Mateu 13
13
Vona Tana‑minikuna Tau Baguna Wayahina
(Marika 4:1‐9; Luke 8:4‐8)
1Ka auyewana wayahina Iesu manua‑nana ni‑tawanei, iopu Navu Galili tania, e manuena. Ya nuanua yoko in'‑omo wayahina, e viwavenena. 2Ka yoko ananina inau‑hohona wayahina, akaka tauna aitam wae wayahina igenu, manuena, ka yoko‑nana tania imimini.#Luk 5:1-3. 3E nua‑uya habuhabuna viwavenei vona tana‑minikuna nihenina, ivona,
“Tau baguna aitam inei ya baguna, e witiV utuna si‑yavuyavunei. 4Ka tupwai utuia etawana ipeu. Wayahina, manua idueyei, e iyaveha iopu iam‑neiei. 5Ka tupwai utuia tanopi hanuhanuna wayahina ipeu. Ka munia, inau‑tabo‑kwayavoni, iuna tanopi‑nana avavana. 6Ka apaina babau apu‑gabwani, e nau‑moewa, iuna wanohi eha tanopi kwekwekwena ita‑vaniahe. 7Ka tupwai utuia mata‑dududuna nepena ipeu, e nui inau‑tabo tamotamota. Ka mata‑dududuna bagibagi, e isi‑vi‑anai, e witiV aniga. 8Ka tupwai utuia tanopi ahiahina wayahina ipeu, e inau‑tabo, inatanata. Ka iuaua, ka tupwai utuia uai ai yau 100, ka tupwai 60, ka kadu tupwai 30. 9Aituhu aviyaivia yai nuanua vonana inononi, akanai yau nuanua ina‑nua‑haui.”
Iesu Ya Viwavenena Vin'‑omo Vona Tana‑minikuna Wayahia
(Marika 4:10‐12; Luke 8:9‐10)
10Vonana iakwa, e a tau vi‑muni‑waiwai ivin'‑omo, e Iesu ivi‑tanaiei, ivona, “Aviani wayahina vona tana‑minikuna ana heta wayahina yokoia wayahia eviwavenena?”
11Ka Iesu ivona,
“Yaubada avaha awaehemi nua‑uya hivahivana ya pai veimea wayahina un'‑anamanei, kate yokoia eha. 12Nua‑uya Yaubada wayahina deina. Aituhu aviyaivia yai anamana wayahia mamaei, ka aituhu idewa‑nubunubui, apaina yai nua‑uya ani‑vainena ivaniahei. Ka aituhu aviyaivia eha ita‑dewa‑nubunubu, avi anamana ataina wayahia mamaei, apaina ivo‑haini.#Mat 25:29; Mar 4:25; Luk 8:18; 19:26.
13Taui idunedune, kate eha it'‑anamane,
ka ivanevaneneha, kate eha ita‑nononi
kadu eha ita‑nua‑hau.
Wayahina, vona tana‑minikuna wayahia aviwavenei, iuna eha yai nuanua ananina Yaubada in'‑anamane. 14Wayahina, nonova tau apa‑taputapu Isaia mai‑haeyei deina, ivona,
‘Tuta tuta uvanevaneneha
ka nuami eha t'‑am‑hauhau.
Ka kadu udunedune, ka eha ami pata
un'‑anamane ahiahina.#Isa 6:9-10; Ioni 12:40; Dew 28:26-27.
15Iuna tomotau taina ununui ivi‑toyoa,
ka tanihai itupa‑potei,
kadue matai ivo‑potei.
Aituhu yai dewa eha deina,
kaiwadi ai pata mataia idunedune,
ka tanihaia inononi, kadue inua‑haui.
Ka aituhu inua‑haui,
imavina wayahiua, e adewa‑vidovidohei.’
Tuta ataina tomotau yai dewa tomotaui nonova yai dewa aitamoata deina. 16Kate taumi au tau vi‑muni‑waiwai tunimi. Yaubada avaha nau‑iaiavemi. Wayahina, ami pata matamia udunedune, e avaha uanamane, ka kadu tanihamia unononi, e avaha unua‑haui.#Luk 10:23-24. 17Memeanina nuami vi‑tupatupa, kate avonemi, ataina dewaia ududueyei ka unonononi, ka avonemi, tuta nonova a itoava tuta ataina wayahina tau apa‑taputapu habuhabui kadu tau tunutunuhi habuhabui nuanuai ananina dewaia idudueye kadu nuanuai vonaia inonononi, kate eha ita‑vaniahe.
