Luk 3
3
Uvaʼs ipaxsat Xhun inqʼa yol tiʼ quBʼaal Jesuus, Xhun, uvaʼ nikich aqʼon kuʼ inqʼa xaol xeʼ aʼ
Tio 3.1-12; Kuxh 1.1-8; Xhun 1.19-28
1Aʼetz ixeʼt vet Xhun tiʼ ipaxsal viyolbʼal quBʼaal Tiuxh uvaʼs tel vet oʼlaval yaʼbʼ tok Tiveerio s-mam iqʼesalil tu mam tenam Rooma. Tul aʼich Poonsio Pilaato atich ok siqʼesal tuulbʼal Judeea. Atz aʼich Eroodes Antiipas atich ok siqʼesal tuulbʼal Galileea. Aʼichetz Piʼl, u titzʼin Eroodes, atich ok siqʼesal tuulbʼal Itureea, atz tuulbʼal Trakoniite. Atz aʼich Lisaanias atich ok siqʼesal tuulbʼal Aviliinia.{*}#3.1 Aʼetz Tiveerio nik tal tzitza uvaʼ bʼanon iqʼesalil tiibʼa jankʼal u txʼavaʼ uvaʼ okebʼel taʼn Rooma t-inqʼa yaʼbʼ 14 m.t.J. tetxhal topoon tu yaʼbʼ 37 m.t.J. 2Tul aʼich Anaas tuchʼ Kaifaas atich ok siqʼesal xoʼl jolt inqʼa oksan yol vatz Tiuxh xoʼl inqʼa tij imam Israeel tu tenam Jerusaleen.
Tul yolon quBʼaal Tiuxh te Xhun, vikʼaol Sakariias, tu txʼavaʼ uvaʼ yeʼl xaol jeqlel s-tuul.
3Yaʼne bʼen vet Xhun tiʼ ipaxsal viyolbʼal quBʼaal Tiuxh tuulbʼal inqʼa txʼavaʼ uvaʼ titziʼ u xaomla aʼ Jordaan. Tul aʼ nikich tal Xhun te inqʼa xaol uvaʼ bʼaxa tzij laʼich motx titzʼa tibʼ t-inqʼa ipaʼv vatz quBʼaal Tiuxh tiʼ ikuy sotzsat quBʼaal Tiuxh inqʼa ipaʼv. Yaʼne laʼich motx aqʼaxaq kuʼ xeʼ aʼ taʼn Xhun. 4Aʼetz ex elaʼpunoq u yol tiibʼa Xhun uvaʼ tzʼibʼamal ka taʼn Isaiias, u qʼexsanich tetz viyol quBʼaal Tiuxh, val u yol uvaʼ ech nik tal s-eche:
—Jatvaʼlxh inqʼa xaol
uvaʼ nik ipal tu txʼavaʼ
uvaʼ yeʼl xaol jeqlel s-tuul,
laʼ motx tabʼi val u yol
laʼ sichʼinsal el s-viʼ
uvaʼ ech laʼ tal s-eche:
«¡Jikbʼavaq etibʼ
tiʼ ikʼulux u quBʼaal
uvaʼ tuleʼ!
Tul ech ejikbʼat etibʼ
eche ijikbʼixsal invaʼq bʼey
uvaʼ koyel kuxhtuʼ
tiʼ ikʼulux tul vaʼq
mam iqʼesal.
5Tul ech laʼ ejikbʼat etibʼ
eche laʼ inojsal
invaʼq xoʼl vitz,
atz eche laʼ teleʼl iviʼ
invaʼq vuqʼkin pejoʼn,
atz invaʼq tal vitz,
tul laʼ bʼen s-txhaqʼaala.
Atz echatxh laʼ ejikbʼat
etibʼ,
eche laʼ ijikbʼal invaʼq bʼey
uvaʼ yeʼ atoʼk s-jik;
atz eche ibʼanax tutxh
invaʼq bʼey
uvaʼ vuqʼel kuxhtuʼ.
