Luk 4
4
Uvaʼs tetxhbʼut Satanaas ikuʼ quBʼaal Jesuus t-paʼv
Tio 4.1-11; Kuxh 1.12-13
1Poro tiraetz atich ok viTiuxhil Tiuxh t-taanxelal Jesuus, tul qʼaʼv vet tzaan Jesuus kʼatz u xaomla aʼ Jordaan. Yaʼne iqʼol vet Jesuus taʼn viTiuxhil Tiuxh tu txʼavaʼ uvaʼ yeʼl xaol jeqlel s-tuul.{*}#4.1 ¿Kam nik elkaʼpun u yol?: —iqʼol vet quBʼaal Jesuus taʼn viTiuxhil Tiuxh, —chiche. Jit aʼ nik tale uvaʼ txhʼiqil koq bʼen quBʼaal Jesuus taʼn viTiuxhil Tiuxh. Pet aʼ nik tale uvaʼ tira nikich inatxh quBʼaal Jesuus tu taanxelal taʼn viTiuxhil Tiuxh tiʼ kame uvaʼ nikich isaʼ viBʼaal laʼ ibʼana. Niketz tal tu uʼ Xhun uvaʼ: —Nik ibʼekʼ quBʼaal Tiuxh quBʼaal Jesuus, —chiche. Tul atetz nik ex tal Xhun paqte uvaʼ: —...quBʼaal Tiuxh aqʼon te Jesuus, —chiche. Tul nikat tal Xhun uvaʼ: —...quBʼaal Tiuxh nik kʼutxhun te quBʼaal Jesuus, —chiche. Pet aʼ kuxh nikich ibʼan quBʼaal Jesuuse uvaʼ tira nikich inatxh tu taanxelal kam inqʼa nikich isaʼ viBʼaal laʼ ibʼana. 2Tuulbʼal kaʼviinqil qʼij atin Jesuus tzitzi, tul nikich tetxhbʼul ikuʼ Jesuus t-paʼv taʼn diaavlo.{*}#4.2 U yol ‹diaavlo› nik tal tzitza, tan eela kuxh tuchʼ u yol ‹Satanaas.› Tan tira yeʼl Jesuus nikich itxʼaʼon tuulbʼal u kaʼviinqil qʼij. Paletz vet u kaʼviinqil qʼij tatin Jesuus tzitzi, tul kam vet Jesuus t-vaʼy.
3Tul ech tal vet Satanaas te Jesuus s-eche: —Nik aaleʼ uvaʼ, axh, iKʼaol quBʼaal Tiuxh, kʼutxhetza bʼa, tul aqʼetz bʼen u sivan uvaʼe s-paan, —xeʼt Satanaas.
4Tul ech tal Jesuus s-eche: —Yeʼle. Tan ech val u yol tzʼibʼamal t-viyolbʼal quBʼaal Tiuxh s-eche: «Jit kuxh taʼn u paan laʼ itzʼeʼvsan inqʼa xaol. Pet aʼ laʼ itzʼeʼvsan taanxelal inqʼa xaol, inqʼa yol uvaʼ nik tal quBʼaal Tiuxh,» chich u yol, —xeʼt Jesuus.#Deuteronoomio 8.3
5Yaʼne tiqʼo Satanaas Jesuus viʼ val u vitz uvaʼ sibʼxh at jaʼ. Tul nal kuxh ikʼutxh Satanaas jankʼal inqʼa mam tenam vatz u txʼavaʼ s-kaqaayil te Jesuus. 6Tul ech tal Satanaas te Jesuus s-eche: —Toq voksa axh siqʼesalil inqʼa tenam s-kaqaayil inqʼae. Tul eetz vet jankʼal inqʼa oksabʼ tetz iqʼij. Tan ile at vet t-inqʼabʼ. Tul in laʼ tzaj sinkʼuul jaʼl laʼ vaqʼ s-te. 7Oqetz laʼ ajoqbʼa kuʼ eebʼ sinvatz, tul laʼ anatxhkʼuula in, tul eetzetz vet inqʼa tenam s-kaqaayil, —xeʼt diaavlo.