Iesu Ya Vona Tana‑minikuna Vo‑vi‑mahetei
(Marika 4:13‐20; Luke 8:11‐15)
18Wayahina, itomi unononi, e utu a si‑yavuyavunena an' anamana avo‑vi‑mahetemi, un'‑anamanei.
19Aituhu aviyaivia Yaubada ya pai veimea ipuipupuna inonona‑ohoi, ka eha ita‑nua‑hau, apaina Tau Vi‑goyo‑nana na‑omo, e vonaia nuai wayahia vainaui. Ka utuia ipeu etawana ai anamana deina. 20Ka kadu utuia tupwai tanopi hanuhanuna wayahina ipeu. Ka tomotau tupwai ipupu ahiahina inononi, kadu yai dewa‑haiawa nui iawaehei. 21Kate wanohi eha ta‑toyotoyoa, ka imamaei tuta eha ani‑hoina wayahina. Iuna aituhu avi tuta Vaneana Ahiahina a vitumahana wayahina bebewa o kadi vita ivaniahei, taui ipeu‑kwayavoni, ka yai vitumahana ivo‑haini. 22Ka utuia tupwai mata‑dududuna nepena ipeu. Ka tomotau tupwai Vaneana Ahiahina inononi, kate aviani nau‑wawani tanopi taina wayahina, taui dewaia ivi‑putu inuanua ananina wayahi. Kadu inuanua ananina kaikaiwabo yai gugua wayahina, ka guguaia inonoi. E yai nuanua‑naia Vaneana Ahiahina si‑guani aniga deina. Wayahina, taui eha ai pata ina‑ua.#Luk 12:16-21; 1Ti 6:9-10, 17. 23Ka utuia tupwai tanopi ahiahina wayahina ipeu. Ka tomotau tupwai Vaneana Ahiahina inononi kadu an' anamana wayahia mamaei, e aihana ahiahi ivin'‑omo wayahia. Tupwai uai 100, ka tupwai uai 60, ka tupwai uai 30.”
WitiV Ka Mata‑duduna
24Kadu aitam vona tana‑minikuna Iesu venei, ivona,
“Yaubada ya pai veimea deina. Aitam tau baguna witiV uana ahiahina epei, e ya baguna nihenina si‑yavuyavunei. 25Ka aitam ioyoma tauna ino‑ainei, e a havia aitam omo, e baguna inui, e mata‑duduna nau‑yavuyavunei witi‑hoinaV nihenia, e munia ine. 26Wayahina, ainua itabo ivane tuta aitamoata wayahina, e ainua ivi‑putu iua vivane witiV kadu mata‑duduna.
27Ka avaha tau vi‑bagunana ya tau dune‑vi‑avina tupwai idueyei, imavina wayahina, imataedei, ivona, ‘Bada, yam baguna witiV ahiahina avaha igoyo. Kaiwadi, medeina mata‑duduna habuhabuna nui itabotabo?’
28Ka tau vi‑bagunana ivona, ‘Ia! Au havia aitam omo dewei.’
Wayahina, ya tau paisewa‑naia ivi‑tanaiei, ivona, ‘Medeina yam nuanua? Ana‑nei, e mata‑dudu‑naia asi‑apui?’
29Ka bada‑nana ivona, ‘Eha. Aituhu mata‑dudu‑naia usi‑apui, tuta aitamoata wayahina witiV wanohi uvi‑goyoi deina. 30Akanai, nui itabotabo a itoava tuta aihana wayahina. Apaina yau tau aihana avonei deina, “Naona mata‑dudu‑naia unau‑hohoni, unau‑itavi. Apaina utunu‑yavunei. Ka witiV unau‑hohoni, e yau anana nihenina utotohi.” ’”
Mata‑sinisinina Utuna Ka Palaua A Pai Vo‑vi‑nata
(Marika 4:30‐32; Luke 13:18‐21)
31Ka kadu aitam vona tana‑minikuna venei, ivona, “Yaubada ya pai veimea mata‑sinisinina utuna deina. Ka onoto utuna aitamoata epei, e ya baguna nihenina baguni. 32Ka mata‑sinisinina utuna kikitu‑vainena, ka yana tabo munina vi‑ai. Wayahina, manua iomomo, e nahana wayahia ai hiu iyoneyone‑neiei.”
