Lukas 23
23
E Nataban Isus sas Pilatu
(Mat. 27:1-2,11-14; Mar. 15:1-5; Uan 18:28-38)
1Ay kanya fagayu nlindug ay nataban Isus sas Pilatu. 2Ay kanya matvngvd nu gfamuwagan gfoyung Isus at ngay asalanan te, “Nalag ami ka fag taw nu gfe asalanan tam ngay taw. Ay kanya nasalag emi nu gfon ami em buwis sas talun Ruma at fun fiya fiya. Ay manga nalong te, ‘Aw wan Diyus at nafili fag Fun.’ ” 3Ay Pilatu ginto sas Isus te, “Go o wan taw Udyu at Fun?” Ay Isus nabalus te, “O wan at nalong takatanya.” 4Ay Pilatu nalong sa sangay taganyun daul ay sa sangay taw te, “Dakwa e nasafulan ka fag taw at asalanan.” 5Ay ka fag ngay taw matvngvd nu nalong sas Pilatu te, “Tuy fag taw gfaaringangan tam ngay taw sa at nafoyungan. Nu gfamoyung sas fagdaul talun Udiya, siginans Galiliya anggan wa ndasug stes Erusalem.”
E Nataban Isus sas Fun Erudes
6Ay Pilatu nu nadungug kanya fag longan, nainto sa tiba te, “Go ka fag taw sik taw Galiliya?” 7Ay nu nasaful te, Isus siginans Erudes at fagmagurangan, Pilatu nasugu tibak taw te, “Tabani Isus sas Erudes.” Ginanya Erudes sa was Erusalem.
8Ay Erudes guseganan dawdaw nu nalag Isus, anway glugo wan nu galagun, ay ebi ataw e nafoyung anya Isus at fagbulun. Ay glugo wan nu galagun Isus at madulawan fag fagbulun. 9Ay Erudes ngayu wan at nainto. Ay Isus wa batang gbalus. 10Ay ngay taganyun daul ay ngay tagfoyung Muisis at Suguwan malindug sit dayu, ay matvngvd nu gfamuwagan gfoyung Isus at ngay asalanan. 11Ay Erudes ay anggan at ngay sundalu gfalingun ay igfanlamangan sas Isus. Ay nu nafasulun wa sas Isus sik masine dawdaw fag balukas ay nafakata sik takadungug fag taw, nafafoli yangay sas Pilatu. 12Ay Pilatu ay Erudes bagu nafagwesanan siginan ginanya fag menit. Ebi ataw kanya fag duwa garingangan way gugat.
E Nafalfas Barabas ay e Gafateun Isus
(Mat. 27:15-26; Mar. 15:6-15; Uan 18:39–19:16)
13Ay Pilatu nafaful ngay taganyun daul, ay ngay tagmagurang sis fulan, ay anggan ngay taw. 14Ay nalong te, “Aro nataban wam ka fag taw sa angku gina am gfoyung te, kanya tagfe asalanan tam ngay taw. Ay nasarap akwa ka fag taw at asalanan si ay akbang. Ay dungugani nu kin, manlag akdi we mauri kata aro ay longan. 15Ay anggan yangay Erudes wa mandi e nalag at mauri. Madyay kanya nafafoli way anya stiye sa antam. Dungugani nu kin. Ka fag taw we nafagbulun mauri, laman nanfate anya. 16Nu katvngvd way niya, nanfafalang akway anya ay gfalfas kwan.” [17E sik longan sanya fag talun te, falfasi sik masungsungan gina e fagmafulun sa baliwas Tagfabarita nu Glangfe.] 18Ay ngay taw gasfuwan dawdaw guro te, “Fatei Isus. Ay falfasi wan Barabas!” 19(Barabas at faginsungsungun, anway kanya nafamabo at fun, ay anggan nafate tibak taw.) 20Ay Pilatu gdog yay nalong sa sangay taw, anway kaumsig gfalfas Isus. 21Nu katanya way at longan, at ngay taw gfanguroan way te, “Tuktuki wa anya! Tuktuki wa anya sas salibagan kayu!” 22Ay at fatulu ginan Pilatu ginto sa sangay taw te, “Taw ro at masuwad ku fagnantuktukun? Nataw sangay at asalanan? Dakwa e nasafulan ka fag taw at asalanan. We nafagbulun mauri sak fate anya. Nu katvngvd way niya, nanfafalang akway, ay gfalfas akwan.” 23Ay rodi at ngay taw inkugat yay dawdaw nu guro te, “Tuktuki wa anya sas salibagan kayu!” Ay at ngay taguro at nababo. 24Ay Pilatu nafaning ka fag ngay taw at fasadan. 25Ay kanya nafalfas wa fiya ka fag masungsungan, ebi at nafamabo at fun, ay anggan nafate tibak taw. Kanya at ngay taw at fakaumsigun at fagfalfasun. Ay nafabayan wa Isus sa sangay taw laman gfagbulun at fasadan.
E Natuktuk wa Isus sas Salibagan Kayu
(Mat. 27:32-44; Mar. 15:21-32; Uan 19:17-27)
26Ay gina nataban Isus sas fagtuktukan, ngay sundalu nated sik taw siginans fulans Sirene, at ngayan Simun, gina guli siginans gamasun. Ay nafafasanan sanya fag taw Isus at ba salibagan kayu, laman gubanan guyan Isus.
