Tabekacane 1
1
Tabekacane ki Twaumase
1Sakapathagilane, ku Twaumase sa pathagili bekace kai subelebelenge si kawmasane#1.1 “Sakapathagilane, ku Twaumase sa pathagili bekace kai subelebelenge si kawmasane” ku wahunyake madu iya kai “Sa tau pathagili, ku Twaumase wabekace subelebelenge si kadaengane” ku “Ku Twaumase sa pathagili bekace subelebelenge si kadaengane”.. 2Kai kawmasane kadrwana ku manemanemane, kaiyana ngiadarepe. Madradrimitiana palraelre; ku Ri ki Twaumase#1.2 “ku Ri ki Twaumase” ku wahunyake madu iya kai “ku puku ki Twaumase” ku “ku twalai ki Twaumase mutaluvaivai ka valrigi” ku “ku matiukukuludru ka valrigi”. ngiavelevelevele ikai belenge ki acilai. 3Ku Twaumase la drekase, “Lri ikai ku ledra.” Ku ledra la utaluvaivai. 4Ku Twaumase sa drele ki ledra laka mathariri, la malra pauvagai ki ledra si dradrimitane, 5“Vaiyane” la iya ki ledra, “Maungu” la iya ki dradrimitane. La ngilribate kwini maungu, si kela ku mialrealre; kikai yai amani ku aswalalanga ka vai.
6-7Ku Twaumase la pela drekase, “Ikai kai ki laacilai lri ikai ku subelebelenge, la malra apauvagai ki acilai ibelenge si ilebe.” Kikai patuelre la singikai ki drekaseini tulrepenge. Ku Twaumase la bekacenga subelebelenge, si malra ki acilai apauvagai ibelenge si ilebe. 8La sunagane subelebelenge “Belenge” iya. La ngilribate kwini maungu, si kela ku mialrealre; kikai yai samaka pusale.
9Ku Twaumase la pela drekase, “Kai lebe kai acilai lri yelrelre, lai lri mutaluvaivai ku kadaengane.” Kikai patuelre la singikai ki drekaseini tulrepenge. 10Ku Twaumase la sunagane ki kadaengane “Daedae” iya, kwidra ki yaelrelre ka acilai “Laveke” la iya, ku Twaumase la drele ki daedae si laveke ka mathariri. 11La pacungulu, ku Twaumase drekase, “Kai kadaengane lri cebe ku makaelaela ku wacebecebe, yakai ku lataleke, yakai ku lapwamadrumadru.” Kikai patuelre la singikai ki drekaseini tulrepenge. 12Kai kadaengane la cebenga ku makaelaela ku wacebecebe, yakai ku lataleke, yakai ku lapwamadrumadru. Ku Twaumase sa drele kikai lawacebecebe laka mathariri. 13La ngilribate ku maungu, si kela ku mialrealre; kikai yai samaka tulrulu.
14Ku Twaumase la pela drekase, “Kai subelebelenge lri ikai ku kinawmasane ki ledra si apatatukudha ki vaiyane si maungu, la lri kamani ka sapatuthingalane ki caili si vai si kalamanemanane#1.14 “kalamanemanane” ku wahunyake madu iya kai “kalalrilrisiane”., 15lai lri ikai subelebelenge ledra si paledra ki kadaengane.” Kikai patuelre la singikai ki drekaseini tulrepenge. 16Ku Twaumase ala bekace ku drusa ku maadrau ku kinawmasane ki ledra: Ku vai marasiakai ki vaiyane; ku dramare marasiakai ki maungu. Ku Twaumase la bekace ki latariau. 17Ku Twaumase la malra kikai lawaledra pikai subelebelenge, pakai ku apaledrane kai ki kadaengane, 18marasiakai ki vaiyane si maungu, pauvagai ki ledra si dradrimitane. Ku Twaumase sa drele ki ledra laka mathariri. 19Ngialribate ku maungu, la kela ku mialrealre; Kikai samaka supatele.
20Ku Twaumase la drekase, “Kai acilai adringi lri edhale ku makaelaela ku waudriwdripi; kai belenge lri ikai ku makaelaela ku ngiapapapalai ku laadhadhame.” 21Ku Twaumase la bekace ku maadrau ka waudriwdripi ikai laveke, si ku yakai ki acilai ku makaelaela ku waudriwdripi, si ngwababelenge ku makaelaela ku laadhadhame. Ku Twaumase sa drele kikai ki lawaudriwdripi laka mathariri. 22Ku Twaumase la subulrubulru kikai ki lawaudriwdripi, paedhale ki lakange ikai ki laveke, arupadrimadrima ki adhadhame ikai ki daedae. 23Ngialribate ku maungu, la kela ku mialrealre; kikai samaka lrimale.
24Ku Twaumase la pela drekase, “Kai kadaengane lri edhale ku makaelaela ku waudriwdripi: Nilapulapwane, bulabulai, wagulagulai.” Kikai patuelre la singikai ki drekaseini tulrepenge. 25Ku Twaumase la bekace sanaka manemane ka waudriwdripi ikai kai ki kadaengane. Ku Twaumase sa drele kikai lawaudriwdripi laka mathariri.
26La pacungulu ku Twaumase iya kai, “Lri singikaita kai tangimiamianeta, si bekace ku umawmase#1.26 “Lri singikaita kai tangimiamianeta, si bekace ku umawmase” ku wahunyake madu iya kai “Bwala tabekace ku umawmase, lani mia mitane, lri mararamau mitane”., lani kamani ku marasiakai ki lakange, laadhadhame, si sanaka nilapulapwane si lawagulagulai ka makaelaela ka waudriwdripi si yakawmasane patuelre.” 27Ku Twaumase la ngipapatwalrau bekace tuumawmase#1.27 “Ku Twaumase la ngipapatwalrau bekace tuumawmase” ku wahunyake madu iya kai “Ku Twaumase la bekace ki umawmase, kwini lalasu la ngimia iniane”.. La kathi liniane, yakai ku sawvalai, yakai ku ababai. 28Ku Twaumase la subulrubulru liniane, iya kai, “Lri tulalake numi tuthathatha, ku mwabaibalrithi numiane lai lri suete kai kawmasane, si gemegeme kai ki kadaengane. Lri pamarasikaiyaku numiane ki lakange, laadhadhame, si sanaka waudriwdripi. 29Lri patarumaraku kai lataleke si lapwamadrumadru ku lrika akanekaneane numi. 30Ai, kai lawaudriwdripi si adhadhame patuelre, lri pakanaku liniane kai ubulu si lalacenge.” Kikai patuelre la singikai ku drekaseini tulrepenge. 31Ku Twaumase sa drele ku bekaceini patueelre laka mathariri turamuru. Ngialribate ku maungu, la kela ku mialrealre; kikai yai samaka nemele.
Terpilih Sekarang Ini:
Tabekacane 1: NDV
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© The Bible Society in Taiwan, 2017
All rights reserved
© 臺灣聖經公會版權所有，2017