URA TIN AYRA 18
18
Lona tak ki kay vuɗta vi Isaak
1Yawe tak tam ii Abraham u ɦoy ma Mamrena, hu li ma nam kaki fun mbutluɓ mamma a sii tam ko faɗta ti cocora ni faali ŋgolla. 2Nam tli irim kolo gol na ni suuna u tasi hindi laki egem tok, nam wasi ay na ni col ŋgafasi zak gaw goɓ kaŋga fokosiya.#Heb. 13.2 3Nam di ana, «Malanna, lini an fi oora gasi fokoŋ wa ni jak ki kanɗi. 4Hin asi halagi yo ay mbusugi segiya, lakagi kaŋga u ŋgusna koɗogi tagi nde. 5An hin tuɗ halagi va ma ti ay nde a ɦagi saɓakŋa, ŋgoo dagan agi hin jak koy magira tuwa. Ni kay ndaɗta agi tli ay kay saagi ma sunda ni na.» Asi hoŋom dira ana, «Li ko aŋ dira na.»
6Abraham hoŋ vo eg Sara zak daɗ ana, «Ŋga fuɗta tegeɗira hindi gi komnjoɗira ay zak.» 7Abraham liŋ duk yoori mamma vi goo mbutl ma jivina ay dew, mba ɦam maŋ saam ma sunda ana ŋgaɗamu. 8Nam tli mbiira ay u mbuluɗu, u mbala goo mbutlna may, mba cuksi kaŋga fokosiya tamba col egesi u ŋgus guna may, asi ti tlena may.
9Asi hin joɓom ɗaŋŋi ana, «Caaŋga, Sara, ni arage?» Nam hoŋosi dira ana, «Ndaɗ ka vo hu mbutluɓma.» 10Yawe di ana, «An hoŋ ay daa ko wanda na ni caaŋga Sara hin vuɗ goona.» Sara ay hu mbutluɓma ŋgorosi na ni hum boy namma.#Rom. 9.9 11Abraham u Sara mbuɗ ki maa cocoo, caamba Sara dlara vuɗ goo ka kaɗ oloɗi. 12Kay ndaɗta Sara san huruɗ kurufu di ana, «Cemmi an mbuɗ ki ni maa may ni ndak a vuɗ goo olo su? Bu ziinna ki ni maa lay.»#1 Piy. 3.6 13Yawe di Abraham ana, «Sara sana, di ana gasi anni ndak a vuɗ goo olo su ni nanage? 14Va ma su kay saɓakŋa vi Yawe ka su? Daa ko wanda na an hoŋ ay ni mba fi Sara u go njufna koɗu.»#Luk 1.37 15Sara mbuɗ ndaana tin vunuɗ ki ana, «An san kaɗi.» Nam hin daɗ ana, «Gasira ni ndak sana.»
Abraham tin suuna hu voɗta
16Suuna cuk tasi a tuɗ hu voɗta Sodomba, Abraham gi tam fokosi a tinisira. 17Yawe di ana, «Va ma an lamma an ndak ŋgayam ii Abraham su? 18Abraham hin mbuɗ ni njaf ma ŋgolna, saɓak coco lay. Njaf suu kay ndaŋgarana halaŋ hin fi paɗvunna ni umu. 19An manammi kay nam gaɗ goryomu u suu mam suu hin ka ŋgorom daganna, a asi hum gaɗta vi Yawera, poy ɗegee.» Ko ndaɗta na Yawe faɗ vun dlara nam vi vunum kaɗ u Abrahamba kiyo.
20Yawe di Abraham ana, «Tii ma suuna tii ko dla cora vi Sodomma u Gomorna tewen ha wa, coosira mbuɗ ŋgol cocoo. 21Kay ndaɗta an tuɗ golosi tuwa, lini asi ka li gasi ko dlara an humusira ha kasira na ni an hin wi tuwa.»
Abraham cen kay zi ma Sodomma
22Suuna cuk tasi a tuɗ Sodom, Abraham hin coli eg Yawe tuwa. 23Abraham ɦuɗ tam ay joɓ ana, «Aŋ hin ba suu ɗegeena u suu cona lay su? 24Lini suu ɗegeena ka hu dok-vadlna, aŋ hin baasi ki lay su? Aŋ ka ndak a hinisi kay suu ɗegee suu dukusi dok-vadlnaɗi su? 25Aŋ ka ndak a li naɗi, suu ɗegeena u suu cona aŋ ka ndak a baasi ki ko tasi dewɗi. Aŋ li u suu ɗegeena ko suu cona su? Aŋ ndak a li naɗi. Sa ma kaɓakŋa kay suu kay ndaŋgara halaŋŋa hin li ni u ɗegee mam ndaɗtaɗi su?» 26Yawe di ana, «Lini an fi suu ɗegeena wa dok-vadl hu zi Sodomma ni an ka beŋ zina oloɗi.»
