'Lu 19
19
:Zakeor'
1:Yeh :Yusu' 'si-a 'do :Jehliko'o-gwlor dih, 'de or yi-a 'o :dhie' :chehn 'da, 2:yee' bhaan-nyor-kpalu :due', an 'da-dih-a :Zakeor', :or no-a 'taa-deh:⧾ :za-nyor⧾-a' nyor :klaba', :or 'ti-a 'o :gwlor :dao' 'di, 3or-a' 'jeh :dao', or-: 'bhorn or 'ye nyor :Yusu' 'dhu-eh:-' yubo:. Jorwor: :ka or 'koan'-a ya, :yee' or se or-a' 'ye-a' 'beh-dih:, deh no-eh, nyor⧾ :on bhian-a :Yusu', on :dhie: 'i. 4:Yeh or se-a ka 'ye, :yee' or kpa ple-a', or mu :Yusu' ybei', 'de or 'ya 'de tu an 'da-dih-a 'sekamor ya, or 'ye-or 'ye. Deh no-eh, :gwie: :dao', eh-: :Yusu'-a ya 'de. 5:Yeh :Yusu' nyni-a 'o :dha :Zakeor' :ne-a, :yee' or pobo: 'de or bo yai', or 'dae:, :Zakeor', 'dhle :kana :naa. 'De :on 'bli 'gbu, 'do :wor 'on :korn 'on 'ye :ko-dih: 'zean' :gbor :gbor.
6:Yeh or 'da :ao', :yee' :Zakeor' 'dhle 'do :dha :ne-a :due', 'de or kpa-or 'de or 'bli 'gbu, 'de :porluh-a' dih 'pehn ka 'di. 7:Yeh nyor⧾-a' klehkpeh 'ye-a :Yusu', 'de or :ko-dih:-a 'de :Zakeor' 'bli 'gbu, :yee' an wlu-dih worn dih, on 'dae:, Or mu 'de deh⧾-zon:⧾ :no-nyor 'bli 'gbu 'di :ko-dih: 'da.
8:Yeh :Zakeor' 'i :ne-a 'de 'gbu 'di, :yee' :Zakeor' :sorn-' 'weh, 'de or :nyna dih. :Yeh or :nyna-a dih, :yee' or :wlu-' 'de :Gwlor :baa' bo, or 'dae:, :Gbee'e:, :Gwlor :baa'. 'An mu 'an-a: :kororn-deh⧾ :gwluhuh' 'beh-dih:, 'on 'ye en-' 'for nyor⧾ :on se-a deh-a' :za-da 'ble 'nyi. :Yee' deh⧾ 'on 'yli-a 'o nyor⧾ ken, 'an mu en-' kpor⧾ :nyieh on de 'nyi-:.
9:Yeh or 'da :ao', :yee' :Yusu' :wlu-', or 'dae:, 'Puh-a' pa 'noror 'gbu :daa 'di 'weh 'zean'. Deh no-eh, 'yu :daa, or no 'Eble'hehn 'di-a' 'yu :ke. 10'Yu an 'da-dih-a Nyor-kpalu-a' 'yu yi-: 'de, or 'ye nyor⧾ :on 'ma-a 'kwla⧾-' dih 'bhorn, 'de or 'ye-uh 'puh-dih:.
'Wlii-a' 'dlan
(Mt 25.14-30)
11:Yeh nyor⧾ :dao', on 'si-a 'o deh⧾ :Yusu'-a za-a-' :dou'⧾ bo :to 'da, :yee' 'do :wor or :yi-dih:, 'de or po 'dlan. Deh :korn-a dhih, or po-a 'dlan :dao', eh-: 'dhu, or 'koan'-dih: :Julu'slehn-: dih, :mor on :taa 'ye :dee', :yee' on 'da Nyorsoa-a mu nyor⧾ wlu 'ken :korn 'do :dha :ne-a :due'. 12Eh-: no-eh, 'de or po 'dlan :daa, or 'dae:, :Yee' 'nyne :korn-nyor :due' :oo', or-: mu 'duhba-', :mor or yi de, or 'ye nyor⧾ kwa 'ble. 13:Yeh or yi-a mu 'da, :yee' or 'da or-a'a: 'bhoi-nynuu :bhue:, 'de or 'nyi-uh 'sebla-wlii-a' :kehehn' :due' :due', 'de or :wlu 'de on bo, or 'dae:, A 'bili: 'wlii: :daa-' dih, en 'ye ken 'kpa, 'de 'on 'ye deka yi. 14:Yeh or no :ao', :yee' or mu-'. Jorwor: or 'bli-nyor:⧾ :on :ne-a 'noror or 'kpuh 'i, on 'nyeh-or' 'weh, 'de on dbo-or nyor⧾ ken dih, on 'da, :A :se-' 'yu :daa 'bhorn, or 'ye :a kwa 'ble.
15:Yeh on 'da :ao', :yee' nyor⧾ on dbo-a wlu bo, on :se-eh' 'worn-dih:, on no-or 'keen 'weh :gbor :gbor, 'de or yi or 'bli de. :Yeh or yi-a de, :yee' or dbo or-a'a: 'bhoi-nynuu: or 'nyi-a 'wlii wlu bo 'weh, or 'ye deh on 'ye-a 'o 'wlii: :dao' ken 'ye. 16:Yeh or 'da-uh'-a, :yee' :tehn 'i nor yi-: 'de, 'de or 'da, Nyor :klaba', :an-a'a: 'sebla-wlii-a' :kehehn' :due' :on :sie-dih:-a 'on, 'on 'ye 'o en ken 'wlu :due'. 17:Yeh or 'da :ao', :yee' or-a'a: nyor :klaba' :wlu-' 'de or bo, or 'dae:, :On no deh 'jeh, :mor 'an-a: 'bhoi-yu: 'jeh :oo'. :Ka :on no-a :dhehehn-nyor 'do deh-yu-a' 'yli-eh bo 'dhu-eh, :yee' eh-: :korn dhih, 'an mu :on gwlor⧾ :bhue 'kwa :po, :on 'ye-eh wlu 'ken :korn. 18'De 'sororn' nor 'yle, or 'da, Nyor :klaba', :an-a'a: 'sebla-wlii-a' :kehehn' :due' :on :sie-dih:-a 'on, 'on 'ye 'o en ken :kehehn' :mm'. 19:Yeh or 'da :ao', :yee' or-a'a: nyor :klaba' :wlu-' 'de or bo, or 'dae:, 'An mu :on gwlor⧾ :mm' 'kwa :po, :on 'ye-eh wlu 'ken :korn.
20'De 'bhoi-yu: :noror' 'yle, or 'da, Nyor :klaba', :gbee'e:. :An-a'a: 'sebla-wlii-a' :kehehn' :due' :on :sie-dih:-a 'on, me-: :dhe dih. 'On po-ih 'de 'yli-eh-for 'di, 'de 'on dhe-ih dih 'do :dha :bhoehn' :ne-ih:-a' 'nyne-eh :tba-dih:. 21'An ple :an-a' :fano 'weh. Deh no-eh, :an-a' deh :kma 'i. :Dha :on se-a deh dih dhe, 'do :wor :an za deh. 'De mor, deh :on se-a 'dhu, eh-: :an 'kpan. 22:Yeh or 'da :ao', :yee' or-a'a: nyor :klaba' :wlu-' 'de or bo, or 'dae:, :Mor 'bhoi-yu: :daa, :or :korn-a :porluh: :nyni-a worn. Wlu :on 'wluh-a 'de :on 'worn, mo-: 'an mu :an-a' zabe 'i :chehn-dih:. :On yubo-eh' :ka 'an deh :kma-a 'i. 'De :on yubo-eh :dha 'on se-a deh dih dhe, 'do :wor 'an za deh, 'de mor deh 'on se-a 'dhu, eh-: 'an 'kpan. 23:Yee' :ka :on yubo:-a deh⧾ :daa, :eh :korn dhih 'da, 'de :on :se-' 'an-a: 'wlii 'de 'wlii dih :dhe-gbu 'zorn kpa :eh? :Yee' :mor 'on yi de, :yee' 'an mu 'an-a: 'wlii-: 'dekorn: deh :eh 'kpa-a 'o en ken-: 'ye.
