Zyan 12
12
Marii n Zyezu tɔ́lɔyi pɔ̀li ní nùndaanna sìnmɛ ní
(Mat 26:6-13; Mar 14:3-9)
1A ki ga kòro canya kɔrɔni, Sɔ̀lɔ-mí-yaʔali séri canʔa si nan, a Zyezu kári Betanii ma, gee ni Lazari da pye lè, wee Zyezu da nyán n yirige lè kúbèle nínge ni. 2A be sáà yébiligi lìile sɔʔɔ Zyezu na nɛɛ bee. A Mariti i súri lée n sa ni téeri suliibèle taana, Lazari maa pye ní suliibèle bee ní, a be pínɛ ni líi ní Zyezu ní. 3#Luk 7:37-38 Lǎli bee ni a Marii náari nùndaanna sìnmɛ láa, bee lɔ́rɔ ti gbàn lè, pi maa pye cúlo tíla, n baa Zyezu tɔ́lɔyi pɔ̀li ní bi ní, níì wi ǹjoori tɛ́ʔɛ n yi kurugo kurugo. A sǐnmi núngo kpáagi myɛ foro. 4Wàa maa pye Zyezu pìitamabèle ni, pe i wi yiri Zyudasi Isikariyɔti, woro wee wi a kɔ́ ba wi le nigoobèle kɔ́yɔ ni lè, a wee bee jo: 5«Nùndaanni naa sìnmɛ lɔ́rɔ di nyɛ lè selebingéle taanri, nyàʔá na pe ga bi pára níì wáliw lɛɛ foomɔfɔbèle na í?» 6Foomɔfɔbèle kéele na ban wi da ni sɔ̀ngí níì dee bee joo í, níì cán wi maa pye kàyuuo ní i wáliw yalege có, gee ni syɛ́ɛnbèle da ni kpɔ́ʔɔri nii lè, a wi i wàa làrá ni yirigi gi ni. 7A Zyezu si jo: «Céw yaʔa sági. Ki n yɛlɛ wi bi kɔn sáni mii cânguugi í nan lè pé mii tɔ́n. 8#Làlw 15:11 Foomɔfɔbèle i naa ní yele ní làrigèle myɛ ni, kàjáa mii a pye naa ní yele ní làla o làla í.»
Pe n joo n bɛ̀ɛ Lazari kpóoli kéele na
9Lǎli ni Zyefu-syɛ́ɛnmi saʔa lóʔo lè Zyezu i yaà Betanii ma, a be kári yaà. Kàjáa Zyezu kéeli yagana na ban pe da kári yaà í, kàjáa pe maa kári bi wɔ́ɔ sa Lazari wéle, wee Zyezu da nyán n yirige lè kúbèle nínge ni. 10Lǎli bee ni a sáriga-wòlobèle kàfɔɔlɔ peyɛɛ nyaa n joo koro ga pye si wɔ́ɔ Lazari taa kpóo, 11níì cán Lazari kéeli na Zyefubèle saʔa poro yaari, ní i tági Zyezu na.
Zyezu i jǐn Zyerusalɛmi ni
(Mat 21:1-11; Mar 11:1-11; Luk 19:28-40)
12Ki nyǐndaligi na syɛɛnnɛʔɛmi pi da kári lè fɛ́tiiw ma, a pi ga lóʔo Zyezu wɔ́ɔ i syée yaà Zyerusalɛmi ma, 13#Ŋún 118:25-26 a be i sɛ́ʔɛwari lée ni syée sa wi fàra, ní i yákpogèle wáa níì jo:
«Hozanna! Kolocɔlɔɔ í dùbaw kpéʔele
Isirayɛli ye fànʔafɔw ma,
woro wee wi maa lè Kàfɔw mɛ́ʔɛ na.»
14Zyezu si maa jòfanipile taa n lúgu n tɛ́ɛn li na, àmɛɛ ki da sɛ́bɛ lè níì jo:
15 #
Zak 9:9
«Siyɔn calipili,
ki ga yɛlɛ mɔ í da fɛ̀ɛgí í.
Wéle, mɔ fanʔafɔw wi lúgu n tɛ́ɛn
jòfanicaa pyà na ni maa wee.»
16Wi pìitamabèle si da kɔ́ɔ̀ gee bee kɔ́rɔ cán lǎli bee ni í. Kàjáa lǎli ni Kolocɔlɔɔ nìjangbɔɔri taʔa Zyezu na lè, a be náà sɔ̀ngi n taa gi na ncan ki maa sɛ́bɛ wi kéeli na, koro si syɛ́ɛnbèle wɔ́ɔ baa kpéʔele wi ma.