8Yaʼne ech tal Jesuus s-eche: —Yeʼle. Tan ech u yol tzʼibʼamal ka t-viyolbʼal quBʼaal Tiuxh s-eche: «Aʼ quBʼaal, vaTiuxh laʼ anatxhkʼuula. Tul taʼn kuxh uvaʼe, laʼ anima,» chich u yol. Pet ¡palen el tzitzi sinvatz, Satanaas! —xeʼt Jesuus.#Deuteronoomio 6.13
9Yaʼne iqʼol Jesuus taʼn Satanaas tiviʼ jaʼ u tostiuxh tu tenam Jerusaleen. Tul ech tal Satanaas te Jesuus s-eche: —Nik aaleʼ uvaʼ, axh, iKʼaol quBʼaal Tiuxh, kʼutxhetza bʼa, tul kʼoni bʼen eebʼ tzitza. 10Tan yeʼl axh laʼ akʼon axh. Tan ech tzʼibʼamal ka s-eche:
«Laʼ ibʼekʼ quBʼaal Tiuxh
inqʼa iaanxel,
tul laʼ itxhaq tzaan
tiʼ akoloxeʼ.
11Tul yekxh axh tiqʼabʼ.
Tul mij inbʼeeq avoq
laʼ bʼen ajsa tiʼ sivan,»
chich u yol,
—xeʼt Satanaas te Jesuus.#Saalmo 91.11-12
12Yaʼne ech tal Jesuus s-eche: —Yeʼle. Tan echatetzxh vaʼt u yol tzʼibʼamal ka t-viyolbʼal quBʼaal Tiuxh s-eche: «Yeʼ laʼ isaʼa uvaʼ, aʼ, axh laʼ bʼekʼon quBʼaal Tiuxh tiʼ ibʼanax invaʼq kam,» chich u yol, —xeʼt Jesuus te Satanaas.#Deuteronoomio 6.16; Vibʼanoʼm inqʼa Apoostol 11.17{*}#4.12 Deuteronoomio 6.16. ¿Kam nik elkaʼp u yol, tiʼ uvaʼ?: —Yeʼ laʼ isaʼa uvaʼ, aʼ axh, laʼ bʼekʼon quBʼaal Tiuxh tiʼ ibʼanax invaʼq kam, —chiche. Aʼ nik tal, tiʼ uvaʼ oq laʼxh ivatzi invaʼq xaol toksat tibʼ tuul invaʼq tzaʼlla yol, tul laʼ tabʼi txha vet lotxhbʼal te quBʼaal Tiuxh tiʼ teesal tuulbʼal vitzaʼlal. Tul yeʼletz laʼ tabʼi vet quBʼaal Tiuxh, tan juntxh qat ivatzi toksat tibʼ tuul u yol uvaʼ tzaʼl. Tul ilat u yol nik tal paqte tiʼ uvaʼ: —...yeʼ laʼ isaʼa uvaʼ, aʼ axh, laʼ bʼekʼon quBʼaal Tiuxh tiʼ ibʼanax vaʼq kam, —chiche, ile t-Vibʼanoʼm inqʼa Apoostol 11.17.
13Yaʼetz vet Satanaas tiʼ ibʼanax kam inqʼa titzʼa, tiʼ tetxhbʼul ikuʼ Jesuus t-paʼv, tul aqʼax vet ka Jesuus taʼn Satanaas. Tul yeʼxhkam nikich ibʼan vet Satanaas te Jesuus t-inbʼiil.
Uvaʼs ixeʼt quBʼaal Jesuus tiʼ ipaxsal viyolbʼal quBʼaal Tiuxh tuulbʼal Galileea
Tio 4.12-17; Kuxh 1.14-15
14Poro tira atich viyakʼil viTiuxhil Tiuxh kʼatz Jesuus tiʼ ibʼanax inqʼa kaebʼal aanima. Tul qʼaʼv vet Jesuus tuulbʼal Galileea. Tul paxin vet itziulal Jesuus tuulbʼal Galileea, atz tuulbʼal kaqaayil inqʼa tenam inqʼa atich s-naqli. 15Nikichetz itxhus Jesuus inqʼa tij imam Israeel t-inqʼa kʼulbʼal ibʼ, tul jankʼal inqʼa xaol nikich oksan iqʼij Jesuus.