27Abraham hoŋ di ana, «Malanna, van vunun humun boy manna haa, kay anni ndaŋgara u buɗna ɦawaa. 28Ɗowba duk suu ɗegee suu dok-vadlna li kaɗi vadlini aŋ beŋ zina ki lay su?» Bu Suuna hoŋ dam ana, «Lini an fi suu ɗegeena wa dok-fiɗi yam vadli ni an ka beŋ zina kiɗi.»
29Abraham dam olo ana, «Lini aŋ hin fi suu ɗegeena dok-fiɗi mayge?» Bu Suuna hin ana, «Lini an fi suu ɗegeena wa dok-fiɗini an ka beŋ zina kiɗi.»
30Abraham di ana, «Ko Bu Suu manna mbuɗ yaɗi an min ɓak tuwa. Lini aŋ fi suu ɗegeena wa dok-hindi ni nanage?» Nam di ana, «Lini an fi suu ɗegeena wa dok-hindi ni an ka li vaɗi.»
31Abraham di ana, «An ɓak ha maŋ Bu Suuna, lini aŋ fi suu ɗegeena wa dok-mba' ni nanage?» Nam di ana, «Lini an fi suu ɗegeena wa dok-mba' ni an ka beŋ zi nammaɗi.»
32Abraham di ana, «Bu Suuna mbuɗ yaɗi, an ɓak ha ni a fafaɗta. Lini aŋ fi suu ɗegeena doogo ni nanage?» Bu Suuna di ana. «Lini an fi suu ɗegeena wa doogo ni an ka beŋ zina kiɗi.»
33Hu li ma Yawe daɓ njaɗta u Abraham may ni gi tam gaw. Abraham hoŋ ay vo may.
Terpilih Sekarang Ini:
URA TIN AYRA 18: BMS
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Bible Moussey © Bible Society of Chad, 2002.
URA TIN AYRA 18
18
Lona tak ki kay vuɗta vi Isaak
1Yawe tak tam ii Abraham u ɦoy ma Mamrena, hu li ma nam kaki fun mbutluɓ mamma a sii tam ko faɗta ti cocora ni faali ŋgolla. 2Nam tli irim kolo gol na ni suuna u tasi hindi laki egem tok, nam wasi ay na ni col ŋgafasi zak gaw goɓ kaŋga fokosiya.#Heb. 13.2 3Nam di ana, «Malanna, lini an fi oora gasi fokoŋ wa ni jak ki kanɗi. 4Hin asi halagi yo ay mbusugi segiya, lakagi kaŋga u ŋgusna koɗogi tagi nde. 5An hin tuɗ halagi va ma ti ay nde a ɦagi saɓakŋa, ŋgoo dagan agi hin jak koy magira tuwa. Ni kay ndaɗta agi tli ay kay saagi ma sunda ni na.» Asi hoŋom dira ana, «Li ko aŋ dira na.»
6Abraham hoŋ vo eg Sara zak daɗ ana, «Ŋga fuɗta tegeɗira hindi gi komnjoɗira ay zak.» 7Abraham liŋ duk yoori mamma vi goo mbutl ma jivina ay dew, mba ɦam maŋ saam ma sunda ana ŋgaɗamu. 8Nam tli mbiira ay u mbuluɗu, u mbala goo mbutlna may, mba cuksi kaŋga fokosiya tamba col egesi u ŋgus guna may, asi ti tlena may.
9Asi hin joɓom ɗaŋŋi ana, «Caaŋga, Sara, ni arage?» Nam hoŋosi dira ana, «Ndaɗ ka vo hu mbutluɓma.» 10Yawe di ana, «An hoŋ ay daa ko wanda na ni caaŋga Sara hin vuɗ goona.» Sara ay hu mbutluɓma ŋgorosi na ni hum boy namma.#Rom. 9.9 11Abraham u Sara mbuɗ ki maa cocoo, caamba Sara dlara vuɗ goo ka kaɗ oloɗi. 12Kay ndaɗta Sara san huruɗ kurufu di ana, «Cemmi an mbuɗ ki ni maa may ni ndak a vuɗ goo olo su? Bu ziinna ki ni maa lay.»#1 Piy. 3.6 13Yawe di Abraham ana, «Sara sana, di ana gasi anni ndak a vuɗ goo olo su ni nanage? 14Va ma su kay saɓakŋa vi Yawe ka su? Daa ko wanda na an hoŋ ay ni mba fi Sara u go njufna koɗu.»#Luk 1.37 15Sara mbuɗ ndaana tin vunuɗ ki ana, «An san kaɗi.» Nam hin daɗ ana, «Gasira ni ndak sana.»
