Iyoni 3
3
Yeisu be Nikodimo tetelidi
1E koroto tayamo adi tovakumgo tayamo. 2Ame tauyana sabamgo goi ima yaina idigo kana,
‘Tovatulúkwana Toolagaim, kayagoi bego kom tovatulúkwana tayamo Yaubada goi kuma. Moitamo. Neta Yaubada kom taiyao geya, e aba kinana kuguuinuwedi geya itoboinemta kuguinuwedi.’
3Go iya Yeisuyana idigo kana,
‘Im bóbwara moitamo go, ame alatuuwokoim kunōve: Avatauwa neta geya sibibinamneta, geya itoboinedita bei sigite.’#Mad 18:3; Mak 10:15; Luk 18:17; Iyo 3:5.
4Go iya Nikodimoyana kana,
‘Yau bogina akaitomoya go! Manakaegu abibinamna? Manakae? Sinagu gamona goi aiyuwoina asiumna abíbina ae? Geya itoboineguta!’
5Go iya Yeisuyana kana,
‘Moe moitamo go, ame alatuuwokoim kunōve: Avatauwa neta bwae goi#3:5 Bwae goi: Ame nakona livalakaibala da Giriki niyadi goi. Ana yagoina moe manakaeda tabíbina. Tutayana tomota ibíbina, mainao bwae vavina goi isowóduwo namlieta gómana isowóduwo. Tauna bwae goi tabíbina moe sakava ana dadava idigedige go, Baloma Kimaasabaina goi moe baloma ana dadava goi. be nakae goi geya sibibineta, geya itoboinedita Yaubada ina kalibúbuna goi sisiu.#Iyo 3:3. 6Avatauwa neta sakava goi sibíbina, moe sakava ana dadava. Go avatauwa neta Baloma Kimaasabaina goi sibíbina, moe baloma ana dadava. 7Taabu kukaaināopa bego yau kagu,
“Itoboinem kubibināmna.”
8Gwa! Nako goi yágira latuwona itowo, nakae itowo, e butukáona tanove go, geya tayagoiyeta nako imamaima o nako inonoina. Tauna kom nakae neta Baloma Kimaasabaina goi kubíbina. Ina paisewa geya kugiteyeta go, ina paisewayana myana kuulotowo.’
9Go iya Nikodimoyana idigo kana,
‘Go bibinamna manakaena isowóduwo?’
10Go iya Yeisuyana idigo kana,
‘Iyaa! Manakae? Kom bego idi tovatulúkwana go, ame vatulukwanayadi geya kuyagoidita ae? 11Moe aba kainaopa gagaina go, ame alatuuwokoim kunōve: Kaga kaayagoi kaabobore; kaga kagitegite katalavaite yaimi go, ima talavaitayana geya konumiseyeta. 12Kaga kaga sisowóduwo poyapoya goi manudi alatuwokoimi go, geya konumiseguta. Tauna kaga neta yábana manuna alatuwokoimi, bei manakaemi konumisegu? 13Ame pasina itoboinegu yábana manuna avatulúkwana: Geya vatau tayaamo bogina ituko ina yábana goi bego dogoiyadi yábana manuna iyagoidi, go sem yábana goi isou ima anetava itoboine dogoiyadi iyagoidi. 14Boi nimatu yoyowo goi Mosese barasa ikabi, moteta imadagi. Ikavava, aitakeo goi itupatuko. Ikavava, ikatulagasi, e bei avatauwa neta motetayana sipotepote, geya sikamaseta, go sem maa yawoidi sikaaiyaka.#Yoy 21:4-9. E nakae itoboine bei Tomalatomota sikatulagasi 15bego avatauwa neta Tauyana sinumise, e maa yawoidi vata.’#Iyo 3:16; 6:47; 20:31; 1Iy 5:13.
