LUKAS 5
5
Daha' ala masik, avan daha' ngeniheng.
Anak sekulah aleng aring-aring Na' mili
Mat 4:18-22; Mk 1:16-20
1Té' nah ji hangun, alem Yesus nekring té' benghé' bawang Genesaret, buvut tua nah kelunan kahum tei pepeng té' béh Na' ngenep kelenghi dahun Allah. 2En Na' nyineng ké', té' dua' haruk té' bahé', bi dalo' aleng ngejala' atih dih uh napah nah dalo' men ujung haruk tei mayau jala' dalo'. 3Ma'un nah Yesus halem ji haruk, iha' tih haruk Simon, pelalau Iha' nyihu nyarang na' su uk men bahé'. Pelalau melo' nah Iha', dahin katuk kelunan ngahum atih men alem haruk atih. 4#Yoh 21:6 Tegu Iha' uh ngeta' tengaran, ken Na' men Simon, “Harang nah, tei ha' aleng dalem tih, en biving nah jala' ka' anan ja ka' ala masik kahum.” 5Pelalau nyu'ei Simon, ken na', “U Guru, pahmalem anih kalo' uh meté' ngejala' ji-ji pah em té' kelan alo', bi avin ha' Dahum tua kah akui biving na' la'an nih.” 6Tegu Simon uh biving jala' men dalo' nunan dih, iha' nah dalo' ala masik kelalau lalé' kahum, ateng jala' dalo' seng birak kenan masih, 7dalo' pah ngayep bakéh dalo' alem haruk ha' béh, ja dalo' nei masi dalo'. Dalo' atih pah tei, piah-piah nah dalo' nyuang dua' haruk atih, ateng dalo' lim seng kahem. 8Tegu Petrus nyineng na', ngelu'ap nah iha' té' bulan kasa Yesus, dahin kuma', “U Tuhan, lap nah men béh kui, avin akui anih ji kelunan aleng sala.” 9Avin iha' ngeniheng, nurei kah dalo' aleng dahin na' lahuh ngeniheng té' peng lideng masik aleng kelan dalo' atih. 10Nunan pah Yakobus dawa' Yohanes aleng anak Zebedeus atih pah ngeniheng lahuh, avin dawa' nah aleng peji dahin Simon ala masik. Ken Yesus nah men Simon, “Meng takut, men kerei inih ika' seng ngejala' kelunan,” ken Na'. 11Tegu dalo' uh mekep haruk dalo' ha' bahé', en dalo' lek nah lim uvung dalo', pelalau tei ngioh Yesus.
Iha' petagéh ji la'ung aleng ga' perah malin
Mat 8:1-4; Mk 1:40-45
12Alem Iha' té' alem ji daléh té' nah ji la'ung aleng ga' perah malin#5:12 perah malin Nyineng behida Mat 8:2., katé' lelan ha' té' perah na'. Tegu iha' nyineng Yesus, ngelu'ep nah kelunan atih dahin akei té' Iha', ken na', “U Tuhan, awi ha' kenep Ka' adang deng Ka' petagéh akui.” 13Pelalau Yesus mejei usu Na' dahin gem iha', ken Na', “Ngenep kah Akui, ma'ang nah im.” Tegu atih pah lahuh pelalau magéh nah iha' men perah malin atih. 14En Yesus nangen nah iha', “Men ji kelunan pah meng im bara na', bi tei nah im bara batung ka' men imam dahin ma'uk bun usu ka' men Tuhan avin ika' uh magéh, awi aleng hu'en Musa', iha' tih jadi' ji tada' men kelunan.” 15Sa'-sa' putat nah dengah Yesus, pelalau pepeng nah kelunan kahum avin daha' ngenep kelenghi dahun Na', dahin akei Iha' petagéh kelunan men perah daha' tih, 16bi leka' nah Yesus tei ha' ngavan aleng henung, pelalau sebayang.
Iha' petagéh ji la'ung aleng perah matei uhat
Mat 9:1-8; Mk 2:1-12
17Tegu Yesus pekatuk té' ji dau té' nah kelunan Farisi dahin dalo' guru tebara menuna' melo' hitih aleng nei ateng men ha'ut-ha'ut uma té' daléh Galilea dahin Yudea dahin Yerusalem. Tingan Tuhan Allah té' té' Iha' ateng Iha' petagéh kelunan. 18Té' pah ji kelunan aleng perah matei uhat aleng en dalo' na'tang paget ngavan na' miri, dahin ilau alan seng geri iha' halem, ngenep metei iha' ha' unan Yesus. 19Bi em deng loh dalo' geri iha' halem, avin kelunan kahum. Lun ma'un nah dalo' hujung kepang, pelalau dalo' merah nah hapau pelalau muloh iha' dahin ngavan na' miri atih men kepang, tei ha' unan Yesus té' hang daha'. 20Tegu Yesus nyineng kinan dalo' atih, pelalau Iha' kuma', “U bakéh, sala ka' uh pebet.”
