Johaneb 10
10
ǃÛi-aob xa hâ ǂkhōs
1“Amase, amase ta ra mîba du, khoe-i hîa dao-ams gūǃharas dis ǃnâ-u ǂgâ tama-i tsî ǁîs tawa ra ǃnariǂgâ-i, ǁnā-i ge ǃnari-ao tsî a ǁkhâuǁnâ-ao! 2Xawe dao-amsa-u ra ǂgâ-i, ǁnā-i ge a gūn di ǃûi-ao. 3ǁÎbab ge dao-amǃûi-aoba dao-amsa ra ǁkhowa-amba tsîn ge gūna ǁîb domma ǁnâu tsî ǁîb ǃoa ra hā. ǁÎb ge ǁîb gūna ǀondi ai ǂgai tsî ǁîna ra ǂgaeǂguiǂui. 4Tsî hoaraga gūnab ga dīǂuitoa tsî ǀhaoǀhaos khaoǃgâb ge ǁîn ais ai ra ǃgû, tsîn ge ǁîna ra sao bi dommi âban ǂan amaga. 5ǁÎn ge ǃhaokhoe-e tātsēs tsîna sao tide tsî ǁî-e xu nî ǃkhoeni, ǁîn ǁî-i domma a ǀū amaga.”
6Jesub ge khoena nē ǂkhōsa* ge ǃhoaba, xawen ge tare-eb ra ǂâibasen ǃkhaisa ge ǁnâuǃā tama hâ i.
Jesub ge a ǃgâi ǃûi-ao
7Ob ge Jesuba ǁkhawa ǁîna ge mîǃāba: “Amase, amase ta ra mîba du. Tita ge gūn di dao-amta. 8Naun ti aiǃâ ge hān hoan ge ǃnari-ao tsî ǁkhâuǁnâ-ao. Xawen ge gūna ǁîna ǁnâuǀnam tama ge i. 9Ā, tita ge a dao-am. Khoe-i ga tita ǃnâ-u a ǂgâ, o-i ge nî sâuhe tsî-i ge ǂoa tsî nî ǂgâ tsî ǃû-ai-e nî hō. 10ǃNari-ao-i ge ǃnari tsî i nî ǂā tsî hîǀhuru, ti ī ǂâibasens ǀguisa ūhâ. Tita ge ge hā ǁîn nî ûiba ǃnāǂamsase ūhâse.
11“Tita ge ǃgâi ǃûi-aota. ǃGâi ǃûi-aob ge ǁîb ûiba ǁîb gūn ǃaroma ra ǁguiba. 12Xawe ǀkhupi-sîsenaob ge ǂhirasab ga mûǃgoaxa, o ra ǃkhoeni. ǁÎb ge gūna nî ǁnāxū ǁîb di taman hâ tsîb ǁîba ǁîn di ǃûi-ao tama amaga. Tsîs ge ǂhirasa gūna ǃkhō tsî ǁîna nî ǀgaruǀgaru. 13ǀKhupi-sîsenaob a xui-aob ge gūna ǁnāxū tsî ra ǃkhoeni ǁînab ǁae-ū tama hâ amaga. 14-15#Mat. 11:27; Luk. 10:22Tita ge ǃgâi ǃûi-aota. Tita ge ti gūna a ǂan tsî ta ge ǁîn xa ǂanhe, ti Îb tita ǂans ǁkhās khami ta ge ti Îba a ǂan. Tsî ta ge ti ûiba ti gūna ra ǁguiba. 16Tsî ta ge ǀnî gūn nē ǃharas di taman tsîna ūhâ. Tsî ta ge ǁîn tsîna nî hā-ū tsîn ge ti domma nî ǁnâu. ǁNāpas ge ǀgui gūǃharas ǀguisa, ǀgui ǃûi-aob ǀkha nî hâ.
17“ǁNā-amagab ge ti Îba tita a ǀnam ti ûiba ta ra ǁguiba amaga, ǁkhawa ta ǁîba nî ūse. 18Khoe-i xare-i ge ti ûiba tita xu ū tama hâ. Tita ge ti ûiba ǁî-aitsama ra ǁguiba. Tita ge ǁkhāsiba ūhâ ǁîba ǁguibasa tsî ta ge ǁkhāsiba ūhâ, ǁîba ǁkhawa ūbasensa. Nē mîmāsa ta ge ti Îba xu ge hō.”