24'De or :wlu 'de nyor⧾ :on :nyna-a 'o dih bo, or 'dae:, A za-or 'sebla-wlii-a' :kehehn' :due' :dao' 'kwa. :Yee' a 'nyi-ih :yor :or 'ye-a 'o 'sebla-wlii-a' 'wlu :due' ken. 25:Yeh or 'da :ao', :yee' on 'dae:, Nyor :klaba', 'yu :daa, or 'ble 'sebla-wlii-a' 'wlu :due' :weh. 26:Yeh on 'da :ao', :yee' an-a'a: nyor :klaba' :wlu-' 'de on bo, or 'dae:, 'An zela a :gwluhuh', nyor :or 'ye-a 'o deh⧾ :dhulu', or-a'a: deh⧾ :dhulu' or 'ye-a 'o, en mu ken 'kpa-:. Jorwor: nyor :or se-a 'o deh 'ye, or-a'a: deh-yu-a' 'jeh or 'ble-a, eh mu-or 'kwa :za-eh:. 27'De or 'da, A :ya 'de nyor⧾ :dao' :on 'nyeh-a 'on-', 'de :on se-a 'bhorn 'on 'ye-uh'-a kwa 'ble, a 'ye-uh 'dba dha 'on ybei'.
:Yusu' 'si :Julu'slehn dih, 'de 'beor' ka 'di
(Mt 21.1-11; Mk 11.1-11; Jn 12.12-19)
28:Yeh :Yusu' gweh-a deh :daa, eh-a' :za-a' 'i, :yee' or 'kpa :Julu'slehn: :gwie 'i :neheh'. 29:Yee' :yeh or 'koan'-dih-a :gwlor⧾ an 'da-dih-a :Behfe'yi-: 'dekorn: :Behtani'i-: dih :eh :ne-a 'o 'do 'Orle-tluh ken, :yee' or dbo or-a'a: bo :na-nyor⧾-a' nyor⧾ 'sororn' ybei', or 'dae:, 30A mu 'de :gwlor-yu: :dao' :or :ne-a 'de a ybei' 'di. :Mor a :taa 'o dih 'si, :yee' a mu 'dhornke-yu: :eh :muae-eh dih 'ye-:, :eh nyor 'see-a 'o ken 'kpa :zai'. A bhehn-dih-eh, a 'ye-eh 'de :ya. 31:Mor nyor dhele: a dih, or 'da, :Eh :korn dhih, 'de a bhehn-dih-eh :eh? :yee' a zela-or :gwluhuh', a 'dae:, :Gwlor :baa', or-: 'bhorn-eh.
32:Yee' nyor⧾ or dbo-a ybei', :yeh on mu-a, :yee' :ka or no-a eh-a' :za-a', :yee' 'ka-: eh :ne :kpeheh:. 33:Yeh an bhehn-dih-a 'dhornke-yu: :dao', :yee' nyor⧾ :on korn-eh, on dhele-uh-: dih, on 'da, :Eh :korn dhih, 'de a bhehn-dih 'dhornke-yu: :daa :eh?
34'De on zela-uh :gwluhuh', on 'dae:, :Gwlor :baa', or-: 'bhorn-eh. 35'De on kpa-eh 'de :Yusu' bo. :Yeh on kpa-eh, :yee' on slo 'o eh ken an-a'a: 'ylii dih, 'de on dhe 'o :Yusu' 'do eh ken dih. 36:Yeh or :dhe-a 'o eh ken dih, 'de or mu-a, :yee' nyor⧾-a slo an-a'a: 'ylii dih 'do :gwie 'i.
37:Yeh or 'koan'-dih:-a 'o :dha :gwie 'dhle-dih:-a 'Orle-tluh dih, 'de eh mu-a :Julu'slehn, :yee' or-a'a: bo :na-nyor:⧾ :dhulu'-a no 'mona:, 'de an po 'geh⧾, an po Nyorsoa-a' 'nyne ya, 'de deh⧾ :kolu'⧾ :dhulu' :Yusu' no-a, on 'ye-a, en-' dhih, on 'da, 38:Bhorlie' 'do 'keen bo, :or yi-a 'de, 'de :Gwlor :baa'-a' 'nyne 'di. Wlu-' dih 'worn-eh: :ne 'de Nyorsoa 'bli yai'. :Yee' dhih-a' 'i 'beh-a' 'do Nyorsoa :or :ne-a 'de yai' bo.
