मत्ती 17
17
येशूजे रूप् सूजो क्यूरेब
मर्कूस ९:२-१३; लूका ९:२८-३६
1र्वाया ङ्येदे येशूदे पत्रुस, याकूब मेस्ये ङूजे च्योन् यूहन्नाने रङ्सेप्रे आलाक्के फेर गङ्त्या फ्याने कूदीदे। 2थमयूदे लेन्न लेन्नने येशूजे रूप् सूजो क्यूरी। ङूजे त्वा मीयाप्र ओथ्याङ् छालाला क्यूत्दे, मेस्ये ङूदे होन्नब कोला सोरो कर् टेल्कीदीदे। 3होर्दे हैयाने हम्ब स्यूस्स्या सोम्दे मोशा मेस्ये एलिया येशूप्रे बात्सेन्नब तङ्दे।
4पत्रुसदे येशूने यदे, “ओ प्रभु, ङी यैयाने क्यूत्देबे सोरो ज्य क्यूर ख्यङ्। नदे बन्दी यलो ङैदे यैयाने छप्र सोम् बन्दीय। त्या नैजे लागि, त्या मोशाजे लागि मेस्ये त्या एलियाजे लागि।”
5 #
उत्पत्ति 22:2; भजनसंग्रह 2:7; यशैया 42:1; मत्ती 3:17; 12:18; मर्कूस 1:11; लूका 3:22; व्यवस्था 18:15 #
२ पत्रुस 1:17,18 पत्रुसदे येर्बे पो चीन्न चीन्नने चकिलो मूक्पदे थमयूने उप्कीदी, मेस्ये हम्ब मूक्प नङ्दे के त्या तैरदे, “ङू ङैजे छेब च ख्यङ्, ङ ङूप्रे सोरो सूग ख्यङ्, ङूजे पो ङ्यीन्।”
6कन्छ्वाब स्यूस्स्यायूदे अम्ब के तदे, हन्छ्वाब थमयू सोरो फदेबे पून्छ्यल् क्यूत्दे। 7तर येशू रदे मेस्ये थमयूने छूत्देबे यदे, “लङ्, अम्फलाची।” 8होर्दे थमयूदे लेप्प, थमयूजे म्यादे येशूत्या तङ्दे, सूजो सूत्याये अन्तङ्।
9थमयू गङ्दे मो तल्लीनूब येशूदे थमयूने, “मीजे च सीबदे सोम्बो अन्क्यूट्टता नमयूदे अम्ब तङब पो सूनेये अन्स्योल्लाची।” यदेबे आज्ञा पीन्दे।
10 #
मलाकी 4:5
होर्दे स्यूस्स्यायूदे येशूने यरे यदेबे लोत्दे, “पन्डेयूदे एलिया खूम् रपर्दीय यदेबे चेने य?”
11येशूदे थमयूने यदे, “तम्दम्ने एलिया रीय, मेस्ये ङूदे साप्ताने फेरि सूधारतीय। 12#मत्ती 11:14तर ङ नमयूने यीय, ‘एलिया मालाङ्ने रेक ख्यङ् होर्दे मीयूदे ङूने अन्स्ये, थमयूदे ङूने च चीतीङ्रीको हम्बने चीत्दे। होर्प्रने मीजे चनेये थमयूदे सकस् पीन्क्य।” 13होर्दे येशूदे बप्तिस्मा-पीनब यूहन्नाजे बारेने थमयूने य टोङ् यदेबे स्यूस्स्यायूदे कोकदे।
छेत् लादीकब स्योर्ब
मर्कूस ९:१४-२९; लूका ९:३७-४३
14होर्दे मीहुल ख्यब नेने थमयू फ्योरङ्येदे येशूजे खूम्ने मीत्या रदे मेस्ये पूजी चोदेबे यदे, 15“प्रभु, ङैजे चने दया चीम्मी, चेनेयलो ङू छर्र-बीद लादीदेबे केन् सकस् प्रेन्न ख्यङ्। ङू कतङ्ब प्ल्याङ्नब मीने फोल्ब, कतङ्ब क्यूने क्योब ख्यङ्। 16ङैदे नैजे स्यूस्स्यायू ट्याने ङू रेत्दे, तर ङूने थमयूदे तम् चीम्मे अन्खू।”
17होर्दे येशूदे यदे, “ओ चेलाबे विश्वास अन्चेब मीयू मेस्ये पाप चेब मीयू, ङ नमयूप्रे कोलासेमेत्या क्यूर, ङ नमयूने कोलासेमे सैदीन? हम्ब स्योर्ब यैयाने ङैट्याने सीक।”
18होर्दे येशूदे हम्ब छेत्-आत्माने बोङ्बे फ्राचीदे मेस्ये हम्ब स्योर्बजे ङ्वदे छेत्-आत्मा योङ्गी होर्दे खात्याने स्योर्ब तम् क्यूरी।
19होर्दे येशूट्याने स्यूस्स्यायू आलाक्के रदेबे लोत्दे, “ङीयूदे हम्ब छेत्ने चेने योन अङ्ख्व?”