19Tsî ǁîb ge nēna mî, on ge Jodeǁîna ǁkhawa nē mîdi ǂama ge ǁhaiǃāgu. 20On ge ǂguin ǁîn dina ge mî: “ǁÎb ge ǁgâua-e* ǁîb ǃnâ ūhâ! ǁÎb ge ǃkhau hâ. Tare-e du ǁîba ra ǃgâba?” 21On ge ǀnîna ge mî: “ǁGâuab* xa hâǃnâhe khoe-i di mî tama di kom nēdeo! ǁGâua-e kha ǁkhā-i a, ǂgī hâ-i di mûde ǁkhowa-amsa?”
Jesub ge Jodeǁîn xa ra ǂharahe
22Saoǁaeb ge ge i, tsîb ge Jesuba Tempeli Khaihes di ǁâudīb ǁaeb ǃnâ Jerusalems ǃnâ ge hâ i. 23ǁÎb ge Tempeli tawa, Salomob di ai-ommi ǃnâ gere ǃgûma. 24On ge Jodeǁîna ǃnamiǂgā tsî ge dî bi: “Mâtikō ǁae-ets sida ǀgommaǂâisib ǃnâ nî ūhâ? Xristuts* kao, o ǃoaǃū mîba da re.”
25Ob ge Jesuba ge ǃeream: “ǀNai ta ge mîba du, xawe du ge ǂgom tama ge i. Ti Îb di ǀons ǃnâ ta ra dī sîsengu kom tita xa ra ǃkhō-amo. 26Xawe du ge ǂgom te tama hâ, ti gūn di tama du hâ amaga. 27Ti gūn ge ti domma ra ǁnâu; tsî tita ge ǁîna a ǂan tsîn ge tita ra sao. 28Tita ge ǁîna ǀamo ûiba ra mā tsîn ge tātsēs tsîna kāǁō tide. Khoe-i xare-i ge ǁîna ti ǃomma xu tsubuǂui tide, 29ti Îb ǁîna ge tita māb hoan ǂamai a kai xui-ao. Tsî khoe-i xare-i ge ǁîna ti Îb di ǃomma xu a tsubuǂui ǁoa. 30Tita tsî ti Îb tsîkhom ge a ǀgui.”
31ǁKhawan ge Jodeǁîna ǀuide ge ūkhâi ǀuiǁhom bi nîse. 32Ob ge Jesuba ge mî: “ǂGui ǃgâi dīgu ti Îba xu hâga ta ge ge ǁgau du. Mâ dīb ǁnāgu dib ǃaroma du kha ra ǀuiǁhom te ǂgao?”
33 #
Lev. 24:16
On ge Jodeǁîna ge ǃeream bi: “ǃGâi dī-i ǃaroma da ge satsa ǀuiǁhom tama, xawe eloǃkhāǃkhās tsî khoets a hîats ra aitsama elodīsen ǃkhais ǃaroma.”
34 #
Psa. 82:6
Ob ge Jesuba ge ǃeream: “Sadu di ǂhunuma ǂhanub ǃnâ xoamâisa tama i hâ Elob ge mîsa, ‘Sago ge elogo!’ ti. 35Tsî go a ǂan ǃkhais ge Xoas ǀkharaǀkharahe ǁoasa. Xawe gu ga ǁnāgu hîa Elob di mîsa ge ǃkhōǃoaga ‘elogu’ ti ǂgaiheo, 36mâti du eloǃkhāǃkhās ti ra mî? ǁNāb hîa ǁGûb xa ǃanuǃanuhe tsî ǃhūbaib ǁga sîhe hâb ra ‘Tita ge Elob di Ôa?’ ti mîo. 37Ti Îb di sîsenga ta ga dī tama io, tā ǂgom te. 38Xawe ǁîb sîsenga ta ga dī, xawes tsîna ǁnâi sîsenga ǂgom, tita du ga ǂgom tama i xawe. O ǀgui du nî ǂgom ǃkhais ge ti Îba tita ǃnâ hâ tsî ta tita ǁîb ǃnâ hâsa.”
39On ge ǁkhawa ǁîba ǃkhōsa ge dītsâ, xaweb ge ǁîna xu ge bē. 40#Jhn. 1:28ǁÎb ge Jordanǃāb nauǃanib ǁga ǁkhawa oa tsî Johaneb ge ǂguro ǁāǁnâsa dī ǃkhaib tawa sī tsî ǁnāpa ge hâ. 41Tsî ǂguin ge ǁîb tawa sī tsî ge mî: “Johaneb ge sao-i xare-e ge dī tama hâ i, xawe ǁîb ge nē khoeb xa mîn hoan ge a ama.” 42Tsî ǂguin ge ǁnāpa ǁîb ǃnâ ge ǂgom.
Terpilih Sekarang Ini:
Johaneb 10: KKG20
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Khoekhoegowab Elobmîs © Bible Society in Namibia, 2020.