Juan 5
5
I Jesús xrutzirsaj jun achi chi sikirnaq che i k'ijib'al Betesda
1Keb' oxib' ij rik'awik ile, are uri xuriq i ij re i kinima'ij i aj Judío, rumali i Jesús x-e chila pa Jerusalén. 2Chila pa tinimit Jerusalén le, naqaj che Uchi b'e chi ke i Chij kb'ix che, o jun atinb'al chi o jo'ob' okb'al che chi Betesda ub'i pa Hebreo. 3Che taq i k'ijib'al le, lik je k'i iwab'ib' je olik: Je o i mawach, klis, xaq i sikirnaq kich'akul, konojel je xoternaq b'i chwach taq ulew. 4Jun ángel arewi kqaj li chusilab'saxik i ya, chila pa k'oltal wi. Are ksilab' i ya, i nab'e iwab' chi kok chupam lik kkuntajik, nti k-ono xab'i chi yob'il o che.#5.4 Konojel ti wuj chi o utzij i Dios chupam chi lik mas ujer kanoq, kriqtaj i jun versículo ri. 5Chkixol iwab'ib' chi je o chila, o jun achi chi o chik wajxaqlajuj juwinaq (38) junab' i yob'il che. 6I Jesús are xril i achi le chi kotz'ol b'i pulew, xaq xretamaj chi ujer o chila. Are uri xutz'onoj che:
—¿Kawaj katutzirik?
7Are uri iwab' xula' uwach che:
—Ajwal, lik nti jun kinminaw pa ya are ksilab'ik. Are kin-an pen wib' che i okik pa atinb'al, jun chik kumin la rib' nab'e chinwach yin —xcha.
8I Jesús xub'ij che:
—Chatwalijoq, chamolo b'i asok, i chatb'inoq.
9Lik che i or le xutzir i achi, xuyak b'i usok; are uri xujeq b'inik. Xwiri i ij le, are i ij sábado, 10rumali i aj Judío xkib'ij che achi chi xutzirik:
—Wo'or sábado, lik utz taj chi aweqam asok —xecha che.
11Are uri ire xub'ij chke:
—I xinutzirsawik xub'ij chwe: “Chayaka b'i asok, xaq chatb'inoq”.
12Ike xkitz'onoj che:
—¿Pachin taq xb'iw ile chawe chi chayaka b'i asok, jat i chatb'inoq? —Xecha.
13Xwiri i achi chi xutzirik reta'am taj pachin i xutzirsawik, man i Jesús xsach chkixol uk'iyal winaq chi je o chila. 14Chrijil chik ronojel ile i Jesús xuriq i achi le, prachoch i Dios, xub'ij che:
—Chata pe', wo'or chi at utzirnaq chik matmakun chik, man keje ile kpe ti chik jun k'ax pawi chi lik mas nim chwach ile —xcha.
15Te'uri i achi x-ek, xaq xub'ij chke aj Judío chi are i Jesús xutzirsawik. 16Rumali i aj Judío lik xkiterb'ej i Jesús; man ku'an utzirsanik le pa taq uxlanb'al ij. 17Xwiri i Jesús xub'ij chke:
—Inqajaw lik ij ij kchakunik, xaq keje yin uri lik ij ij kinchakunik.
18Rumal i tzij le chi xub'ij i Jesús, i aj Judío xkikowij mas kik'ux chukamsaxik, man xaq rumal kuya ti u'ij i ij sábado, xwi ta la ile, xaq kujunamsaj taq rib' ru' i Dios, man kub'ij chi uqajaw Ire are i Dios; xecha.
I Jesús o atb'al tzij pu'ab'
19I Jesús xub'ij chke: Qatzij kinb'ij chiwe chi i Rak'al i Dios, nti jun b'iroxik ku'ano puwach wi, xwi ku'ano pacha ku'an Uqajaw. Ronojel ni'pa wach ku'an Uqajaw, xaq are ku'an Uk'ojol. 20Man i Ta k'ax kuna uk'ojol xaq lik kuk'ut che ronojel wach i k-ono. Xwiri lik k'a o ni nimaq taq b'iroxik kuk'ut che, chi are kiwil yix, lik kixok il che. 21Man pacha ku'an i Ta chi keuwalijsaj i je kamnaq xaq kuya chik kik'aslemal, xaq keje ku'an Uk'ojol ile, kuya kik'aslemal pachin i kraj ire kuya chke. 22I Ta mixat jun ku'at tzij puwi man lik uya'om pu'ab' Uk'ojol chi are ire k-ataw tzij. 23Man keje ile konojel kkiya ni u'ij uk'ojol pacha u'ij i Ta. Pachin kukoj ti u'ij Uk'ojol xaq kukoj ti uri u'ij i Ta chi taqawnaq loq.
