Joyn 13
13
Yesò ə shʉ̀ aghʉ ndzɨ̀mtə̀sə bàm wen
1Andiʼ ando əchʉʼ ndiʼ ne layn və zhɨ̀ kətsi kə Məzaʼsə, mu Yesò sə kɨ la zhʉ̀ kʉʼʉ li la ghə̀ lu fa mbyi ashə ə dyʉ̀ a ben Tìʼ. Ghə̀ kòŋ viʼi wen vyi a və ndiʼ a mbyi, faŋ sə kòŋ vəwenə ə zàʼa ando ghə̀ moʼtə mbyi ghèn.
2Və ne sə zhɨ̀ azhʉ̀ pfwomə, a diʼ ali mu Deblə̀ ku li əkwoʼtə a Judàs Iskalìyòt, ə wàyn Simùn, la ghə̀ baʼlə Yesò. 3Yesò nkɨ la Tìʼ əku li kədyòʼ a yi to akwi əfo ə tsèm, kɨ la ghə̀ lù fa ben Nyìngòŋ, diʼ ə bwenə ə dyʉ̀. 4Ghə̀ lu fa akəshi kə kəzhɨ, ə tsuʼ kəgʉ̀nə̀ ki a ghə̀ mòʼ, ə tam tawùlə̀, 5ə ŋwaʼ mu a kəkaŋ kə shʉ wèn, ə sə shʉ̀ aghʉ ndzɨ̀mtə̀sə bàm ə wen tsu, zhesə nə̀ tawùlə̀ yì a ghə̀ ntàmə li, 6Ghə̀ shʉ əvi zàʼa ə Bità, ghə̀ mu bèm a wen la, “wù kəŋ shʉ aghʉ ghomə a Bobo?”
7Yesò ə gàʼ a wen la, “Wù ko yenə kɨ tebè kənyʉ̀ kì a ma nè luwen, ali diʼ ə ne ə kɨ.”
8Bità ə tensə ə gàʼ la, “Wù ko lu shʉ̀ aghʉ ghomə no kətsi kə kətsen.”
Yesò ə gàʼ a wen la, “A zhʉ a ma ko a shʉ aghʉ wu yowù mè.”
9Saymun Bità ə mu gàʼ la, “Kə ndiʼ ali a Bobo, kə wù shʉ̀ to aghʉ ghomə, wu be shʉ̀ avu ghomə nə̀ kətʉ̀ ə kòmkə!”
10Yesò ə gàʼ la, “No ndò a ghə̀ shʉ̀ li wèn ə wen ko be dì shʉ wèn ə wen no tsèm, əchò tò aghʉ wen, byìʼàndo wèn ə wenə laynə. Ghə̀ŋ laynə ali, kò ghə̀ŋ lu nlaynə vətsèm, wu muʼ ko laynə.” 11Yesò ə gàʼa ali la vəwenə diʼ nə̀ laynə, ə chò to wìʼ ə mùʼ byìʼàndo ghə̀ nkɨ li wìʼ yi a ghə̀ ndiʼ ne baʼlə wen.
12Yesò ə shʉ li mwetə aghʉ vəwenə ə bwensə mòʼ kəgwʉnə kə wen ə dyʉ̀ nyʉ̀ʼmə akəshi yi a ghə̀ ə nyʉ̀ʼ tsu ə mu bèm a ndzɨ̀mtə̀sə bàm wensə la, “Ghə̀ŋ yen li kɨ kənyʉ̀ kènkə a mà nè a ghə̀ŋ a? 13Ghə̀ŋ toŋtə mò la ndìʼsə̀, be toŋtə la Bobo, kə diʼ to nəmwèʼè. 14Ma shʉ li aghʉ ghəŋə diʼ Nyìngòŋ ghə̀ŋ, be diʼ ndìʼsə̀. Kə lə diʼi la no ndò fa ghə̀ŋ a ntìntìn diʼi ə̀ shʉ aghʉ lèmə̀ wen. 15Mà diʼi li nchwi a ghə̀ŋ ndi ghə̀ŋ nè to ando mà nè. 16Ma gaʼa a ghə̀ŋ no nəmwèʼè la wù ə shwèʼè ko tɨmə chò tiʼi shyèʼ wen, wù ə ntɨm ko ntemə chò wìʼ yi a ghə̀ tɨmə wen. 17Ghə̀ŋ sə kɨ nyʉ̀ venə, mu ghə̀ŋ sətsen ə nè to ali, ghə̀ŋ a kiʼi mbwaʼsə.
18“Ma ko gàʼa tebè a ghə̀ŋ və tsèm. Ma kɨli ghə̀ŋ vyi a mà tsuʼ li. Alì, kənyʉ̀ kì a və nyoʼ a Ŋwàʼlə̀ Nyìngòŋ la, ‘Wìʼ ne zhɨ̀ to yo wen, sə diʼ mù ghə̀ bwenə li dzèm əwen a mò’. 19Ma shə̀ʼtə̀ kənyʉ̀ kènkə a ghə̀ŋ luwen alə̀, kə ko təmə fʉ̀, ndiʼ kə na fʉ̀, ghə̀ŋ byɨmə la ‘ma diʼ wìʼ yì a ma diʼ wen.’ 20Ma gaʼa a ghə̀ŋ no nəmwèʼè la, no ndo a ghə̀ à shisə wìʼ a mà tɨmə, mù ghə̀ shisə li mò, no ndo à ghə̀ shisə mo, mù ghə̀ shisə li Wìʼ a ghə̀ tɨmə mo.”
