Matyo 22

Nklama timi mbɔʼ antara nu-aye

(Luk 14:15-24)

1Yeso wu gâ ebe bɔ ene nklama timi kpe, 2“Ebwa m̀fɔ̀ ekere ne mwɔ énde, m̀fɔ̀ deʼ à kɛʼɛ antara nu-aye ebe ŋwɔanɔm mɔ. 3Engɔ à tɔm bɔ afwɛʼ mɔ é ga ebe abɔ à me tèʼe ngɛ kpe e zeʼ ene antara nu-aye. Bɛʼngɛ angɔ à ke ma ke é zeʼe bo. 4Engɔ gɛrɛ wu tɔm abɔ afwɛʼ tsɛrɛ ga kpe, ‘Mbɔn ga ebe abɔ mmɛ a me tèʼe ngɛ kpe endzobo shi koʼo é nde antara, mmɛ à shi kɛmɛ ezɛʼ m̀pwɔ̀rɔ̀ nchwɔnchwɔ mane m̀pwɔ̀rɔ̀ mmɛ a shi ndee shi ngɛ, eku gimkpaʼ gɛrɛ shi a chwâ. Mbɔn zeʼ ene antara nu-aye ngu.’ 5Bɛʼngɛ abɔ à me tèʼe ngɛ ne kɔʼ aŋu bo ngɔ̀ɔ yɛrɛ fwɛʼ efwɛʼ àmɔ̀, ebi ngɔɔ amɔ ekwa, ebi ngɔɔ afwɔ afwɛʼ mɔ, 6etseʼre abɔ abê bere abɔ afwɛʼ byɛ gbɛɛrɛ gɛ̀rɛ̀ zhudu angɔ. 7M̀fɔ̀ yɛ à bɔɔ etaa ghɛʼ, tɔm bɔ ebiri mɔ e zhudu abɔ enɔgho byɛ gɛ̀rɛ̀ twɔ̀n antiri abɛ angɔ.

8Éngɛ è zɔʼ bɔ afwɛʼ mɔ gà ebe angɔ kpe ‘Endzobo antara nu-aye ndza shi koʼo, bɛʼngɛ abɔ mmɛ à me tèʼe ngɛ ke me koʼro é mwɔ aŋu bo. 9Enjitsɔ mbɔn ngɔɔ etonji, tèʼ bɔ gimkpaʼ byɛ mbɔn me né zɔ ngɛ.’ 10Éngɛ abɔ afwɛʼ byɛ ngɔɔ etonji shùnu bɔ gimkpaʼ byɛ a me né zɔ ngɛ, bɔ ǹchwɔ̀ mane bɔ bɔɔbɔɔ, etsam antara nu-aye wɛ shwe ene bɔ. 11Èndzobo chɛ m̀fɔ̀ yɛ à nyii efwɔ etsam é zɔ àgɔn ngɛ, e zɔ aŋu ndɔ a me shwe ngɛ, e zɔ gho deʼ wɛ à ne me ge ǹdi antara bo ngɛ. 12M̀fɔ̀ yɛ biiri ebe engɔ kpe ‘Àgho, ngwo à nyii efwɔ anɔ ene tɔrɔ ǹdi antara nu-aye?’ Bɛʼngɛ egho wɛ zhwezhwe. 13Éngɛ m̀fɔ̀ yɛ ga ebe bɔ afwɛʼ mɔ kpe ‘Mbɔn koro ebwo mane elo ngɔ ndwa engɔ ese akwâ di. Engɔ wa sa ku̧u nde ashwɔ mɔ aŋu’ 14Yeso shi ngùdu ga kpe ‘Ngwe ye zɔʼɔ bɔ akɛkɛ shi pwɔ̀nɔ̀ ma m̀pùru.’ ”

Ebiiri mbɔʼ é nɛ̀rɛ̀ aŋwɛ ebe m̀fɔ̀

(Mak 12:13-17; Luk 20:20-26)

