Gɔ̃mèjèje be Xoma Kpɔ̀kplɔ̀sɔyìemè
Kpɔ̀kplɔ̀sɔyìemè
Biblìa be xoma cucugbãa ye nyi Gɔ̃mèjèje be xoma. E le pò nupo so xixea be ɖoɖo ŋuti. Lè ekèa mèa Mawu ɖè ènu kè jè na xixea ku ènu kè mu jè na xixea òa fiɔ (Èta 1 yì 11).
Gɔ̃mèjèje xoma a gbà pò nupo so Izràɛl be dùkɔ̃a be gɔ̃mèjèje ku àlekè ye yebe tɔgbewo nɔ̀ ku Mawu va yìa ŋuti (Èta 12 yì 50).
Èta 1-11: Àleke ye mi la teŋu sè xixe kè mè mi lèa gɔ̃mè ɖo ò? Nukɛ ye nyi àgbètɔ? Tèpe kɛ ye lè e si? Nukɛ ŋuti ye klìcà-klìcà lè àgbètɔ ku Ɖotɔ a dòmè ɖo ò? Àlɔ̀do ɖekpekpe mu la teŋu nɔ̀ ànyi a? Biɔse kèawo ŋuti ye àkpa cucugbãtɔ̀ kèa le ɖo: Ŋusù ku nyɔ̃nù lè ɖoɖo a mè (Èta 1 yì 2); woabe ànyi jèje lè Mawu gbɔ (3); Kaɛ̃ ku Abɛ̀l (4); Nɔà lè èsì ɖɔɖɔ gãa mè (6 yì 9); Babɛ̀l be àsãŋu gã (11). Àseŋu kãkã kèawo be vɔ̀vɔnuwo ɖèfiɔ àlekè Mawu cɔ̃ àsi àgbèa ji ɖo eye e gbà nana ɛ̀ fàa.
Lè Èta 12 yì 50 mèa, mi le kpɔ àlekè Mawu cã yebe dùkɔ̃a, ɖè ye ɖokoe fiɔ wo, gbà ɖùzò ku wo ɖoa. Abràham (12.1 yì 25.18), èvia Izàk ku tɔgbeyɔvia Yakɔb (25.19 yì 36.43). Wo le ze sìgbè Izràɛl dùkɔ̃a be tɔgbe tɔ̀gbèwo nène. Yakɔb be èvi woèvèawo ye na nyikɔ Izràɛl be Kɔ̀ta àlo Ètò woèvèawo. Lè woa dòmèa, Yosɛ̀f ɖo àsìxɔ̀xɔ tɔ̀xɛ ɖe. Xoma a pò nupo so yebe àgbè ŋuti dìdiɖe (37.1 yì 50.26). E ye ji Mawu to kplɔ̀ Yakɔb ku èviawo yì Ejiptè-nyigbã ji na èpè fuu.
Gɔ̃mèjèje xoma kèa nyi nufiɔfiɔ so Mawu be èdɔ ŋuti. E ɖokpe ji be Mawu ye ɖo xixea, eŋuã, e lè yebe ŋusɛ̃ cã gɔ̃mè tututu. Eye Mawu be fìãfiã sɔ kpɔ yebe dùkɔ̃a ji be ènyàwo ye wu xoma a nu. Kplògòdòa, Mawu ye nyi àmè kè ŋuti ye xoma pò nupo so ŋutɔ. E ɖè ye ɖokoe fiɔ, e ɖokòjo, e doàlɔ̀ gbà kplɔ̀ yebe dùkɔ̃a. Eye e trɔàsi so yebe èxotùnyaa ŋuti.
So ekèa mèa, Mawu biɔ be woa xɔ̀ yè ji sè. Gbà wua, wo a xɔ̀ yebe fìãfiã ji sè; eye wo a sɔ yèbe ègbè do àsi ku èsewo do èdɔwɔ̀wɔ mè.
Xoma kèa tɔ àsi Izràɛl be kɔ̀do xoxowo ji, sɔ ɖè àlekè yebe dùkɔ̃a nɔ̀ xɔ̀se be àgbè ɖo ku àlekè ye e le è ɖotè ɖoa.
Xoma a mè-nyàwo
Xixe a ku àgbètɔwo be ɖoɖo (1.1—2.25)
Èvùɛ̃ ku àyàɖùɖu be gɔ̃mèjèje (3.1-24)
So Adàm ji sɔ yì Noa ji (4.1—5.32)
Noa ku èsìɖɔɖɔ gã a (6.1—10.32)
Babɛ̀l be èmɔ̃ ji kpɔ-xɔ̀ a (11.1-9)
So Sem ji yì Abràm ji (11.10-32)
Tɔgbe-tɔ̀gbèwo: Abràham, Izaak, Yakob (12.1—35.29)
Esaò be jìjimèviwo (36.1-43)
Yosɛf ku fòfoawo (37.1—45.28)
Izsraɛ̀lviwo lè Ejipte-nyigbã ji (46.1—50.26)
Terpilih Sekarang Ini:
Gɔ̃mèjèje be Xoma Kpɔ̀kplɔ̀sɔyìemè: GEN
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Mina Bible © Bible Society of Togo, 2014.