Jenesis 4
4
Kaín oho nia alin Abel
1Liu tiha nee, Adão halo relasaun seksual ho nia feen Eva. Depois feto nee isin rua, i tuur ahi oan mane ida. Nia dehan, “Hau hetan oan mane ida, tanba NAI Maromak tulun ona hau.” I nia tau naran ba labarik nee, Kaín (nee dehan katak ‘hetan’). 2Depois Eva tuur ahi tan labarik mane ida, i nia tau naran Abel.
Bainhira sira nain rua boot ona, Abel sai bibi atan, i Kaín sai toos nain. 3Iha loron ida, Kaín lori ai-haan balu hosi nia toos hanesan oferta foo ba NAI Maromak. 4Abel mos lori nia bibi oan sira nebee moris primeiru, i bokur. Bibi oan sira nee nia oho tiha, i nia lori naan nebee diak liu hodi foo ba Maromak. Haree nunee, NAI Maromak nia laran haksolok ho Abel i ho nia oferta nee. 5Maibee Maromak la simu Kaín ho nia oferta. Kaín hirus atu-mate, too nia oin siak loos.
6NAI Maromak husu ba Kaín dehan, “Kaín! Nusaa mak o hirus nunee? Tansaa mak o hanoin atu oho o nia alin? 7Se o halo buat diak, Hau sei simu o ho diak. Maibee kuidadu! Se o halo buat aat, sala hein hodi tama iha ita nia fuan-laran. Sala hakarak domina o, maibee o tenki manaan sala.”
8Iha loron ida, Kaín koalia ba Abel dehan, “Alin! Mai ita nain rua baa toos lai.”#4:8:Kaín nia liafuan nee tama iha dokumentu antigu balu, maibee la tama iha dokumentu Ebreu nebee antigu liu. Sira foin too iha nebaa, derepenti deit Kaín baku mate tiha nia alin.
9I NAI Maromak husu ba Kaín, “Kaín! O nia alin iha nebee?”
Kaín hataan, “Hau la hatene! Hau mak hein nia ka?”
10Nai Maromak dehan, “Nusaa mak o halo buat aat nee? O keta hanoin o bele subar o nia alin nia raan iha rai, tan nia raan nee hakilar mai Hau. 11Agora malisan kona ona o. Tanba bainhira o oho o nia alin, rai susu tiha nia raan. Nunee agora o tenki sai hosi nee. 12Se o halo toos, rai la foo rezultadu ida ba o. Komesa agora, o sei la hela hakmatek, i o sei lao baa-mai buka moris iha mundu nee.”
13Maibee Kaín protesta ba NAI Maromak dehan, “Nusaa mak Maromak foo kastigu todan demais nee mai hau, too hau mos la aguenta? 14Tanba Maromak duni sai ona hau hosi rai nee, mak hau sei dook hosi Maromak. Hau sei lao tuun lao sae, i see deit mak hasoru hau, sei oho hau.”
15Maibee NAI Maromak hataan fali dehan, “Laos nunee! See mak oho o, Hau sei kastigu nia todan liu dala hitu.” Depois NAI Maromak tau sinal ida ba Kaín, para ema bele hatene katak sira la bele oho nia. 16Depois nia sai hosi NAI Maromak nia oin, i lao too iha fatin ida iha toos Eden nia sorin loro-sae. Fatin nee naran Node, nee dehan katak ‘lao rai’. I nia hela iha nebaa.
Kaín nia jerasaun
17Liu tiha nee, Kaín kaben. Nia halo relasaun seksual ho nia feen depois nia isin rua. Nia tuur ahi oan mane ida nebee sira tau naran Enoke. I Kaín harii aldeia ida. Nia tau aldeia nee naran Enoke, tuir nia oan nia naran. 18Enoke nia oan, Irade. Irade nia oan, Meujael. Meujael nia oan, Metusael. I Metusael nia oan, Lameke.
19Lameke kaben ho feto nain rua. Ida naran Ada, ho ida tan naran Zila. 20Ada nia oan ida naran Jabál. Nia jerasaun sira hakiak animal. Sira sempre muda fatin, i hela iha tenda. 21Nia alin naran Jubál. Jubál nia jerasaun sira sai tokador muzika, sira toka arpa i huu flauta.
22Lameke nia kaben Zila tuur ahi oan mane ida naran Tubal-Kaín. Nia jerasaun sai badaen besi, sira halo sasaan oi-oin hosi besi no riti. Tubal-Kaín nia alin feto naran Naama.
23Loron ida, Lameke gaba nia aan iha nia kaben rua nee nia oin, dehan, “Imi rona mai! Hau oho mane ida, tanba nia hakanek hau. Loos duni, hau oho mane klosan nee tanba nia baku hau. 24Ema nebee oho Kaín, sei hetan kastigu dala hitu. Maibee see mak vinga hau, sira hetan kastigu dala 77.”
Adão nia oan Sete
25Adão nia kaben Eva iha oan mane ida tan. Sira tau naran ba labarik nee, Sete, tanba Eva dehan, “Nai Maromak foo oan nee mai hau iha Abel nia fatin, nebee Kaín oho tiha nee.”#4:25:Iha lian Ebreu liafuan Sete dehan katak ‘foo’. 26Kleur-kleur Sete iha oan mane ida, naran Enos.
Iha tempu nee, ema komesa adora ona NAI Maromak.
Terpilih Sekarang Ini:
Jenesis 4: BTDT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2024 Wycliffe Timor-Leste.