu Yesu, pamwinga na vamwayuuva avaali vámuniniiliye ukuhuma ku Galilaya, viimile pataali viilola idziilimika.
UYesu iisiilwa
(Matayo 27:57-61; Maluko 15:42-47; Yohana 19:38-42)
50-51Aali pwali umuunu yumwinga, ye aatambulwaga Yosefu, umuhuma ku wudzenge wa Alimataya, ku nyi ya Yudeya. Uyo aali muyaawo va kiwungu kya Vayahudi. Kangi aali munofu nu wugolofu pa miiho ga Nguluvi. Umuunu uyo asiidiingʼiine na vayagwe mu mola ya kumukoma uYesu. Kangi aahuuvilaga ukwadza uwutwa wa Nguluvi.
52UYosefu iihelelaga kwa Pilato ukumunyilika umufimba gwa Yesu, ukuta akagusiile.#23:52 Akagusiile AVayahudi vaalagiidzwe ukusiila umufimba gwa muunu ye átoveleliilwe pa kipindulihidzo ikigono kiikyo, Lwiwuko 21:22-23. 53UPilato pe aaviye íidikiye, uYosefu iihelelaga kwisa umufimba pa kipindulihidzo. Akugupilingidzaga nu mwenda umuvalafu, akuguviikaga mu mombwe iyaabuguliilwe kwave mu lutalaawe.#23:53 Mu lutalaawe Mu mivedzehedze gya Vayahudi gya kusiila avaanu, vavaviikaga ávafuwe mu manga, nu kudinda ni liganga likomi pa mulyango. Imombwe ya Yesu yaali mu manga. Imombwe iyo, aali asinaa aviikwaga muunu. 54Ikigono ikyo kyali kya kwigelanidza ulwa Sabato, kangi nayo yaali biihi ukuvanga.
55Avamwayuuva avaadzile pamwinga nu Yesu ukuhuma ku Galilaya, vakumuniniilaga uYosefu ku mombwe. Vakuyiwonaga imombwe, nu mufimba gwa Yesu kye gúgoniikwe. 56Neke, vawuyage ku kaaya, vagelanidzage amafuta nu mugoda#23:56 Amafuta nu mugoda Ifi fyatanidzaga umufimba gutane ukuwola. gwa kubaka umufimba gwa Yesu. Na pa kigono ikya Sabato viihuwaga, ngita imilagililwe gya Mose kye gyalagiidze.
Одоогоор Сонгогдсон:
Luka 23: BEZ
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2022 Wycliffe Bible Translators, Inc. All rights reserved.