6Tan aʼ isaʼ quBʼaal Tiuxh
laʼxh tootzaqi
inqʼa xaol s-kaqaayil
kam laʼ ulbʼel ichitix
t-inqʼa ipaʼv,»
—chich u yol.#Isaiias 40.3-5
7Tul mamala xaol nikich tul tiʼ taqʼax kuʼ xeʼ aʼ taʼn Xhun. Poro at xaol uvaʼ kaʼlichaq kuxh ikʼuul tiʼ titzʼataq tibʼ t-inqʼa ipaʼv. Tul ech nikich tal Xhun te inqʼa xaol s-eche: —¡Ex inqʼa xaol, inqʼa itzʼlel ex s-txheel, tan aʼ nik etal uvaʼ toq etzʼeq etibʼ vatz u kʼaxkʼo uvaʼ toq taqʼ quBʼaal Tiuxh setiibʼa, eche itzʼeqt tibʼ kan vatz xamal! Poro yeʼl ex laʼ oleʼv ex. 8Pet aʼ ekʼutxh inqʼa bʼaʼnla bʼanoʼm. Tul ech ex ebʼan, eche viʼoq tzeʼ uvaʼ laʼ taqʼ bʼaʼnla ivatz. Tul yeʼ etitzʼa uvaʼ laʼ elaʼp ex tibʼaʼnil tiʼ kuxh uvaʼ ex tij imam Avraʼaam. Tan oq laʼ isaʼ te quBʼaal Tiuxh, tul laʼ taqʼ bʼen inqʼa sivan inqʼae s-tijaq imam Avraʼaam. Pet bʼaxa etitzʼa etibʼ t-inqʼa epaʼv vatz quBʼaal Tiuxh. Tul jikbʼavaq etibʼ.{*}#3.8 ¿Kam talax u yol tal Xhun?, tiʼ uvaʼ ech laʼ —ikʼutxht inqʼa xaol inqʼa bʼaʼnla ibʼanoʼm, eche viʼoq tzeʼ uvaʼ laʼ taqʼ bʼaʼnla ivatz, —xeʼt Xhun. Taletz Xhun u yol uvaʼe, tan tira yeʼ nikich motx titzʼa inqʼa tij imam Israeel, oq bʼaʼn inqʼa nikich motx ibʼaneʼ, atz maq kantxhaq. Tan taʼn kuxh nikich motx titzʼa uvaʼ tijaq imam Israeel, tul bʼaʼnetz kuxh vatz quBʼaal Tiuxh s-vatz. Atz taʼn kuxh nikich motx titzʼa uvaʼ, tiʼ kuxh uvaʼ maʼt tuulbʼal u tostiuxh, atz nik inima itzʼeʼsal ok inqʼa txoo vatz quBʼaal Tiuxh s-vatz, tul aʼetz uvaʼe, nikich aqʼon bʼen s-bʼaʼn vatz quBʼaal Tiuxh s-vatz. Pet jit aʼ nikich motx titzʼa ibʼant u bʼaʼnla bʼanoʼm vatz quBʼaal Tiuxh. Tan kʼuxh tootzaqich u bʼaʼn, pet yeʼ nikich motx ibʼaneʼ. Pet koq uvaʼ ul tal Xhun, tan aʼ inqʼa tij imam Israeel ul toksa Xhun s-jik. Tul aʼ inqʼa taanxelal laʼich ok s-jik vatz quBʼaal Tiuxh uvaʼ nikich tal Xhun. Tul tiʼetz vibʼen inqʼa taanxelal s-bʼaʼn vatz quBʼaal Tiuxh, tul aʼetz inqʼae, laʼ motx ikʼutxh vet tuchʼ vibʼanoʼm. Aʼetz vet vibʼaʼnla bʼanoʼm inqʼa xaol nik ikʼul quBʼaal Tiuxh, eche laʼ ikʼult vaʼq xaol ivatz viʼoq bʼaʼnla tzeʼ. Aʼetz nik ibʼan vet Xhun eela vibʼaʼnla bʼanoʼm inqʼa xaol tuchʼ vivatz viʼoq bʼaʼnla tzeʼ. ¿Kam s-tiʼil tal Xhun, tiʼ uvaʼ laʼ taqʼ bʼen quBʼaal Tiuxh inqʼa sivan s-tij imam Avraʼaam? Tan alel taʼn quBʼaal Tiuxh uvaʼ laʼ taqʼ quBʼaal Tiuxh vibʼaʼnil tiibʼa