Marcos 13
13
Káchíꞌ Jesús ya̱ naanꞌ veñu̱ꞌun káꞌnú Jerusalén
(Mateo 24:1-2; Lucas 21:5-6)
1Sáá nkene Jesús iniꞌ veñu̱ꞌun káꞌnú, jee ɨɨn rá te̱e súkuáꞌa re̱ꞌ ráa nkachiꞌ‑i nu̱u̱nꞌ re̱ꞌ:
―Mestrúꞌ, ¡kune̱ꞌyá! Na̱ ka̱ꞌ káꞌnú ka̱ꞌ rá yu̱u̱ꞌ vá. Jee na̱ ka̱ꞌ viiꞌ ka̱ꞌ íyó rá veꞌi yaꞌá.
2Soo nkachiꞌ Jesús nu̱u̱nꞌ re̱ꞌ:
―¿Á néꞌyá rán rá veꞌi náꞌnú yósóꞌ táꞌán yaꞌá ya̱ kúvi veñu̱ꞌun káꞌnú? Ni nsáꞌ kino̱o ka̱ꞌ ni ɨɨn yu̱u̱ꞌ kosoꞌ ta̱ꞌán nu̱u̱nꞌ inka yu̱u̱ꞌ, chi nɨꞌɨ yaꞌá ta̱nɨ̱ꞌ ―nkachiꞌ Jesús.
Rá seña koo tiempúꞌ ya̱ kuvi ya̱ nkachiꞌ Jesús
(Mateo 24:3-28; Lucas 21:7-24; 17:22-24)
3Kua̱ꞌa̱nꞌ ráa jee sáá ña̱kuneeꞌ re̱ꞌ i̱ka̱ꞌ yuku Olivos ya̱ káá ichinúúnꞌ veñu̱ꞌun káꞌnú, jee Pedro, Jacobo, Juan jín Andrés ni̱ka̱tu̱ꞌún sɨ́ɨ́n ráa re̱ꞌ:
4―Kachiꞌ xá nu̱u̱nꞌ ránꞌ, ¿na̱ tiempúꞌ kuvi rá tiñu yaꞌá ya̱ nkachiꞌ nú?, jee, ¿ná kúvi seña koo sáva stúvi ya̱ kuna̱a̱ꞌ nɨꞌɨ rá yaꞌá? ―nkachiꞌ ráa nu̱u̱nꞌ re̱ꞌ.
5Jee Jesús nka̱jiéꞌé nkachiꞌ re̱ꞌ nu̱u̱nꞌ ráa:
―Kumí rán maárán ya̱ ni ɨɨn ntu̱náꞌ xináꞌví ñɨvɨ ránoꞌó. 6Chi kue̱ꞌe̱ꞌ ñɨvɨ káñunkúún káchíꞌ ráa nika̱ꞌ ya̱ kiji ráa nu̱u̱nꞌ súví ni̱ꞌ jee kachiꞌ ráa: “Nuꞌuꞌ ví Cristo.” Jee kue̱ꞌe̱ꞌ víꞌí ñɨvɨ xináꞌví ráa. 7Soo ré teso̱ꞌo rán ya̱ íyó tu̱kantaꞌan ɨɨn ñuunꞌ jín inka ñuunꞌ, jín ya̱ koo tu̱kantaꞌan, jee koto ñúyúꞌví iniꞌ rán. Chi saá íyó kuvi rá tu̱nóꞌó yaꞌá. Soo ntiáꞌan kenta ji̱nu. 8Chi kantáꞌán nación jín inka nación jee kantáꞌán ñuunꞌ jín inka ñuunꞌ. Jee koo ñutáan. Jee kéꞌín nu̱u̱nꞌ kutámá víꞌí. Jee koo kue̱ꞌe̱ꞌ tuntíxín. Soo nɨꞌɨ rá yaꞌá kúvi tu̱nóꞌó ya̱ kijiéꞌé xíꞌnañúꞌún ka̱ꞌ.