15Bɔ Farisii deʼ â sɔŋɔ tɔ̧ɔrɔ é sebe Yeso ene ebiiri abwa. 16Éngɛ angɔ tɔm bɔ bɛɛrɛ abwa àmɔ̀ mane bɔ abɛɛ Hɛrɔd kpe e ngɔɔ biiri ebe engɔ kpe, “Àtee abwa mbyɛɛ be nɛɛ kpe ngwo wa ga éŋwaʼa, gɛ̀rɛ̀ ma tee éŋwaʼa mbɔʼ ebwa wɛ Ngwe ma ke ebe bɔ ngɛ, ne ma zhuŋu awɛ kpe ka bɔ na ga kpe ayɛ bo, mbɔʼnga ngwo ke me chi atsɛʼ ene gho deʼ bo. 17Toʼro endyɛɛ ká e we koʼro é nɛ̀rɛ̀ aŋwɛ ebe Kaasa m̀fɔ̀ abɛ Rom ka keʼ? Ngwo ne zhuŋu ngwo kpe ayɛ?” 18Bɛʼngɛ Yeso à twɔɔbɔ nɛ̀ɛ ezhuŋu bɔɔbɔɔ angɔ, shi ga ebe angɔ kpe, “Mbɔn bɔ ndooro aghɔɔ, mbɔn na ke é sebe angu kpe ayɛ 19Mbɔn tee ekɛb atɔrɔ aŋwɛ deʼ ena nɔ.” Angɔ ndɛʼ ekɛb atɔrɔ wɛ ebe engɔ. 20Yeso biiri ebe angɔ kpe, “Na azhi mane ekumu wɛ mwɔ ene ekɛb wunɔ?” 21Angɔ gii kpe, “Ne engɔ Kaasa.” Yeso shi ga kpe, “Mala e mwɔ éngɛ, ndɛʼ ala Kaasa ebe Kaasa, ndɛʼ ala Ngwe ebe Ngwe.” 22Èndzobo chɛ angɔ à zo egiiga zɔnɔ ngɛ, â kɔ̂n, angɔ saara engɔ nyɛnnɛ.

Yeso tee mbɔʼ é zhwɛm ene ewu

(Mak 12:18-27; Luk 20:27-40)

23Anji aŋwaʼ yɛ, bɔ Sadusii deʼ byɛ â ma zhuŋu kpe bɔ ke ma ngo zhwɛm ene ewu bo ngɛ zeʼ ebe Yeso. 24Angɔ biiri ebe Yeso kpe, “Àtee abwa, Mose à ga kpe mala anɔm deʼ nu aye ku tɔn ŋwɔ, ghongwaanɔm mɔ nu eyeti wɛ, be bwɔ byɛ e ma ngo bɛrɛ ekumu egho ku wɛ ngɛ. 25Enjitsɔ bwɔngwaanɔm deʼ sàambyɛ â na tsɔmɔ anɔ. Embèmbè ngɛ nu aye ku tɔrɔ bwɔ, eyeti wɛ nɔ ebe gho tɛʼ chim mɔ. 26Ǹtɛʼchim mɔ ngɛ gɛrɛ ku tɔn bwɔ. Engɔ wɛ à me tɛʼ achim engɔ ngɛ gɛrɛ nu eyeti wɛ gɛrɛ ku tɔn bwɔ. Éngɛ àbwɔngwa sàambyɛ byɛ nu aye wɛ kudu tɔn bwɔ. 27É ngùdù aye wɛ gɛrɛ ku. 28Enjitsɔ, anji yɛ bɔ ma yà zhwɛm ene ewu ngɛ, aye wɛ yà mwɔ eye wɛ, mbɔʼnga angɔ bɔ gimkpaʼ â nu engɔ ene aye?” 29Yeso gíì kpe, “Mbɔn be nyim ebwa ghɛʼ! Na mbɔʼnga mbɔn ke nɛɛ ega Ngwe kà ekama Ngwe bo. 30Èndzobo chɛ bɔ ma yà zhwɛm ene ewu ngɛ, e ba ngo mwɔ ne engere ezob nɔ. Ebwa elô yà me tsɛʼ bo. 31Enjitsɔ, ene ebwa é zhwɛm ene ewu, mbɔn ke shi zɔʼrɔ ebwa wɛ Ngwe à ga endɔn ngɛ bo? Engɔ à ga kpe, 32‘Mmɛ na Ngwe yɛ Abraham, Ayzik, mane Yakɔb ma ghɔ ngɛ.’ Engɔ na Ngwe bɔ kɔʼɔ ke ma Ngwe bɔ kudu bo.” 33Èndzobo chɛ ebaŋabɔ à zo ebwa wunɔ ngɛ â kɔ̂n ghɛʼ ene aghɛʼ yɛ engɔ à ma tee abwa ngɛ.

