लुका कितापक परिचय
कितापक परिचय
यि किताप एक जना लुका कहलाहार गैर यहुदि मानुकले निख्ल स्यो। उ डाक्टर आ इतिहासकार पनि छले। ओइले यि किताप मत्रे नाइ “पेरेरितसिक काम” कहलाहार किताप पनि निख्ल स्यो (लुका १:१-४, पेरेरित १:१-२)। लुकाले यि कितापम येसुक बारेम एनामे कहल छो। येसु इस्राएलिसिलग एतो कहिक बाचा कर्ल मुक्ति देल्हार आ सभे मानुकसिका बचाइलाहार खिरिस्ट स्यो। लुकाले निख्ल यि कितापक सभेस खास बात यि स्यो कि पर्मेसोरले येसुका दुखि गरिबसिका खुसिक खबर सुनाब, बन्धनम पर्ल मानुकसिका छुट्करा दिअ आ अन्धासिका देख्लाहार बनाब लागि सन्सारम पठाइल स्यो। यि कितापम येसुले कहल बातसब साँच्चेक ठिक स्यो कहिक लुकाले एक्दम अस्लिमे निख्ल छो। खास करिक सुरुक अध्यायसिम येसु यि सन्सारम आइल बातसब आ पछल्का अध्यायसिम चाहिं येसु सोर्ग गेल बातसब निख्ल छो।
कुन्हुँ-कुन्हुँ बातसब त लुकाले निख्ल यि कितापम मत्रे छो। उदाहरनक लागि: सोर्गदुतस्या गितकाइल, भेरा चर्भास्या बच्चा येसुक दर्सन कर्ल, येसु बार बरिसक भेल जुमा मन्दिरम रहल अनि अस्लि सामरि आ हराइल बेटाक खिसा। अरु तिन जना मत्ति, मर्कुस आ युहन्नाले पनि येसुक जिबनक बारेम निख्ल छो। मत्तिले यहुदिसिक लागि खुसिक खबर निखल्के तर लुकाले चाहिं दस्रो जातक मानुकसिक लागि खुसिक खबर निखल्के। येसुक सेबाकाइले पुर्ना नियमक कर्ल अगमबानिसब पनि पुरा भेल बातसब देखाइ छो (लुका ४:१८, १०:२३, २४:२६, ४४-४७)।
खात जानकारि
परिचय१:१-४
बप्तिस्मा देल्हार युहन्ना आ येसुक जनम १:५—२:५२
बप्तिस्मा देल्हार युहन्नाले सेबाकाइ कर्ल ३:१-२
येसुक बप्तिस्मा आ जाँच् ३:२१—४:१३
येसुले गालिल पर्देसम सेबाकाइ कर्ल ४:१४—९:५०
येसु गालिलस यरुसलेम गेल ९:५१—१९:२७
यरुसलेमम येसुक अन्तिम हप्ता १९:२८—२३:५६
येसु फेरि जिउँत भइक सोर्ग गेल २४:१-५३
Terpilih Sekarang Ini:
लुका कितापक परिचय: DANU
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 2024 (Active), Mother Tongue Translators Society and Wycliffe Bible Translators, Inc. All rights reserved.