9’Soo nito koo rán maárán, chi naku̱ꞌva ráa ránoꞌó xi̱ntíín rá te̱e jiéꞌnéꞌ kua̱chi. Jee ku̱ꞌva rá ñɨvɨ ránoꞌó jín yoꞌo iniꞌ rá veꞌi sinagoga nu̱u̱nꞌ kútútú rá ñɨvɨ Israel. Jee kuiñɨ rán ichinúúnꞌ rá te̱e nísotíñú kúvi gobernador jín rá te̱e ya̱ tátúníꞌ rá nación sijíta ráa ránoꞌó, jie̱ꞌe̱ꞌ ya̱ yɨ́ꞌɨ́ rán nu̱u̱nꞌ nuꞌuꞌ. Jee suꞌva naku̱ꞌva rán ya̱ nááꞌ jie̱ꞌe̱ꞌ nuꞌuꞌ nu̱u̱nꞌ ráa. 10Jee xíꞌna ka̱ꞌ ne̱ ntiáꞌan kenta ji̱nu, íyó te̱ku̱tu̱ꞌún tu̱ꞌun váꞌa jie̱ꞌe̱ꞌ ni̱ꞌ nu̱u̱nꞌ nta̱ká nación íyó ñɨ̱vɨ́. 11Jee retú naku̱ꞌva ráa ránoꞌó xi̱ntíín te̱e nísotíñú, koto nániꞌvɨꞌ iniꞌ rán ná kachiꞌ rán xíꞌna ka̱ꞌ kenta rán yukuán. Chisaꞌ néni ɨɨn tu̱ꞌun taji Ndiosíꞌ nu̱u̱nꞌ rán sáá kachiꞌ rán maá hora yukuán, jee kachiꞌ rán vá. Chi nsú ránoꞌó ví ya̱ kaꞌanꞌ, chi Ta̱chi̱ꞌ Ííꞌ Ndiosíꞌ ví ya̱ kaꞌanꞌ.
12’Naku̱ꞌva te̱e ñaniꞌ re̱ꞌ xi̱ntíín rá ñɨvɨ, sáva kaꞌniꞌ ráa maa. Jee suni tátáꞌ naku̱ꞌva re̱ꞌ se̱ꞌya re̱ꞌ xi̱ntíín rá ñɨvɨ, sáva kaꞌniꞌ ráa maa. Jee rá se̱ꞌya nenta ráa si̱kɨ̱ꞌ sɨꞌɨ́ ráa, jee saꞌá ráa ya̱ kaꞌniꞌ rá ñɨvɨ rá sɨꞌɨ́ ráa. 13Taꞌvi iniꞌ kua̱íyó rá ñɨvɨ kune̱ꞌyá ráa ránoꞌó, jie̱ꞌe̱ꞌ yɨ́ꞌɨ́ rán nu̱u̱nꞌ nuꞌuꞌ. Soo rá ñɨvɨ kuni̱ꞌin kuiñɨ kutú ráa jín ni̱ꞌ ne̱ nu̱u̱nꞌ kenta ji̱nu jee suviráa ví ya̱ sikáku Ndiosíꞌ ráa.
14’[Daniel, te̱e nna̱kani tu̱ꞌun nkene yuꞌú máá maá Ndiosíꞌ ne̱ yanaꞌán, ntee re̱ꞌ ya̱ koo] ɨɨn ya̱ kákini néꞌí ya̱ stívɨ́‑ɨ ya̱ ííꞌ jee saꞌá‑a ya̱ kuniꞌ u̱ꞌvi̱ꞌ Ndiosíꞌ veñu̱ꞌun káꞌnú re̱ꞌ. (Ñɨvɨ ya̱ kaꞌvi tu̱ꞌun yaꞌá, jee íyó ki̱ku̱ꞌun iniꞌ‑i vá.) Jee sáá kuniꞌ rán maa, ya̱ kuiñɨ‑ɨ nu̱u̱nꞌ ntu íyó kuiñɨ‑ɨ, saájee rá ñɨvɨ nééꞌ ñuꞌun Judea íyó kunu ráa kɨ̱ꞌɨ̱nꞌ ráa nu̱u̱nꞌ rá yuku sáva ka̱ku ráa. 15Ré ɨɨn ñɨvɨ yósóꞌ‑o xi̱ni̱ꞌ ve̱ꞌí‑i, jee koto núun‑u nívɨ‑ɨ iniꞌ veꞌi‑i tavaꞌ‑a ni ɨɨn nantíñú‑u. 16Jee ré ɨɨn ñɨvɨ íñɨ́‑ɨ nu̱u̱nꞌ tataꞌ sáꞌá‑a, koto níkó‑o nakeꞌen‑e so̱kotóꞌ‑o. 17Na̱ ka̱ꞌ náꞌví ka̱ꞌ rá ñaꞌan nékue̱ꞌi̱ꞌ, jín rá ñaꞌan néen yɨkɨ́n rá ki̱vɨ̱ꞌ yukuán.
18’Ka̱ka̱nꞌ táꞌvíꞌ rán nu̱u̱nꞌ Ndiosíꞌ ya̱ nkúvi rá tiñu yaꞌá tiempúꞌ kúvíjin. 19Chi rá ki̱vɨ̱ꞌ yukuán koo tu̱nóꞌó máá na̱sɨ xéénꞌ nasɨ́kuitɨꞌ, ya̱ ni ntiáꞌan né kuvi suꞌva ne̱ tiempúꞌ xíꞌnañúꞌún, sáá nsa̱ꞌá Ndiosíꞌ ñɨ̱vɨ́, jín ne̱ vitan. Jee ni nsáꞌ koo‑o ka̱ꞌ suꞌva. 20Jee retánꞌ ntu̱ví nasaꞌá kuítɨ́ I̱toꞌoꞌ‑ó tiempúꞌ tu̱nóꞌó vá, jee ni ɨɨn ñɨvɨ nkáku nékúvi. Soo jie̱ꞌe̱ꞌ rá ñɨvɨ nkáji Ndiosíꞌ sáva ki̱vɨ ráa xi̱ntíín re̱ꞌ, saáva nasaꞌá kuítɨ́ re̱ꞌ tiempúꞌ vá.
21’Saájee retú ɨɨn ñɨvɨ kachiꞌ‑i nu̱u̱nꞌ rán tiempúꞌ yukuán: “Kune̱ꞌyá, yaꞌá íñɨ́ Cristo.” Áxí kachiꞌ‑i ya̱: “Kune̱ꞌyá, yukuán íñɨ́ re̱ꞌ.” Koto ínúꞌ iniꞌ rán tu̱ꞌun ya̱ káchíꞌ‑i, 22chi kiji rá te̱e xínáꞌví ya̱ kachiꞌ ráa nika̱ꞌ ya̱ Cristo ví ráa. Jee kenta rá ñɨvɨ ya̱ kachiꞌ ráa nika̱ꞌ ya̱ nákani ráa tu̱ꞌun kéne yuꞌú Ndiosíꞌ. Jee saꞌá ráa rá seña a̱nasɨ́ jín rá tiñu a̱nasɨ́ ya̱ ti̱vɨ́ xíniꞌ rá ñɨvɨ sáva xináꞌví ráa rá ñɨvɨ. Jee saꞌá ráa maa sáva xináꞌví ráa ne̱ rá ñɨvɨ nka̱ji Ndiosíꞌ, retú sa̱naanꞌ kuvi. 23Soo nito koo rán maárán. Chi ya nstúꞌva ya̱chi̱ꞌ ni̱ꞌ ránoꞌó jie̱ꞌe̱ꞌ nɨꞌɨ rá tiñu vá ne̱ ntiáꞌan kuvi‑i suꞌva.
Sáá niji tuku Jesús
(Mateo 24:29-35, 42-44; Lucas 21:25-36)
24’Soo rá ki̱vɨ̱ꞌ yukuán, jee ré njia̱ꞌa tu̱nóꞌó,
jee nuneenꞌ nka̱niiꞌ, jee nsáꞌ kutuunꞌ ka̱ꞌ ñuꞌunꞌ yo̱o̱ꞌ,
25jee ku̱te̱ꞌ rá tiu̱u̱nꞌ ne̱ súkún.
Jee kajiaꞌ rá fuersáꞌ súkún ya̱ tɨ́ɨn nɨꞌɨ ya̱ íyó súkún.
26’Saájee kuniꞌ rá ñɨvɨ nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, kiji ni̱ꞌ nu̱u̱nꞌ vi̱ko̱ꞌ jín fuersáꞌ ííꞌ níꞌin níso ni̱ꞌ ya̱ viiꞌ nasɨ́kuitɨꞌ kúñáꞌnú ni̱ꞌ ya̱ va̱ne̱ꞌ tu̱u̱nꞌ kujianu̱te̱ꞌ nuva ni̱ꞌ. 27Jee kuíre chuichí ni̱ꞌ rá najiáꞌáꞌ ííꞌ ni̱ꞌ jee nastútú ráa rá ñɨvɨ nka̱ji ni̱ꞌ kuvi ráa ñɨvɨ ni̱ꞌ, ne̱ nu̱u̱nꞌ ni kúmíꞌ ichi ñɨ̱vɨ́, ne̱ íyo ka̱ꞌ ichi ñɨ̱vɨ́, jín ne̱ íyo ka̱ꞌ ichi antivɨ́ ya̱ta̱ꞌ ñɨ̱vɨ́.