33Ka kadu aitam vona tana‑minikuna venei, ivona, “Yaubada ya pai veimea palaua a pai vo‑vi‑nata deina. Ka vavine pai vo‑vi‑nata aya‑kituna iepei, e palaua ananina nui ivinei. Pai vo‑vi‑nata aya‑kituna, kate bagibagina, e ana pata palaua ananina habuhabuna vo‑vi‑natei.”
Iesu Ya Vona Tana‑minikuna Wayahia
(Marika 4:33‐34)
34Ka Iesu nua‑uya habuhabuna yokoia viwavenei, kate tuta habuhabuna wayahina vona tana‑minikuna ai heta wayahia viwavenena tomotau wayahia. 35Dewana wayahina tau apa‑taputapu ya vona‑dabadaba mamaei. Tanoi nonova mai‑haeyei, ivona,
“Vona tana‑minikuna wayahina ahaeyei.
Ka aviani Yaubada hivehivei
nonova tanopi a vevewana ana tuta
a itoava tuta ataina wayahina avo‑vi‑mahetei.”#Sam 78:2.
Vona Tana‑minikuna Mata‑duduna Wayahina An' Anamana
36Ipupu taina iakwa, e Iesu yokoia ni‑tawanei, mavina manua‑nana wayahina, e inui. Ka munia a tau vi‑muni‑waiwai iomo wayahina, e iviamei, ivona, “Itoai yama nuanua vona tana‑minikuna mata‑duduna ka witiV ainua wayahina an' anamana evo‑vi‑maheteai anua‑haui.”
37Wayahina Iesu ivona,
“WitiV utuna a tau si‑yavuyavunena tanoi vivane Tauna Vi‑tomotau, 38ka baguna tanoi vivane tanopi habuhabuna, ka witiV utuna ahiahina tanoi taui Yaubada ya pai veimea a tau vi‑muni‑waiwai, ka mata‑duduna tanoi taui Tau Vi‑goyo a tau vi‑muni‑waiwai, 39ka mata‑duduna a tau si‑yavuyavunena tanoi vivane Satana. Ka aihana ana tuta tanoi vivane tuta a pai nau‑yehata, ka tau aihana tanoi vivane Yaubada yan' anelose.
40Ka tau aihana‑naia iomo, e mata‑dudu‑naia inau‑hohoni, inau‑itavi, itunu‑yavunei. Ka apaina, tuta a pai nau‑yehata wayahina, deina.#Ioni 15:6. 41Apaina auyewana wayahina yauke, Tauna Vi‑tomotau, yau anelose avi‑tunei iomo, e dewa goyona aitamoata aitamoata kadue tau goyogoyona aitamoata aitamoata inau‑hohoni, inau‑itavi, ka yau pai veimea wayahina ivitua‑yavunei.#Mat 24:31; 25:31; Mar 13:27. 42Iakwa, e ai ananata nihenina ihaponei, ka tanoi papani‑nana wayahina tomotau ivi‑mohai kadue ivi‑mahi‑nununa, iuna viha ani‑vainena wayahia.#Mat 8:12.
43Ka auyewana wayahina tau tunutunuhi Yaubada matana kan'‑anamanei ahiahina, iuna amai tauna didigana venei ya pai veimea nihenina. Wayahina, itunu‑mahetei, babau deina. Aituhu aviyaivia yai nuanua vonana inononi, akanai yau nuanua ina‑nua‑haui.#Dan 12:3.
