پێدایش 13
13
لوت و اِبرامئے جِتایی
1اِبراما هرچے که هست‌اَت، زرتنتی و گۆن وتی لۆگیا چه مِسرا بُرزاد راه گِپت و نِگێبا شت. لوت هم گۆن آییا گۆن اَت. 2اِبرام، مال و دَلوَت و تلاه و نُگرها باز هستۆمند اَت. 3آ، چه نِگێبا لَڈّان و رئوان تان بئیت‌اێلا رَسِت، تان بئیت‌اێل و ائیائے شهرانی نیاما، هما جاگها که پێسرا وتی گِدانی مِکّ کرتگ‌اَت، 4هما جاگها که پێسرا کُربانجاهے اَڈّی کرتگ‌اَت. اۆدا اِبراما هُداوندئے نام تئوار کرت.
5لوت هم که اِبرامئے همسپر اَت، آییا پَس و دَلوَت و گِدان هست‌اَت. 6بله جاگه په لوت و اِبرامئے یکجاه نِندَگا کَمّ اَت، چێا که مال و دَلوَتِش باز اَت. پمێشکا هۆر نِشتِشَ نکرت. 7اِبرام و لوتئے شپانک اَڑِتنت. آ زمانگا کَنهانی و پِریزّی هم اے سرڈگارا جَهمنند اَتنت. 8گڑا اِبراما گۆن لوتا گوَشت: ”ما برات اێن. منی و تئیی نیاما، یا منی و تئیی شپانکانی نیاما اَڑ و کُڑے مبیت. 9سجّهێن مُلک تئیی دێما اِنت. چه من جِتا بئے. اگن تئو چپّێن نێمگا رئوئے، من راستێنا رئوان و اگن تئو راستێن نێمگا رئوئے، من چپّێنا رئوان.“
10لوتا چمّ چست کرتنت، دیستی که اُردُنئے سجّهێن دشت، تان سۆهرا سێراپ اِنت، هُداوندئے باگئے ڈئولا، مِسرئے سرڈگارئے ڈئولا. اے چه آ وهدا پێسر اَت که هُداوندا سُدوم و گُمورَهئے شهر گار و بێگواه کرتنت. 11گڑا لوتا اُردُنئے سجّهێن دشت په وت گچێن کرت و دێم په رۆدراتکا راه گِپت و دوێن مرد چه یکدومیا جِتا بوتنت. 12اِبرام کَنهانئے سرڈگارا نِشت و لوت هما شهران جَهمنند بوت که دشتا اَتنت. لوتا وتی گِدان زُرت و سُدومئے نزّیکّا مِکّ کرتنت. 13سُدومئے مردم بَدکار و هُداوندئے دێما باز گُنهکار اَتنت.
اِبرام هِبرونا جَهمنندَ بیت
14لوت که چه اِبراما جِتا بوت، هُداوندا گۆن اِبراما گوَشت: ”چه وتی همے جاگها، چمّان چست کن و شمال، جنوب، رۆدراتک و رۆنندئے نێمگا بچار، 15اے سجّهێن مُلکا که تئو گِندگا ائے، چه منی نێمگا اے تان اَبد تئیی و تئیی نَسل و پَدرێچئیگ اِنت. 16تئیی نَسل و پَدرێچا زمینئے دنزانی پئیما بازَ کنان، اگن کسے دنز و گُباران هساب کرتَ کنت، گڑا تئیی نَسل و پَدرێچا هم هساب کرتَ کنت. 17پاد آ، اے مُلکئے دْراجی و پْراهیا تَرّ و گرد بکن، که اِشیا من ترا دئیان.“ 18گڑا اِبراما وتی گِدان چِست کرتنت و هِبرونا شت و مَمرِهئے مزنێن درچکانی نزّیکّا جَهمنند بوت. اۆدا په هُداوندا کُربانجاهے اَڈّی کرت.
လက္ရွိေရြးခ်ယ္ထားမွု
پێدایش 13: HPKB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2016-22 Wycliffe Bible Translators, Inc.