39:Yeh on 'da :ao', :yee' :Falasi'i-nyor⧾-a' nyor⧾ :noo', :on :ne-a 'de nyor⧾ :dhulu' :dao' 'klu-', mo-: :wlu 'de :Yusu' bo, on 'dae:, Nyor⧾ deh :torne-nyor:, po :an-a'a: bo :na-nyor⧾ 'borboa' 'i, on 'ye 'dhuan no.
40:Yeh on 'da :ao', :yee' or :wlu-' 'de on bo, or 'dae:, 'Nyi 'on zela a :gwluhuh', :mor eh 'dhu, on no 'dhuan, :yee' sobu'⧾-a mu 'geh⧾ :po 'gboror:.
:Yusu' 'vin-' :Julu'slehn-a' dhih
41:Yeh :Yusu' 'koan'-dih:-a :Julu'slehn dih, 'de or 'ye-or, :yee' or 'vin-dih-or 'dlu dih, 42or 'dae:, 'Zean'-zorn: :daa, :mor a yubo: deh nyor :korn or 'ye-a' no, 'de or 'ye-a' :porluh-a dih 'pehn-eh 'ye :dee', :yee' eh :nmor-: 'yi 'do a bo. Jorwor: :dha eh :ne-a, a se 'o yubo: :naa. 43Ti-a mu 'o :nyni, nyor⧾ :on 'nyeh-a a-uh', on 'ye 'de a :kuo 'di po, 'de on 'ye a tuh bo :pa-dih:. :Yee' a :se-' ple-a' 'beh-dih: i. 44:Mor :Julu'slehn-gwlor: :daa, an mu :on :wa, 'de on 'ye nyor⧾ :on 'ti-a 'de :an-a' gba-dih-gba 'di 'dba. Sobu' :due' :se 'o :gbaan' ken :sie: i. Deh no-eh, ti Nyorsoa yi-a a zelie: 'da, :yee' a se-eh 'i yubo:.
:Yusu' no nyor⧾ dih 'do Nyorsoa-a' 'sla ybei'
(Mt 21.12-17; Mk 11.15-19; Jn 2.13-22)
45:Yee' :Yusu' mu 'o Nyorsoa-a' 'sla ybei', 'de or 'kpa nyor⧾ :an plo-a deh⧾ 'de mor an-a' dih :no-eh ken. 46'De or :wlu 'de on bo, or 'dae:, Eh 'chle-eh:-' 'de Nyorsoa-a' 'chlee-deh 'di, or 'da, 'An-a: 'gbu :korn on 'ye :dha nyor⧾ 'ye-a' 'de 'on bo :wlu-dih-gbu no. Jorwor: a :mor no-uh 'ylii'-nyor⧾-a' 'di 'ti-gbu-'.
47:Yeh or no :ao', :yee' zorn 'o zorn, or torne nyor⧾ deh 'de Nyorsoa-a' 'sla ybei'. Jorwor: Nyorsoa-a' 'slaa: :za-nyor:⧾ :klaba'⧾-: nyor⧾ 'tele' :torne-nyor⧾-: 'dekorn: nyor⧾ :klaba'⧾ :on :ne-a 'de nyor⧾ 'nyne-: an vorn-' on 'ye-or' 'dba. 48Jorwor: an-a' 'worn, an-a' 'ye-or' ka. Deh no-eh, :gwlor-nyor⧾-a' klehkpeh, an to or-a' wlu :dou'⧾ bo, an 'bhorn deh⧾-a' klehkpeh or mu-a-' :za, on 'ye-ih en-' klehkpeh-' dih 'worn.
လက္ရွိေရြးခ်ယ္ထားမွု
'Lu 19: TCHKR
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The New Testament in Tchien Krahn published as KUO :DELE' © The Bible Society in Liberia, 1995.