Abraham tin suuna hu voɗta
16Suuna cuk tasi a tuɗ hu voɗta Sodomba, Abraham gi tam fokosi a tinisira. 17Yawe di ana, «Va ma an lamma an ndak ŋgayam ii Abraham su? 18Abraham hin mbuɗ ni njaf ma ŋgolna, saɓak coco lay. Njaf suu kay ndaŋgarana halaŋ hin fi paɗvunna ni umu. 19An manammi kay nam gaɗ goryomu u suu mam suu hin ka ŋgorom daganna, a asi hum gaɗta vi Yawera, poy ɗegee.» Ko ndaɗta na Yawe faɗ vun dlara nam vi vunum kaɗ u Abrahamba kiyo.
20Yawe di Abraham ana, «Tii ma suuna tii ko dla cora vi Sodomma u Gomorna tewen ha wa, coosira mbuɗ ŋgol cocoo. 21Kay ndaɗta an tuɗ golosi tuwa, lini asi ka li gasi ko dlara an humusira ha kasira na ni an hin wi tuwa.»
Abraham cen kay zi ma Sodomma
22Suuna cuk tasi a tuɗ Sodom, Abraham hin coli eg Yawe tuwa. 23Abraham ɦuɗ tam ay joɓ ana, «Aŋ hin ba suu ɗegeena u suu cona lay su? 24Lini suu ɗegeena ka hu dok-vadlna, aŋ hin baasi ki lay su? Aŋ ka ndak a hinisi kay suu ɗegee suu dukusi dok-vadlnaɗi su? 25Aŋ ka ndak a li naɗi, suu ɗegeena u suu cona aŋ ka ndak a baasi ki ko tasi dewɗi. Aŋ li u suu ɗegeena ko suu cona su? Aŋ ndak a li naɗi. Sa ma kaɓakŋa kay suu kay ndaŋgara halaŋŋa hin li ni u ɗegee mam ndaɗtaɗi su?» 26Yawe di ana, «Lini an fi suu ɗegeena wa dok-vadl hu zi Sodomma ni an ka beŋ zina oloɗi.»
27Abraham hoŋ di ana, «Malanna, van vunun humun boy manna haa, kay anni ndaŋgara u buɗna ɦawaa. 28Ɗowba duk suu ɗegee suu dok-vadlna li kaɗi vadlini aŋ beŋ zina ki lay su?» Bu Suuna hoŋ dam ana, «Lini an fi suu ɗegeena wa dok-fiɗi yam vadli ni an ka beŋ zina kiɗi.»
29Abraham dam olo ana, «Lini aŋ hin fi suu ɗegeena dok-fiɗi mayge?» Bu Suuna hin ana, «Lini an fi suu ɗegeena wa dok-fiɗini an ka beŋ zina kiɗi.»
30Abraham di ana, «Ko Bu Suu manna mbuɗ yaɗi an min ɓak tuwa. Lini aŋ fi suu ɗegeena wa dok-hindi ni nanage?» Nam di ana, «Lini an fi suu ɗegeena wa dok-hindi ni an ka li vaɗi.»
31Abraham di ana, «An ɓak ha maŋ Bu Suuna, lini aŋ fi suu ɗegeena wa dok-mba' ni nanage?» Nam di ana, «Lini an fi suu ɗegeena wa dok-mba' ni an ka beŋ zi nammaɗi.»
32Abraham di ana, «Bu Suuna mbuɗ yaɗi, an ɓak ha ni a fafaɗta. Lini aŋ fi suu ɗegeena doogo ni nanage?» Bu Suuna di ana. «Lini an fi suu ɗegeena wa doogo ni an ka beŋ zina kiɗi.»
33Hu li ma Yawe daɓ njaɗta u Abraham may ni gi tam gaw. Abraham hoŋ ay vo may.
Terpilih Sekarang Ini:
:
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Bible Moussey © Bible Society of Chad, 2002.