20 #
मत्ती 21:21; मर्कूस 11:23; १ कोरिन्थी 13:2 येशूदे थमयूने यदे, “नमयूदे चेब विश्वास चूक्बत्या क्यूरब कारणदे ख्यङ्। तम्दम्ने, ङ नमयूने यीय, रोयो-लजे ल तीत्यात्याप्र विश्वास नमयूने ख्यङ्लो अम्ब गङ्ने ‘यैयादे हर्दीप्र’ यदेयलो हम्ब हर्दीप्रीय मेस्ये नमयूदे चनेयली चे खूइय। 21[तर येर परीपरीजे छेत् प्रार्थना चीत्देबे मेस्ये बर्त टूङ्देबेत्या योम्बे खूइय।”]#१७:२१ मीयूङ्जे कोइ कोइ ग्रीक पाण्डुलिपीयूने अम्ब पद अन्लीख्दीये ख्यङ्।
फेरि सीबयली खूम्ने येशूदे रङ्से सीबजे बारेने स्य्वेब
मर्कूस ९:३०-३२; लूका ९:४३-४५
22स्यूस्स्यायूप्रे गालीलने रूप् क्यूप्प येशूदे थमयूने यदे, “जेम्से मीजे च मीयूजे लाने सूम्दीपीय। 23होर्दे थमयूदे ङूने सेक्य, तर सोम्-म्याङीदे ङू सोम्बो क्यूत्देबे लङ्क्य।” होर्दे थमयू सोरो अन्सूग क्यूत्दे।
मन्दिरजे स्यर्म
24 #
प्रस्थान 30:13; 38:26 होर्दे स्यूस्स्यायू कफर्नहुमने रदे, मन्दिरजे स्यर्म लङब मीयू पत्रुस ट्याने रदेबे लोत्दे, “नमयूजे गुरुदे मन्दिरजे स्यर्म अम्फा?”
25पत्रुसदे यदे, “अँ, फाख्यङ्।”
पत्रुस कीम् नङ्ने क्योयेङ्येदे येशूदे ङूने पात्ता खूम् पो लोत्दे, “ओ सिमोन, नैजे कर विचार ख्यङ्? पृथ्वीजे मूरुम्यूदे स्यर्म सूप्रे लङ्क्य? रङ्से चयूप्रे यी सूजो मीयूप्रे?”
26“सूजो मीयूप्रे”, यदेबे पत्रुसदे जवाफ पीन्दे,
येशूदे ङूने यदे, “होरेयलो रङ्से चयूदे स्यर्म फा अम्पर्ते टोङ्। 27तर ङीनदे थमयूने छरङ् अम्पीन्लाचीदे, यदेबे समुद्रने प्रदेबे च्याइ पूब, मेस्ये पात्ता खूम् चूङब ङ-सीक। हम्ब ङजे ङूर् पूक्ब नदे चाँदीजे मन्द्रमूली त्या प्रेक्क्य होर्दे हम्ब कूबदेबे ङीन ङ्हीजे स्यर्म यदेबे नदे थमयूने फाबी।”
Terpilih Sekarang Ini:
मत्ती 17: सर् कबुल
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Ghale New Testament © Nepal Bible Society, 2011.