inqʼa xaol vatz txʼavaʼ s-kaqaayil kʼuxh jit tij imam Israeel. Pet eche inqʼa tij imam Israeel, tan aʼ itxaʼk laʼ ikʼutxh u bʼaʼnil vatz inqʼa xaol, inqʼa jit tij imam Israeel. Poro aʼe tan, yeʼ motx ibʼana, kʼuxh aʼxh txhejk u Kriisto xoʼl inqʼa tij imam Israeel. Pet kʼuxh ixval u Kriisto taʼn inqʼa tij imam Israeel, poro antxh ikʼutxh quBʼaal Tiuxh u bʼaʼnil xoʼl inqʼa jit tij imam Israeel. Poro jit tiʼ inqʼa tij imam Israeel ikʼutxhvat, pet tiʼ inqʼa niman tetz u Kriisto; aʼe u Jesuus. Tul tzitzi ex sotzk ikʼuul inqʼa tij imam Israeel, tan aʼ motx titzʼa uvaʼ tetxhal kuxh aʼich inqʼa tij imam Israeel laʼich ibʼanbʼe quBʼaal Tiuxh tiʼ ikʼutxhux u bʼaʼnil tiʼ ikuy sotzsal ipaʼv inqʼa xaol. Xaʼtetze tal Xhun te inqʼa tij imam Israeel uvaʼ yeʼlich laʼ utxhi laʼ motx tala uvaʼ, tiʼ uvaʼ tij imam Israeel, tul atetz kuxh vet vibʼaʼnil quBʼaal Tiuxh s-tiibʼa. Yeʼle. Pet, tiʼ uvaʼ laʼ motx kʼuqeʼv ikʼuul tiʼ quBʼaal Jesuus, tul laʼ kuyux inqʼa ipaʼv. Echetz jit, tiʼ uvaʼ tij imam Israeel, tul kʼutxhul tetz bʼaʼnil. Tul echetz talt Xhune uvaʼ laʼ utxhi tal kuxh laʼ itxhejsavat quBʼaal Tiuxh niman tetz, tan kʼuxh xoʼl tij imam Israeel, atz kʼuxh xoʼl jit tij imam Israeel. Taʼn kuxh loqʼ laʼ ikʼuqbʼa ikʼuul tiʼ quBʼaal Tiuxh tiʼ ikuy sotzsal ipaʼv, eche uvaʼ ibʼan Avraʼaam. Aʼetz talaxe u yol: ‹Ikʼaol imeʼal Avraʼaam› inqʼa ech laʼ ikʼuqbʼat ikʼuul, eche Avraʼaam, kʼuxh tij imam Israeel, atz kʼuxh jit tij imam Avraʼaam. Xaʼtetze nik tal Xhun u yol tiʼ itxhej tij imam Avraʼaam, kʼuxh kʼatz sivan, atz kʼuxh kʼatz kamxh invaʼtoʼq tiqleʼmil. Pet jit tetxhalen koqxh tij imam Israeel laʼ txhej s-niman tetz quBʼaal Tiuxh. Aʼetz u yaabʼla txumbʼale uvaʼ txhabʼamich kuxh tok tiviʼ inqʼa tij imam Israeel, tiʼ uvaʼ taʼnaq kuxh inqʼae, atich ok s-tuul taʼn quBʼaal Tiuxh nikich motx taleʼ. Tul aʼetz uvaʼe, nikich tal Xhun inuqul xoʼl inqʼa tij imam Israeel. 9Tan oq yeʼle, tul toq ikʼaxbʼisa ex quBʼaal Tiuxh tiʼ inqʼa epaʼv. Eche invaʼq u vinaq uvaʼ atoʼk kʼoxbʼal tiqʼabʼ, tul bʼanel kuxh vet tutxh tiʼ ikʼonox u tzeʼ uvaʼ yeʼ nik taqʼ bʼaʼnla ivatz, tul laʼ toksa t-xamal. Echetz uvaʼe, laʼ ulbʼel ex, —chichich Xhun.
10Yaʼne ech tal vet inqʼa xaol te Xhun s-eche: —¿Kametz laʼ qubʼana bʼa, tul yeʼ laʼ ul u kʼaxbʼichil s-qiibʼa? —xeʼtaq veteʼ.