28’Kutu̱ꞌva rán ya̱ xínéꞌénꞌ tu̱ꞌun kúnkunuún káꞌánꞌ jie̱ꞌe̱ꞌ yutun higo. Sáá ya núyúté naꞌá yutun‑u jee néneyúté naꞌá yu̱ku̱ꞌ‑u, ya jíníꞌ rán ya̱ va̱ji nku̱yatin rá yo̱o̱ꞌ tiempúꞌ sááꞌ. #13:28 Soo ñuunꞌ Israel ntu kúun sa̱vi̱ꞌ tiempúꞌ verano. Yukuán kúun sa̱vi̱ꞌ ne̱ rá yo̱o̱ꞌ octubre jín ne̱ yo̱o̱ꞌ mayo. Verano kúvi rá yo̱o̱ꞌ junio, julio, jín agosto ya̱ kúvi‑i tiempúꞌ nííꞌ. Jee néneyúté naꞌá yu̱ku̱ꞌ rá yo̱o̱ꞌ abril jín mayo. 29Suni sukuán sáá kuniꞌ rán ya̱ kuvi rá tiñu yaꞌá ya̱ nkachiꞌ ni̱ꞌ, saájee kukáꞌnú iniꞌ rán ya̱ ya va̱ji kúyatin ni̱ꞌ, kuéntáꞌ va̱ji ki̱vɨ ni̱ꞌ yuvéꞌí. 30Máá nááꞌ vá káchíꞌ ni̱ꞌ nu̱u̱nꞌ rán ya̱ nsáꞌ ji̱nu rá ñɨvɨ yaꞌá #13:30 Tu̱ꞌun yaꞌá ví esta generación: kúvi kachiꞌ‑ó rá ñɨvɨ ya̱ tékúꞌ ráa tiempúꞌ nkachiꞌ Jesús tu̱ꞌun yaꞌá, áxí rá ñɨvɨ kutekuꞌ sáá kuniꞌ ráa rá seña vá, áxí tataꞌ yaꞌá (tataꞌ Israel), áxí rá ñɨvɨ ya̱ kúvi suꞌva. ne̱ kuvi nɨꞌɨ rá tiñu ya̱ nkachiꞌ ni̱ꞌ. 31Súkún jín ñɨ̱vɨ́ yaꞌá kɨ̱naanꞌ ráa, soo rá tu̱ꞌun káchíꞌ ni̱ꞌ, ni nsáꞌ kɨ̱naanꞌ‑a chi nɨꞌɨ sikúnkuvi.
32’Soo jie̱ꞌe̱ꞌ ki̱vɨ̱ꞌ yukuán jín hora vá, ya̱ kuvi rá tiñu nkachiꞌ ni̱ꞌ, jee ni ɨɨn ntu̱náꞌ jíníꞌ maa. Ni rá najiáꞌáꞌ ííꞌ Ndiosíꞌ, ya̱ nééꞌ antivɨ́. Ni maáníꞌ ya̱ kúvi ni̱ꞌ Se̱ꞌya Ndiosíꞌ. Chi métúꞌún ni Tátáꞌ‑ó Ndiosíꞌ ví ya̱ jíníꞌ. 33Nito koo rán maárán. Kuꞌun xúꞌún iniꞌ rán. Jee ka̱ka̱nꞌ táꞌvíꞌ rán nu̱u̱nꞌ Ndiosíꞌ, chi ntu jíníꞌ rán na̱ tiempúꞌ kuvi‑i. 34Sukuán íyó kuéntáꞌ íyó ɨɨn te̱e ya̱ nkene‑e veꞌi‑i jee kua̱ꞌa̱nꞌ íká‑a. Jee ne̱ ntiáꞌan kene re̱ꞌ, jee njia̱ꞌa re̱ꞌ nu̱u̱nꞌ ta ɨɨn rá musúꞌ re̱ꞌ tiñu sáꞌá ráa, sáva kuneen kuéntáꞌ ráa veꞌi re̱ꞌ. Jee nta̱túníꞌ re̱ꞌ nu̱u̱nꞌ te̱e kúmí yuvéꞌí, ya̱ nito koo‑o. 35Saáva nito koo rán, chi ntu jíníꞌ rán na̱ma kiaaꞌ I̱toꞌoꞌ xí veꞌi: á yankuaaꞌ, áxí savañuún, áxí nikɨ́n sáá kána stóꞌo, áxí ya̱neꞌenꞌ. 36Nito koo rán maárán, sáva retú sa̱naanꞌ nenta ni̱ꞌ jee koo tu̱ꞌva rán, kuéntáꞌ retú nenta sa̱naanꞌ te̱e xí veꞌi, jee ntu nániꞌinꞌ sa̱naanꞌ re̱ꞌ musúꞌ kíxíꞌ. 37Rá tu̱ꞌun káchíꞌ ni̱ꞌ nu̱u̱nꞌ rán yaꞌá, nu̱u̱nꞌ nɨꞌɨ ñɨvɨ káchíꞌ ni̱ꞌ maa. ¡Nito koo rán maárán! ―nkachiꞌ Jesús.
Одоогоор Сонгогдсон:
Marcos 13: meh
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2022, Wycliffe Bible Translators, Inc. All rights reserved.