Yohani 14
14
U Yesu zila iyakubukila kwa Tata
1U Yesu akababuzya abamanyili bache akati, “Mutakapasyanje mumoyo ghinyu. Mumusubilaye u Chala sona munsubilaye nane. 2Munyumba iya Tata wane muli ivipinda ivyinji ivyakwikalamo, nanti vitakabangamo ngali imbabuzizye.#14.2 Munyumba…imbabuzizye: Pamo Munyumba iya Tata wane muli ivipinda ivyinji ivyakwikalamo, nanti mute momumo, nkimba ngali imbabuzizye ukuti nkubuka pakubayanizya ubuzilo? Pakuti nkubuka pakubayanizya ubuzilo. 3Sona bo nabuka pakubayanizya ubuzilo, nkwiza sona pakubasenda, umwakuti kuko indiko, ko kuko namwe bulo mubanje. 4Kuko nkubuka muyimenye kale izila yache.”
5U Tomasi akati, “Mwene, tutamenyeko kuko ukubuka, po tungayimanya bulibuli izila yache?” 6U Yesu akamula akati, “Ane ne Zila, ne Bwanaloli, sona ne Bumi. Nayumo umuntu yuyo akubuka kwa Tata ukusita ukwendela mumwane.” 7U Yesu akababuzya akati, “Pakuti ilelo mwamanya ane, mukwiza pakumumanya#14.7 mukwiza pakumumanya: Amasimbo ghamo aghakale ghasimbite ukuti Nanti mwamenye…ngali mwamunye. wepe nu Tata wane, ukwandila pakabalilo aka mumumenye, sona mwamwennya.”
8U Filipu akati, “Mwene, utulanjizye Utata, cho chicho chene tukulonda.”
9U Yesu akamula akati, “Nikala namwe akabalilo akatali, Filipu, nkimba nilelo uchili utamenye? Umuntu wesi yuyo anyennya, amwennya nu Tata wepe. Po choni chicho ukuti, ‘Utulanjizye Utata?’ 10Filipu, nkimba utakusubila ukuti ane indi mwa Tata, wepe nu Tata ali mumwane? Amazyu ghagho nababuzya ghate ghane na ghane, loli gha Tata yuyo akwikala mumwane, sona akubombela mumwane imbombo zyache. 11Munsubilaye bo nkunena ukuti ane indi mwa Tata, wepe nu Tata ali mumwane. Nanti mutakusubila zinizi, musubilaye bulo pachifukwa icha mbombo zizyo nkubomba. 12Naloli nkubabuzya ukuti umuntu wesi yuyo akunsubila, akwiza pakubomba imbombo zizyo nkubomba. Eee, akwiza pakubomba ivintu ivikulu ukuchilapo ivi pachifukwa ichakuti nkubuka kwa Tata. 13Chosi chicho mukulabila mwitabwa lyane cho chicho nkwiza pakuchibomba, umwakuti Utata achindikiwanje ukwendela mu Mwana. 14Chosi chicho mukulabila mwitabwa lyane cho chicho nkwiza pakuchibomba.”
Ilayizyo ilya Muzimu Umuzelu
15“Nanti munganite, mukwiza pakukonka amalamulo ghane. 16Nkwiza pakumulaba Utata, po akwiza pakubapa Umwavwilizi uyunji, yuyo akwiza pakwikala namwe bwila na bwila. 17Uyu we Muzimu Umuzelu yuyo akubavumbulila ubwanaloli ubwa Chala. Ichisu ichapasi chitangamupokela pakuti chitangamwennya pamo ukumumanya. Loli amwe mumumenye pakuti akwikala namwe,#14.17 akwikala namwe: Pamo akwiza pakwikala namwe. sona ali mumwinyu.
18“Ntakwiza pakubaleka mwebene ngati mwe bapina, nkwiza sona kukwinyu. 19Kwasyala akabalilo akanandi bulo ichisu ichapasi chitakwiza pakunyennya nalumo, loli amwe mukwiza pakunyennya pakuti ane ne mumi, namwe mukwiza pakuba mwe bumi. 20Bo isiku lila lyafika, mukwiza pakumanya ukuti ane indi mwa Tata, sona ukuti amwe muli mumwane, ukuyana namumo ane indi mumwinyu.
21“Umuntu wesi yuyo akughitika amalamulo ghane nukughakonka, weyuyo anganite. Utata wane akwiza pakumughana wesi yuyo anganite. Nane bulo nkwiza pakumughana nukwilanjizya nemwene kukwache.”
22U Yudasi uwamwabo (u Yudasi Sikaliyoti awe) akamulalusya akati, “Mwene, zingaba bulibuli ukuti wize wilanjizye wemwene kukwitu, loli kuchisu ichapasi awe?”
23U Yesu akamwamula akati, “Umuntu wesi yuyo anganite akwiza pakwivwila ubumanyisi bwane. Utata wane akwiza pakumughana, sona Utata wane poka nane tukwiza kukwache nukwikala nawe. 24Umuntu wesi yuyo atanganite atakwivwila ubumanyisi bwane. Sona ubumanyisi bubo mwivwa bute bwane nu bwane, loli bukufuma kwa Tata, yuyo akantuma.
25“Nababuzizya zila zinizi bo inchili indinamwe. 26Loli Umwavwilizi, u Muzimu Umuzelu, yuyo Utata akwiza pakubatumila mwitabwa lyane, akwiza pakubamanyisya nukubakumbusya vyosi vivyo nababuzya.
27“Nkubalekela umutende. Nkubapa umutende wane. Intakubapa ukuyana namumo ichisu ichapasi chikupelela umutende. Mutakapasyanje mumoyo ghinyu, sona mutakanyilaye. 28Mukanyivwa nkunena namwe nkuti, ‘Nkubuka, loli nkwiza sona kukwinyu.’ Nanti mukanganagha, ngali mukuhoboka ukuti nkubuka kwa Tata pakuti wapamwanya nkani ukunchila. 29Ilelo nababuzizya zila zinizi bo zichili pakuboneka, umwakuti bo zyaboneka mukwiza pakusubila. 30Ntakwiza pakunena namwe akabalilo akatali awe pakuti u Satana, umulaghili uwa chisu ichapasi akwiza. Ate na maka papane awe, 31loli abantu aba muchisu ichapasi bamanyaghe ukuti ane imughanite u Tata. Ichi cho chifukwa nkubomba chosi chicho u Tata akundamula.
“Twende, twepepo pano.”
လက္ရွိေရြးခ်ယ္ထားမွု
Yohani 14: LMBNT2016
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Ulufingo Ulupya အေၾကာင္းကို ပို၍ သင္ယူပါ။