11Tul ech tal Xhun s-eche: —Jaʼl ex, uvaʼ kaʼvaʼl etoksaʼm, tul oyavaq vaʼl te u xaol uvaʼ yeʼl tetz. Atzoq jaʼl uvaʼ at tetxhbʼubʼal, tul aqʼvaq tetz u xaol uvaʼ yeʼl tetz, —xeʼt Xhun.
12Yaʼne aqʼbʼ jolol inqʼa jaqol puaq tetz Rooma tiʼ ikuʼ xeʼ aʼ taʼn Xhun. Tul ech motx tal te Xhun s-eche: —Txhusul qetz, ¿keʼch oʼ? ¿Kametz laʼ qubʼana, tul yeʼ laʼ ul u kʼaxbʼichil s-qiibʼa? —xeʼtaqe.{*}#3.12 ¿Jaʼlichetze inqʼa jaqol puaq tetz Rooma? Aʼ jolol inqʼa tij imam Israeele uvaʼ nikich ijaq puaq te jolt inqʼa imol s-tijaq imam Israeel. Tul nikich taqʼ bʼen te inqʼa aj Rooma. Echetz s-tiʼile yeʼ nikich isaʼax taʼn inqʼa imol s-tijaq imam Israeel. Tul mam txʼiol iqʼij nikich motx bʼenk inqʼa jaqol puaq tiʼ vijaqt puaq te inqʼa imol. Tan jit taʼn koq kuxh nikich motx ijaq jankʼal u puaq uvaʼ nikich taqʼaq bʼen te Rooma, pet nikich motx taqʼ jaʼ iviʼ ijaqax u puaq te inqʼa imol. Tan nikich motx teesa ka tetz s-te. Tul ech u aqʼone uvaʼ nikich ibʼan Tio tuchʼ Sakeeo. Ech uvaʼe nik tal tu Tio 9.9-13 tuchʼ Luk 19.2-10. Atetz jolol inqʼa jaqol puaq tetz Rooma motx titzʼa tibʼ t-inqʼa ipaʼv uvaʼs nikich talt Xhun inuqul.
13Tul ech tal Xhun s-eche: —Yeʼ laʼ utxhi uvaʼ niim tel puaq laʼ etabʼi te inqʼa xaol tiʼ jankʼal uvaʼ bʼekʼel ex tiʼ tabʼileʼ, —xeʼt Xhun.
14Yaʼne aqʼbʼ jolt inqʼa sol vatz Xhun. Tul ech motx tal s-eche: —¿Keʼch oʼ? ¿Kametz laʼ qubʼana? —xeʼtaqe.
Tul ech tal Xhun s-eche: —Yeʼ laʼ exoʼvisa inqʼa xaol tiʼ imajax vaʼq kam tetz. Atz yeʼ laʼ etzʼeq tzij tiʼ itxhejsal ipaʼv invaʼq xaol. Tul kʼuqbʼavaq ekʼuul tiʼ vejaʼmil uvaʼ nik etxʼakeʼ, —xeʼt Xhun.
15Tan mamala xaol nikich txʼebʼon tul u Kriisto. Xaʼtetze ech nikich titzʼa vet inqʼa xaol t-taanima s-eche: —Kamal aʼ vet u Kriisto uvaʼe, —chichichaq tiʼ Xhun.
16Yaʼne ech tal Xhun te jankʼal inqʼa xaol s-eche: —Yeʼle. Jit aʼ ine u Kriisto. Bʼantan il jolol ex qʼaoq, nik vaqʼ kuʼ ex xeʼ aʼ. Pet ech koq u Kriisto, uvaʼ yaʼn tul s-viʼ, sibʼxh palnaʼql tiqleʼm naq sinviʼ. Tul jitoq inkʼulel uvaʼ laʼ inchiteʼl kʼaʼil ichichʼ xaʼp naq t-toq. Tan aʼ vet viTiuxhil Tiuxh laʼ taqʼ sete; atz laʼ taqʼ xamal. 17Tan ech laʼ ul ibʼan naq, eche invaʼq u xaol uvaʼ atoʼk tichubʼal triigo tiqʼabʼ, tul laʼ ikʼoni el u chʼis uvaʼ nik tel ka xoʼl u triigo.
