Lukas 9
9
Yexus Khaiv Kaum-Ob Tug Thwjtim Moog Qha Txuj Moo Zoo
(Mathais 10:5-15; Malakaus 6:7-13)
1Yexus hu kaum-ob tug thwjtim lug uake hab Nwg muab fwjchim rua puab kuas ntab tau txhua tug dlaab hab khu tau txhua yaam mob zoo. 2Tes Nwg txawm khaiv puab moog qhuabqha zaaj kws has txug Vaajtswv lub Tebchaws hab khu tej tuabneeg kws muaj mob. 3Yexus has rua puab tas, “Thaus mej moog, mej tsi xob nqaa ib yaam dlaabtsi nrug mej moog: xob nqaa tug cwjnreg, xob nqaa naab thoobpuab, xob nqaa zaub-mov, xob nqaa nyaj, hab tsi xob nqaa dlua ib lub tsho ntxiv. #Lukas 10:4-11 4Yog yim twg zoosab txaistog mej moog huv nwg tsev, mej cale moog su huv yim ntawd moog txug nub kws mej tawm huv lub nroog ntawd moog; 5yog mej moog txug qhovtwg kws tsi muaj leejtwg txaistog mej, tes mej cale tawm huv lub nroog ntawd moog, hab nchus tej moov aav kws lu mej kutaw povtseg, kws yog ua ib qhov timkhawv tawmtsaam puab.” #Tegnum 13:51
6Cov thwjtim txawm taug kev moog rua txhua lub zog, qhuabqha txug Txuj Moo Zoo hab khu tej tuabneeg muaj mob kws nyob txhua qhov zoo huv tuabsi.
Helauj Ntxhuvsab
(Mathais 14:1-12; Malakaus 6:14-29)
7Thaus Helauj tug kws kaav lub xeev Kalilais nov txug txhua yaam kws Yexus ua ntawd, nwg ntxhuvsab heev, ruaqhov muaj ibtxha tuabneeg has tas Yauhaas tug kws muab tuabneeg ua kevcai rausdlej tau sawv rovqaab lug lawm. #Math 16:14; Malak 8:28; Lukas 9:19 8Muaj qeeleej has tas yog Eliyas rovqaab lug tshwmsim, hab muaj qeeleej has tas yog ib tug xwbfwb cev Vaajtswv lug txheej thaus u cajsa sawv rov lug lawm. 9Helauj has tas, “Kuv tub muab Yauhaas txav cejdlaab lawm; yogle ntawd, tug kws kuv nov moo nuav ho yog leejtwg hab?” Tes Helauj yimfuab nrhav kuas tau sijhawm ntsib Yexus.
Yexus Pub Mov Rua 5,000 Leej Noj
(Mathais 14:13-21; Malakaus 6:30-44; Yauhaas 6:1-14)
10Thaus cov timthawj rovqaab lug, puab qha txhua yaam kws puab moog ua lawm rua Yexus noog. Yexus txawm coj puab tuabywv moog rua tim ib lub nroog hu ua Npexaidas. 11Thaus cov tuabneeg nov le ntawd, puab txawm lawv Nwg qaab moog. Nwg txaistog puab txhua tug, Nwg qha txug Vaajtswv lub Tebchaws rua puab, hab txhua tug kws xaav zoo mob los Nwg khu puab zoo huv tuabsi.
12Thaus nub yuav poobqho, kaum-ob tug thwjtim lug has rua Yexus tas, “Cale tso suavdlawg moog sub puab txhaj moog nrhav tau zaub-mov noj hab chaw pw huv tej zog kws nyob ibncig ze ntawm nuav, ruaqhov thaaj chaw nuav tsi muaj dlaabtsi le.”
13Tabsis Yexus has rua puab tas, “Mej cale nrhav rua puab noj.”
Puab teb tas, “Peb tsuas muaj tsib lub ncuav hab ob tug ntseg xwb. Koj xaav kuas peb moog yuav mov lug rua suavdlawg noj lov?” 14(Cov txivneej kws nyob ntawd muaj kwvlaam le 5,000 leej.)
Yexus has rua Nwg cov thwjtim tas, “Mej has kuas suavdlawg nyob quastsawg ua tej paab, ib paab twg tsibcaug leej.”