16Ame moitamo. Yaubada imatakoiyeda ame nakae: Natuna kaakesaina#Iyo 1:18; 3:18; 1Iy 4:9. ikasale#Abv 22:2,12,16; Iyo 1:14. bego avatau neta inumise, bei geya ikamaseta, go sem maa yawoina vata.#Iyo 3:15; 6:47; 20:31; 1Iy 5:13. 17Moitamo. Yaubada Natuna ietune ima poyapoya ame goi geya kada bego da poyapoya itakinoida toogoyoida ida goyo pasidi geya, go sem bego Natunayana goi iyaveda.#Luk 19:10; 1Ti 1:15. 18Avatauwa neta Natunayana siinumise, itakinoidi todedevidi. Ego avatauwa neta Yaubada Natuna kaakesaina#Iyo 1:18; 3:16; 1Iy 4:9. geya sinumiseyeta, bogina itakinoidi toogoyoidi. 19E takinonayana unana ame: Mavadayana bogina ima poyapoya ame goi go, tomota nuwodi geya ikabiyeta, go sem mamaníwana nuwodi ikabi. Idi nuwokabiyana moe idi guinuwa goyogoyoidi pasidi. 20Moitamo. Avatauwa neta goyo siguuinuwe, Mavadayana sikaolilive, tauna bei geya sisiuta, govila bei idi guinuwa itapasigidi. 21E kidi go avatauwa neta Yaubada ana siguuinuwe, Mavadayana simeko bego idi guinuwa ikaiwoduwedi bego tomota liliudi siyagoi idi guinuwayadi moe idi spwagógana Yaubada yaina goi pasina siguuinuwedi.
Iyoni tosayóyova be Iyoni togínina idi talavaita Yeisu manuna
22Moe dogoiyadi sikavava, Yeisu be kai ina . 23Ego nakae. Bwae gagaina asa Ainoni Salim kikina goi ikaaiyaka, tauna tomota sina amoko goi Iyoni isaayoyoidi. 24Amo tutayana Iyoni nava deri goi geya sivaisiuyeta.#Mad 14:3; Mak 6:17; Luk 3:19-20.
25E tauna kidi Iyoni ina be Diyuu koroto tayamo taiyao sikaumakimaki goyo ana kimavada manuna. 26Tuwo Iyoni ina tovatotowanayaoyadi sima Iyoniyana yaina sidigo kadi,
‘Tovatulúkwana Toolagaim, koroto kunuuwaisi boi Iyoridani ta dadava goi taiyao kokaaiyaka nakae boi bogina kukamooitamoe? E kunōve. Korotoyana ame tuta boda isaayoyoidi. Madabokiidi sinonoina Tauyana yaina goi. Tauna geya simamaima kom yaim.’
27Go iya Iyoniyana idigo kana,
‘Geya vatau tayaamo kébana, nakona toolagaina gea toosobuna, ibabane neta kina Yaubada geya iviniyeta. 28Komi toinimi itoboinemi kotalavaitegu bego boi adigo kagu,
“Yau geya,#Iyo 1:20. go sem Yaubada ietunekumgoiyegu ama be amo Tauyana ina sowóduwo manuna akatubayasi.”
29Aba gita tayamo aguinuwe: Korotoyana tonai nakae bei inai. Yau siyana nakae. Yau aataoya tauyana atuuyaosi bego ima. Tutayana tonaiyana isowóduwo, siyana bei iuyáwana gagaina tutayana tonaiyana niyana inove. Yau nakae auyáwana gagaina tutayana korotoyana ina guinuwa valena kutaalavaite anove. 30Tauyana itoboine ietoolagaina go, yau aetoosobugu.’
31Avatau neta maeko goi ima, e tomota liliuda yaida goi iya toosakina. Avatau neta poyapoya goi ima, moe guma poyapoya nakae poyapoya ana nanamsa kaka ibobore. Avatau neta yábana goi ima toosakina. 32Kaga bogina igite be nakae inove, moe italavaite go, ina talavaitayana geya vatau tayaamo iuyaone. 33Avatauwa neta ina talavaitayana siuyaone, e sikamoitamo bego Yaubada . 34Ame moitamo. Yaubada Natuna ietune ima ina livala italavaitedi. Bogina kuyagoi. Yaubada Balomaina ivakayaodeivatae. 35Gwa! Yaubada Natuna nimana goi kaga liliuna iyatoidi#Mad 11:27; Luk 10:22. unana Natunayana imatakoiye. 36Avatauwa neta Natuna siinumise, tauyadi bogina maa yawoidi vata. Ego avatauwa neta Natuna geya sikabikaoneyeta, yawoidi vata bei geya sibabaneyeta, go sem Yaubada ina egamogamogu ikaaiyaka tauyadi yaidi goi.
Одоогоор Сонгогдсон:
Iyoni 3: GVS
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2019, Wycliffe Bible Translators, Inc. All rights reserved.