Genesis 25
25
Abrahab erningit Keturamit. Abraha toᴋovoᴋ. Ismaêlib kinguvângit. Esauelo Jakolo.
1Abrahalo nulianikkivoᴋ Keturamik attelingmik.
2Tâpsomungalo erniarivait Simralo, Jokasânelo, Mêdalo, Mîdialo, Jisbakelo, Suarelo.
3Jokasâniblo Sebalo Dedanelo ernertârivak. Dedanible Assurillo Latusillo Leumillo kinguvârivait.
4Mîdiable kinguvângit (imaiput): Efalo Eferelo Hanorlo Abidalo Eldaalo. Tâpkoa tamaita Keturab kinguvârivait.
5Abrahablo perᴋutine tamaita tunivait Isaamut.
6Pannervgaminille ᴋitorngarijane pilliutinik tunidjivigivait, inôvlunelo sulle nûtipait ernerminit Isaamit paunga kangillît nunangannut.
7Abrahable inôsingata jâringita unurningit 175ovut.
8Abrahalo anernangerlune toᴋovoᴋ ᴋêrtovlune, îtôvlune, nâmaksimariklune, sivorliminullo illaliudjauvoᴋ.
9Isaablo Ismaêliblo ernîkita illijatorpâk ᴋairosungmut Makpêlamut, Efronib, Zoarib Hêtitereojub erningata perorsêvinganut, Mamrib akkianêtomut,
10Perorsêvingmut, Abrahab pissiarilauᴋtanganut Hêtib ᴋitornganginit. Tagvunga Abraha nuliangalo Sara illijartortauvuk.
11Abrahablo toᴋungata kingorngagut, Gûdib erninga Isaaᴋ saimauserpâ. Isaarlo nunaᴋarpoᴋ “Omajub uvamnik takojub puilavingane.”
12Tamadja unipkautsit Ismaêlemik, Hagarib Egiptenemiub, Sarab kivgangata erniarilauᴋtanganik Abrahamut.
13Tamadjalo Ismaêlib erningita attingit, tâpkoa maliklugit kinguvângit atserartauvut: Nebajot, Ismaêlib erniariᴋârtanga, Kedar, Adbêl, Mibsam,
14Misma, Duma, Masa,
15Hadar, Têma, Jetor, Nafis, Kedma.
16Tâpkoangovut Ismaêlib erningit, tamakkoangovullo attingit (ilingatitaumajut) tangmârvinginut iglugasanginullo; attanit 12 inôᴋatimingnut ilingajut.
17Ismaêliblo jâringit 137olauᴋput; anernangerlunelo toᴋovoᴋ, sivorliminullo illaliudjauvoᴋ.
18Nunaᴋarpullo Havilamit Suere tikkidlugo, Egiptenib tungânêtoᴋ, apᴋome Assiriamut. Kattangutimelo ilûnatik kangiane nunaᴋarpoᴋ.
19Tamadja unipkautsit Isaamik, Abrahab erninganik: Abrahab Isaaᴋ ernerivâ.
20Isaarlo jâreᴋarpoᴋ 40nik, Rebekka nuliarigamiuk, Betuelib Siriamiub panninga, Mesopotamiamit pijoᴋ, Labanib Siriamiub najanga.
21Isaablo Nâlegaᴋ ᴋenuvigivâ nuliane pivlugo, ᴋitorngisuingmat. Nâlekablo tussarpâ, Rebekkalo nulianga singailerpoᴋ.
22Nutaraksâgle aporᴋattautingmanik timingane, oᴋarpoᴋ: Taimaipat, sûdlunga taimailivingâ? Nâlegarlo apperijartorpâ.
23Nâlekablo oᴋautivâ: Inôᴋatigêksuit magguit timingnêput, inugasaᴋsuit magguit timingnit anijomârput; inôᴋatigêksuit aipaingit sâlaᴋaromârput aipaimingnik, anginersarlo kivgaksauvoᴋ mikkinersamut.
24Erniviksangale nalliutingmat, nutte, maggoliarᴋarpok timingane.
25Annerᴋârtorlo aupallângavoᴋ, merᴋoᴋarlune ᴋissiktut; tâmna Esauemik atserarpât.
26Kingorngagut nukanga annivoᴋ, aggangillo angajume Esauib kingminganik tigumiarput; tâmna Jakomik atserarpât. Isaarlo 60nik jâreᴋarpoᴋ, erniangongmanik.
27Nukapiâgle inôsuleramik, Esaue ômajoᴋsiorteolerpoᴋ iglomêjuitoᴋ, Jakole sinaungaitoᴋ tuppermiôvoᴋ.
28Isaablo Esaue nagligivâ, tâpsoma pijaviningit mamarivlugit; Rebekkable Jako nagligivâ.
29Uvlullo illangane, Jako nerᴋiksaminik igangmat, Esaue naternamit tikkipoᴋ merngortorlune.
30Jakomullo oᴋarpoᴋ: Aupalluktaᴋ nerrilaulago-ai? manna aupalluktaᴋ, merngortudlarama. Taimaimat Edomemik taijaugivoᴋ.
31Jakoble oᴋautivâ: Erniangoᴋârnît pissiarilaulago uvlome!
32Esauib kiovâ: Takkuit, toᴋojuksatuinaugama, erniangoᴋârnera suksarivigô?
33Jakob oᴋautivâ: Tagva angerviginga mâna! Angervigivâ tagva, erniangoᴋârnine niorvgutigivlugo Jakomut.
34Jakoblo tunivait Esauemut ᴋaᴋᴋôjat makpatâgulaillo pîseojârtut igamajane; tâmnalo nerrivoᴋ imilarmelo, nikovilerporlo aularlunelo. Taimak Esauib erniangoᴋârnine suglugivâ.
Одоогоор Сонгогдсон:
Genesis 25: LIHB08
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Labrador Inuttitut Heritage Bible © Canadian Bible Society, 2008.