15Cov thwjtim txawm moog has kuas suavdlawg nyob quastsawg, 16tes Yexus txawm muab tsib lub ncuav hab ob tug ntseg lug, Nwg tsaa qhovmuag saib sau ntuj hab ua Vaajtswv tsaug, Nwg muab ndlais hab cev rua cov thwjtim nqaa moog faib rua suavdlawg. 17Txhua tug puavleej tau noj tsau huv tuabsi. Cov thwjtim moog sau tej seem kws suavdlawg noj tsi taag tau kaum-ob tawb.
Petus Has Tas Yexus Yog Tug Mexiyas
(Mathais 16:13-19; Malakaus 8:27-29)
18Muaj ib zag thaus Yexus tuableeg taabtom thov Vaajtswv, cov thwjtim txawm lug cuag Nwg. Yexus nug puab has tas, “Tej tuabneeg suavdlawg has tas Kuv yog leejtwg?”
19Puab teb tas, “Muaj ibtxha has tas Koj yog Yauhaas tug kws muab tuabneeg ua kevcai rausdlej; ibtxha has tas Koj yog Eliyas, hab muaj ibtxha has tas Koj yog ib tug ntawm cov xwbfwb cev Vaajtswv lug txheej thaus u kws tau cajsa sawv rov lug.” #Math 14:1-2; Malak 6:14-15; Lukas 9:7-8
20Yexus nug puab has tas, “Mej ne, mej ho has tas Kuv yog leejtwg?” #Yauh 6:68-69
Petus teb tas, “Koj yog Vaajtswv tug Mexiyas.”#9:20: Mexiyas los yog Khetos.
Yexus Has Txug Nwg Kev Txomnyem Hab Kev Tuag
(Mathais 16:20-28; Malakaus 8:30—9:1)
21Yexus txwv cov thwjtim tawv-tawv kuas puab tsi xob qha zaaj nuav rua leejtwg le. 22Nwg has ntxiv rua puab tas, “Tuabneeg Leejtub yuavtsum raug tsimtxom ntau yaam; cov txwjlaug, cov thawj povthawj hlub hab cov xwbfwb kws qha Kevcai, yuav tsi leeg yuav Nwg. Puab yuav muab Nwg tua, tabsis peb nub tomqaab ntawd Nwg yuav cajsa sawv rov lug.”
23Hab Yexus has rua puab suavdlawg tas, “Yog leejtwg xaav nrug Kuv moog, nwg yuavtsum tsi xob xaav txug nwg tugkheej, najnub kwv nwg tug ntoo khaublig, hab lawv Kuv qaab. #Math 10:38; Lukas 14:27 24Ruaqhov tug kws xaav ceev nwg txujsa, tug ntawd yuav nplaam txujsa, tabsis tug kws yeem ca nwg txujsa tu rua Kuv, tug ntawd yuav ceev tau nwg txujsa. #Math 10:39; Lukas 17:33; Yauh 12:25 25Yog leejtwg tau ibpuas tsaavyaam huv nplajteb nuav lug ua nwg tug, tabsis nwg txujsa tu lossis puamtsuaj moog lawm, tej ntawd yuav muaj qaabhau dlaabtsi rua nwg? 26Yog leejtwg txaajmuag rua Kuv lub npe hab Kuv tej lug qha, tes thaus lub sijhawm kws Tuabneeg Leejtub nrug Nwg cov timtswv dlawbhuv lug sau ntuj lug hab nrug Leejtxiv tug tshwjchim kws ci ntsaa-ab lug, Nwg yuav txaajmuag rua tug ntawd hab. 27Kuv qha tseeb rua mej has tas, mej cov kws nyob ntawm nuav muaj ibtxha yuav tsi tau tuag uantej kws puab pum Vaajtswv lub Tebchaws.”
Yexus Lub Cev Hloov
(Mathais 17:1-8; Malakaus 9:2-8)
28Kwvlaam le ib lub limtam tomqaab kws Yexus tau qha tej ntawd taag, Nwg txawm coj Petus, Yauhaas hab Yakaunpaus nrug Nwg moog thov Vaajtswv peg roob. #2Pet 1:17-18 29Thaus Nwg tseem taabtom thov Vaajtswv, Nwg lub ntsejmuag txawm hloov hlo hab Nwg cev tsoogtsho cale ci ntsaa-ab dlawbpaug. 30Taamsim ntawd txawm muaj ob tug txivneej lug nrug Yexus thaam. Ob tug ntawd yog Mauxes hab Eliyas. 31Obtug lug tshwm nrug tug tshwjchim kws ci ntsaa-ab hab obtug nrug Yexus thaam txug qhov kws tsi ntev Nwg yuav tuag, kws yog Nwg yuav tau ua kuas tav lawvle Vaajtswv lub homphaj nyob rua huv lub nroog Yeluxalees.
