Matyo 16

Bɔ Farisii biiri anɛ̂ ebwa

(Mak 8:11-13; Luk 12:54-56)

1Bɔ Farisii mane bɔ Sadusii zeʼ é kpèrè Yeso ma biiri kpe è tee anɛ̂ ebwa deʼ yɛ a me zeʼe ekere ngɛ ebe angɔ. 2Yeso gíì ebe angɔ kpe, “Èndzobo chɛ etaranchwe sa turu ngɛ mbɔn kpe echwe wa ngo ko enchwe mbɔʼnga ezob ma fàn. 3Enchwenchwe gɛrɛ, mbɔn kpe m̀bò ya ngo ngwe mbɔʼnga ezob ma fàn gɛ̀rɛ̀ ma di. Mbɔn ba kede ezob ma tòʼrò kpe ka echwe wa ko kà m̀bò ya ngwe. Bɛʼngɛ mbɔn ke né tòʼrò ebwa wɛ e ma ngo gli ngɛ bo. 4Bɔ efwɔ endzobo zɔnɔ be le ǹchù mane abwa bɔɔbɔɔ ne ma bumu Ngwe bo. Mbɔn na biiri anɛ̂ ebwa ena? Mbɔn ke ma ngo zɔ anɛ̂ ebwa deʼ bo. Anɛ̂ ebwa chwɛ̀ʼ yɛ mmɛ me né le endɔn ngɛ à tye anɛ̂ ebwa Yɔɔna.” Éngɛ Yeso saara angɔ è ngɔɔ amɔ.

Àfòo bɔ Farisii mane bɔ Sadusii

(Mak 8:14-21)

5Èndzobo chɛ angɔ à shi kpɛ̀n angli ngɛ, bɔ bɛɛrɛ abwa ngɔ kwaʼ zhuŋu kpe mbɔɔ a dzɛrɛ é nu ende deʼ. 6Yeso gâ ebe angɔ kpe, “Mbɔn nu azɔm gɛ̀rɛ̀ kɔ̀ʼ akwa ndzɔn ene àfòo bɔ Farisii mane bɔ Sadusii.” 7Bɔ bɛɛrɛ abwa ngɔ sa ga àmɔ̀ àmɔ̀ kpe na mbɔʼnga ntsɔ ne me nu ǹgoŋ ekara bo. 8Yeso à ne nɛɛ ebwa wɛ angɔ à ma ga ngɛ, è ga ebe angɔ kpe, “Bɔ nè ebɛrɛtaa kparakpara, mbɔn na ga mbɔn mbɔn kpe mbɔn ke le ǹgoŋ deʼ bo kpe ayɛ? 9É bwɛrɛ enjitsɔ, mbɔn a da bli shi nɛɛ ebwa bo? Mbɔn ke zhuŋu ebɔʼ ǹgoŋ tan byɛ ntsɔ à ndee bɔ ètɔɔshin tan mane etseʼre yɛ ntsɔ à shunu efwɔ ènkàm ngɛ bo? 10Mbɔn gɛrɛ ke zhuŋu ebɔʼ ǹgoŋ sàambyɛ byɛ ntsɔ à ndee bɔ ètɔɔshin kwɛ̀ mane etseʼre yɛ mbɔn à shunu efwɔ ènkàm ngɛ bo? 11Éngɛ ayɛ me le mbɔn ne me nɛɛ kpe mmɛ à ke ma ga ma mbɔʼ ǹgoŋ bo tsɛ̀ʼ? Mbɔn zɔmmɔ angɔn ene àfòo bɔ Farisii mane bɔ Sadusii.” 12Éngɛ angɔ nɛɛ kpe Yeso ke ma ga kpe angɔ zɔmmɔ àmɔ̀ ngɛ me ne àfòo ǹgoŋ bo. Bɛʼngɛ engɔ à na ga me ene abwa yɛ bɔ Farisii mane bɔ Sadusii ma tee ngɛ.