Uvaʼs yeʼ ikʼulux quBʼaal Jesuus t-vitenam Nasareet
Tio 13.53-58; Kuxh 6.1-6
16Yaʼne aqʼbʼ vet Jesuus tu tenam Nasareet tal uvaʼ chʼijk Jesuus. Tuulbʼaletz val u xeem qʼij saavado, tul bʼen vet ok Jesuus tuul u kʼulbʼal tibʼ inqʼa tij imam Israeel. Tan echxh nikich ibʼan Jesuuse jun xeem qʼij saavado. Yaʼne txakeʼv vet Jesuus tiʼ isikʼlel viyolbʼal quBʼaal Tiuxh. 17Tul aʼ u uʼ aqʼax te Jesuus, uvaʼ tzʼibʼamal ka taʼn Isaiias, u qʼexsanich tetz viyolbʼal quBʼaal Tiuxh. Tul isalpu vet Jesuus u uʼ. Tul aʼ ex ileq Jesuus u yol uvaʼ ech nik tal s-eche:
18— «Il viTiuxhil Tiuxh,
at sinkʼatza.
Tan txael vet in
taʼn quBʼaal Tiuxh
tiʼ talax inqʼa bʼaʼnla txhaq
yol
xoʼl inqʼa xaol,
inqʼa meebʼaʼ.
Atz aʼ qat itxhaqvat tzaan in
quBʼaal Tiuxh
tiʼ inqʼa xaol,
inqʼa txeyel taʼn Satanaas.
Atz qat taqʼ viqleʼm
tiʼ vilonsat inqʼa tzot,
atz tiʼ ichitp inqʼa xaol,
inqʼa bʼeenoxh
nik motx ikʼaxbʼeʼ.
19Tul aʼat qat itxhaqvat
tzaan in
quBʼaal Tiuxh
tiʼ ipaxsal inuqul uvaʼ,
il u qʼij, atz u yaʼbʼ,
uy veteʼ
tiʼ ibʼant quBʼaal Tiuxh
bʼaʼnil te inqʼa xaol,»
—xeʼt isikʼlet Jesuus u uʼ.#Isaiias 61.1-2
20Yaʼne ibʼalqʼu vet Jesuus u uʼ. Tul taqʼ vet ok Jesuus te u xaol uvaʼ nikich taqʼonv tu kʼulbʼal ibʼ, tul kʼuqeʼv vet Jesuus. Atz xeʼt vet Jesuus tiʼ itxhusux inqʼa xaol. Tul itzʼtaqich kuxh vet ivatz inqʼa xaol s-kaqaayil tiʼ Jesuus.
21Yaʼne ech tal Jesuus s-eche: —Xeʼtiyetz vet in s-txheel tiʼ itzoqpisal inqʼa yol uvaʼ qat etabʼi insikʼletaʼ, —xeʼt Jesuus xoʼl inqʼa xaol.
22Tul aalatxh inqʼa xaol nikich alon vet bʼaʼnla txhaq yol tiʼ Jesuus sixeʼtebʼal. Atz kaayaqichxh vet taanima tiʼ inqʼa jikla txhaq yol uvaʼ nikich tal Jesuus. Pet atetz jolt inqʼa xaol uvaʼ ech nikich tal vet tiʼ Jesuus s-eche: —Poro naq kuxhte vikʼaol Xhuʼl, —chichichaqe.
23Yaʼne ech tal Jesuus s-eche: —Vootzaqle uvaʼ, aʼ val u yol toq etal s-ve uvaʼ ech nik tal s-eche: «Tzʼakvil, juntetz atzʼaka eebʼ,» toq etaleʼ. Atz echat toq etal s-ve s-eche: «Kamxh uvaʼ nik qabʼi itziulal abʼant inqʼa kaebʼal aanima tu tenam Kapernauum, tul bʼanatetz bʼa tzitza t-vatenam,» toq etal s-ve.
24Pet nuqxh nik val sete: Yeʼl invaʼq qʼexsanich tetz viyol quBʼaal Tiuxh nik inimal viyol uvaʼ nik taleʼ tuulbʼal vitenam. 25Eche uvaʼ ulbʼel Eliias s-naʼya, tan mamala txakay ixoq atich xoʼl inqʼa tij imam Israeel tuulbʼal uvaʼs yeʼ ikuʼ vet ul jabʼal vatz u amlikaʼ tuulbʼal oxvaʼl yaʼbʼ tuchʼ vajqil ichʼ. Tul ul val u mam vaʼy tuulbʼal jankʼal u vatz txʼavaʼ. 26Poro jitetz aʼ txhaqaxik bʼen Eliias taʼn quBʼaal Tiuxh, tiʼ ilotxhox invaʼq txakay ixoq xoʼl inqʼa tij imam Israeel. Pet aʼ txhaqaxik bʼen Eliias xeʼ val u txakay ixoq, val u aj Sareepta uvaʼ jitich tij imam Israeel uvaʼ at tuulbʼal Sidoon.