32Petus hab nwg ob tug phoojywg puab tsaugzug heev, tabsis thaus puab tsim dlheev lug, puab txawm pum Yexus tug tshwjchim kws ci ntsaa-ab hab ob tug txivneej kws nrug Yexus sawv ntawd. 33Thaus ob tug txivneej ntawd taabtom yuav ncaim Yexus moog, Petus txawm has rua Yexus tas, “Tug Tswv, qhov kws peb nyob ntawm nuav zoo kawg le! Ca peb ua peb lub tsev pheebsuab, ib lub rua Koj, ib lub rua Mauxes, hab ib lub rua Eliyas.” (Petus yeej tsi paub tas sov nwg has dlaabtsi le.)
34Thaus Petus tseem taabtom has le ntawd, txawm muaj ib tauv fuab lug roog nkaus puab; thaus cov fuab ntawd lug laum nkaus puab lawm, cov thwjtim ntshai kawg le. 35Muaj ib lub suab has huv tauv fuab ntawd tuaj has tas, “Tug nuav yog Kuv tug Tub kws Kuv xaiv ca lawm, mej cale noog Nwg lug!” #Yaxaya 42:1; Math 3:17; 12:18; Malak 1:11; Lukas 3:22
36Thaus lub suab ntawd ntsag lawm, tes tsuas tshuav Yexus tuableeg nyob ntawd lawm xwb. Peb tug thwjtim npug tej kws puab pum ntawd ca hab yeej tsi qha rua tej tuabneeg kws nyob rua lub sijhawm ntawd paub hlo le.
Yexus Khu Tug Mivtub Kws Raug Ib Tug Ntsujplig Phem
(Mathais 17:14-18; Malakaus 9:14-27)
37Nub tomqaab thaus Yexus hab Nwg peb tug thwjtim nqeg peg roob lug, muaj tuabneeg coob-coob tuaj cuag Yexus. 38Muaj ib tug txivneej huv paab tuabneeg ntawd hu nrov-nrov has tas, “Xwbfwb! Kuv thov Koj paab saib kuv tug tub, kuv muaj tuabtug tub nuav xwb! 39Muaj ib tug ntsujplig phem ua phem rua nwg tes nwg pheej qw nrov-nrov; ua rua nwg fuam ib thaaj hab ua npuag ncauj tawm plawg. Dlaab pheej tsimtxom nwg hab tsi kaam tawm huv nwg moog le! 40Kuv tub thov Koj cov thwjtim ntab tug dlaab ntawd tawm, tabsis puab ntab tsi tau.”
41Yexus teb tas, “Tam tuabneeg kws tsi muaj kev ntseeg hab sabphem! Kuv tseem yuav nrug mej nyob ntev lecaag hab? Kuv tseem yuav ua sabntev rua mej moog txug thaus twg?” Yexus txawm has rua tug txivneej ntawd has tas, “Cale coj koj tug tub lug ntawm nuav.”
42Thaus tug mivtub taabtom lug, tug dlaab txawm ua rua nwg qaug kag rua huv aav, nwg fuam ib thaaj hab nti moog nti lug. Yexus txawm tshev tug ntsujplig phem ntawd, Nwg txhaj khu tug mivtub ntawd zoo hab muab nwg cob rua nwg txiv. 43Txhua tug tuabneeg kws pum Vaajtswv lub fwjchim luj kawg nkaus ntawd, puab xaav tsi thoob le.
Yexus Rov Has Txug Nwg Kev Tuag
(Mathais 17:22-23; Malakaus 9:30-32)
Thaus suavdlawg tseem pheej xaav tsi thoob txug txhua yaam kws Yexus tau ua ntawd, Yexus txawm has rua Nwg cov thwjtim tas, 44“Mej yuavtsum ncuntsoov tej kws Kuv qha rua mej nuav! Tuabneeg Leejtub yuav raug muab cob rua luas teg.” 45Tabsis cov thwjtim tsi totaub lub ntsablug kws Yexus has ntawd le. Tej nuav tau muab npug ca lawm puab txhaj tsi totaub, tabsis puab los kuj ntshai nug Yexus txug zaaj ntawd hab.
Leejtwg Yog Tug Luj Dlua Ndlais?
