Zyan 11
11
Lazari kùúw kéele
1 #
Luk 10:38-39
Nànwaa maa ni yáa, pe i wi yiri Lazari, wi maa pye Betanii ye wóo, kěgi gi pye lè Marii ní wi yɛʔɛfɔw Mariti ye kěgi. 2#Zyan 12:3 Mariiw bee wi da Kàfɔw Zyezu tɔ́lɔyi pɔ̀li ní nùndaanni sìnmɛ ní, níì wi ǹjoori tɛ́ʔɛ n yi kurugo, Lazari wi da ni yáa lè, Marii cɔnɔɔ wi pye. 3A wi yɛʔɛfɔbèle siin tun Zyezu ma, níì jo pe sa wi pye: «Kàfɔw, mɔ taannyɛnw i naa ni yáa.»
4Lǎli ni Zyezu yáami wóʔo lóʔo lè, a wi jo: «Yáami naa o nyɛ wi yaàguumɔ í, gee naa n kpéʔele bi Kolocɔlɔɔ nìjangbɔɔri tɛ̀ɛn, koro ga pye Kolocɔlɔɔ si nìjangbɔɔri taʔa wi Jáaw na yáami naa báriga ni.»
5Mariti, ní wi cɔnɔw Marii, ní be cɔnɔw Lazari kéeli maa tɔ̀nɔ n Zyezu dɛ́nɛ. 6Koro ní ki myɛ ní àmɛɛ wi wírè Lazari yáami wóʔo lóʔo lè, a wi sèʔê canya siin kwɔ́ɔ yaà, beè wi da pye lè. 7Koro kàdoʔo ma a wi náà wi pìitamabèle pye: «Ki n yɛlɛ wo lúru wo kári Zyude ma.» 8A wi pìitamabèle wi yari: «Tamafɔw, a Zyefubèle jo lé pe a mɔ wábagi kpóo ní kàdɛnɛri ní ki ga mɔn í, á mɔ níì jo mɔ i syée yaà?» 9A Zyezu be yari: «Lɛ́ɛribéle kɛɛ ní siin ban be nyɛ canbogi ì? Syɔɔn ga ni táanri canʔa ni, wi o kpírigi í, níì cán wi i nyaagi dulunyanw naa gbɛ̀ɛnmɛ na. 10Kàjáa syɔ́ɔnwee wi ga ni táanri lè yébilige ni, woro n ni kpírigi, níì cán gbɛ̀ɛnmɛ o nyɛ wi ma í.»
11A wi ga dee bee joo n kwɔ́ɔ, a wi níì jo: «Wolo tàannyɛnw Lazari i yaà ni ŋúnɔ, mii si a kári sa wi yìrige ŋúnɔmi na.» 12A pìitamabèle wi pye: «Wo Kàfɔw, kapye wi n gbàn ni ŋúnɔ, wi a pɔʔɔ.» 13Wi kùúw kéele Zyezu da joo, pe si ga gi cán í, ní i sɔ̀ngí ŋúnɔmi wodelemɛ kéele wi joo poro ma. 14Lǎli bee ni a Zyezu náà gi joo n fílige be ma níì jo: «Dé a Lazari kùu wii. 15Ki n tɔ̀nɔ n mii dɛ́nɛ gbanʔama yele kéeli na, àmɛɛ gi nyɛ lè mii da pye yaà í, koro ga pye yele si tága kányɛʔɛ ni. Koro ní ki myɛ ní yaa maa wo kári wi ma.» 16Lǎli bee ni Toma pe wɔ́ɔ̄ yiri lè Didimi#11:16 Didimi: Mɔ ga lóʔo Toma wàlá Didimi, mɛ́ɛgi bee i nyɛ Senari ni Ŋǎɔn. a woro wi pìitamanyɛnbèle pye: «Ye myɛ yaa maa wo kári ní wi ní pe sa wo pínɛ be kpóo.»
Zyezu wi nyɛ nyán-yirili ní sìíw
17Lǎli ni Zyezu sáà nan yaà lè, a wi be nyaa a be Lazari tɔ́n, a wi canya sicɛrɛ kwɔ́ɔ nyángi ni. 18Amɛɛ si Betanii ní Zyerusalɛmi nyɛ lè yi ga léeli yiyɛɛ na í, ncan ki i nyɛ cúlobéle taanri félege, 19gee bee na Zyefubéle saʔa da kári yaà Betanii ma sa Mariti ní Marii kpɛʔɛlɛ be cɔnɔw kùu kéele na.