27Atz echatxh uvaʼe, ibʼan Eliseeo, u qʼexsanich tetz viyol quBʼaal Tiuxh. Tan mamala xaol nikich iqʼaj itxhiʼoʼl xoʼl inqʼa tij imam Israeel tuulbʼal uvaʼs nikich iqʼexsat Eliseeo viyol quBʼaal Tiuxh. Poro yeʼl invaʼq inqʼa tij imam Israeel ibʼan bʼaʼn. Pet taʼnxh Namaan ibʼan bʼaʼn, u aj Siiria, —xeʼt Jesuus xoʼl inqʼa xaol.
28Taʼnetzxh tabʼi vet inqʼa xaol u yol uvaʼe, inqʼa kʼulich tibʼ tu kʼulbʼal ibʼ, tul motx lakpaq vet iviʼ.{*}#4.28 ¿Kam s-tiʼil lakp iviʼ inqʼa xaol tiʼ u yol uvaʼ tal quBʼaal Jesuus? Tiʼ uvaʼ tan, aʼ tabʼi inqʼa xaol uvaʼ jit aʼ, inqʼa tij imam Israeel laʼich ilotxh Jesuus. Pet aʼ, inqʼa jit tij imam Israeel, laʼich lotxhoxi. 29Yaʼne motxaq ok tiʼ Jesuus. Tul ojqeʼlamal tel Jesuus tiʼeʼl u tenam ibʼan inqʼa xaol. Tul een ex taqʼvat inqʼa xaol Jesuus viʼ val u pejoʼn. Tan eenich u tenam viʼ val u vitz tziʼ val u qoʼtzʼ. Tul aʼ titzʼa inqʼa xaol ikʼoʼpil bʼen Jesuus tu qoʼtzʼ tiʼ ikamsal el. 30Poro pal kuxh paʼl Jesuus xoʼl inqʼa xaol. Tul bʼen vet Jesuus.
Uvaʼs itukit el quBʼaal Jesuus demoonio t-taanima val u vinaq
Kuxh 1.21-28
31Tul yekich vet kuʼ Jesuus tu tenam Kapernauum tuulbʼal Galileea. Tul xeʼt vet Jesuus tiʼ itxhusux inqʼa xaol tuulbʼal u xeem qʼij saavado. 32Tul tira kaj vet taanima inqʼa xaol tiʼ vitxhusuʼm Jesuus, tan atich tiqleʼm Jesuus tuchʼ vitxhusuneʼ.
33Atichetz okaʼp val u vinaq tuul u kʼulbʼal ibʼ uvaʼ atich ok demoonio t-taanima. Tul jankʼalxh tiʼ iqul sichʼini. 34Tul ech tal u demoonio s-eche: —¡Aa! ¡Yeʼl oʼ laʼ uulbʼe oʼ, Jesuus, aj Nasareet! Kamal aʼ nik aaleʼ uvaʼ quqʼij ul eesa, ¿abʼa? Tan vootzaqle uvaʼ, aʼ axhe, u loqʼola iTxajich quBʼaal Tiuxh; atz axh, uvaʼ een tzajnaʼql axh kʼatz quBʼaal Tiuxh, —xeʼte.
35Yaʼne imaq Jesuus iyolon u demoonio. Tul ech tal Jesuus s-te s-eche: —¡Val axhaakalil! ¡Elen el kʼatz naq u vinaqe! —xeʼt Jesuus.
Tul itʼebʼlu kuʼ u demoonio u vinaq t-txʼavaʼ xoʼl inqʼa xaol. Tul el vet el u demoonio t-taanima u vinaq. Poro yeʼxh tal invaʼq akʼonk te u vinaq uvaʼs teleʼl u demoonio.
36Tul tira kaj taanima inqʼa xaol, inqʼa kʼulich tibʼ. Tul ech nikich motx iyol vet s-vatzaq s-eche: —¿Keʼchetz talax u yol uvaʼe? Tul ¿jaʼl nik aqʼon tiqleʼm naq tiʼ toleʼv tiʼ itukil el inqʼa demoonio? Tul ¡nik motx teleʼl! —chichich vet inqʼa xaol. 37Tul nal kuxh ipaxin vet el itziulal vibʼaʼnil Jesuus tuulbʼal jankʼal inqʼa tenam tal uvaʼ atich Jesuus.
