LAMPULAN 4
4
Ngengtüp Sheshao Me Peter Hei John
1Hüyange iman ükhong phei ngaowe ngohwante ngengpalan hüyange khümjing yompalan woipa hüyange Sadduceelan iman tangte pei, 2iman yeonge mongshih ngai hangjingne imniye ükhong te nyüo, hüyange Jesu lipu mepu yange ye she pong. 3Hüyange iman-e imni pho, hüyange shaaji ünngoi mahpu nanjingne, ngainyih ngoiye imni küpnok me ang. 4Hüyangpoi ngaojaipulan maawe ütinglak hüyange lungphak me kahtalan haja nga nanjing ngoh.
5Üne nyih iman wanglam lampalan, jeiyonglan hüyange ngaokeng nyanpalan Jerusalem me jamshe jem. 6Iman Ütahpa ngengpa Annas, hüyange Kaifas, hüyange John, hüyange Alexander, hüyange Ütahpa Ngengpa nokphong ülaolan she jem. 7Hüyange aope iman-e imnite iman hotan me yongne tam, iman-e tong, “Hanghe üngan kaiye yejema-a ao minme numan-e hatüo lingpu shi?”
8Hüwante Yaha Üjaowe maawe Peterwe imante i, “Pinnyuha wanglam lampalan hüyange jeiyonglan, 9yafaipa meiye tampu jingne, hanghe kaiye I meiye tampu she tenyih tomante tongma-a; 10Nazareth mepu Jesu Khrista min me, ao numan-e tangpem pee me daktoi, hüyange ao Kahwange lipu mepu yange yene tam, I min me hatüo kahta numan sheshao me meiye yonge ngohnang she, numan liliye hüyange Israellan üsheiye shingyah. 11#Tüo 118.22.Hatüowa numan nokwepalanne yeyahpe winyangpu long, hüyangpoi nokjing shongnyu longne I meng. 12Hüyange ülao aome-o yinyepu yenang, hangjingne teman hanghe kaiye yinyelak, wangphang me kahta yo me ülao min hango phawe yenang.”
13Sha-a aope iman-e Peter hüyange John wongnangpu nge, hüyange aope iman lai yenyüopu hüyange yeshing yemanpu kahtalan she shinge ok, iman yashan; hüyange imni Jesu phei ngohyangpu she iman-e shinge pei. 14Hüyangpoi meiye tampu kahta imni phei yongyange ngohpu ngeye tüo tokte kaiye iman-e hango yengao ok. 15Hüyangpoi iman-e aope pangshanlan mepu nokshaote iman yanne yune tam, iman hei iman pa me hüke teingaowe i: 16“Hatüolan kahtate teman-e hang linglak? Hangjingne iman kaiye ütingme kahnyingwüngha toi ja lingteki she Jerusalem me ngohpu üsheiye shinge ngohnang, hüyange hatüo yeje ja she teman-e janpu ye-oklak. 17Hüyangpoi ükhong yo me jalunne mintahtai ne, hüyange sha-a memuh iman-e tüopa min me ao te-o yengaolak jingne, teman-e imante ngao phahah.” 18Tüokhei iman-e imni nyik, hüyange Jesu minme üjingha nehoi yengaolak yejema-a yenyüolak ngaokeng pha.
19Hüyangpoi Peter hei Johnne imante janne i, “Kahwang phei-a numan ngao jailakpa Kahwang shaome shupu heiya yeshupu, numan-e ngao phünne itüoh.” 20Hangjingne toman-e jaipu hüyange ngepu jeng yengaope yengoh ok. 21Hüyange aope iman-e imnite ünyeine nyamshao, hüyange iman-e hanghe jingne shangne tamlak ülao ümeng yetüope, ükhong te nyampu kaiye imni lanne tei; hangjingne hanghe lingyangki tüopa jingne kahta üsheiye Kahwang minyong. 22Hangjingne kahta ao te tüopa kahnyingwüngha meitampu linge tam, tüopa kahta-a wang deli linne yafai teiye ngohyangki.
Mengpalanne Mongyonglak Jingne Yoppu
23Aope imni lantam shümpalan tangte imni ye, hüyange ngengpa üjenglan hüyange jeiyonglanne imnite ngaopu üshei imante i. 24#Woi 20.11; Tüo 146.6.Hüyange aope iman-e tüo jai, iman üsheiye mong ja ne menge ngao ngaiye Kahwang te i, “Wongnangpu Youngwanpa, wangdang, kahtok, yengching hüyange tüoyin me ngohpu khongküm lingpupa, 25#Tüo 2.1-2.Yaha Üjao me toman üpa David nang shaoshanpa ju kaiye i,
“ ‘Hangne yinhulanne mongshih ngai,
hüyange kahtalanne jajang japu konkon?
26Kahtoknyu ahnglan iman nying nyingke tüm,
hüyange I wanglam lampalanne jamme jem,
Youngwanpa phei tüi-e hüyange I Messiah phei tüi-e.’
27 #
Tüo 2.1-2. Hangjingne tüopa chingnyu me Herod hüyange Pontius Pilate ükhong, yinhulan hüyange Israel kahtalan phei, Jesu, nang üjao shaoshanpa, ao nange Messiah ne mengetam tüopa phei tüi-e jamshe jemnang; 28hüyange nang yak hüyange nange nyinge tamyangpu ütahte ngailak linglak jingne iman jem. 29Hüyange sha-a Youngwanpa, iman-e konpute leitüoh, hüyange nang shaoshanpalan, toman-e mongyongpu phei nang ngao ngaone, 30hüyange aope nange meitamlakpa nang yak lanlakei, hüyange kahnyingwüngha füo hei yashanlak nang üjaopa shaoshanpa Jesu min me lingne tampha.” 31Hüyange aope iman-e yoppe sho, iman jamshe jemme ngohpu nyoi shuipo. Hüyange iman üshei Yaha Üjaowe maawe ngoh, hüyange iman-e Kahwang ngao wongnange ngao.
Mengpalan Teijampu
32 #
Lam 2.44-45. Hüyange mengpalan iman ükhong üyong mongjang hüyange Yaha ja ne menge ngoh. Hüyange aowe-o yoi nangpu te yoijing she ye-i, hüyangpoi toi lili ükhong sheine meng. 33Hüyange üngan üyongpuwe lampulanne Youngwanpa Jesu yange yepu jeng saki pha, hüyange shüpshe üyong iman üshei tangme ngoh. 34Hangjingne iman yo me aowe-o hanghe-o toinanne yengoh, hangjingne kahtok yejema-a nokjing ngohpalanne tüolan yüo; 35hüyange yüopu ümee yahpeiye lampulan shaome ang, hüyange kahta lilite yoi yoi wongpong te shuwe tamme han.
36Hüyange Levi nokphong, Saipras lan Joseph, aohite lampulanne Barnabas she nyik, (leppu Hengtampu Ha) 37Iye kah ja ngohpu yüo, hüyange ngin yahpeiye lampulan sheshao me ang.
सध्या निवडलेले:
LAMPULAN 4: KONYBSI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.