21Daha' aleng puboh surat Tuhan atih dahin daha' Farisi atih petengaran dahin kuma', “Hi kah kelunan anih aleng peji'ek Allah? Hi aleng deng mebet sala kelunan, bi Allah dep kah?” 22Bi kitan Yesus alem kenep kelunan atih, pelalau Iha' kuma' men daha', “Na' nun ikam pelemana' nunan alem kenep kam? 23Aleng ano' aleng seng melei en ta' kuma', ‘Sala ka' uh pebet,’ iha' em nunan ké', ‘Biti nah im, panau', Kek iah? 24Bi Akui bara men ikam, Anak-kelunan ningan ha' usun tana deng mebet sala.” Lun ken Na' men kelunan aleng perah matei uhat atih, “Akui kuma' men ika', ‘Peju nah, ala nah avam tudu anan, uli ha' uma ka',’ ” ken Na'. 25Pelalau peju nah iha' ha' unan daha' atih tegu atih, dahin ala avan na' miri atih, pelalau uli ha' uma na', dahin meju aran Allah. 26Lim daha' atih pah ngeniheng tua, pelalau meju aran Allah, dahin takut lelan pah daha', ken daha', “Dau anih nah itam uh jam ket aleng selap.”
Tuhan Yesus mili Lewi
Mat 9:9-13; Mk 2:13-17
27Ngebaya men'uh atih musang nah Yesus, en Na' nyineng nah ji kelunan aleng mepeng sukei, aleng aran na' Lewi, alem iha' melo' té' uma ngavan na' mepeng sukei. Ken Na' men iha', “Nei nah ngioh Akui.” 28Pelalau iha' melek lim ket anan, nei biti, pelalau tei ngioh Yesus.
29 #
Lk 15:1-2
Lewi pah na ji pahlung aya' men Yesus té' alem uma na'. Hinan té' kahum kelunan aleng mepeng sukei dahin daha' ha' béh pah aleng melo' kuman dahin daha'. 30Ngelebeng nah daha' kelunan Farisi dahin daha' aleng puboh surat Tuhan marung daha' anak sekulah Yesus, ken daha', “Avin nun kelo' kuman dahin du'i dahin kelunan aleng mepeng sukei dahin kelunan aleng sala?” 31Yesus pah nyu'ei dahin kuma' men daha' atih, “Kelunan aleng magéh atih nusi' té' bang na' men duktun, bi kelunan aleng perah tua. 32Nusi' Kui nei ateng muvui kelunan aleng teneng, té' pah kelunan aleng sala tua, ja daha' nei ngelisah kenep.”
Katuk marung pelien
Mat 9:14-17; Mk 2:18-22
33Ken daha' atih men Iha', “Daha' anak sekulah Yohanes tutek pelien dahin sebayang, nunan pah lahuh anak sekulah daha' Farisi atih, beka' anak sekulah Ka' kuman dahin du'i.” 34Ken Yesus men daha', “Deng kam nyihu daha' bakéh laké' aleng ngehawa' atih pelien alem ha' té' laké' aleng ngehawa' atih té' dahin daha' ia? 35Bi té' dau baya tegu laké' aleng ngehawa' atih leka' men hang daha', tegu atih nurei daha' pelien.”
36Pelalau Iha' na ji ivun men daha', “Ji la'ung pah em té' aleng mirak basung maring dahin napen na' té' basung aleng lumei. Tana' ha' nunan, birak loh kah kenan tapen aleng maring atih avin irak aleng maring atih em piah dahin basung aleng lumei atih. 37Ji la'ung pah em té' aleng melo' ata' agun aleng maring té' alem sut anit aleng lumei lahuh. Tana' ha' nunan, ata' agun aleng maring anan pah seng meso' sut anit atih, ata' agun atih pah muak, dahin sut anit atih pah birak. 38Bi ata' agun aleng maring tekep nah melo' na' alem sut aleng maring. 39Ji kelunan pah em té' aleng kuman ata' agun aleng dara uh anan seng ngivah té' ata' agun aleng maring, avin ken na', ‘Heling ata' agun aleng dara.’ ”
Одоогоор Сонгогдсон:
LUKAS 5: TDK1990
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Bible in Today's Dahun Kayan Version © Bible Society of Malaysia, 1990.