Uvaʼs ibʼant quBʼaal Jesuus bʼaʼn vijiʼ Luʼ t-val u xamal yaabʼil
Tio 8.14-15; Kuxh 1.29-31
38Eletz vet ul Jesuus tu kʼulbʼal tibʼ inqʼa tij imam Israeel, tul yekich vet Jesuus t-totzotz Simoon. Tul atichetz kuʼ qʼes u ixoq, vijiʼ Simoon, t-mam xamal yaabʼil. Tul ijaqaq bʼaʼnil te Jesuus tiʼ ibʼant qʼes bʼaʼn.
39Yaʼne ijetxh kuʼ tibʼ Jesuus kʼatz qʼes. Iletz kuxh u yol nikich tal Jesuus tiʼ teleʼl u xamal yaabʼil, tul ¡yekich yaʼ vet u xamal yaabʼil! Atz yekich lakp vet qʼes. Tul antxh vet qʼes xeʼt tiʼ ikʼuulal inqʼa xaol tzitzi.
Uvaʼs ibʼant quBʼaal Jesuus bʼaʼn mamala yaabʼ, tuchʼ itukil el inqʼa demoonio t-taanima inqʼa xaol
Tio 8.16-17; Kuxh 1.32-34
40Kuʼetz vet qʼij uvaʼs iyaʼ vet u xeem qʼij saavado, tul iqʼol vet tzaan inqʼa yaabʼ vatz Jesuus, inqʼa kamaq kuxh yaabʼilil nikich motx bʼanon. Tul taqʼ vet jaʼ Jesuus iqʼabʼ tiviʼ junun inqʼa yaabʼ. Tul yek nikich motx ibʼan bʼaʼn.{*}#4.40 ¿Kam s-tiʼil nik nalich ikuʼ qʼij, tul nikich tiqʼo tzaan inqʼa xaol inqʼa yaabʼ? Tiʼ uvaʼ tan, aʼ vet nik ikuʼ qʼij, tul nik iyaʼ u xeem qʼij saavado vatz inqʼa xaol. Tul jitetz vet paʼv laʼ ibʼan inqʼa xaol vatz u bʼekʼbʼal kʼuxh laʼich motx tiqa vet tzaan inqʼa xaol inqʼa yaabʼ vatz Jesuus. Tan mam paʼvich s-vatz, oq laʼ motx iqtzʼ tuulbʼal u xeem qʼij saavado. 41Atz nikichat ituki el Jesuus demoonio t-taanima mamala xaol. Tul oqxhich isichʼin teleʼl inqʼa demoonio t-taanima inqʼa xaol. Tul ech nikich motx tal te Jesuus s-eche: —¡Aʼ axhe, viKʼaol quBʼaal Tiuxh! —chichich inqʼa demoonio. Tan tootzaqichaqe uvaʼ, aʼich Jesuus u Kriisto. Poro nikich iyaj Jesuus inqʼa demoonio. Tul yeʼ nikich ikuy Jesuus iyoloneʼ.
Uvaʼs ex ipaxsat quBʼaal Jesuus viyolbʼal quBʼaal Tiuxh t-jolt tenam
Kuxh 1.35-39
42Saqbʼetz vet ech eqal, tul bʼen vet Jesuus t-val u txʼavaʼ uvaʼ yeʼlich xaol jeqlel s-tuul. Yaʼne txhokox vet Jesuus taʼn inqʼa xaol. Aqʼbʼetz vet inqʼa xaol tal uvaʼ atich Jesuus, tul maqax vet Jesuus taʼn. Tan aʼ nikich motx isaʼeʼ uvaʼ yeʼlich Jesuus laʼich el bʼen s-xoʼl. 43Yaʼne ech tal Jesuus xoʼl inqʼa xaol s-eche: —Poro tetxhal toq bʼenoq in t-jolt inqʼa tenam; tul bʼen inpaxsa inuqul inqʼa bʼaʼnla txhaq yol uvaʼ nik isaʼ quBʼaal Tiuxh tiʼ ibʼant iqʼesalil t-taanima inqʼa xaol. Tan aʼ uvaʼe, txhaqel tzaan in tiʼ talaxeʼ, —xeʼt Jesuus. 44Tul nikich ipaxsa Jesuus inqʼa bʼaʼnla txhaq yol t-inqʼa kʼulbʼal tibʼ inqʼa tij imam Israeel t-junun inqʼa tenam tuulbʼal Galileea.
လက္ရွိေရြးခ်ယ္ထားမွု
Luk 4: ixlC
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2016, Wycliffe Bible Translators, Inc. All rights reserved.