Etɛʼɛ yɛ e me fɔɔ azê ngɛ

(Mak 12:28-34; Luk 10:25-28)

34Èndzobo chɛ bɔ Farisii à zɔ kpe Yeso a gwɔb eklo bɔ Sadusii ngɛ, angɔ sɔŋɔ afwɔbi. 35Àtee atsɛrɛ bi abwaʼ angɔ kpere é sebe Yeso biiri ebe engɔ kpe, 36“Àtee abwa, angwa etɛʼɛ abwaʼ atsɛrɛ gimkpaʼ ngɛ ne eze?” 37Yeso gíì kpe, “Doʼ Masakɛ Ngwe njɛ ene etaa mfyɛ gimkpaʼ, ene azhwɛɛrɛ njɛ gimkpaʼ mane ezhuŋu njɛ gimkpaʼ. 38Ne etɛʼɛ kɛ yɛ e me fɔɔ atɛʼɛ gimkpaʼ ngɛ gɛ̀rɛ̀ mwɔ etɛʼɛ mbèmbè. 39Engɔ yɛ e me tɛʼɛ amɔ achim engɔ yɛ ngɛ gɛrɛ na ke mwɔ ne engɔ yɛ nɔ. Ene ga kpe ‘Doʼ gho ebara ngwɛ na ngwo me doʼo ekwa ngwɛ nɔ.’ 40Atsɛrɛ Mose gimkpaʼ mane abwa yɛ bàmɛnɛkɔn Ngwe à tee ngɛ ne zeʼe efwɔ atɛʼɛ fyee zɔnɔ.”

Yeso biiri ebiiri mbɔʼ Ǹtɔmzhwaʼa

(Mak 12:35-37; Luk 20:41-44)

41Èndzobo chɛ bɔ Farisii deʼ à sɔŋɔ afwɔbi ngɛ, Yeso biiri ebe angɔ kpe, 42“Mbɔn ne zhuŋu ebwa yɛ mbɔʼ Ǹtɔmzhwaʼa? Na gho ekla wɛ?” Angɔ gíì kpe, “Na gho ekla Devid.” 43Yeso shi biiri kpe, “À yɛ à le azhwɛɛrɛ Ngwe le M̀fɔ̀ Devid zɔʼrɔ engɔ kpe Masakɛ? Devid à shi ga kpe,

44‘Masakɛ Ngwe ga ebe Masakɛ ngu kpe

tsɔmɔ abɛɛ abwo anɔm ndza

bwɛn èndzobo chɛ mmɛ ma ge bɔ m̀pɛ̀ʼ mbyɛ enji elo mbyɛ ngɛ.’

45Mala m̀fɔ̀ Devid à zɔʼrɔ engɔ kpe ‘Masakɛ,’ Ǹtɔmzhwaʼa gɛrɛ shi we mwɔ gho ekla ngɔ ngɛ ene?” 46Gho deʼ à ke le egiiga deʼ é ndɛʼ ebe Yeso bo. Enyɛrɛ anji yɛ sa ngɔɔ embè, gho deʼ ke we kpèrè é biiri ebwa tsɛrɛ ebe engɔ bo.

Terpilih Sekarang Ini:

Matyo 22: nbt

Highlight

Kongsi

Salin

Ingin menyimpan sorotan merentas semua peranti anda? Mendaftar atau log masuk

Ketahui Lebih Lanjut tentang Aŋwɛʼrɛ Ebuumu Fe Nè Ngwe

Matyo 22

Ayat Alkitab yang Popular daripada
Matyo 22

Alkitab:

Ngwo

Versi: Aŋwɛʼrɛ Ebuumu Fe Nè Ngwe - nbt

Matyo 22

Matyo 22

Ayat Alkitab yang Popular daripada Matyo 22

Alkitab:

Ngwo

Versi: Aŋwɛʼrɛ Ebuumu Fe Nè Ngwe - nbt

Matyo 22

Ayat Alkitab yang Popular daripada
Matyo 22