(Mathais 18:1-5; Malakaus 9:33-37)
46Cov thwjtim lug siscaav has tas seb puab leejtwg yog tug luj dlua ndlais. #Lukas 22:24 47Yexus paub tej kws puab xaav ntawd, Nwg txawm nqug kag ib tug mivnyuas yau lug sawv ntawm Nwg ib saab, 48hab Nwg has rua puab tas, “Tug kws txais yuav tug mivnyuas yau nuav huv Kuv lub npe, yog nwg txais yuav Kuv; hab tug kws txais yuav Kuv, yog nwg txais yuav tug kws khaiv Kuv lug hab. Ruaqhov tug kws ua tug yau tshaajplawg huv mej taagnrho, tug ntawd txhaj yog tug kws luj dlua ndlais.” #Math 10:40; Lukas 10:16; Yauh 13:20
Tug Kws Tsi Tawmtsaam Mej, Tug Ntawd Yog Mej Cov
(Malakaus 9:38-40)
49Yauhaas has tas, “Xwbfwb, peb pum ib tug txivneej taabtom tuav Koj lub npe ntab dlaab, peb txwv tsi pub nwg ua le ntawd ruaqhov nwg tsi yog peb cov.”
50Yexus has rua Yauhaas hab cov thwjtim has tas, “Tsi xob txwv nwg, ruaqhov tug kws tsi tawmtsaam mej, tug ntawd yog mej cov.”
Lub Zog Xamalis Tsi Kaam Txais Yuav Yexus
51Thaus lub sijhawm kws Vaajtswv yuav coj Yexus moog sau ntuj ceebtsheej lug ze zujzug lawm, Yexus tau txavtxim sab moog nraag lub nroog Yeluxalees. 52Yexus khaiv ib cov tuabneeg ua Nwg ntej moog. Puab txawm moog rua huv cov Xamalis ib lub zog hab yuav moog npaaj txhua yaam tog Yexus. 53Tabsis cov tuabneeg huv lub zog ntawd tsi kaam txais yuav Yexus, vim Yexus taabtom yuav moog rua nraag Yeluxalees. 54Thaus Yakaunpaus hab Yauhaas kws yog Yexus ob tug thwjtim pum le ntawd, obtug has tas, “Tug Tswv, Koj puas xaav kuas wb hu suavtawg poob sau ntuj lug hlawv cov tuabneeg ntawd kuas puamtsuaj?”#9:54: Tej phoo ntawv qub kws xuas teg sau, ntxiv ib yaam le Eliyas tau ua lug lawm. #2Vaaj 19:16
55Yexus tig hlo moog tshev obtug.#9:55: Tej phoo ntawv qub kws xuas teg sau, ntxiv hab has tas, “Mej tsi paub tas tug ntsujplig twg yog tug kaav mej lub sab; ruaqhov Tuabneeg Leejtub tsi yog lug rhuav tuabneeg txujsa kuas puamtsuaj, tabsis yog lug cawm kuas puab dlim.” 56Tes Yexus hab cov thwjtim txawm moog dlua lwm lub zog lawm.
Tug Kws Xaav Nrug Yexus Moog
(Mathais 8:19-22)
57Thaus puab taabtom taug kev moog, muaj ib tug txivneej has rua Yexus tas, “Txawm yog Koj moog qhovtwg los kuv yuav nrug Koj moog qhov ntawd.”
58Yexus teb nwg has tas, “Maa tseem muaj qhov nkaum hab noog tseem muaj zeg nyob, tabsis Tuabneeg Leejtub tsi muaj lub chaw rau ncoo.”
59Yexus has rua ib tug txivneej ntawd tas, “Koj cale nrug Kuv moog.”
Tabsis tug ntawd teb tas, “Tug Tswv, thov ca kuv xub rovqaab moog log kuv txiv tsaiv.”
60Yexus teb tas, “Ca cov tuabneeg tuag log puab tug tuag, tabsis koj cale moog hab qha zaaj kws has txug Vaajtswv lub Tebchaws.”
61Muaj dlua ib tug txivneej has tas, “Tug Tswv, kuv yuav nrug Koj moog hab; tabsis thov ca kuv rovqaab moog haslug sisncaim rua kuv tsev tuabneeg tsaiv.” #1Vaaj 19:20
62Yexus has rua tug ntawd tas, “Tug kws tub tuav khais laijlag lawm, tabsis tseem pheej tig saib qaab, tug ntawd tsi tsimnyog ua dlejnum rua Vaajtswv lub Tebchaws.”
Terpilih Sekarang Ini:
Lukas 9: HNJ2022
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2022 United Bible Societies. All rights reserved.