17Lǎli ni Zyezu da Lazari yeri nyángi ni n wi nyán n yirige kúbèle nínge ni lè, syɛ́ɛnmi pi da pye yaà lè ní wi ní, a poro i séeraw kpéʔele. 18Amɛɛ si syɛ́ɛnmi kakpɔɔgi bee kéele lóʔo lè, gee wi da kpéʔele lè, gee bee na pe da yiri n kári sa wi fàra. 19Lǎli bee ni a Farisibèle i gi nyuu ní peyɛɛ ní níì jo: «Yele n gi cán gee wolo kpéʔele lè, ki i nyɛ gbanzan, ye wéle, àmɛɛ dulunyanw syɛ̀ɛnnɛ myɛ syée wi kurugo lè.»
Girɛkibèle pèle i caa bi Zyezu nyaa
20Syɛ́ɛnbèle bele pe da kári lè fɛ́tiiw ma sa Kolocɔlɔɔ kpɔ̀ʔɔrɔ, be pèle maa pye Girɛkibéle. 21A poro kári n sáà nan Filipi na wi lè Bɛtisayida ye wów, ki lè Galile ni, níì wi pye: «Wo kàfɔw, wolo i caa bi Zyezu nyaa.»
22A Filipi kári n sáà gi joo Andire ma, a woro ní Andire pínɛ n kári n sáà gi joo Zyezu ma. 23A Zyezu be yari: «Lǎli n nan, lee ni Syɔɔn-pya a wi nìjangbɔɔri taa lè. 24Mii a tɔ̀nɔ́ gi joo yele ma kányɛʔɛ ni, kapye pe ga yaliipile lùgu tári ni a li kùu í, li a kòro li nibin. Kàjáa li ga kùu, li a yaliire saʔa taa. 25#Mat 10:39; 16:25; Mar 8:35; Luk 9:24; 17:33Wee wi ga tàmaga le lè ní wi sìi ní, wee bee fɔ́lɔ a bɔ̀nɔ wi ni, wee si ga nigooro cò ní wi sìi ní lè dulunyanw naa ni, wee bee a wi woò kɔn sìibangwɔɔw yɛ́ʔɛ na. 26Syɔ́ɔnwee faala ga ni caa lè bàā mii fáliw kpéʔele, ki n yɛlɛ wi taʔa mii na, tɛ́ɛgee ni mii ga pye lè, mii falipyew a wɔ́ɔ pye nɛɛ bee. Syɔ́ɔnwee wi mii fáliw kpéʔele lè, mii Tóow a ra wee bee wɔ̀ʔɔrɔ́.»
Zyezu n wi kùúw kéele jo
27A wi níì jo: «Mii fúngi n curugo mii na tɔ́ɔliw ni n sɔ̀lɔ. Nyàʔá mii a joo? Mii si jo lé, mii Tóow, mi mii syɔɔ lǎli naa ma? Eʔe, mii a gee bee joo í, níì cán kéeli naa pyele na mii láa n baa nan lǎli naa na. 28Mii Tóow, nìjangbɔɔri taʔa mɔ mɛ́ɛgi na!» Lǎli bee ni a wi yákpolo lóʔo nyɛ̀ʔɛni na, a li jo: «Mii n sélì nìjangbɔɔri taʔa gi na, mii si a ní di taʔa gi na.» 29Syɛ́ɛnmi pi da pye yaà lè woyéremɛ ní wi taana, lǎli ni be yákpoli bee lóʔo lè, a pèle jo: «Nyɛ̀ʔɛni li tìn,» á pèle jo: «Kolocɔlɔɔ tundunwaa wi joo ní wi ní.»
30A Zyezu be pye: «Yákpoli yele lóʔo lè, mii kéeli na ban li joo í, yele kéeli na li joo. 31Lǎli naa ni pe a kútiiw joo ceri dulunyanw naa syɛ̀ɛnnɛ na. Lǎli naa ni pe a wɔ́ɔ dulunyanw naa fànʔafɔlɔ nɛnɛ yirige kàfugi na. 32Mii si na, pe ga mii yìrige tári na n yérige lǎlee ni lè, mii a ra syɛ́ɛnbèle myɛ kíle paa maa mii ma.» 33Syɛ́ɛnri bee wi da joo lè, kùuganmee na woro yɛlɛ bi kùu lè, gee bee wi da joo n tɛ̀ɛn. 34#Ŋún 110:4; Eza 9:6; Ezek 37:25; Dan 7:14 A syɛ́ɛnmi wi yari: «Pe i gi nyuu wolo ma Mowizi làlwaw sɛ́bɛ ni níì jo Kirisi a ba kòro beè sìi na làla o làla kwɔ́ɔmɔ fun. Mɛ̀ɛ́ si gi nyɛ á mɔ jo pe a kɔ́ ba Syɔɔn-pya yìrige bi yérige? Wìí wi nyɛ Syɔɔn-piiw bee?»