Vona Tana‑minikuna Aitonu Yaubada Ya Pai Veimea Wayahina
44Yaubada ya pai veimea vivane kaikaiwabo ya gugua vi‑maiena ani‑vainena deina. Nonova kaikaiwabona epei, e omo aitam tano wayahina, e guguana a pai vi‑ai ikayo, hivei. Ka munia, aitam onoto omo, vaniahei, e tauna ya dewa‑haiawa ananina. Wayahina, hive‑havinei, e mavina ya manua wayahina. Ka ya dewa‑haiawa nui ya gugua habuhabui vituei, imwaneyei. Ka ai nau‑pata epei, ine, e tano‑nana vi‑maiei, yana tano. E tauna kaikaiwabo ya gugua a nau‑pata ani‑vainena poy'‑avini deina.
45Ka kadu Yaubada ya pai veimea tau aimwane aitam, e mwani ahiahina wayahina naunau‑nene deina. 46Ka aitam auyewa, tauna mwani ahihi‑vainena vaniahei. Wayahina, ine, e ya gugua habuhabuna imwaneyei, e ai nau‑pata wayahina mwani‑nana ahihi‑vainena vi‑maiei, yana mwani.
47Ka kadu Yaubada ya pai veimea aitam agida deina, e tomotau inenehi hawana. Ka mani iana mani iana ivi‑onai, 48e avaha agida‑nana nau‑vi‑anata, e itaini ivane tania. Ka tomotau imanuena, e iana habuhabui itana‑vewani. Ka iana ahiahi nau‑kai nihenia ivi‑aia, ka iana goyogoyoi iyavunei. 49Ka tuta a pai nau‑yehata ana dewa deina. Auyewana wayahina anelose in'‑omo, e tau goyogoyona itana‑vewani tau ahiahina wayahia. 50Ka tau goyogoyona ivituei, ione‑neiei ana ai ananata nihenina, e tanoi ivi‑mohai ka ihidahida ananina.”#Mat 13:42; Luk 13:28.
Gugua Kaikaiwabo Vovoui Ka Tutuai
51Wayahina, Iesu vi‑tanaiei, ivona, “Itomi medeina? Vona tana‑minikuna tanoi habuhabui avaha uanamanei o eha?”
Ka a tau vi‑muni‑waiwai ivona, “Ika, avaha.”
52Wayahina, vonei, ivona, “Vona ahiahina, tupwai tau viwavenena Yaubada ya veimea tutuaina ianamanei ahiahina. Ka aituhu aviyaivia wayahia kadu avaha Yaubada ya pai ma' vaneana ianamanei ahiahina, taui aitam kaikaiwabo deina. E taui ai pata yai manua inui, e gugua tutuai ai nau‑pata ananina kadu gugua vovoui ai nau‑pata ananina isi‑vin'‑omanei.”
Me Nasareta Iesu Ivihahaiei
(Marika 6:1‐6; Luke 4:16‐30)
53Ka Iesu avaha ya vona tana‑minikuna tanoi nau‑yehai, e papani tanoi ni‑tawanei. 54E mavi‑havine ya megeia, ka omo yai manua tapanono wayahina, inui, e vi‑putu tomotau viwavenei. Ka tomotaui nuai vi‑tupatupa, e ivona, “Koiaka onoto taina ya nua‑uya venei, ka koiaka awaehei tauna dewa‑bagibagina dedewei?”#Ioni 7:15. 55Kadu ivona, “Kaiwadi, onoto taina vivane tau yona manua ana wava Iosepa natuna, a? Ka ayona vivane Mari, ka vavaneina Iamesa ka Iosepa ka Simoni ka Iudasa kanamanei,#Ioni 6:42. 56ka kadu novunovuna nui kamamaei. Tauna itoka aitamoata deina. Wayahina, onoto taina ya nua‑uya aveta baina wayahina vin'‑omo? Tauna koiaka?” 57Wayahina, inua‑goyo ka ivihahaiei.
Ka Iesu vonei, ivona, “Tau apa‑taputapu apa‑vidovidoha ivaniahei tomotau habuhabuna wayahia. Kate tau vi‑meagai yai megeia, kadu yai yoko yai manua imana‑giboei.”#Ioni 4:44.
58Wayahina, Iesu tauna ya megeia eha dewa‑bagibagina habuhabuna ta‑dewe, iuna taui eha ita‑vitumahane.
လက္ရွိေရြးခ်ယ္ထားမွု
Mateu 13: MVN
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2008, Wycliffe Bible Translators, Inc. All rights reserved.