24Lik saq laj tzij kinb'ij chiwe: Pachin jun kukoj retalil intzij xaq kukub'a uk'ux che i Jun chi xinutaq loq, lik o chik uri uk'aslemal chi nti uk'isik. Xaq lik nti chik uri jun tojb'al mak puwi, man nti chik pu'ab' i kamik, ire o chik che i k'aslemal chi kuya i Dios. 25Lik saq laj tzij kinb'ij chiwe chi kk'un i ij xaq lik are chik ij iri, chi i kamnaq kkita ni uch'awb'al Uk'ojol i Dios, xaq konojel ni'pa i kkita lik kk'un ni saq chkiwach. 26Man pacha i Ta chi o k'aslemal pu'ab' xaq keje ile u'anom che Uk'ojol lik o k'aslemal pu'ab'. 27Xaq uya'om che chi lik ku'at tzij pkiwi i winaq, man ire lik are i pacha Winaq chi Xolalaxoq chwach Ulew. 28Lik mixok il che ile, man lik kuriq ni ij chi konojel i je kamnaq kkita ni uch'awb'al. 29Are uri ke'el li ni'pa i je muqtal chik pa jul, ni'pa i ki'anom i utz kewalijsax loq, man kya' chik kik'aslemal. Xwiri ni'pa xki'an i utz taj xaq kewalijsax loq yab'al re i tojpen pkiwi.
I Jesús xuk'ut chke i winaq chi o i atb'al tzij pu'ab'
30Yin nti kin-ano we to' pinwach wi; yin xwi kin-ano pacha i atb'al tzij chi kub'ij i Inqajaw chwe. Xaq in-atb'al tzij lik suk'ulik man kintzukuj ti u'anik pacha kwaj yin, xwi pacha kraj Inqajaw man are Ire xintaqaw loq. 31Yin wetene kinlap chiwe wach taq kintiki chu'anik, lik kuriq ti uchak uri chiwe, re ilb'al re we qatzij kinb'ij. 32Xwiri o jun chi kuya utz laj saqinel tzij chwij yin; xaq lik weta'am chi ronojel ni'pa i kub'ij ire le, lik saq laj tzij, lik kuya retamaxik xaq kusaqij chiwe chi yin lik saq laj tzij i kinb'ij. 33Yix xitaq utz'onoxik che ma Wan, chi Ajqajsanel Ya; ire lik xuya i utz laj tzijonik chiwe chrij i saq laj tzij. 34Xwiri yin are ti kkub'i ink'ux che wach kub'ij jun winaq chwij yin, xinb'ij ile chiwe man kwaj yin kiriq i tob'al iwe. 35I ma Wan, chi Ajqajsanel Ya, keje te'eq pacha jun kantil ktzijon a' che chi kjuluwik xaq ktzunik, xwiri yix xa keb' oxib' ij xiwaj k'ijilem che i saq le. 36Xwiri o chik jun chi kuya tzijonik tzij chwij chi lik mas nim u'ij chwach i xub'ij i ma Wan. Ronojel ni'pa i kin-ano are Inqajaw xintaqaw chu'anik. Lik are ilb'al re uri ile, chi are Inqajaw xintaqaw loq. 37Inqajaw chi xintaqaw loq, kuya utzijol in pachin yin, tupu yix itom ti uch'awb'al xaq iwilom ti uwach. 38Xaq i utzij kowirnaq ti pik'ux man kixkojon ti che i jun chi utaqom li Ire. 39Yix lik kitijoj iwib' che i tzij chi o chupam uwuj i Dios man kiwaj uriqik i k'aslemal chi nti uk'isik. Tupu i tz'ib'tal kan chupam uwuj i Dios le, chwij yin ktzijon wi, 40xwiri yix kiwaj ti kixpe wu' yin, riqb'al re ik'aslemal saqil.
41Yin kintijin ti chutzukuxik in-ij chkiwach i winaq. 42Xwi ta la ile, yin xaq lik weta'am chi lik nti k'axnab'al uk'ux i Dios pik'ux. 43Yin in k'unnaq pub'i Inqajaw, xwiri yix kiwaj taj kikoj intzij. Xwiri wetene o jun to' puwach wi kk'unik, ile lik kikoj ni che wach i kub'ij chiwe. 44¿B'uchak kich'ob' taq yix chi lik utz kikoj i'ij chiwach, xwiri kitzukuj ti ukojik i'ij chi kpe ru' i Dios? 45Mich'ob' taq yix chi yin kinkoj imak chwach Inqajaw. Are kkojow imak are mam Moisés chi ikub'am ik'ux che. 46Yix, wetene xikojo wach xub'ij mam Moisés xaq lik kinikoj ne ri yin. Man ni'pa i xutz'ib'aj i mam Moisés, lik chwij yin xlapan wi. 47Xwiri, we yix kikoj taj wach utz'ib'am i mam Moisés, ¿Wach ukojik uri ki'an che ni'pa taq i kinb'ij yin chiwe?
Terpilih Sekarang Ini:
Juan 5: ACHICUB
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© Biblia Achí de Cubulco, Derechos reservados de Sociedad Bíblica de Guatemala