LAMPULAN 3
3
Peterwe Yafaipa Meitampu
1Nyih ja ünpong lümpaji yoppu hipak me Peter hüyange John khümjing te ong. 2Hüwante puhnap memuh yafaiteiye ngohpu kahta ja khümjing te ongpalan mepu hahyulak jingne “Shemeipu Taten” she nyikpu khümjing taten shongme iman-e nyihjeih I woipeiye ang. 3Iye Peter hüyange John ni khümjing te ongne ngohpu ngeye ngin yu. 4Hüwante Peterwe John phei Ite tingkhakke leiye i. “Toman te leipha!” 5Hüyange iman mepu ülam ja tüokülak she monge, Iye iman ngao jaiye yepope lei.
6Hüyangpoi Peterwe i, “Taowe nginmei hüyange hon yenang, hüyangpoi üme hanghe ngoh hatüo nangte yahpha ning. Nazareth mepu Jesu Khrista min me, kemtüoh.” 7Hüyange Iye yoi yakjah ye-e jonyange yongne tam, hüyange hüwante muh I ya hüyange yatuh lah me wongnange pei. 8Hüyange I homme yong, hüyange kem ne wang hüyange kemme, homme, hüyange Kahwang min yonge, I iman phei khümjing te ong. 9Hüyange kahta üsheiye I kemme hüyange Kahwang minyonge nge. 10Hüyange khümjing “Shemeipu Taten” taten shongme shotyange hahyupa she iman-e shing, hüyange Ite hanghe ngai, tüojingne iman yashanpuwe maa hüyange nyam.
Yopnok Me Peterwe Konnyüopu
11Aope Iye Peter hüyange John nite jonne ngoh, Solomon shümphang she nyikpu me kahta üshei yeonge yashanne iman tangte phette jem.
12Aope Peterwe tüo nge, Iye kahtalante i, numan-e hangne tüopa kahta jingne yashanpu? Yejema-a toman yoi üngan hüyange jaopuwe I kemne tampukih hangne numan-e tomante ange leipu? 13#Woi 3.6; Isa 52.13.Abraham hei Isaac hüyange Jacob Kahwang teman puyimlan Kahwange yoi “Ha Jesu müktishiwa tamyangki. Numan-e I phünne pha, hüyange Pilate-e lanteilak jingne monge ngohwante, I sheshao me numan-e yeyah. 14Hüyangpoi numan-e Üjaopa hüyange ümeng yenangpupa yeyahpe, kahta toipa ja hi tonge yah; 15hüyange numan-e üyin lingengaipa Youngwanpa toi. Hüyangpoi Kahwange I lipu mepu yange yenetam; hatüo jingne toman saki ngohnang. 16Hüyange I minme mengpu jingne I minme tüopa kahta ao numan-e nge hüyange shing, I wong nange tam. Aiyang, hanghe ütinglakpu I kaiye ngoh hatüowe numan üshei sheshao me I jaoshe-i-ye meitam yangki.”
17“Hüyange sha-a, jeiheinaolan, numan-e tüopa yeshingpe jon hüyange numan wanglam lampalanne-o hüke jon she taowe shing. 18Hüyangpoi Kahwange I Khrista shanglak she hangyin hipalan üshei ju kaiye itte ang, hüke Iye ngaine tam. 19Tüokhei monglüptüoh, hüyange Kahwang yete lüptüoh, tüome nakshih Iye numan ünu phutte winlak; 20hüyange numan jingne lepu Khrista Jesu Iye shonlak, she I Üjao hipalan kaiye Kahwange üshongwante muh shingne tam. 21Hüyange üshei üla ne linglak hipak manngoi manngoi I wangdang me tan ngohlak. 22#Hin 18.15-16.Mosawe i, ‘Youngwanpa Kahwange numan jeiheinaolan yo mepu numan jingne ü-kihpu hipa ja ngaitamphalak. Iye numante hangyin ngaolakei tüolan khongküm numan-e Ite jailak. 23#Hin 18.19; Lev 23.29.Hüyange hüke ngailak, aoyinne tüopa hipa ngao yejailakei, kahta yo mepu jaoshih mahtamlak.’ 24Hüyange hipalan, Samuel mepu hüyange I pheite peipu üsheiye ngaolan phei jamme tüopa nyih hei hipak jingne-o ngaoyangki. 25#Kaht 22.18.Numan hipalan hayim; ‘Hüyange nangmepu üli me kahtoknyu nokphong üshei moimanlak’ she Abrahamte ngaowe, hanghe Kahwange numan puyimlan phei jiengpu yah, hatüo jiengpu hayimlan-o numan. 26Numan kahta phephe yoi ünu ümeng mepu lüppe yene tampu kaiye numan moimanlak jingne, Kahwange yoi ‘Ha’ yange yene tamphei me, I numan tangte üwangne shon.”
सध्या निवडलेले:
LAMPULAN 3: KONYBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.