Petoro toʼro egho wɛ Yeso mwɔ ngɛ

(Mak 8:27-30; Luk 9:18-21)

13Èndzobo chɛ Yeso mane bɔ bɛɛrɛ abwa mɔ â bwɛn abɛɛ abɛ ebara Kaysarya Filipi ngɛ, Yeso biiri ebe bɔ bɛɛrɛ abwa mɔ kpe, “Bɔ na ga kpe Ŋwɔ Gho na awɛ?” 14Angɔ gíì kpe, “Adeʼ kpe ngwo na Eyɔɔ Andɛʼndim, adeʼ kpe ngwo ne Elayja, adeʼ gɛrɛ kpe ngwo na Jerimaya kà àmɛnɛkɔn Ngwe sam deʼ.” 15Yeso biiri ebe angɔ kpe, “Mbɔn ga mbɔn kpe mmɛ na awɛ?” 16Shimun Petoro ga kpe, “Ngwo na Ǹtɔmzhwaʼa Ŋwɔ Ngwe yɛ è mwɔ ekɔʼɔ ngɛ.” 17Yeso gíì kpe, “M̀bɔ̀nɔ mwɔ ekwa ngwɛ Shimun ŋwɔ Yɔɔna mbɔʼnga ke ma gho a me toʼro m̀pè ebwa wunɔ engɛ̂ bo, bɛʼngɛ e ne zeʼe ebe àtɛ ngu ekere. 18Éngɛ mmɛ ga engɛ̂, Petoro kpe, ngwo ne ekob, edɔm ekob wunɔ mmɛ wa byɛ ndɔngwe ndza, ka de mwɔ ekama ewu, e yà ne fɔɔ ndɔngwe zɔnɔ bo. 19Mmɛ wa ndɛ̀ʼ etuuru ene ebwa m̀fɔ̀ Ngwe ekere endɔn, ebwa wɛ mbɔn tɔrɔ a chwâ ngɛ, e ba ngo tɔrɔ ekere, engɔ mbɔn bɛrɛ a chwâ ngɛ, e gɛrɛ ba ngo bɛrɛ ekere.” 20Éngɛ Yeso gbeʼre eto angɔ kpe angɔ ke toʼro ebe gho deʼ kpe engɔ na Ǹtɔmzhwaʼa bo.

Yeso gâ mbɔʼ ǹgoʼ mane ewu mɔ

(Mak 8:31–9:1; Luk 9:22-27)

21Enyɛrɛ èndzobo chɛ sa ngɔɔ embè, Yeso klada sa ga ebe bɔ bɛɛrɛ abwa mɔ apɛpɛ kpe mbè wara ngɔɔ a Jerusalɛm é zɔ ǹgoʼ ene abwa akɛkɛ eblabwo eto, m̀fɔ̀rɔ̀ zhiri, mane bàtee atsɛrɛ. E ba zhudu angbe, bɛʼngɛ enji sa fɔɔ tɛd Ngwe zhwɛɛmɛ angbe ene ewu. 22Èndzobo chɛ Petoro à zo ebwa wunɔ ngɛ, è gòoro Yeso ngɔɔ abɛɛ bi, sa bwe ebe engɔ kpe, “Masakɛ, Ngwe ke bɛrɛ bo! M̀pè ebwa zɔnɔ ke né gli ekwa ngwɛ bo.” 23Yeso ghɛɛbɛ amɔ ga ebe Petoro kpe, “Nyɛrɛ efàarà ndza Asatan! Ngwo na kɔrɔ aghɛʼnji ndza, mbɔʼnga ega wunɔ ngwo ma ga nɔ ke me zeʼ ebe Ngwe bo, bɛʼngɛ e ne zeʼe efwɔ etaa gho.” 24Éngɛ Yeso gâ ebe bɔ bɛɛrɛ abwa mɔ kpe, “Mala gho deʼ ma ke é zeʼ nè mmɛ, è tɔrɔ ekwa mɔ, beʼ azɔd baʼra mɔ kiri angu. 25Enga egho ma ke é pwèerè amɔ ngɛ wa nyim. Bɛʼngɛ egho wɛ è nyimi etyê mɔ mbɔʼ mmɛ ngɛ wa ngo le. 26Ǹtsara deʼ ya ngo mwɔ ebe egho wɛ è ma le ela gimkpaʼ efwɔ ese, bɛʼngɛ shi nyim etyê mɔ ngɛ? Tsɛ̀ʼ ala deʼ gho me né ndɛʼ é wu tsɔmɔ ekɔʼɔ bo? 27E ne énde mbɔʼnga, Ŋwɔ gho wa ngo zeʼ efwɔ enɛŋɛrɛkɛ àtɛ mɔ mane engere mɔ. Éngɛ engɔ wa ngo nɛ̀rɛ̀ bɔ gimkpaʼ ene aghɛʼ yɛ angɔ à ma fwɛʼ ngɛ. 28Mmɛ ga éŋwaʼa endɔn kpe bɔ deʼ anɔ ke ma ngo kudu bo bwɛn èndzobo chɛ e ma zɔ Ŋwɔ Gho zeʼe efwɔ ese na m̀fɔ̀ nɔ.”

Terpilih Sekarang Ini:

Matyo 16: nbt

Highlight

Kongsi

Salin