Fagsigadan 11
11
Diyus nu Gfalyam Taw Fanlong
1Ebi ataw taguna, taw fanlong sas fagdaul daga sadi way. 2Ay at ngay taw nu gbanwan, gadgalinan way. Nu kadugdug, sas fakamenitan baliwa. Ay nu galin wa gugat, indasug sa sik datag dawdaw. Kanya fag datag, sis talun Sinar. Ay sanya wa fag datag dawdaw taw nu gbanwan.
3Ay ka fag ngay taw nu sanya wa gugat, iglong te, “Katsi nangawat way tam tam fangawat tam bale. Antam nanbul sik ngay daga ayuwayu. Ay antam nantafa tam ba daga, laman ro umgong.” Ay katanya wa fiya at taw fagbulun. Anwa fiya igtafa daga. Nu katanya, at fangawat at ngay bale, bunwa batu. Kanya way at nafagong fag ngay daga. Ay nu kawat wa at ngay bale, e fandafut tuwa sa sangay buknga, laman ro at naawat di karugbang.
4Ay bandi ataw, ka fag ngay taw gsulitanan te, “Katsi long nangawat watam tam fulan daul, at ke bale ngabat. Ay ka fag bale at ngabat, sumuy was banwa. Ay nu katanya tuwa tam fagbulun, at ngay taw ban dumungug tuwa, te itam wa fag fulan at madaragang dawdaw. Ay at sadi at kasinean, nu nafaawat tuwa tam katanya, ste wa ban gugat fag datag nu gbanwan tam. Di ban tam karapyag sa sangay talun.” Ay ka fag ngay taw nu nadiyuganan wa katanya, fasigad wa long kawat at fulan daul, ay anggan at bale ngabat.
5Ay roro at taw nu gfasigad wa kawat, siginans banwa Yawi indaga yay. Nanlag sanya fag ngay taw nu kawat at fulan ay at bale ngabat. 6Ay Yawi nu nananlag wan, glong te, “Katsi at ngay taw e fagmasadiun tuwa dawdaw, teway sadi way at fanlong. Nu katanya, katsi igfasigad wa gfagbulun tagbiya dawdaw fag fagbulun. Ay bandi ban, fagayu wa bangan at fasadanan, mafafagurungan tuwa. 7Ay nu katanya, nanlag yangay tam sanya, ay nanfalyam watam at fanlong, laman ro wa gtogdungug tiba nu gelongan.”
8-9Ay Diyus nafalyam wa fiya at ngay taw fanlong. Ay ka fag ngay taw wa long gtogdungug tiba nu gelongan. Ay nu katanya wa long, ka fag ngay taw intuwas wan nu kawat at fulan, ay inrapyag wa sa sangay talun. Ay bandi at taw nu gngayan sanya fag fulan, Babel. At masuwad kanya fag longan, Babel, wa nasadsafulan. Fakatanyaun at ngayan, teway sanya ebi Diyus nu gfalyam taw fanlong, laman at ngay taw wa gsadsafulan.
Sem at ngay Fufu sat Dagat Daga
10Katatuy at foyungan sas Sem baliwa, anggan sat ngay fufu sat dagat daga:
Siginan inke lino daul, inlangfe yay duwak banwa, ay Sem inke unga wan, sik ama. At ngayan Arfaksad. Ginanya, Sem banwa, 100 wan. 11Ay siginan Arfaksad insalug, at tama gleleg yay 500k banwa. Ay ginanya fag 500k banwa, kanya inke ngay unga yay ayuwayu, sik ngay ama ay sik ngay ina.
12Ay Arfaksad banwa nu anwa 35, kanya inke unga, sik ama. At ngayan Selak. 13Ay siginan Selak insalug, at tama gleleg yay 403k banwa. Ay ginanya fag 403k banwa, kanya inke ngay unga yay ayuwayu, sik ngay ama ay sik ngay ina.
14Ay Selak banwa nu anwa 30, kanya inke unga, sik ama. At ngayan Eber. 15Ay siginan Eber insalug, at tama gleleg yay 403k banwa. Ay ginanya fag 403k banwa, kanya inke ngay unga yay ayuwayu, sik ngay ama ay sik ngay ina.
16Ay Eber banwa nu anwa 34, kanya inke unga, sik ama. At ngayan Peleg. 17Ay siginan Peleg insalug, at tama gleleg yay 430k banwa. Ay ginanya fag 430k banwa, kanya inke ngay unga yay ayuwayu, sik ngay ama ay sik ngay ina.
18Ay Peleg banwa nu anwa 30, kanya inke unga, sik ama. At ngayan Reu. 19Ay siginan Reu insalug, at tama gleleg yay 209k banwa. Ay ginanya fag 209k banwa, kanya inke ngay unga yay ayuwayu, sik ngay ama ay sik ngay ina.
20Ay Reu banwa nu anwa 32, kanya inke unga, sik ama. At ngayan Serug. 21Ay siginan Serug insalug, at tama gleleg yay 207k banwa. Ay ginanya fag 207k banwa, kanya inke ngay unga yay ayuwayu, sik ngay ama ay sik ngay ina.
22Ay Serug banwa nu anwa 30, kanya inke unga, sik ama. At ngayan Nakur. 23Ay siginan Nakur insalug, at tama gleleg yay 200k banwa. Ay ginanya fag 200k banwa, kanya inke ngay unga yay ayuwayu, sik ngay ama ay sik ngay ina.
24Ay Nakur banwa nu anwa 29, kanya inke unga, sik ama. At ngayan Terak. 25Ay siginan Terak insalug, at tama gleleg yay 119k banwa. Ay ginanya fag 119k banwa, kanya inke ngay unga yay ayuwayu, sik ngay ama ay sik ngay ina.
26Ay Terak banwa nu anwa 70, kanya inke unga wan. Ay bandi, e baguwama wa tulu. At ngayan, Abram, Nakur, ay Aran.
Terak fag Talafuwan
27-29Katatuy at foyungan sas Terak baliwa, anggan sat ngay baguwama:
Terak e baguwama tulu, at ngayan, Abram, Nakur, ay Aran. Ay Aran, e ngay unga yangay, sadik ama ay duwak ina. At baguwama ngayan, Lut. Ay at baguyna, Milka ay Iska.
Ay kanya fag talafuwan ebi ataw nu gbanwan, sis fulan Ur, maful sis taw Kaldiya. Ay kaduge gugat gbanwan sanya, Aran inkate wan, sis fulan Ur. Sanya at fakasalugan yay fag talun.
Ay Terak baguwama at duwa, Abram ay Nakur, inke mangena wan. Nakur mangena, Milka. Kanya Milka, Nakur yay mangwayi. At tama, Nakur fadugsay at kinkate. Ay sis Abram at mangena, Saray. 30Ay roro Abram ay Saray dewa ndaduwa, Saray wa gugat gunga.
31Ay bandi, Terak naalin wan. Nataban at baguwama Abram, anggan at mangena. Ay nataban yangay at fufu Lut. Ay kanya fagayu glo wan. Satu ro, nangadasug wa sas talun Kanaan. Ay roro nu glugo wa nu glo, infamato wa sa sik fulan, at ngayan Karan. Ay sanya wan Terak fag talafuwan nu gbanwan. Wa natunglus sat fasadan. 32Ay nu gbanwan wa gugat sanya, Terak inkate wan. At banwa, 205.
Одоогоор Сонгогдсон:
Fagsigadan 11: TAWEAST
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Copyright © 2023 by OMF International, Philippines