San Mateo 3
3
Juan benne rugadi indaha ridhalie neda ge Jesús‑ni
(Mr. 1:1-8; Lc. 3:1-9, 15-17; Jn. 1:19-28)
1Bisia sá tti ulea lo Juan benne rugadi indaha rekie rigixxi'e ka tisa ge Tata Do Yebáha daka lo yu bisi ge Judea, 2ree ka benne:
―Gwalodúna le nna gwalodaxxu neda ge Tata Do Yebáha kumu chiba dabigana innabie.
3Ge Juan‑niba nuha unne profeta Isaías‑ni, tti ree:
Lo yu bisiha ata lanú benne se'e, niha riyien tsi'i ttu benne rinnebie idisa, ree:
“Gwalegixxa tse neda ge benne anke Xxanari'iha.
Gwalolixxa neda kini dhabie.”
4Itsa xo camelluba uka xo Juan‑ni nna udhí lhe'eni ttu yieti, nna nu xixxi ge betsirúba lhe kutsittaba lhe utona. 5Ka benne daa lhe'esi Jerusalén‑ni lhe adíru ka benne daa lhe'e ka yiesi to se'e itúba Judea‑ni lhe, anágaba ka benne se'eke gaxxaba ro'o yoo Jordán‑ni, iyábake risinke ata reki Juan‑ni. 6Nianna rigixxi'ake ge ka tulha ruinkeha nna rugadi Juan‑ni ke inda lhe'e yoo Jordán‑ni.
7Ttaka tti bilenna ixeru ka fariseo lhe ka saduceo lhe risinkana ata dunaha kini ugadina kana inda, nianna tti rana kana:
―¡Aalexa nu ruin satsa! ¡Lebi'i ankale ttiba ka belha‑na! ¿Nú chi rana le deki gwalábale lo elha disa tsitsi nu chi dabiga ute Tata Do Yebáha gele? 8Gwaluni nu dika ixú ganna xa. Aníha kini ula'a deki gwalí chi bodúna le ge nu ruinle nna bodaxxule neda ge Tata Do Yebáha. 9Abittu tse'ele ulaba lhi'u lele, akinle: “Ri'itu gwalábatu kumu de ankatu benne datiatu Abraham‑ni.” Netiru ria, Tata Do Yebáha ganna aka lebie, gwakaba gebie eyonie ka íyya du'uya nii kini eyakakana benne datia Abraham‑ni, a laa kila iyasanie le. 10Anágaba nna chigaba du tse iyyatteha kini ichúna itupa lhu ka yaga. Laxkala iyába ka yaga ka nu abittu utekana nu xixxi tse, ka nuha chúbakana nna iru'unakana tsiakana lo giha. Aníha‑ba nuha satele ganna abíba uinle nu dika ixú. 11Neti gwalí galá leni indaruba nuní rugadia le ki ula'a deki chi bodúna le nna bodaxxule neda ge Tata Do Yebáha, ttaka benne daa kwe'aha tsitsirula ra le benneha tti neti. Laxkala labí elha ralhaa ichea ka gwaracha geeha. Benneha ugadie le Espíritu geeha lhe ugadie le gi lhe. 12Chi den tse barkilu ge benneha kini uin tsebie xuxtilaha nna ganna chi bolhube siná nna ottupe xuxtilaha nna oga'abie xuaha ata rigua tsebie benneha. Nianna tti udelhe tee ge xuaha lo gi nu satíaba rite loniha, delába nu abittu reyola loniha. Lebi'i nuha udhake aníha.
Jesús‑ni udie inda
(Mr. 1:9-11; Lc. 3:21-22)
13Ttu sá udá Jesús‑ni lo yu ge Galilea nna diabie bisine ata du Juan‑ni ro'o yoo Jordán‑ni kini ugadine inda. 14Ttaka Juan‑ni nna ridú disabana ugadine inda, nianna rane:
―Netila dika ugadilu inda; laa netila dalu ralu: “Begadi neti inda.”
15Ttaka Jesús‑ni nna bekabie, ree:
―Begwelhaba aka aní nnanna, kumu aní chi ga'anani Tata Do Yebáha uinri'i.
Aníha uka nna uxielhaba Juan‑ni begadina Jesús‑ni inda. 16Iki de chi udie indaha nna beria ttebe lhe'e nuha. Looraha nna biyali tteba yebáha nna bilánie Espíritu ge Tata Do Yebáha ugwadie ttiba ttu becha ata dueha. 17Nianna biyien tsi'i ttu benne yebáha, unnebie ree:
―Benne‑ni nuní anke Xi'inia rakati gebie. Benne‑ni runie nu ru'u lasia.
လက္ရွိေရြးခ်ယ္ထားမွု
San Mateo 3: zae
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2014, Wycliffe Bible Translators, Inc. All rights reserved.