Dyénésis 3
3
I to gamsalà di Dwata
1Na di kdee dad mlayal lmanaf mgimò Dwata i Amu, i ulad i too fulung mgaw. Taman satu duh man i ulad di libun, “Too glut kè, fnang gamu Dwata kmaan i balù tan bunge di dad kayu di dad fule ani?”
2Na tmimel i libun di ulad, manan, “Fakay gami sa kmaan bunge i dad kayu ani. 3Kabay man Dwata nun satu kayu di gutngà i dad fule ani, i bungen làmi fakay knaan, na fnangan gami magot i bungen, du ku ani nimòmi mati gami.” 4Kabay man i ulad, “Bong là, là gamu sa mati. 5Én gman Dwata di gamu, du gadean ku kmaan gamu bunge i kayu atù, mbaling gamu fulung faldam, na mbaling gamu salngad kenen, du balù gamu gmadè ku tan i fye na ku tan i sasè.”
6Kafnge én, di kite i libun i bunge i kayu én too gablà knaan, na too fye bawehan, na fandaman fye ku mbaling kenen fulung faldam, taman nlifoan bunge i kayu én na knaanan. Na blén i dademe di yaanan, na knaanan. 7Di kakaanla bunge i kayu én, mbaling ale fulung faldam, na dilèla ale flaweh. Taman mwè ale dad doon i kayu fig, na nilolla na labédla di lawehla.
8Di fan kasdaf i duh lingela lduk i Amula Dwata magu di lam dad fule. Taman salbuni ale di lam i dad kayu. 9Kabay Amula Dwata, tlon i lagi, manan, “Tanè ge?”
10Na tmimel i lagi, manan, “Lingegu i ldukam magu di lam i dad fule ani, na too agu likò, du flaweh agu, taman salbuni agu.”
11Na snalek Dwata kenen, manan, “Simto kè mangman flaweh ge? Kmaan ge kè bunge i kayu fnangta ge?”
12Na tmimel i lagi, manan, “I libun blém di deg, kenen sa mlé deg bunge i kayu én, na knaangu.”
13Na Amula Dwata, snalekan i libun, manan, “Tan kè i duenam mimò ani?”
Tmimel i libun, manan, “Hae, du fangaw agu i ulad, taman gamkaan agu.”
14Taman man Dwata i Amu di ulad,
“Fanlayamta ge du mdà di sasè nimoam ani.
Di kdee dad lmanaf, i dad mnalam, na i dad mlayal,
alò ge magu di kaflayam ani.
Mdà ani, fulu ge di tanà,
na too ge kmaan kfung di tanà kel di kfatim.
15Sanduengu gamu,
ge na i libun, na i dad belan, na i dad belam,
na mbaling gamu snang nawa kel di atuan.
I belan ndakan kadang i ulum,
na nakétam i takadan.”
16Na man Dwata di libun,
“Tananùgu i kaflayamam fagu di ksut i dad ngaam.
Di ksut i dad ngaam, too sasè katduk lyom.
Kabay balù fa ani i kaflayamam,
knean là mgili i knayeam di yaanam.
Na yaanam i mebe ge.”
17Na manan di lagi dnagit ku Adam, “Du flinge ge di yaanam, kmaan ge bunge i kayu fnangta ge.
Taman i tanà ani fakufgu di kaflayam.
Kel di kfatim, too ge fgal mimò di tanà du fye nun gablà knaanyu.
18Na dad samfinit na dademe sabat nun sual gal tmabò na lamnok di tanà.
Na toom fanngabal kadang dademe kakaanyu tmabò di bnas.
19Too ge fadlug mimò kel di kaloh i tum,
du fye i dad fulem di tanà tmabò na lamnok.
Na ani i nimoam kel di kasfuléam di tanà gufdum.
Hae, du mgimò ge mdà di tanà,
na kadang satu duh lêman ge sa mbaling tanà.”
20Di kagman Dwata kdee ani gine, dnagit Adam i yaanan, dunan Iba, du kenen mbaling yê di kdee dad to.
21Na mimò Dwata i Amu klaweh ale Adam na Iba mdà di kindal i dad lmanaf na kanlawehan ale.
Falwà Dwata Adam na Iba di banwe Idén
22Na man Dwata i Amu, “I dad to ani tambaling ale salngad deg, du tagmadè ale i fye na i sasè. Taman là fakay ku nwèla i bunge i kayu mlé nawa landè sen, du ku gkaanla là ale mati kel di landè sen.” 23Taman falwà ale Dwata di banwe Idén i gunun fule, du fimoan di tanà, i tanà gumdàla.
24Di kafalwà Dwata dale, dekan dad gambet kasaliganan gsen di gumsut i duh di banwe Idén, na fkahan sundang di gufusuk. Fadlug dminè i sundang na gal fatbiling flibut. Én i munung i dalan salu di kayu mlé nawa, du fye landè fakay fdadong déén.
Terpilih Sekarang Ini:
Dyénésis 3: ITD
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2014, Wycliffe Bible Translators, Inc. All rights reserved.