35A Zyezu be pye: «Gbɛ̀ɛ́nmi sèʔé i naa yele níngi ni bi làla cɛɛri kwɔ́ɔ. Amɛɛ si gbɛ̀ɛ́nmi nyɛ lè yele ma lǎli naa ni, ki n yɛlɛ yaa táanri bi na, koro ga pye yébilimi a kɔ́ yele nɛnɛ taa í. Níì cán syɔ́ɔnwee wi táanri lè yébilimɛ ni, wi o wi kàbangárigi cángi í. 36Amɛɛ gbɛ̀ɛ́nmi nyɛ lè yele ma lǎli naa ni, ki n yɛlɛ ye tága bi na, jàngó yele í pye gbɛ̀ɛ́nmi pìibēle.»
Zyefubèle sìndagala kéele
Lǎli ni Zyezu kérigèle bee joo n kwɔ́ɔ lè, a wi núngo be taana n sáà làra. 37Amɛɛ wi da wírè kakpoloyi saʔa kpéʔele lè pe nyɛnɛ na, koro ní ki myɛ ní pe ga sèʔê tága wi na í. 38#Eza 53:1 Koro ga pye syɛ́ɛnri naa í foro, dee kanyaajoow Ezayi da joo lè níì jo:
«Ni Kàfɔlɔ, wìí wi tága wolo syɛɛnjóori na?
Amɛɛ Kàfɔw Kolocɔlɔɔ wírè wi fǎngi tɛ̀ɛn be na lè,
wìí wi tága gi na?»
39Gee gi be kaan lè pe ga gbàn n tága í, Ezayi maa níì syɛɛnraa joo níì jo:
40 #
Eza 6:10
«Wi n be kpéʔele fúunbéle,
ní wɔ́ɔ̀ be fúnyi tɔ́n be na,
koro ga pye pe a kɔ́ ra nyaagi nyapiigèle ni í,
pe a wɔ́ɔ kɔ́ yarigaa cán be fúnyi ni í,
si kɔ́ kàri woro si be syɔɔ í.»
41Ezayi maa Kirisi nìjangbɔɔri nyaa, koro na wi da kérigèle bee joo, níì cán woro kéeli wi da joo.
42Koro ní ki myɛ ní a kùndigibèle pèle saʔa sèʔê tága Zyezu na. Kàjáa pe ga fɔ̀lɔ n gi joo syɔɔn ma í, níì cán pe maa ni fɛ̀ɛgí Farisibèle na, níì jo pe a kɔ́ poro nɛnɛ sérikpaagi na. 43Níì cán syɛ́ɛnbèle kpɔɔgaanma n be dɛ́nɛ n sɔ̀lɔ Kolocɔlɔɔ wogaanmi na.
Zyezu syɛ́ɛnri a ba kútiiw ceri
44A Zyezu yákpoli wáa níì jo: «Syɔ́ɔnwee wi tága mii na lè, mii na ban wi tága í, mii Tunvɔw na wi tága. 45Wee wi ga tɛ́nɛ̀ mii nyaa lè, mii Tunvɔw wi nyaa. 46Mii i nyɛ gbɛ̀ɛnmɛ, níì pan dulunyanw ni, koro ga pye syɔ́ɔnwee faala wi ga tága mii na lè, wee bee a ní kòro yébilimɛ ni í. 47Syɔ́ɔnwee ga ni mii syɛ́ɛnri lúro lè, wi si o gi kpéʔele àmɛɛ mii jo lè í, wee bee a kɔ́ jo mii wi a kútiiw kúun woro na í. Mii ga pan ba kútii kúun dulunyanw syɛ̀ɛnnɛ na í, a mii pan ba dulunyanw syɛ̀ɛnnɛ syɔɔ wii. 48Syɔ́ɔnwee wi mii cée lè, wi ga wɔ́ɔ̀ fɔ̀lɔ syɛ́ɛnri na mii joo lè í, kútiiw joofɔlɔ i yaà ni wee bee sige, syɛ́ɛnree mii joo lè, toro ti a ba pye wi kútiijoow dulunyanw cângwɔʔɔ canʔa na. 49Níì cán syɛ́ɛnree mii nyuu lè, mii tiimaa wóro ban í. Mii Tóow wi mii tun lè, gee mii yɛlɛ mii í da nyuu lè, woro wi gi tɛ̀ɛn mii na, gee bee si gi yɛlɛ mii í wɔ́ɔ ra nyuu. 50Níì cán tundunree wi joo mii ma lè, mii n gi cán sìibangwɔɔw i taagi dee bee ni. Gee bee na gee mii nyuu lè, àmɛɛ Tofɔw gi joo mii ma lè, kánmi bee na mii gi nyuu.»
सध्या निवडलेले:
Zyan 12: CB10
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Kolocɔlɔɔ Syɛ́ɛnri © Bible Society of Côte d'Ivoire, 2008.