Luka 20
20
Lihɔjɔ liNganga
1Yesu adaka a tempelo bokina busa; akojaka bato na atɔndɔkɔ Mwako Mopele. Basuku banganga, na basɔni, na basuku bangando, badoa ai yo 2na babala na nde bo, Wɛ okɔkɔ ngando jiji na kpaci enda? Opa wɛ kpaci emina nda? tɔndɔ so. 3Iyo abasɔmbeja bo, Mbi nadi bohɔjɔ no lihɔjɔ pongono. 4Batisimo eYoane ehula Diko isa ai bato? tɔndɔni mbi. 5Ibo babalana a tei ebu a mojɔ momina, na babala bo, Bokabala bo ehula Diko, yo adi bohɔjɔ so bo, Oimojimani mojɔ moye? 6Na bokabala bo ehula ai bato, bato basusu badi bo’la so matai, mojɔ bo bajimaka bo Yoane adaka motɔndɔi. 7Oko boa basɔmbeja bo bajebiti esika ehula batisimo eYoane. 8Na Yesu abala na bu bo, Na mbi pongono, nitatɔndɔ no yona opani kpaci ebokɔ na ngando ji.
Mondɛ Mogbie na Basali Babe
9Yesu abala na bato mondɛ mu. Okina momi ana gbie. Aekina a mɔmɔ mabasali, na akɛ a likota litongo a boyeyoa. 10Yana akpeta mbuma, aloma mobuli ai basali bo bamopɛ libondo limbuma jigbie. Basali ko batua mobuli, na bamoyaneja boa ngasa. 11Aloma okina mobuli otongo. Bamotua, bamosamboja na bamoyaneja koko boa ngasa. 12Aloma koko mobuli obasato. Babeneja mobuli omina, na bamodumba a sokolu. 13Moswa’gbie abala bo, Mbi nâkɔ boni? Nâloma mwana’mbi ongɛnjɔ; isa badi bomosuma. 14Basali ko, yana anɛ bo mwana, babalana bo, Sangoli yona! Kɔni bomowoe, nongo bosangoe so bɛnɛ. 15Oko boa, bamodumba a sokolu egbie na bamowa oko bowa. Moswa’gbie adi bokɔ bo ai bato bamina? 16Adi bodoa, âwa basali bamina, na âpa gbie ai batongo. Aka bo ekenge emina, babala bo, Yɛ bobala boa! 17Yesu ko abanja, abala na bu bo, Oko boa, cina eMosɔnɔ mu edi bo?
Litai lilona bayoi
Lidi edɛye litai limogbukusu lindako.
18Moto akakwa a diko dilitai limina, âbukeana. Litai limina ko likakwa a diko dimoto, limopenjepenje.
Lihɔjɔ a Mojɔ Motako
19Basɔni na basuku banganga baduka njea bo bamopee a ehole emina, mojɔ bo bacingea bo ama bala mondɛ momina oko a mojɔ mobu; badaka ko na bɔ a mojɔ mobato bangando. 20Oko boa bamosea, na baloma bato kɛngi ai yo. Bato bamina bakosea bo badi bato basoti, bo balokobane mijɔ minde na njingo bo bamotembee, na bamopɛ a momɔ magonverneur a bomosambeja. 21Oko boa, bahɔjɔ Yesu bo, Mokoja, iso bojebaka bo mijɔ mibalaka wɛ na mikojaka wɛ midi oko mipele. Bato basusu badi amɛci a miso mawɛ, na okojaka njea eNjambe na soti mɛnɛ. 22Ebɔngi bo so bopute tako ai Kaisala, isa ebɔngiti? 23Iyo ko anɛ poloso ebu. Abala na bu bo, 24Anejani Banka. Edi na elimo enda na kombe enda? Ibo bɛ bo, oko eKaisala. 25Oko boa abala na bu bo, Kabani ai Kaisala libondo liKaisala, libondo liNjambe ko, oko ai Njambe. 26Ibo bakamoa bou a mojɔ moekenge ebala Yesu, na badaka oko bogo. Oko boa baihɔnɔ bomodumba a boso bobato a mojɔ mongando jibala yo.
Lihɔjɔ liBaSadoki
27BaSadoki bajimaka bo bato batangɔ nongo a bogwa. Oko boa, bakina babu badoa na lihɔjɔ ai Yesu. 28Babala bo, Mokoja, Mose asɔnea so mobeko bo mwanange’moto akagwa, na akakina mwali ngasa, pɛpɛ bana, yo adi bosɔ mwali omina bo abote na nde bana ai mwananango. 29Badaka boa bananange jibato sambo. Yona mosuku asɔ mwali, na agwa pɛ bobota nongo mwana. 30Mbakeli onde asɔ mwali omina, 31yona obasato koko, na basusu sambo koko boa, na bagwa pɛ bokina mongo mwana. 32Mwali yo mɛnɛ agwa ngɔngɔ. 33Oko boa, bakangɔ a bogwa, yo adabi mwali onda? Mojɔ bo adaka mwali obu basusu sambo. 34Yesu abala na bu bo, Bana bangondo ye basɔkɔ bali, na basɔnɔkɔ bali. 35Bato ko baya babɔngi a bokwea a ngondo yena oho, na a bongɔ a bogwa, batasɔkɔ na batasɔnɔkɔ bali. 36Ibo bataya gwa, mojɔ bo badi o babwɛnji baDiko; badi bana baNjambe, mojɔ bo badi bana babongɔ a bogwa. 37Mose yo mɛnɛ ajebeja bo bagwake badi bongɔ, a esika esɔnɔ yo mojɔ molipumba limole. Iyo asemba Kumu bo, Njambe oAbala-yama, Njambe oIsaka, Njambe oYakobo. 38Njambe ko aditi Njambe obagwake. Adi oko Njambe obato baya badi mɔ; na bato basusu badi mɔ a miso mande. 39Bakina basɔni basɔmbeja bo, Mokoja, olongi. 40Oko boa badaka na bɔ a bomohɔjɔ koko lihɔjɔ.
Lihɔjɔ liYesu
41Yesu abala na bu bo, Bato babalaka bo Masiya adi Mwana ’Dawidi mojɔ moye? 42Dawidi yo mɛnɛ abalaka a mokanda moNjambe bo,
Kumu abali na Kumu ombi bo,
Da a ebɔ embi ebami,
43Oko a ehole êdumba mbi soki jiwɛ a cina jibibota biwɛ. 44Isa Dawidi abeaka Masiya Kumu onde, abwani boda mwana’nde na ye?
45Yesu abala na bacingami bande a boso bobato basusu bo, 46Toma nganjamani na basɔni! Posa ebu edi oko a bongɛ na bisenja biyaibiyai, na bo bato bababɛje njɛbɛ a jando. Bapalaka bidie biboso a sinagoge, na bisika biekumu a mabonje. 47Bapunjaka ndako jibali-babogwa, na bangaka bingeeli biyai oko a mojɔ mobokosea pɛ. Bato bamina bâsɔ mokindo monɛnɛ soti.
လက္ရွိေရြးခ်ယ္ထားမွု
Luka 20: NTNG61
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Alliance Biblique de la R. D. Congo