Tan bʼaxa nik itichu u xaol vivatz u triigo tuchʼ u tichubʼal, yaʼne nik itxhabʼa vet ikolox u triigo tu tatibʼal. Pet u chʼis, tan nik toksa xamal s-tiʼ. Echetz uvaʼe, laʼ ul ibʼan naq u vinaq. Tan laʼ ijatx naq ixoʼl inqʼa jikla xaol tuchʼ inqʼa yaabʼla xaol, —xeʼt Xhun.
18Mamala teletz kuxh yol nikich tal Xhun te inqʼa xaol tiʼ toksal t-bʼey vatz quBʼaal Tiuxh. Atz nikichat ipaxsa Xhun inqʼa bʼaʼnla txhaq yol xoʼl inqʼa xaol tiʼ u tulebʼal u Kriisto.
19Yaʼne talat Xhun inuqul vipaʼv Eroodes Antiipas, tiʼ uvaʼ tan kantxhaq uvaʼ bʼanich taʼn. Tan tiqʼo Eroodes ixoq u Erodiias s-tixqel, tul atz tixqelich Piʼl Erodiias, Piʼl u titzʼinich Eroodes. Tul motxat tal Xhun inuqul jankʼal inqʼa yeʼbʼaʼn uvaʼ nikich ibʼan Eroodes.{*}#3.19 U Eroodes Antiipas uvaʼ nik tal tzitza, tan aʼe val vikʼaol qʼes Eroodes, uvaʼs atich ok s-mam iqʼesal uvaʼs talal Xhun tuchʼ u quBʼaal Jesuus, eche uvaʼ nik tal tu Tio 2.1-23. Tul antich kuxh u yaabʼla txumbʼal iqʼomalich taʼn Eroodes Antiipas, eche vitxumbʼal vibʼaal. Tan aʼ vibʼaal alon iyatzʼax el inqʼa neʼ. Tan aʼ kʼaqich taʼn uvaʼ ant Jesuus laʼich yatzʼax el. Tul bʼenetz txhan vet Eroodes Antiipas, u kʼaola s-vinaq, atz ok vet siqʼesalil, tul antetzxh vet alon iyatzʼax el Xhun, eche uvaʼ nik tal tu Tio 14.1-12 tuchʼ Luk 9.7-9. Tul antetzxh Eroodes Antiipas aqʼon kuʼ yol tinuqul tiʼ quBʼaal Jesuus. Tul chʼixvisal quBʼaal Jesuus taʼn, eche uvaʼ nik tal Luk 23.6-12. 20Echetz koqxhte te Eroodes, tul inima koq Eroodes u yol uvaʼ tal Xhun. Pet aʼl taqʼax jaʼ Xhun t-tzeʼ taʼn Eroodes. Aʼetz vaʼt u nimla paʼve uvaʼ ibʼan Eroodes tiʼ jankʼal inqʼa nikich ibʼaneʼ.
Uvaʼs taqʼax kuʼ quBʼaal Jesuus xeʼ aʼ taʼn Xhun
Tio 3.13-17; Kuxh 1.9-11
21Tuulbʼaletz uvaʼs yeʼnaqich aqʼaxoq jaʼ Xhun t-tzeʼ, tul mamala xaol nikich taqʼ kuʼ Xhun xeʼ aʼ. Tul ant Jesuus aqʼax kuʼ xeʼ aʼ taʼn Xhun. Yaʼne inatxh Jesuus quBʼaal Tiuxh, tul jaqp u amlikaʼ.{*}#3.21 ¿Kam nik elkaʼp u yol, tiʼ uvaʼ?: ‹jaqp u amlikaʼ,› nik tal tzitza. Aʼ nik tal uvaʼ quBʼaal Tiuxh laʼ yolon te inqʼa xaol tzitza vatz txʼavaʼ. Eche uvaʼs iyolon tzaan t-amlikaʼ tiʼ quBʼaal Jesuus uvaʼs taqʼax kuʼ quBʼaal Jesuus xeʼ aʼ taʼn Xhun. Echat kuxh nik tale tu Jeenesis 28.12-13; Tio 3.16; Kuxh 3.11 tuchʼ Apokaliipsis 4.1. 22Tul yekich kuʼl viTiuxhil Tiuxh tiibʼa Jesuus, uvaʼ echich vichʼij, eche invaʼq paraamuxh. Tul yolon tzaan quBʼaal Tiuxh t-amlikaʼ. Tul ech tal s-eche: —Axh inKʼaol. Kamxh in seʼe. Tul tira nik achiibʼisa vaanima, —xeʼt quBʼaal Tiuxh te Jesuus.