Yesò ə shə̀ʼtə̀ la və ne baʼlə wen
(Mat 26.20-25; Mak 14.17-21; Luk 22.21-23)
21Yesò ə ngàʼa nyʉ̀ avenə alə kwòʼtə̀ ə wenə sə ku ngəʼ a wen no nànto. Ghə̀ mu gàʼ ə làynsə la, “Ma gaʼa a ghə̀ŋ no nəmwèʼè la wìʼ ə mùʼ fa ghə̀ŋ a ntìntìn ne ə baʼlə mo.”
22Ndzɨ̀mtə̀sə bàm wensə sədiʼ nə̀ əkaynə ə, mu sə ki mu kaynə la ghə̀ gàʼa kumə ndò lo. 23A ndiʼ ali dzɨ̀mtə̀ əbàm wen yì a ghə̀ nkòŋ nəkwoŋ ə ŋwʉʼ boʼsə wen. 24Saymun Bità ə gàʼ a wen ashɨ, la ghə̀ bèm a Yesò la ghə̀ gàʼa kumə ndò lo.
25Ghə̀ zhəʼtə dyʉ̀ a ben ə Yesò ə bèm a wen la, “Wù gaʼa ndò a Bobo?”
26Yesò ə gàʼ la, “Ma chʉ̀ kəbayn kènkə a mbàsə̀ ə kù a wìʼ yi a ma gaʼa kumə wen.” Ghə̀ gàʼ ali ə chʉ ku a Judàs Iskalìyòt, ə wàyn Simùn. 27Judàs ə sə shi vi nə̀ kəbayn a kì a alə, Satan kwen a wen ə tyɨm. Yesò ə gàʼ a wen la, “Zaŋsə nè kənyʉ̀ kì a wù kəŋ ə nè.” 28Alì ko wìʼ lù ə kɨ akəshi kə kəzhɨkə a kì la ghə̀ gàʼa ali byìʼì ghò lo. 29Ghə̀ ngaʼa ali, ndzɨ̀mtə̀sə bàm ə wensə sə tsensə kwoʼtə la ghə̀ gaʼa la Judàs zen əfo vyi a chʉʼ a layn, və zhɨ̀ a kətsi kə kəzhɨ, bwen ali mu ghə̀ əgàʼa la ghə̀ ku əko a viʼi kəfem byìʼàndo a ghʉ̀ wen ghʉ̀ kəbò kə ko.
30Judàs ə shi kəbayn kì fa Yesò no zhʉ̀ko, ə fʉ̀ dyʉ̀ a kəbəŋ kə fenəkə.
Yesò ə ku əsoʼ ə fighə
31A ndiʼ ando Judàs ə fʉ̀ dyʉ̀ li, Yesò ə mu gàʼ la, “Əzhʉ kʉʼʉ li a və a yen kədyòʼ kə Wàyn Wìʼ, ə be yen kədyòʼ kə Nyìngòŋ chò fa wen. 32A na ndiʼ ando və yenə kədyòʼ kə Nyìngòŋ chò fa wen, nkàyntə̀ Nyìngòŋ be ne, və be yen kədyòʼ kə wen. Nyìngòŋ a nè, kənyʉ̀ na kènkə zaŋsə fʉ̀. 33Mà ko be diʼ ə ndiʼ vəghəŋ a kəghaf a vù vwomə. Ghə̀ŋ kəŋ mò nənlù, mu ma dyʉ̀ li akəshi, mu ghə̀ŋ zizi ko ghə̀ŋ lu vi tsu. Ma shə̀ʼtə̀ a ghə̀ŋ luwen, to ndə̀ŋndəŋ ando mà sə diʼ mù ma shə̀ʼtə̀ li a viʼi Jus. 34Ma ku əsoʼ ə fìghə a ghə̀ŋ luwen. Ghə̀ŋ nə̀ kòŋ təwen ə təŋtə. Ma kòŋ li ghə̀ŋ. Ghə̀ŋ ne kòŋ təwen ə təŋtə to ali. 35Nò viʼi və tsèm ə ne yenə kɨ la ghə̀ŋ diʼi ndzɨ̀mtə̀sə bàm ə mò, a ji yi a ghə̀ŋ kòŋ təwen ə təŋtə fa tsu.”
Yesò ə shə̀ʼtə̀ la Bità ə na mo wen
(Mat 26.31-35; Mak 14.27-31; Luk 22.31-34)
36Yesò əgàʼa ali, Saymun Bità ə bèm a wen la, “Wù dyʉ̀ fe a Bobo?”
Ghə̀ bwensə la, “Wù zizi ko wù lu dyʉ̀ akəshi yi a ma dyʉ̀ tsù luwen, ali diʼ ə ne dzɨ̀mtə̀ ə vi.”
37Bità ə bèm a wen la, “Mà zizi ko ma lu dyʉ̀ luwen byìʼì ghò a Bobo? Ma zizi ma pfʉ̀ byìʼì wù.”
38Yesò ə bèm la, “wù le zi wu ə pfʉ̀ byìʼì mò a? Ma gaʼa a wù no nəmwèʼè la ə nkəʼ ne sə toŋ layn, mu wù mo li mò aghayn a tàʼ.”
Terpilih Sekarang Ini:
Joyn 13: bbkDBLnt
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk