मत्ती 3
3
बाप्तिस्मा आपनेवावू योहान
(लुका 3:1-9,15-17; योहान 1:19-28)
1तीनु दाहळामा योहान बाप्तिस्मा आपनेवावू आवीन यहुदियान बोयळामा यु प्रचार कोरणे बाज गोयू. 2“मोन फिरावू, काहाकि सोरगोन राज साते आव लागलो छे.” 3यो चो छे कि जेरी वात यशयाह भविष्य कोरतान लारे कोराय गोयली, बोयळामा एक आयळने वावान आवाज सोमवायने बाज रोयू, कि “प्रभून वाट तीयार कोरु, तेरी वाट सुदी कोरु.” 4यु योहान उटळान झोटान छिंदरा पेहरतू होतु, एने आपना कोळ्यामा चामळान पोटटू बांधलु राखतू होतु तेरो खाणो टीडया एने भावर होतो. 5तेत्यार यरुशलेम एने आखा यहुदिन एने यरदन नोंदीन आस-पासोन आखा जागान माणसे तीनानचा निकवीन आव्या. 6चे आपना-आपना पापे कबूल कोरीन यरदन नदीमा तिनान हाते बाप्तिस्मा लेदा. 7तेत्यार चू लोकेत फरुशी एने सदुकी काजे बाप्तिस्मा लेणे कोरीन तेरेनचा आवतेला देख्यू, ती तीनुक कोयू, “हे जेहेर वावा घोळसान पिला, तुमुक कून जोताळलो कि आवने वावा परमेश्वरोन दोंडसी ढासने?” 8इनान कोरता मोन फिरावनेन लायक फोव लावू. 9एने आपना-आपना मोनोमा यु मा विचार कोरु कि आमरू बास अब्राहाम छे; काहाकि मे तुमु काजे कोयो कि परमेश्वर इना दोगळासी पुऱ्या पोयदा कोर सोकतलू. 10हिमी कुराळो झाडोन मुवोपोर मेक मेक्यो, इनान कोरता जो-जो झाड वारलो फोव नि लावे, चो काटायीन एने आगठाम नाखाय जासे. 11मे पाणी कोरीन तुमुक मोन फिरावने बाप्तिस्मा आपतलु, बाकीन जू मारे बादमा आवने वावु छे चू मार गोथा ताकत वावू छे; तेरा चाट्या चूटनेन बी लायक नि होय, चू तुमुक पवित्र आत्मा एने आगठासी बाप्तिस्मा आपसे. 12तेरो सुपळो तेरा हातोमा छे, एने चू आपना खोवा काजे वारला रितीसी साफ कोरसे, एने आपना गोहू काजे ते कुठीमा एखठो कोरसे, बाकीन भूसाक तिना आगठामा धोपाळसे जो उलाये नि.
योहानोन लारे येसुन बाप्तिस्मा
(मरकुस 1:9-11; लुका 3:21-22; योहान 1:31-34)
13तिनी टेमे येसु गलीलमा गोथू यरदन नोंदीन धोळे योहानोन हाते बाप्तिस्मा लेणे आव्यु. 14बाकीन योहान यो कोयीन तीनाक रुकने बाज गोयू, “मेसेक ते तारे हातोसी बाप्तिस्मा लेनेन गोरोज छे, एने तू मारेंचा आव रोयू?” 15बाकीन येसु तीना काजे जोवाब आप्यू, “हिमी ते ओसोत होयने दे, काहाकि आपनु इना रितीसी आखी धर्म काजे पुरो कोरनो वारू छे” तेत्यार चू तेरी वात मान लेदू. 16एने येसु बाप्तिस्मा लीन तेतारुत पाणीमा गोथू उपोर आव्यु, एने, तेरेन कोरीन सोरग खुल गोयो, एने चू परमेश्वरोन आत्मा काजे पेरवा सारखो उतेरलो एने आपने उपोर आवतेलो देख्यू. 17एने जी सोरग वाणी होयी, यु मारू मोंगावू पुऱ्यु छे, जीना पोर मी खुश छे.
Terpilih Sekarang Ini:
मत्ती 3: BFBNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.