Aʼ u yole tiʼ inqʼa kʼuy imam quBʼaal Jesuus
Tio 1.1-17
23Kamal vinaq lavalich vet iyaʼbʼ Jesuus uvaʼs ixeʼt Jesuus tiʼ ipaxsal viyolbʼal quBʼaal Tiuxh. Tul aʼ nikich titzʼa inqʼa xaol uvaʼ tira ikʼaolichxh Xhuʼl Jesuus; Xhuʼl vikʼaol Elii; 24Elii vikʼaol Mataat; Mataat vikʼaol Levii; Levii vikʼaol Melkii; Melkii vikʼaol Jaana; Jaana vikʼaol Xhuʼl; 25Xhuʼl vikʼaol Matatiias; Matatiias vikʼaol Amoos; Amoos vikʼaol Nauum; Nauum vikʼaol Eesli; Eesli vikʼaol Naagai; 26Naagai vikʼaol Maat; Maat vikʼaol Matatiias; Matatiias vikʼaol Semeei; Semeei vikʼaol Xhuʼl; Xhuʼl vikʼaol Judaa; 27Judaa vikʼaol Joaana; Joaana vikʼaol Reesa; Reesa vikʼaol Sorovaveel; Sorovaveel vikʼaol Salatieel; Salatieel vikʼaol Neeri; 28Neeri vikʼaol Melkii; Melkii vikʼaol Aadi; Aadi vikʼaol Kosaam; Kosaam vikʼaol Elmodaam; Elmodaam vikʼaol Eer; 29Eer vikʼaol Josuee; Josuee vikʼaol Elieseer; Elieseer vikʼaol Joriim; Joriim vikʼaol Mataat; 30Mataat vikʼaol Levii; Levii vikʼaol Simeoon; Simeoon vikʼaol Judaa; Judaa vikʼaol Xhuʼl; Xhuʼl vikʼaol Jonaan; Jonaan vikʼaol Eliakiim; 31Eliakiim vikʼaol Meleea; Meleea vikʼaol Mainaan; Mainaan vikʼaol Mataata; Mataata vikʼaol Nataan; 32Nataan vikʼaol Daviid; Daviid vikʼaol Isaii; Isaii vikʼaol Oveed; Oveed vikʼaol Voos; Voos vikʼaol Salmoon; Salmoon vikʼaol Nasoon; 33Nasoon vikʼaol Aminadaav; Aminadaav vikʼaol Araam; Araam vikʼaol Esroom; Esroom vikʼaol Faares; Faares vikʼaol Judaa; 34Judaa vikʼaol Jakoov; Jakoov vikʼaol Isaak; Isaak vikʼaol Avraʼaam; Avraʼaam vikʼaol Taree; Taree vikʼaol Nakoor; 35Nakoor vikʼaol Seruug; Seruug vikʼaol Ragaau; Ragaau vikʼaol Peleeg; Peleeg vikʼaol Eveer; Eveer vikʼaol Saala; 36Saala vikʼaol Kainaan; Kainaan vikʼaol Arfaksaad; Arfaksaad vikʼaol Seem; Seem vikʼaol Noee; Noee vikʼaol Lameek; 37Lameek vikʼaol Matusaleen; Matusaleen vikʼaol Enook; Enook vikʼaol Jareed; Jareed vikʼaol Majalaleel; Majalaleel vikʼaol Kainaan; 38Kainaan vikʼaol Enoos; Enoos vikʼaol Seet; Seet vikʼaol Adaan; Adaan uvaʼ aʼxh bʼaxa iviinqixsat quBʼaal Tiuxh vatz u txʼavaʼ.
လက္ရွိေရြးခ်ယ္ထားမွု
Luk 3: ixlC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2016, Wycliffe Bible Translators, Inc. All rights reserved.