20Lǎli ni Mariti lóʔo lè Zyezu i yaà ni maa, a wi sáà wi fàra, níì Marii yaʔa wodɛ́ɛɔn ní kpáagi ni. 21Amɛɛ Mariti sáà Zyezu nyaa lè, a wi wi pye: «Ni Kàfɔlɔ, mɔ ga maa pye naa, mii cɔnɔw mǎà dée kùu í. 22Koro ní ki myɛ ní mii n sèʔê gi cán mɔ ga yárigee faala nyɛ́ɛri lè Kolocɔlɔɔ ma tɔ́ɔliw ni, Kolocɔlɔɔ a gi kaan mɔ ma.» 23A Zyezu wi pye: «Mɔ cɔnɔw a nyán bi pye sìi na.» 24A Mariti wi yari: «Mii n tɔ̀nɔ n gi cán ncan lǎlee ni kúbèle a nyán yiri lè dulunyanw cângwɔʔɔ canʔa na, lǎli bee ni wi a naa nyán.»
25A Zyezu wi pye: «Jo mii tiimaa si wi nyɛ nyán-yirili ní sìíw fɔ́lɔ. Syɔ́ɔnwee wi ga tága mii na lè, àlí wi ga wírè kùu, wi a nyán. 26Wee si wi nyɛ lè woweeo ní, níì tága mii na, wee bee a ní kùu bi nyaa í. A mɔ tága lé gee bee na?» 27A wi wi pye: «Ɛɛn, ni Kàfɔlɔ, mii n tɔ̀nɔ n tága gi na ncan mɔ wi nyɛ Kirisi, wi lè Kolocɔlɔɔ Jáaw, woro wee pe da jo lè wi a kɔ́ pan dulunyanw ni.»
Zyezu nyɛnili kéele
28A wi ga dee bee joo n kwɔ́ɔ, a wi jée kěgi ni wi cɔnɔw Marii kurugo n sáà joo ní wi ní tára nyɔ́ɔ na níì wi pye: «Tamafɔw n pan, wi si i mɔ yiri yaà.»
29Lǎli ni Marii gee bee lóʔo lè, a wi fala n yìri funvuugo na ni syée yaà Zyezu ma. 30Zyezu da kɔ́ɔ̀ jée kěgi ni í, tɛ́ɛgee ni Mariti da wi fàra lè, beè wi da sèʔê pye. 31Zyefubèle pe da pye yaà lè kpáagi ni ní Marii ní ni wi kpɛʔɛlɛ, àmɛɛ poro wi nyaa lè a wi yìri funvuugo na ni syée, a be taʔa wi na ni syée wi kurugo, ní i sɔ̀ngí wi i syée nyángi ma bi sa ra nyaan yaà.
32A Marii ga sáà nan tɛ́ɛgi na, beè Zyezu pye lè, àmɛɛ wi wi nyaa lè, a wi fala n tìgi n too wi taana níì wi pye: «Ni Kàfɔlɔ, mɔ ga maa pye naa, mii cɔnɔw mǎà dée kùu í.» 33A Zyezu ga wi nyaa a wi i nyaan, Zyefubèle pe da pan ní wi ní lè a poro wɔ́ɔ i nyaan, a wi fun-yáagi ŋɔ́n kányɛʔɛ ni, níì cán ki maa pye wi ma funbɛɛnrɛ gbanʔama. 34A wi be pye: «Sán ye sáà wi tɔ́n?» A be wi yari: «Kàfɔw, da maa mi ba nyaa.» 35A Zyezu nyɛni. 36A Zyefubèle i gi nyuu peyɛɛ ma níì jo: «Ye wéle, wi kéeli maa wi dɛ́nɛ dɛ.» 37A bele bee pèle wɔ́ɔ̀ jo: «Jo nǎnw naa wi da fúunnanw paʔa, a yele jo lé wi mǎà dée wɔ́ɔ gbǎn yarigaa kpéʔele bi Lazari syɔɔ kùúw ma í?»
Pe n Lazari nyán n yìrige
38A Zyezu níì fun-yáagi ŋɔ́n gbanʔama níì kári nyángi ma. Nyángi bee si maa pye fálaweʔe, á be kàdɛnɛgbɔʔɔ tɔ́n gi nyɔ́ɔgi na. 39A Zyezu jo: «Ye kàdɛnɛgi núngo yaà.» A kúw yɛʔɛfɔlɔ Mariti wi pye: «Wéle, ni Kàfɔlɔ, dé wi a pye da níma níbeena, níì cán wi canya sicɛrɛ wi wee níjanʔa nyángi ni.» 40A Zyezu wi yari: «Mii da sélì gi joo mɔ ma níì mɔ pye mɔ ga tága, mɔ a Kolocɔlɔɔ nìjangbɔɔri nyaa ì?»
