Uan 2
2
Isus Fagbulun at Madulawan sis Fulan Kana
1Nu nlangfe wa duwak menit, e kadaduwa sis fulan Kana sis Galiliya fag talun, ay Isus at tina sanya. 2Ay Isus ay anggan at ngay tagadal sanya yangay teway e nagewan anya. 3Ay at fangaranug fag fanginum nu namin wan, at tina nalong sas Isus te, “Namin wan at fangaranug fag fanginum.” 4Ay Isus nalong te, “Sena, fabayani wa angku. Ku menit ya ndasug.” 5Ay dewa katanya, Isus tina nalong sa sangay fanuguwan te, “Nus nga setaw ro ku baguwama at longan ayu, faningi wan.”
6Sanya e unum fagsuwadan mamam at fangawat batu. At fagnafatsanyaun mamam, laman igfasine, igfaning at faugali. At kadaulan ka fag ngay fagsuwadan tiba, undain 20k galun mamam, ay tiba undain 30k galun mamam. 7Ay Isus nalong sanya fag ngay fanuguwan te, “Fapnui mamam sanya fag ngay fagsuwadan.” Ay nafapnu wa fiya. 8Ay Isus nalong yangay te, “Talini ay ubai sa tagmagurang ayu sanya.” Ay ka fag ngay fanuguwan nananfon wa fiya. 9Ay at tagmagurang nafaskud sirut nainum ka fag mamam. Ay at nainum, sik fangaranug fag fanginum. Ay kanya wa nasaful te, daginan at fagbulan, ka fag ngay fanuguwan way tagsaful. Ay at tagmagurang nauro takadaduwa fag mangama. 10Ay nalong te, “Ebi ginan sik taw at fon taguna at masine tuwa dawdaw fangaranug fag fanginum. Ay fagayu taw sanya nu gbiya wan at nainum, kanya fag taw ginanya yay nu gfon at yud bangan masine. Roro mangaro emu tuwa am nafon katsi taglabi nu masine.”
11Kanya yay Isus at nafalag taguna at madulawan fag fagbulun. Nu gfagbulun katanya, sis fulan Kana sis Galiliya fag talun. Ay kanya nu nafalag at fagmadaragangun, at ngay tagadal gafanud sa anya.
12Ay sanya ginan, Isus nalo wa sas fulan Kapernaum gfaygaluwan at tina, ay at ngay fadugsay, ay anggan at ngay tagadal. Ay nabanwan yay sirut sanya sik kadugayun.
Isus Nalanu Diyus Bale
(Mat. 21:12-13; Mar. 11:5-17; Lukas 19:45-46)
13Makbang wan taw Udyu at fagmafulun sa baliwas Tagfabarita nu Glangfe. Ay ginanya, Isus nalo sas Erusalem. 14Ay Isus nu nasakbo wa sas Diyus bale nalag sik ngay taw nu gfabili ngay baka, ay ngay tupa, ay ngay linatad. Ay nalag yangay ngay tagfafalit singku nu malunggung. 15Ay Isus naawat sik lubid at famusfus ay nafalaklo fagayu tagsanya fag ngay taw. Ay anggan nafalimu ngay tupa ay ngay baka siginans Diyus bale. Ay nafanburasan wan anggan ngay tagfafalit singku at ngay singku. Ay nafalub wan at ngay fagfatungkudan sigon. 16Ay Isus nalong sa sangay tagfabili linatad te, “Buli wan ay ngay linatad ay ubai wa sam dayu. Lag fakata sik fagtindanan ku Mama bale!” 17Ay Isus at ngay tagadal namatang at marirukan sis Diyus at longan te, “Katvngvdan nu gfe fanambagun aw am bale, gfauri wa angku.”
18Ay taw Udyu at ngay tagmagurang nalong sas Isus te, “Falagi emi sik fagbulun at madulawan laman gfatuyan o sa emi te, e fagmadaragangun o gfagbulun katanya.” 19Ay Isus nabalus te, “Nu rumasras wa ban am tuy Diyus bale, tulu way bank menit nu kawat aw.” 20Ay taw Udyu at ngay tagmagurang nalong sas Isus te, “Ebi, nu kawat Diyus bale, 46k banwa tuwa, go sangay ban tulu way bank menit nu kawat o?” 21Ay roro Isus at longan fag Diyus bale, at bilug wan. 22Nu katanya, gina Isus gdog gleleg, at ngay tagadal namatang ebi ataw Isus at longan. Ay kanya gafanud sa ebi ataw at marirukan sis Diyus at longan sas Isus baliwa, ay anggan gafanud yangay sas Isus at ngay foyungan.
23Gina Isus sis Erusalem, kaduge e fagmafulun sa baliwas Tagfabarita nu Glangfe, ngayuk taw at nalag at madulawan fag ngay fagbulun ay nafanud sa anya. 24Ay roro Isus wa gafanud sanya fag ngay taw teway gsaful way fagayu taw. 25Ay Isus wa gatarabangan at nanfatuyan sa baliwas taw, teway kanya gsaful tuwa fagayu taw at amatanganan.
Одоогоор Сонгогдсон:
Uan 2: TAWEAST
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Copyright © 2023 by OMF International, Philippines