San Mateo 4
4
Nu xxegwiha ruinna dhi yiena Jesús‑ni
(Mr. 1:12-13; Lc. 4:1-13)
1Nianna tti che Espíritu ge Tata Do Yebáha Jesús‑ni daka lo yu bisi ata lanú benne se'e, kini uin nu xxegwiha dhi yiene.
2Iki de chi bette ubina lhe'ebie abittu utoe yetta delo chua (40) ubisaha lhe chua relaha lhe, nianna tti ugwetti bitunie. 3Nu xxegwiha nna ruinna dhi yiene, nianna tti ubigana, rane:
―Ganna gwalíginlu ankalu Xi'in Tata Do Yebáha, usichu ka íyya se'e‑ni kini eyakakana yettaxtila ki golu.
4Ttaka lee nna bekabie geni, ree:
―Lo ka yetsi ge Tata Do Yebáha dia ra: “Laa sunruga len yettaxtila aka ben ka benne, sinuki aka bengabake len iyába ka tisa rinne Tata Do Yebáha.”
5Nianna tti che nu xxegwiha bie lhe'e yiesi anka le'aha, delába Jerusalén‑ni, nna ulhapine iki yotuha gwetsáli. 6Nianna rane:
―Ganna si gwalíginlu ankalu Xi'in Tata Do Yebáha, biginnichu lo yuha, kumu lo ka yetsi geeha, dia ra:
Tata Do Yebáha idhelhe ka anjeli geeha ki uyúke lu.
Udoni lo náke lu kini abittu tsu'u ni'alu iki ka íyya.
7Jesús‑ni nna bekabie geni ree:
―Lo ka yetsi ge Tata Do Yebáha rágaba: “Bittu dhi yielu Tata Do Yebaa benne anke Xxanaluha.”
8Nianna tti dedeche nu xxegwiha bie iki ttu i'iya yadha xxatta, niha bele'enne iyába ka yiesi ra xxeni lekani se'e yiesi lo yu‑ni lhe bele'ene iyá nu tse tee gekani lhe. 9Nianna tti rane:
―Iyába nu chi bela'ania lu‑na utea gelu ganna lu udú xibilu arloa nna utsá lolu neti.
10Jesús‑ni nna bekabie geni ree:
―Nu reha ugía xa nu xxegwi, kumu lo ka yetsi ge Tata Do Yebáha, dia ra: “Sun arlo Tata Do Yebaa benne anke Xxanaluha, sun arlo benneha‑ba udú xibilu lhe suna nu innabe uinlu lhe.”
11Aníha uka nna bedhan nu xxegwiha Jesús‑ni. Nianna tti bisin ttu chupa ka anjeliha nna bete náke lenbie.
Jesús‑ni uduloe rigixxi'abie ka tisa ge Tata Do Yebáha
(Mr. 1:14-15; Lc. 4:14-15)
12Tti chi bina Jesús‑ni tekinna Juan‑ni lisiyya, nianna tti deyye daka Galilea, 13bedábie lhe'esi Nazaret nna ugíe gwadhoe lhe'esi Capernaum. Yiesiha gaxxaba rena ro'o indatooha daka lo yu ge Zabulón lhe Neftalí lhe. 14Aníha uka ki gwado tisa ge nu unne Isaías benne uka profeta ge Tata Do Yebáha, tti ree:
15Lebi'i, ka benne se'ele daka lo yu ge Zabulón lhe Neftalí lhe,
daka attu ladu ro'o yoo Jordán‑ni,
ata rite neda dia daka ro'o indatooha,
lebi'i ka nu se'ele daka Galilea ata se'eru ka benne labí ankake nu Israel,
16lebi'i nuná ankale attiba ka benne se'e ata anka chulha.
Nnanna nna chi bilenle ttu xiani xeni.
Xianiha nuha udanie ge ka benne se'e ata ruxunnina geke gattike.
17Debá la'ania nna udulo Jesús‑ni rigixxi'anie ka benne, rabie ke:
―Gwalodúna le nna gwalodaxxu neda ge Tata Do Yebáha, kumu chiba dabigana innabia benneha.
Jesús‑ni raxie ttapa ka benne yu'uke gwedaxxu belha
(Mr. 1:16-20; Lc. 5:1-11)
18Tti dia Jesús‑ni ridee saro'o indatoo ge Galilea‑ni, nianna bilánie yu'u chupa betsi ka nubiyú: ttu nuha lána Simón nu tegaba láni Pedro, attuna nna lána Andrés. Ka nubiyúha yu'ukana rudelhakana yexxa ge ka belhaha lhe'e indaha, kumu ankakana benne rudaxxu belha. 19Nianna tti ree kana:
―Gwaltá gwetenalha neti. Neti unia kini akale ka nu gaxile ka benne kini udaxxuke neda ge Tata Do Yebáha.
20Looraha tteba nna bese'e bixxikana ka yexxa gekaniha nna dia ttebakana danalhakane.
21A lattiruba bededee, nianna bedelánie a chupa betsi ka nubiyú: ttu nuha lána Jacobo nna attuna nna lána Juan. Lakana nuha ankakana xi'in Zebedeo. Se'ekana len tata gekaniha lo barcu gekaniha reyoinkana ka yexxa ka nu rudaxxu lenkana belhaha. Jesús‑ni nna uxie kana. 22Lakana nna bedhá bixxi ikikani barcuha lhe tata gekaniha nna dia ttebakana danalhakana Jesús‑ni.
Jesús‑ni rule'enie ka benne ka tisa ge Tata Do Yebáha lhe reyoin gabe ke lhe
(Lc. 6:17-19)
23Jesús‑ni ugwekie itúba daka Galilea‑ni rule'enie ka benne se'e niha ka tisa ge Tata Do Yebáha, rule'enie ke lhe'e ka yo'o ata rudhetike ka tisa ge Tata Do Yebáha. Niha rigixxi'e ka tisa tse, delába rigixxi'e gasina kini akake benne innabia Tata Do Yebáha ke, lhe anágaba reyonie ka benne yu'u iyá looba isagwe latike lhe reyoingabe iyába ata rilhen latike lhe. 24Itúba daka Siria chi ugwadhi tisa ge nu runie. Nianna tti risin lenke iyába ka benne ridakake iyá looba isagwe lhe ka benne rilhen latike lhe ka benne yu'u espíritu xxegwi latike lhe anágaba ka benne rakake beora lhe ka benne daa yatti latike lhe. Labie nna gwa reyoinbe ka benneha. 25Ixe juisiru ka benne danalhake bie: ka benne daba daka Galilea lhe ka benne daba lhe'esi Jerusalén lhe ka benne daba lhe'e adíru ka yiesi se'e daka Judea‑ni lhe anágaba ka benne daba daka Decápolis lhe adíru ka benne daa lhe'e ka yiesi se'e attu ladu ro'o yoo Jordán‑ni lhe.
Terpilih Sekarang Ini:
San Mateo 4: zae
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2014, Wycliffe Bible Translators, Inc. All rights reserved.