41A be kàdɛnɛgi núngo yaà. A Zyezu wi yɛ́ɛgi yìrige ǹjoʔo ma níì jo: «Mii Tóow, mii i bariga kaangi mɔ ma àmɛɛ mɔ mii nyɛ́ɛrigi lóʔo lè. 42Níì cán mii n gi cán mɔ i mii nyɛ́ɛriyi lúro làrigèle myɛ ni, koro ní ki myɛ ní syɛ́ɛnmi naa kéele na mii gi joo, àmɛɛ bi yére n mii màʔa lè, koro ga pye pe tága gi na bi cán mɔ wi mii tun naa.» 43A wi ga dee bee joo n kwɔ́ɔ, a wi yákpoli wáa gbanʔama níì jo: «Lazari, yìri mi yiri naa!» 44A kúw yiri nyángi ni, wi tɔ́lɔyi ní wi kɔ́yi maa pye womigiye ní, á be wɔ́ɔ̀ wi yɛ́ɛgi pwɔɔ n tɔ́n ní fàniwaa ní. A Zyezu be pye: «Ye wi sánʔana, yé wi yaʔa waa syée.»
Pe n joo n bɛ̀ɛ Zyezu kpóoli kéele na
(Mat 26:1-5; Mar 14:1-2; Luk 22:1-2)
45 Zyefubèle bele pe da kári lè Marii ye kurugo, a pe ga Zyezu kakpɔɔgi bee nyaa, a poro pèle saʔa fala n tága wi na. 46A be pèle kári n sáà Zyezu kapyegèle bee kéele joo Farisibèle ma. 47A sáriga-wòlobèle kàfɔɔlɔ ní Farisibèle peyɛɛ nyaa n joo kéeli bee na, pe i kpóʔorojooli bee yiri Sanedirɛn, pe n jo: «Nǎnw naa tɔ̀nɔ́ i kakpoloyo saʔa kpéʔele, nyàʔá si wolo déē kpéʔele? 48Yele n gi cán wo ga wi yaʔa wi i gi kpéʔele nya, syɛ́ɛnbèle myɛ a tága wi na. Wɔrɔmi ye si a pan ba wolo sérikpaagi kálagi ní wolo Zyefuugi myɛ ní.»
49Wàa si maa pye be ni, pe i wi yiri Kayifu, woro wi da pye sáriga-wòlobèle kàfɔgbɔɔɔ yɛ́ɛli bee ni, a woro be pye: «Yele ga yarigaa cán í. 50Yele ga sɔ̀ngi gi na ncan ki n pɔ́rɔ yele ma syɔɔn nibin í kùu syɛ́ɛnbèle kéele na, koro ga pye Zyefuugi myɛ í syɔɔ kálagili ma í.» 51Kàjáa syɛ́ɛnri bee wi joo lè, wi da di kɔ̀rirɔ n joo wiyɛɛ ma í. Amɛɛ wi da pye lè sáriga-wòlobèle kàfɔgbɔɔɔ yɛ́ɛli bee ni, gee bee na Kolocɔlɔɔ da gi lége wi fúngi ni wi di joo àmɛɛ gi séli lè Zyezu í kùu Zyefuugi kéele na. 52Kàjáa Zyefuugi yagana kéele na ban wi a kùu í, fwɔɔ gee bee a kpéʔele bi Kolocɔlɔɔ pìíbèle myɛ kpóʔoro peyɛɛ na, bele be nyɛ lè tɛʔɛ o tɛʔɛ ni. 53Nlaa cángi bee na a be gi séli ni kanmaa caa, koro ga pye bi Zyezu taa kpóo. 54Gee bee na Zyezu da ní ni nyaari Zyefubèle nyɛ́nɛ na í. Kàjáa a wi yiri nɛɛ bee n kári tɛ́nɛmi bee kègaa ma be yiri lè Efirayimi. Kěgi bee maa pye fìími tára taana, a wi kòro nɛɛ bee ní wi pìitamabèle ní bi làla kwɔ́ɔ.
55Zyefubèle Sɔ̀lɔ-mí-yaʔali séri canʔa maa nùuni, a syɛ̀ɛnnɛ saʔa yìri tári bee tɛ́ɛyɛ myɛ ma n kári Zyerusalɛmi ma sa peyɛɛ jéemununi fáli kpéʔele sáni sériw canʔa í nan lè. 56A be i Zyezu wéle ni máari ní i gi nyuu peyɛɛ ma n be yaʔa kpɔ̀ʔɔrɔli kpaʔa kàcoolo ni woyérebéle ní, níì jo: «Mɛ̀ɛ́ yele sɔ̀ngí ki a pye? A yele jo lé wi a pan naa sériw ma í?» 57Sáriga-wòlobèle kàfɔɔlɔ ní Farisibèle si maa téè gi joo syɛ́ɛnbèle ma níì jo, syɔ́ɔnwee faala ga kɔ́ɔ̀ wi tɛɛkòrogi cán lè, wi sa gi joo poro ma, koro ga pye poro í sa wi cò.
सध्या निवडलेले:
Zyan 11: CB10
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Kolocɔlɔɔ Syɛ́ɛnri © Bible Society of Côte d'Ivoire, 2008.