27Ay ngayuk taw tagguyan Isus. Ay anggan tibak mangena garungan dawdaw ay guyway, anway kafanyu Isus. 28Ay Isus inbiling ay nalong sanya fag ngay mangena te, “Taw Erusalem at ngay mangena, lag guyway dewa am kabalu angku. Uywayi way sa ayu mandi, ay anggan sa ay ngay sisiyan. 29Dungugani nu kin ku longan. Umdasug ban sik ngay menit, tibak taw lumong ban te, ‘Masine tuwa sik mangena at yud e unga ay yud batang e nafasusu.’ 30Ay ginanya tibak taw lumong sa sangay muyud ay sa sangay bugsul te, ‘Atongi wa daw sa emi ay tabuni emi.’ 31Anway nu nafagbulun way sa angku at yud e asalanan, tain ro manga at fagbulun sa sangay taw at ke asalanan?”
32Ay nataban yangay duwa yak taw, at tagasalanan dawdaw, laman nanfate gfasfuwan Isus. 33Ay nu ndasug sas talun at ngayan Butul Alfuyu, natuktuk wa Isus sa sik salibagan kayu. Ay natuktuk yangay duwak tagasalanan sas duwak salibagan kayu, at sadi sis Isus siyun baliwa ay at sadi sit wala baliwa. 34Ay Isus nalong te, “Mama, falyami ka fag ngay taw at ngay asalanan, anway kanya wa nasaful at fagbulun at masuwad.” Ginanya, ngay sundalu gafudan Isus at balukas, gina ntabu nu gfe fagsafulan te, dada ro sik afud. 35Ay kaduge at ngay taw malindug gulit sit dayu, ngay tagmagurang sis fulan gfalingun Isus te, “Ebi kanya gfalangfe tuwa tiba, ay katsi falangfei tuwa mandi anya nu kanya wa fiya Diyus at nafili fag Fun.” 36Ay anggan ka fag ngay sundalu gfalingun Isus. Ay inkakbang ay nafon anya sik mayat fag mamam. 37Ay glong te, “Nu o wan taw Udyu at fun, falangfei tuwa emu mandi!” 38Ay e rirukan sis Isus tungud te, “TUY NGAY TAW UDYU AT FUN.”
39Ay at sadi at matuktukan fag tagasalanan igfalingun Isus te, “Go o wan Diyus at nafili fag Fun? Falangfei emu mandi ay anggan emi!” 40Ay at sadi gsalag at usama te, “Go wo kalimu Diyus? Sud way tam gafaurianan kata anya. 41At matuyan, ita duwa e faurianan sa anta, anway ta nafagbulun mauri way, ay roro ka fag taw dewa e faurianan, di e nafagbulun mauri!” 42Ay rodi kanya nalong sas Isus te, “Isus, amatangani tuwa angku, nu gmagurang wa ban o.” 43Ay Isus nabalus anya te, “Matuyan iglong aw emu te, katsi fag menit, gtaban aw emu sas Diyus at fagbanwanan.”
Isus Inkate wan
(Mat. 27:45-56; Mar. 15:33-41; Uan 19:28-30)
44Ay gina swa bilug menit, inkarum way sigad sanya fag talun fagdaul, anggan kabat sfatulu sfafun. 45Gina nkarum at menit, at fandingding fag falefe sis Diyus bale in-girat siginan at tungud anggan wa sat daga. 46Ay Isus nauro dawdaw te, “Mama, gfamato aw ku falad sa emu!” Ay nu nalong wa katanya, Isus naengasan wa taguyan. 47Ay at fun sundalu nu nalag fagayu at kin-gurungan sanya, naseg sas Diyus te, “Matuyan wa fiya kanya fag taw we asalanan.” 48Ay at maful sanya fag ngay taw nu nalag wa at kin-gurungan, guli wa sat ngay bale, ay garungan dawdaw guyway. 49Ay fagayu Isus at fagwes, ay anggan kanya fag ngay mangena ebi tagalo Isus siginans Galiliya, sanya yangay malindug sit dayu ay nalag yangay at kin-gurungan sas Isus.
Use Nalibing Isus
(Mat. 27:57-61; Mar. 15:42-47; Uan 19:38-42)
50E sik ama, at ngayan Use, siginans fulan Arimatiya sis Udiya fag talun. Use sik taw Udyu at sadi at tiba tungud tagmagurang, ay sik masine ay matuyan fag taw. 51Use wa gfadiyuganan sat tiba at fakaumsigun ay at fagbulun, anway kanya gfanya tuwa Diyus nu gmagurang taw. 52Ay kanya nananlag sas Pilatu ay get Isus at bilug. 53Ay rodi, Use nafadaga Isus at bilug, ay nasifig sa sik tagbiya fag falefe masine. Ay kanya nalibing sa ebi ataw at fasad faglibingan, sat naali sasad batu. Ay sanya ya batang e nalibing. 54Ginanya fag menit, Biyernes wan ay gfamasadan laman sas Fakamatoun fag Menit. 55Ay ka fag ngay mangena, ebi at tagufud Isus siginans Galiliya, gguyan Use. Ay nalag at faglibingan, ay naulit nu glibing Isus. 56Ay rodi ka fag ngay mangena noli wan, ay nafamasadan yay sik ngay famabebanglu laman sas Isus at bilug.
Ay roro kamato yay sis Fakamatoun fag Menit, gfaning Muisis at Suguwan.
Одоогоор Сонгогдсон:
Lukas 23: TAWEAST
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Copyright © 2023 by OMF International, Philippines